ކުރުވާހަކަ

ބަދަލު 

ތުތޭ

ކުރީ ދުވަހާ ގުޅޭ
 
ބައެއް މީހުން އޮރިޔާން ކުރަމުން، އަނިޔާކުރަމުން، ޕޮލިހުން ހައްޔަރުކުރަމުން ދިޔައިރު މަހުރީ ތަޅިން ކުޅުހިކިފައެވެ. މުޒާހަރާއަކަށް ނިކުން ފުރަތަމަ ދުވަހެވެ. މަށާދިމާއަށް މިނިކާވަގެއްހެން ޖެހިގަތީ ކަޅު ބިޔަ ބޮޑު އެސްއޯ ފުލުހެކެވެ. މަގޭ ގާތުގައި ހުރި ނުދަން ބޯދިގު ސޮރެއްގެ އިޝާރާތަށްކަން އެނގެއެވެ. މަހިތަށްވެސް އެރީ އެއީ އިންޓެލް ގޮލައެއް ކަމަށެވެ. ފުރަތަމަވެސް ޖަހާގަތީ މަގޭ ވަރަ އެވެ. ދެން ބޮލަށް މަހާފައިވާ ކާޅު ބޮލެވެ. ތިން ހަތަރު އެސްއޯ ފުލުހުން މަ ވަށާލުމަށްފަހު އުފުރާލިއެވެ. އަންހެންވެރިން ހަޅޭ ޖަހާގަތެވެ. އެސްއޯފުލުހުން މަގޭ "މޯޓަރު" ގައި ހިފިތަން އެމީހުންނަށް ފެނުނީ ކަން ޔަގީނެވެ. ގައިން ވަރުގޮސް ދެލޯ އާހަށް އެރިއެވެ 

.

އެސްއޯ ދެ ފުލުހުން މަ ދެކިހިލި ދަށަށް ކުރިމަތިން އަތްލާ ފުރަގަހަށް، ދަމާކޫއްތާފައި، ޕޮލިސް ސްޓޭޝަން ގެންދިއިރު، ރަޝީދާ އާއި ކުޑޭ ހުރީ ޕާޓީގެ ދިދަ ހިފައިގެން ފެންކަޅިވެފައި މަށާ ދިމާއަށް ބަލާށެވެ. އެމީހުންނަށް ހިތްވަރު ދިނުމަށް ކެތްކޮށްފައި ދުނިޔޭގެ ކެތަށް މަހިނިތުންވެލިތަން ފެނިގެން ކުރިމަތީހުރި ފުލުސްމީހާ މަގޭ އަނގަމަތީގައި ޖަހާވިހެލި އެވެ. ވަގުތުން ތިރީތުންފަތް ފެޅިއްޖެއެވެ. ރަށްވެހިމަގު ކަންމަތީ ސަރުކާރަށް ދާއީދުކުރާ އަންހެންވެރިންނާއި ފިރިހެނުން މަލާމާތުގެ ހަލޭކާއެކު ހޯގޮވަމުން ގެންދެއެވެ. 

ޕޮލިސް ސްޓޭޝަން ވެއްދުމާއެކު މަ އަތުގައި ފުރަގަހަށް ކުލިޕް އަޅުވައިފިއެވެ. އެތަނުގެ އެތެރޭގައި ކެޔޮޅާއި ، މުހައްމަދު ބޭއާއި، އައްޔަބޭ މުހައްމަދާއި، ހަލީލާއި، ކުޑޭ އާއި ރަޝީދު ފުރަގަހަށް ބިޑިއަޅުވާފައި ޕްލާސްޓިކް ގޮޑީގައި ބައިތިއްބާފައި ތިބި އިރު ބައެއް މީހުން ތިބީ ބިންމައްޗަށް އެއްލާލާފައެވެ. ގައިގާ އޮތް ގަމީހާއި އުނުގަ އޮތް މުންޑުވަނީ އިރިފައެވެ. ކުޑޭ މުންޑު ފިނދުކިބަމަތިން އޮތީ އިރިފައެވެ. ބިންމަތީގައި ތިބި މީހުންގެ ލޮލުން ވަނީ ކަރުނަ ހިލިފައެވެ. އެމީހުންގެ ތިބިގޮތް ފެނިފައި މަށަށްވެސް ފެންކަޅި ވެވުނެވެ. ޝަފީޤް ކޮބާތޯ ބަލާލީމެވެ. ރީދު ކުލައިގެ ޓީޝާޓޭއްލާފައިވާ ޝަފީޤްވެސް އިނީ ޕްލާސްޓިކް ގޮޑީގައި ފުރަގަހަށް ބިޑި އަޅާފައެވެ. އޭނާގެ މޫނުމަތިން ފެންނަނީ މާޔޫސްކަމުގެ ބަދަލުގައި ރުޅިވެރިކަމާއި ނަފުރަތެވެ. ޓީޝާޓްގެ ކަރުވަޅުވަނީ އާދަޔާ ޚިލާފަށް ބޮޑުވެފައެވެ. ޓީޝާޓްގައި ހިފާ މާރާމާރީ ހިންގާފައިވާ ކަމުގެ ނިޝާންތައް ނިއްކުރިން ފާޅުވާން ހުއްޓެވެ. 

