A US military base in the Maldives?

ސޯފާގެ މައްސަލަ ، ގައުމީ ސަލާމަތަށް ހުރި ބޮޑު ނުރައްކަލެއް!
ތުއްތަނިކު

ސްޓޭޓަސް އޮފް ފޯސަސް އެގްރީމެންޓް" (ސޯފާ)ގެ ވާހަކަ ރާއްޖޭގެ މީޑިޔާތަކުގައި ފުރަތަމަ ފަހަރަށް ރިޕޯޓްކުރީ 24 އެޕްރީލް 2013 ވީ ބުދަދުވަހުއެވެ. ވިވާހަކަ އެއިރު ދެކެވުނީ ރާއްޖޭގައި އެމެރިކާގެ މިލިޓަރީ ބޭސްއެއް ހަދަން ނިންމާފައިވާ ކަމަށެވެ. ނަމަވެސް އެއިރު ދިވެހި ސަރުކާރުގެ އޮފިޝަލުންނާއި އެމެރިކާ ސަރުކާރުގެ އޮފިޝަލުން މިވާހަކަތައް ދޮގުކުރިއެވެ. އަދިވިދާޅުވިއެވެ. " އެއީ ދިވެހި ސިފައިންނާއި އެމެރިކާ ސިފައިން ގުޅިގެން ތަމްރީންތައް ކުރިއަށް ގެންދިއުމުގައި އަމަލުކުރަމުންދާ އުސޫލުތަކަށް ރަސްމީ ސިފައެއް ގެނައުމަށް ހަދާ އެގްރީމެންޓެއް" ކަމަށެވެ.

މިއެއްބަސްވުމުގައި އަސްކަރީބޭހެއް ހަދާ ވާހަކަ ސީދާ ކަނޑައެޅިގެން ބަޔާންކޮށްފައިނެތަސް އަސްކަރީ ބޭހެއްގެ ހުރިހާ ސިފަތައް ސޯފާ އެގްރިމެންޓުން ފެންނަކަމަށް ކަމުގެ މާހިރުން އެއްބަސްވެލައްވައެވެ.

އެހެންކަމުން، ސިޔާސީ ފަރާތްތަކާއި ދީނާއި ގައުމުގެ އިސްތިގްލާލާއި ވަޙުދަތުގެ ނަމުގައި އަޑު އުފުލާ ބައެއް ފަރާތްތަކުން މިއެގްރިމެންޓާމެދު ކަންބޮޑުވާކަން އަންނަނީ ފާޅުކުރަމުންނެވެ. ކަންބޮޑުވާ ވަކިސަބަބެއް ފާހަގައެއް ނުކުރެއެވެ.

ރާއްޖޭގެ ދެކުނުގައި އޮތް އަވަށްޓެރި ރަށެއްކަމަށްވާ ފޯޅަވައްސަކީ 1960 އަދި 1970 ގެ އަހަރުތަކުގައި އިނގިރޭސިންގެ އިސްތިޢުމާރުގެ ދަށުގައި އޮތް ރަށްތަކެކެވެ. ފަހުގެ ދިރާސާތަކުން އެނގިފައިވާ ގޮތުގައި ފޯޅަވަހީގެ ރައްށެއްކަމަށްވާ ޑިއަގޯގާސިޔާގައި އެމެރިކާގެ އަސްކަރީބޭހެއް ހަދަން ، އިނގިރޭސި ސަރުކާރުން ދީފައިވަނީ ޑިއަގޯގާސިޔާގެ ވަޒަންވެރިންގެ ނުރުހުމުގައެވެ. އެރަށުގެ އަސްލުވަޒަންވެރިން އެމީހުންގެ ވަޒަނުން ބޭރުކޮށްފައެވެ. މިހާރު ފޯޅަވަހީގެ އެތަކެއް ރައްޔިތުން ދިރިއުޅެމުން އަންނަނީ މޮރިސަސްގައެވެ. ވަޒަންގެއްލިފައިވާ ނިކަމެތިންގެ ގޮތުގައެވެ.  އިނގިރޭސި ސަރުކާރުގެ މިޢަމަލުގެ ސަބަބުން 1975 ވަނަ އަހަރުންފެށިގެން ، ފޯޅަވަހީގެ ރައްޔިތުންވަނީ މިމައްސަލަ އެކިފަހަރުމަތިން އެގައުމުގެ ކޯޓްތަކަށް ހުށަހަޅާފައެވެ. ނަމަވެސް މިއަދާހަމަޔަށްވެސް މިމައްސަލައަށް އަލިމަގެއް ނުފެނި މޮރިސަސްގައި ތިބި ފޯޅަވަހީގެ ރަށްވެހިންވަނީ އެމީހުންގެ އަޞްލުވަޒަނަށް ދެވޭގޮތް ނުވެފައެވެ.

