Dhivehi Bas

މާތްﷲގެ ދީލަތިވަންތަ ކަން

މުހައްމަދު އަބުދުއްޞަމަދު

إن الحمد لله نحمده ونستعينه ونستغفره ونعوذ بالله من شرور أنفسنا ومن سيئات أعمالنا, من يهده الله فلا مضل له ومن يضلل فلا هادي له. وأشهد أن لا إله إلاّ الله و أن محمد الرسول الله, وصلّ الله وسلّم على نبيِّنا محمّد وعلى آله وصحبه وسلّم.

ހަމަކަށަވަރުން އެންމެހާ ޙަމްދު ވަނީ الله سبحانه وتعالى އަށް . އަޅަމެން الله سبحانه وتعالى އަށް ޙަމްދު ކުރަން. އަދި އެފަރާތުގެ މަދަދާއި ފާފަ ފުއްސެވުމާއި އެދެން. އަދި އަޅަމެންގެ ނަފްސުތަކާއި، އަޅަމެންގެ  ޢަމަލުތަކުގެ ނުބައިކަމުން الله سبحانه وتعالىގެ ރައްކައުތެރިކަމަށް އެދެން.   އަދި الله سبحانه وتعالىގެ ޞަލަޥާތާއި ސަލާމް، އަޅަމެންގެ ނަބިއްޔާ މުޙައްމަދުގެފާނާއި އެކަލޭގެފާނުގެ އާލުންނާއި އަޞްޙާބުންނަށް ލައްވާށި. އާމީން.

އަރަހުށި މާތްﷲ އަޅުތަކުންނާމެދު އެކަލާނގެ ދީލަތިވަންތަކަމާއި، އޯގާވަންތަކަމުގެ ނިހާޔަތެއް ނެތް. އެކަލާނގެވަނީ ކޮންމެ ހެޔޮ އަމަލަކަށް 10 ގުނަ ޘަވާބު ދެއްވާނެކަމަށް ވަޢުދު ކުރައްވާފަ. އެކަލާނގެ ވަހީކުރައްވާފައިވެ.

"ހެޔޮކަމެއް ކޮށްފިމީހާ (ދަންނާށެވެ!) ފަހެ، އެމީހަކަށް އެފަދަ ދިހަ ހެޔޮކަމުގެ ثواب ހުށްޓެވެ. އަދި ނުބައިކަމެއް ކޮށްފިމީހާ (ދަންނާށެވެ!) ފަހެ، އެފަދަ ކަމެއްގެ ޖަޒާ މެނުވީ، އެމީހަކަށް ނުލިބޭހުށްޓެވެ. އަދި އެއުރެންނަކަށް ބޭއިންސާފެއް ނުކުރައްވާހުށްޓެވެ..  سورة الأنعام160"

ނިކަންވިސްނައިވަޑައިގަންނަވާ! މާތްﷲ އެކަލާނގެ އަޅުތަކުންނާމެދު އޯގާވަންތަކަމުގެ ހައްދެއް އެބައޮތްތޯ؟ ހެޔޮކަމެއްކުރަން ގަސްދުކޮށް އެކަމެއް ނުކުރުމުންވެސް އަޅުތަކުންގެ އަމަލުތަކުގެ ފަތުގައި ހެޔޮކަމެއް ލިޔުއްވާ!

އެކަމަކު ރަހުމަތްތެރިންނޭ! ރަޙުމާންވަންތަ ރަޙީމްވަންތަ ރަސްކަލާނގެ މިދެންނެވި ދީލަތިވަންތަކަމާއެކުވެސް މިދަންނަވާ މޭރުމުންވެސް ވަނީ ވަޙީކުރައްވާފަ.

"އަދި ކަލޭގެފާނުގެ ވެރިރަސްކަލާނގެ ބަސްފުޅު ފުރިހަމަވެފައިވެއެވެ. (އެ ބަސްފުޅަކީ) ހަމަކަށަވަރުން، ތިމަންރަސްކަލާނގެ، މީސްތަކުންނާއި، ޖިންނީންނާއި، ދެ ބާވަތުން ނަރަކަ ފުރުއްވާހުށީމެވެ. هود. (119). "

ނަރަކައަށް ވަންނަން ޖެހުމުގެ އެތައް ސަބަބެއް ވޭ. އޭގެތެރެއިން އެއްސަބަބަކީ ، ޤިޔާމަތްދުވަހުން ހިސާބު ބައްލަވާއިރު ހެޔޮއަމަލުތަކުގެ ތިލަފަތް ލުއިވުން.

