ރާއްޖޭގެ ކާމިޔާބީ ފޮނިކޮށްލަދިން ސެލްފީ

އާސިޔަތު މުހައްމަދު ސައީދު

ސެލްފީއެއް ނުފެންނަ އިރެއް، އޭގެ ވާހަކަ ނުދައްކާ ވަގުތެއް މިހާރު އެބަދޭ ހެއްޔެވެ؟ ދެ މީހަކު ކޮފީއެއް ބޯލަން ދިޔަޔަސް ފޯނުން އަމިއްލަ އަށް ފޮޓޯއެއް ނަގާފައި އަޕްލޯޑް ކުރަން ޖެހެ އެވެ. ސެލްފީ ނެގުމަކީ އެހާ ވެސް އާއްމު ކަމެކެވެ. އެކަމަކު ކޮންމެކޮންމެ ސެލްފީއަކީ އެންމެންގެ ޝައުގުވެރިކަން ދަމައިގަންނަ އެއްޗެއް ނޫނެވެ. ސޯޝަލް މީޑިއާގައި ދުވާލެއްގެ މައްޗަށް ދައުރުވާ އެތަކެއް ހާސް ސެލްފީތަކުގެ ތެރެއިން ޚާއްސަ ސަމާލުކަމެއް ލިބޭނީ މަދު ފޮޓޯ އަކަށެވެ. ރާއްޖޭގެ އެންމެ ވަރުގަދަ ސިޔާސީ ދެ ހަތުރުން މިރޭ ނެންގެވި ސެލްފީއަކީ އެފަދަ ފޮޓޯއެކެވެ.

ނެލްސަން މަންޑޭލާގެ ޖަނާޒާގައި އެމެރިކާގެ ރައީސް ބަރަކް އޮބާމާ ޑެންމާކްގެ އަންހެން ބޮޑުވަޒީރާ އެކު ނެންގެވި ސެލްފީ އާއި މި އަހަރުގެ އޮސްކާ އެވޯޑް ހަފްލާގައި ހޮލީވުޑްގެ އޭ-ލިސްޓް ތަރިން ނެގި ސެލްފީއާ ބެހޭގޮތުން އެންމެން ވާހަކަދައްކައި އެ ފޮޓޯ ރީޓްވީޓްކޮށް ޝެއާކޮށް ހެދި އެވެ. މުޅި ދުނިޔެ އަށް އައިސްގެން އުޅޭ ސެލްފީ ހުމުގައި، ވަކިން ބޮޑަށް ފާހަގަކުރެވިގެން ދިޔަ މިފަދަ ތާރީޚީ ހިނދުކޮޅުތަކެއްވެ އެވެ. ރާއްޖޭގައި އެފަދަ ހިނދުކޮޅެއް އައީ އަދި ކިރިޔާ އެވެ. އޭއެފްސީ ޗެލެންޖު ކަޕްގައި ދިވެހިރާއްޖެ އާއި ކިރްގިސްތާން ކުޅުނު މެޗުގައި މައުމޫން އަބްދުލްގައްޔޫމާއި މުހައްމަދު ނަޝީދު ނެންގެވި ސެލްފީއާ އެކުގަ އެވެ. 

ރައީސް މައުމޫނާއި ރައީސް ނަޝީދު މިރޭ ސެލްފީ ނަންގަވާ އިރު ރައީސް ޔާމީން (ކ) އަރިހުގައި.--ފޮޓޯ: އިމޭޖަސް.އެމްވީ

މިއީ ކިހާ އުފާވެރި ރެއެއް ހެއްޔެވެ؟ ގައުމީ ފުޓްބޯޅަ ޓީމުގެ ޝަރަފްގައި މުޅި ގަލޮޅު ދަނޑު އޮތީ ކެކިކެކި އެވެ. ވަރުގަދަ ކިރްގިސްތާނާ ދެކޮޅަށް ރާއްޖެ ދެއްކި ރީތި މޮޅު ކުޅުމާ އެކު އެތަކެއް ހާސް ސަޕޯޓަރުން ގެންދިޔައީ ތަރުހީބު ދީ، ހިތްވަރުދީ، ނަށަމުންނެވެ. އެކަމަކު މިރޭ ދިވެހިން އުފަލުން ފޮޅި ފަޚުރުވެރިވީ ރާއްޖެ ހޯދި 2-0 ގެ ކާމިޔާބީއާ މެދު އެކަންޏެއް ނޫނެވެ. ރާއްޖެ އަށް މެޗުގެ ކުރި ހޯދައިދެމުން އަލީ އަޝްފާގު (ދަގަނޑޭ) ފުލުފުލުން ދެ ލަނޑު ޖެހީތީ އެކަންޏެއް ވެސް ނޫނެވެ. މިރޭގެ މެޗުގައި ބައެއް މީހުންނަށް ދަގަނޑޭގެ އިތުރުން ވެސް ދެ ބަތަލަކު ފެނުނެވެ. ސެލްފީ ނެންގެވި ކުރީގެ ދެ ރައީސުންނެވެ   

ރައީސް މައުމޫނާއި ރައީސް ނަޝީދާއި ރައީސް ޔާމީން މިރޭ ގަލޮޅުދަނޑުގައި އެކުވެރިކަމުގެ ވަގުތުކޮޅެއްގައި.--ފޮޓޯ: އިމޭޖަސް.އެމްވީ