ފޯޅަވަހީގެ އެގްރިމެންޓްގެ މުއްދަތު ހަމަވާން އުޅޭކަމުގެ ޚަބަރުތައް މީޑިޔާތަކުންއަންނަނީ ރިޕޯޓްކުރަމުންނެވެ. ރާއްޖޭގެ ސަރަހައްދަކީ އެމެރިކާގެ އަސްކަރިއްޔާއަށް ނުހަނު ބޭނުން ސަރަހައްދެކެވެ.

ސޯފާގައި އެއްބަސްވެވޭ "ފެސިލިޓީސް" އާއި "އޭރިއާ"ގެ ގޮތުގައި މާނަކޮށްފައިވަނީ، ދިވެހި ރާއްޖެ އިން، އެމެރިކާ ސިފައިންގެ ބޭނުންތަކަށް ދޫކުރާ، ދިވެހި ރާއްޖޭގެ އިމުގެ ތެރޭގައި ހިމެނޭ ސަރަހައްދުތަކާއި އެހެނިހެން ވަސީލަތްތަކެވެ. އޭގެ ތެރޭގައި އެއްގަމާއި ކަނޑުގެ ސަރަހައްދުތައް ވެސް ހިމެނެ އެވެ.

މިސާލަކަށް މިއެގްރިމެންޓްގެ މިބުނާ "އޭރިޔާ" ގެ ގޮތުގައި އިހަވަންދިޕޮޅު ސަރަހައްދު ދިވެހި ސަރުކާރުން އެމެރިކާ ސަރުކާރަށްދީ، އެމެރިކާ ސިފައިން ވަގުތީ ގޮތުން ރާއްޖޭގައި ތިބުމަށާއި އަސްކަރީ ހަރަކާތްތައް ހިންގުމަށް ހއ، ވަނގާރު ދީފިނަމަ ވާނެ ގޮތް ވިސްނާލައްވާށެވެ.

ސޯފާގައި ބުނާގޮތުން، އެމެރިކާ ސިފައިން ރާއްޖޭގައި ތިބޭ ތިބުމުގައި އެމީހުންގެ ރަސްމީ ޑިއުޓީ އަދާކުރާ އިރު، ހަތިޔާރު ގެންގުޅުމުގެ އިޚްތިޔާރު ލިބިގެންވެ އެވެ. އަދި މި އެގްރީމެންޓުން ހުއްދަކޮށްފައިވާ ތަންތަނަށް ދަތުރުފަތުރުކޮށް އުޅުމުގެ މިނިވަންކަން ވެސް ލިބިގެންވާ ކަމަށް ތިން ވަނަ މާއްދާގެ ހަތަރެއްގައިވެ އެވެ.