ދުނިޔެއާމެދު ހޭބޯނާރައި އުޅޭމީހުންނަކަށް ، މާތްﷲ އަނދުމަކުރުމަކަށްވެސް އެކަލާނގެ ރަސްކަންފުޅަށް އަޅުކަން ކުރުމަކަށްވެސް ތަންވަޅެއް ނުލިބޭ.

އެންމެބޮޑު ބަޚީލަކީ ، އަދި މިސްކީނަކީ އަދި އެންމެ ނަސީބުދެރަ މީހަކީ ރެއާއި ދުވާލުގެ 1440 މިނެޓް ތެރެއިން މާތްﷲ ހަނދުމަކުރުމަށާއި، ތިމާގެ މައްޗަށް ފަރުޟުކުރައްވާފައިވާ ކަންކަން އަދާކުރުމަށް މަދު މިނެޓްކޮޅެއްވެސް ހޭދަ ނުކުރެވުނުމީހާ!

އަރަހުށި މާތްﷲ އަޅަމެން އެފަދަ ނަފުސެއްގެ ނުބައިކަމުން ރައްކާތެރިކުރައްވާށި!

މިޒަމާނުގެ އާއްމު އިންސާނެއްގެ ދިރިއުޅުން ތަހުލީލުކޮށްލާއިރު ، އެމީހެއްގެ އަސްލު ޙަޤީޤީ ދިރިއުޅުން އުޅެފައިވާތީ ފެންނަނީ ތިން އަހަރެއްގައި ދުވަހުގެ ތެރޭގައި. އަސްލު ޙަޤީޤީ ދިރިއުޅުމޭ އަޅުގަނޑު މިދެންނެވީ މާތްﷲ އެކަމަށްޓަކައި އެމީހަކު ހައްދަވާފައިވާ ކަމުގެ ތެރޭގައި އުޅޭއުޅުމަށް. އަރަހުށި މާތްﷲ އިންސާނުންނާއި ޖިންނިން ހައްދަވާފައިވަނީ އެކަލާނގެ ރަސްކަންފުޅަށް އަޅުކަންކުރުމަށް.

މިޒަމާނުގައި އާއްމުކޮށް މީހެއްގެ އުމުރަކީ 63 އަހަރުކަމުގައި ބަލައި، 63 އަހަރު ހޭދަކުރައްވަނީ ކޮންގޮތަކަށްތޯ އަޅުގަނޑާއެކު ބަލަމާހިނގާ!

·        21 ގަޑިއިރު ވަޒީފާގައި ( ދުވާލަކު 8 ގަޑި އިރު، އުމުރު 63 )

·        21 ގަޑިއިރު ނިދުމުގައި ( ދުވާލަކު 8 ގަޑިއިރު، އުމުރ 63 ) އެހެންވީމާ 42 އަހަރު ހޭދަ މިކުރީ އަމިއްލަ ނަފުސަށްޓަކައި ނިދުމާއި ވަޒީފާ އަދާކުރުމުގަ. ބާކީ ދެން އޮތީ 21 އަހަރު .

·        ކުޅިވަރާ މަޖަލުގައި 12 އަހަރު (އާއްމުކޮށް މީހަކު ބާލިޣުވަނީ އުމުރުން 12 އަހަރުގައި .) ބާކީ އޮތީ 9 އަހަރު

ނިކަންވިސްނާލަމާ ހިނގާ. މި ނުވައަހަރު އަޅުގަނޑުމެން ހޭދަކުރަނީ ނަމާދުކުރުމާއި ރޯދަ ހިފުމާއި އެނޫންވެސް އަޅުކަމެއްގައިތޯ؟ ނޫން. އެމުއްދަތުގެ ތެރެއިންވެސް އަޅުގަނޑުމެން ކެއިން ބުއިމާއި ، އަނބިދަރިންނާއި، ރަހުމަތްތެރިންނާއި އެކުގައްޔާއި ކުޅިވަރުގައި ވަގުތު ހޭދަކުރަން.