ކުއްލިއަކަށް އިވުނީ " ދެން ނުޖަހާތި" މިހެން ވަރަށް ބާރަށް ބުނެ މީހަކަ ހަޅޭ ލަވާގަތް އަޑެވެ. މޫސަބޭ ގޯތި އިބްރާހިމްބެ އެވެ.

އޭނާގެ ލިނދު ކަށިގަނޑުގައި ފުލުހަކު އެންކަލުން ފައި ކުރުކޮށްފައި ޖެހީ އެވެ. އެއީ މަ ދަންނަ ޕޮލިހެކެވެ. ނޮޅިވަރަމް ސޮރެކެވެ. ޖެހުމާއެކު އެސޮރުގެ އެންކަލް ބޫޓް އިބްރާހިމްބޭ ދަމާގަތެވެ. ހެދިގޮތެއްވެސް ނޭނގެއެވެ. ބޫޓް އެސޮރުގެ މޫނަށް މަޅާލާފައި "ޖަހާފިއްޔާ ދަތުވާނެ ، އެކަމަކު މަށެއް ކަލޭ ގަޔަކު ނުޖަހާނަން" އިބްރާހިމް ބެ ބުންޏެވެ. ދެމީހުން ބައްދަ ބައްދާފައި އޮޅުލަނީ އެވެ. މަގާތަށް އަންނަނީ ހިންޏެވެ.

 "ފުރަގަހަކަށް ބިޑި އެއް ނޭޅެނެ" ރުޅިވެރިކަމާއެކު އިބްރާހިމް ބެ ބުންޏެވެ. 

އިބްރާހިމް ބެ އަތަކު ފުރަގަހަށް ބިޑި ނޭޅިގެން، ކުރިމައްޗަށް އަޅާފިއެވެ. ހުކުރު ހެދުމުގައި ހުރި އިބްރާހިމްބެގެ ގަމީހުގެ ގޮށްތައްވަނީ ގޮހެވެ. 

ފެންކަޅިވެފައި އިން ރަޝީދު އިނދެގެން ކިޔަނީ މަދޫކޮށްލާށެވެ. މަ ޕީޕީއެމަށް ވެސް ވަދެފާނަމެވެ. ރަޝީދުގެ ގާގެ އެތަން މިތަނުގައި ފުލުޙުންވަނީ ތަޅާފައެވެ. މުލަށްދަނޑިވަނީ މެށިފައެވެ.

ބަސްމަދު މަޑުމައިތިރި ރާޝިދުބޭ ވެސް އެތަނުގައި އިންތަން ފެނުމުން މަވަރަށް ދެރަވި އެވެ. ރާޝިދުބޭ އުފުރާލީ ޕޮލިސް ލައިންގައި އިނގިލި ކުރި ޖެހިގެންނެވެ. މީހުންގަނޑު ތެރެއިން ނަސްރު މިސްކިތަށް ވަންނަން އުޅެނިކޮށެވެ. ރާޝިދުބޭ އަކީ ބަލިމީހެއްކަން މަށަށް ވަރަށް ރަގަޅަށް އެނގެއެވެ. 

ރަށުގެ ޕޮލިސް ސްޓޭޝަނާ އެވަގުތު ހަވާޅުވެ ހުރި ، ޕޮލިސް މީހާ އައިސް ، މި އޮޕަރޭޝަންގެ ކޮމާންޑަރ ގެ އިޝާރާތަށް ރާޝިދުބޭ ދޫކޮށްލީ އެވެ. 

(ނުނިމޭ )