އެހެންކަމުން، މުޅި އިހަވަންދިއްޕޮޅުގައި ހަތިޔާރުއެޅި އެމެރިކާ ސިފައިން އުޅެން ފަށާފާނެއެވެ. އެމީހުންނަކީ ކުށަކާނުލާ އޮޅިގެން އާއްމުން ގަޔަށް ބަޑިޖަހާބައެކެވެ. ޕާކިސްތާނާއި އަފްގާނިސްތާނު މީހުން ހެދުން އަޅާގޮތަށް ހެދުން އަޅާގެން އުޅޭ މީހުން މިސަރަހައްދުގައިވެސް މަދެއްނޫނެވެ. ސުންނަތަކަށް އުޅޭ ދީނަށް ލޯބިކުރާ ޒުވާނުންވެސް މަދެއް ނޫނެވެ. ތުބުޅިލާފައި ހުންނަ މީހަކު ފެންނައިރަށް ޓެރަރިސްޓެކޭ ކިޔާ ބަޑި ޖަހާ މަރާވެސް ލާފާނެއެވެ. މިފަދަކަމެއް ހިނގާފިނަމަ އެމީހުންގެ މައްޗަށް މިރާއްޖޭގައި ދިވެހިންނަށް ކުރެވޭނެ ހަމަ އެއްވެސް ކަމެއް ނެތެވެ.

ސޯފާގެ ތިން ވަނަ މާއްދާގެ ދޭއްގައި ބުނެފައިވާ ގޮތުން، މި އެއްބަސްވުމުގައި ޝާމިލްވާ ފަރާތްތަކުގެ (އެމެރިކާ ސިފައިންނާއި ދިފާއީ ވުޒާރާގެ މުވައްޒަފުންނާއި ކޮންޓްރެކްޓެއްގެ ދަށުން މަސައްކަތްކުރާ ދިވެހިން ނޫން މީހުން) މައްޗަށް ހިނގާނީ އެމެރިކާ ޖިނާއީ އަދުލުގެ ނިޒާމެވެ. މާނައަކީ އެފަދަ މީހަކު ރާއްޖޭގައި ކިތަންމެ ބޮޑު ކުށެއްކުރި ކަމުގައި ވިޔަސް، އެ މީހަކު ހިފައި ހައްޔަރެއް ނުކުރެވޭނެ އެވެ. އަދި ރާއްޖޭގެ ތަހުގީގީ ނިޒާމުގެ ތެރެއިން ތަހުގީގު ހިންގައި ޝަރީއަތެއް ވެސް ނުކުރެވޭނެ އެވެ.

ސޯފާގެ ދަށުން 10 އަހަރު ވަންދެން އެމެރިކާ ސިފައިން ރާއްޖޭގައި ތިބެން ހުއްދަ ދިނުމަކީ، 25 އަހަރު ވަންދެން އިންޑިއާގެ ޖީއެމްއާރު ކުންފުންޏަށް ހުޅުލޭ އެއާޕޯޓް ކުއްޔަށް ދިނުމަށް ވުރެ ބޮޑަށް ރާއްޖޭގެ މިނިވަންކަމާއި ސިޔާދަތަށާއި އިސްލާމީ ވަޙުދަތަށް ބުރޫ އަރާނެ ކަމެކެވެ.

އެއިރުން އެމެރިކާ ސަރުކާރާސް ދޭ ސަރަހައްދުގައި ހިނގާނީ، އެހެންދީންތަކަށް އަޅުކަން ކުރާމަންޒަރެވެ. ފައްޅިތައް ބިނާކޮށްފައިވާ މަންޒަރެވެ. އަނބިދަރިން އަހަރެންމެންގެ ލޮލުގެ ކުރިމަތީގައި އެމީހުންގެ އިއްފަތްތެރިކަން ފޭރިގަންނަ މަންޒަރެވެ.

ރާއްޖޭގެ ގާނޫނު ނުހިނގާ ގޮތަށް އެއްވެސް ބަޔަކު ރާއްޖޭގައި އުޅުމުގެ ހުއްދަ އެއްވެސް ބަޔަކަށް ދިނުމަކީ ގައުމުދެކެ ލޯބިވާ އެއްވެސް އެއްވެސް ދިވެހި ދަރިޔަކު ގަބޫލުކުރާނެކަމެއް ނޫނެވެ.