އަޅުގަނޑުމެން ބަރާބަރަށް ފަސްނަމާދުކުރިއަސް ، 63 އަހަރުގެ ތެރެއިން އަޅުގަނޑުމެންނަށް ނަމާދުގައި ހޭދަކުރެވެނީ ގާތްގަނޑަކަށް ދެއަހަރާއި ހަތްމަހާއި ފަނަރަ ދުވަސް. 

ކަންމިހެންހުރިއިރު ހަމައެކަނި އެކަލާނގެ ރަސްކަންފުޅަށް އަޅުކަންކުރުމަށްޓަކައި އަޅުގަނޑުމެން ހެއްދެވި އަޅުގަނޑުމެންގެ ވެރި ރަސްކަލާނގެ ރަސްކަންފުޅަށް އެރުވެނީ ކިހައިވަގުތެއްތޯ؟ ތިމާގެ އަމިއްލަ ނަފުސަށް ޚިދުމަތްކުރުމުގައި ހޭދަކުރެވެނީ ކިހައިވަގުތެއްތޯ؟

އިންސާނުން އިންތިހާ ދަރަޖައިގެ ޣަފުލަތާއެކުވެސް އަރަހުށި މާތްﷲވަނީ އޭނާގެ ކިބާގައި ނިޢުމަތުގެ އެންމެ ފުރިހަމަ ވިއުގައެއް ފަތުރުއްވާފަ. ކުދިންނޭ! އަޅުގަނޑުމެން ކޮންމެ ދުވަހަކު މާތްﷲގެ ނިޢުމަތްތަކުގެ އުފަލާއި މީރުކަން ލިބިނުގަންނަންތޯ؟ ރޭގަނޑު އަޅުގަނޑު ނިދާފައި ތިބޭއިރުވެސް އެލިބެނީ މާތްﷲގެ ވަރަށް މަތިވެރި ނިއުމަތެއްގެ އަރާމު.

މިފަދަ މަތިވެރި ނިޢުމަތް ލިބޭއިރުވެސް އަޅުގަނޑުމެން ހެއްދެވި  މަޤްޞަދާމެދު ޣާފިލް ވުމަކީ ލަދުވެތިވާންޖެހޭ ކަމަކަށް ނުވޭތޯ؟

ވަރަށް ކުދިކުދި ކަންތަކުގައިވެސް އެކަލާނގެވަނީ ހެޔޮދަރުމަޔާއި، ޘަވާބުގެ ބޮޑެތި ފަރުބަދަތައް ފަދަ އަމަލުތައް ހިމަނުންވާފަދަ. އޭގެތެރެއިން އެއްކަމެއް މިއަދު ތިޔަކުދިންނަށް ބުނެދޭނަން. މިނެޓަކު 4 ހަތިމް ކުރުމުގެ ޘަވާބު. ކީރިތި ރަސޫލާ صلّ الله وسلّم ގެ ހަދީޘް ފުޅަކުން އެނގޭގޮތުގައި قُلْ هُوَ اللَّـهُ أَحَدٌ މިސޫރަތް އެފަހަރު ކިޔެވުމަކީ ކީރިތި ޤުރުއާނުގެ ތިންބައިކުޅަ އެއްބައި ކިޔެވުމާއި އެއްވަރުގެ ޘަވާބުލިބޭކަމެއް . އެހެންކަމުން سورة الإخلاص ތިން ފަހަރު ކިޔެވުމަކީ ހަތިމެއް ކުރުމާ އެއްފަދަ ކަމެއް . އެއްމިނެޓް ތެރޭގައި ދަތިކަމެއް ނެތި 12 ފަހަރު ކިޔަވާލެވިދާނެ. އެގޮތުން ބަލާއިރު 4 ހަތިމް ކުރުމާއެއްވަރު ޘަވާބު އެއްމިނެޓް ތެރޭގައި ހޯއްދެވިދާނެ.

 

 އަރަހުށި ހުސްޠާހިރުވަން ރަސްކަލާކޮ! އަޅަމެންގެ އަމަލުގައި އިހުލާޞްތެރިވުމާއި އިބަރަސްކަލާނގެ ލޮބުވެރި ހަބީބާ محمد الرسول الله, صلّ الله وسلّم އާ ފުރިހަމައަށް ތަބާވުމުގެ ނަޞީބު އަޅަމެންނަށް ދެއްވާދޭވެ! އާމިން. ޔާރައްބަލް އާލަމީން.