ދަނޑުގެ ވީވީއައިޕީ ލައުންޖުގައި ބޭބޭފުޅާއި ކޮއްކޯފުޅު، މައުމޫން އަދި ރައީސް އަބްދުﷲ ޔާމީނާ ޖެހިގެން އެ ދެ ބޭފުޅުންގެ ސިޔާސީ ވާދަވެރިޔާ ނަޝީދު މެޗު ބައްލަވަން އިންނެވުމަކީ ހިތްގައިމު މަންޒަރެކެވެ. ސިޔާސީ ދެކޮޅުވެރިކަން ކިތަންމެ ބޮޑަސް ގައުމީ ކަންކަމުގައި ލީޑަރުން އެއްބައިވަންތަކަން ދެއްކުމުގެ ނަމޫނާއެކެވެ.
ގިނަ މީހުންނަށް އެ ވަގުތުކޮޅުން ނެގޭ މާނައަކީ ފުޓްބޯޅަ އިން ރާއްޖެ އަށް ގެނެސްދޭ އެކުވެރިކަމާއި ވަތަނީ ރޫހެވެ. މެޗުގެ ޝަރަފްވެރި މެހްމާން ނަޝީދާ އެކު މައުމޫން ސެލްފީއެއް ނެންގެވުމަކީ އެ ހިތްހަމަޖެހުމަށް އުފާވެރި ހައިރާންކަމެއް ގެނެސްދިން ކަމެކެވެ. އެއް ބަޔަކު އެއީ "ސެލްފީ އޮފް ދަ ނައިޓް" ކަމަށް ބުނި އިރު "އަހަރުގެ ސެލްފީ" އަދި "ގަރުނުގެ ސެލްފީ" ގެ ލަގަބް ވެސް އެ ވަގުތުކޮޅަށް ވަނީ ލިބިފަ އެވެ.
މައުމޫނާއި ނަޝީދު މައުމޫންގެ ފޯނުން ސެލްފީ ނަންގަވާ ތަން ފެންނަ ފޮޓޯއެއް ނޫސްތަކުގައި ޖެހުމާ އެކު ސޯޝަލް މީޑިއާގައި އަލިފާންގަނޑެއް ހެން ފެތުރިގެންދިޔަ އެވެ. އެތައް ބަޔަކު އެ ފޮޓޯ ޝެއާކުރަމުން ފަޚުރުވެރިކަމާ އެކު އެ ވާހަކަ ދައްކައި ދެ ބޭފުޅުންނަށް ތައުރީފް އޮއްސަން ފެށި އެވެ. ސިޔާސީ ވާދަވެރިކަމުގެ ކުރިއަށް ގައުމީ ރޫހު ނެރުއްވި ކަމަށްޓަކައި ޝުކުރު އަދާކުރި އެވެ. ޓްވިޓާގައި އެކަކު ބުނިގޮތުގައި "މޭން އޮފް ދަ މެޗް" ހައްގުވަނީ މައުމޫނަށެވެ. ސެލްފީ ނަންގަވަން ފޯނުގެ ސްކްރީނަށް އޮބާލެއްވީތީ އެވެ.
އެންމެން ތިބީ މައުމޫން އެ ފޮޓޯ އަޕްލޯޑްކުރައްވާނެ އިރެއްގެ އިންތިޒާރުގަ އެވެ. ޓްވިޓާގައި އެ މަނިކުފާނު އަރިހުގައި އެ ގޮތަށް އެދެމުން ދިޔަ އެވެ. ލަސްނުކޮށް ސެލްފީ ދައްކަވާލަދެއްވުމަށެވެ. މެޗު ނިމުނު ފަހުން ސެލްފީ ޓްވީޓްކުރައްވަމުން މައުމޫން ވިދާޅުވީ "ގައުމީ ޓީމަށް ސަޕޯޓްކުރުމަށް އަޅުގަނޑުމެން އެންމެން މިތިބީ އެކުގައި" ކަމަށެވެ.

All of us together to support our national team! It was a joy to watch our team playing so well! pic.twitter.com/pQpTpdJINI
— Maumoon Abdul Gayoom (@maumoonagayoom) May 21, 2014

މައުމޫނާއި ނަޝީދުގެ ސެލްފީ

އަބަދުވެސް މައުމޫނަށް ނަފްރަތުކުރާ މީހުންގެ ޝުއޫރު ހުރީ ހަމަ އެ ގޮތަށެވެ. އާދައިގެ މަތިން ފާޑުކިޔުމާއި މަލާމާތްކުރުމެވެ. މައުމޫނަށް ސެލްފީ ނަންގަވަން ނޭނގޭ ކަމަށެވެ. މިއީ ދެން އެހާ ކަންތައް ބޮޑުކޮށްލަން ޖެހޭ ވަރު ކަމެއް ނޫން ކަމަށެވެ.

އެހެން ބައެއް މީހުން ގަބޫލުކުރަނީ މިއީ ހަމައެކަނި ސިޔާސީ ދަޅަދެއްކުމެއް ކަމަށެވެ. މަގްބޫލުކަން ހޯދަން ރައްޔިތުންގެ ލޮލުގައި އަޅުވާލި އަނދުނެއް ކަމަށެވެ. އެ މީހުން ބުންޏެވެ؛ މިއީ ހަމައެކަނި ހިނދުކޮޅެއްގެ ގައުމީވަންތަކަމެކެވެ. އަނެއްކާވެސް އެނބުރިދާނީ ސިޔާސީ ކޯޅުމާއި ގޮތްދޫނުކުރުމަށެވެ.

ތެދެކެވެ. މައުމޫނާއި ނަޝީދުގެ ސެލްފީއަކީ ހިނދުކޮޅެއްގެ ކަމެކެވެ. އެކަމަކު އެއީ ރާއްޖޭގެ ފުރަތަމަ ތާރީޚީ ސެލްފީ އެވެ. ފުޓްބޯޅަ މެޗުން ރާއްޖެ މިރޭ ހޯދި ކާމިޔާބީ އެ ހިނދުކޮޅުގެ ސަބަބުން އިތުރަށް ފޮނިވެގެންދިޔަ ކަން ކަށަވަރެވެ.