Dhivehi Bas

އިހަވަންދޫއަށް "ސިހުރު" ޖެހިފައި ވަނީ ބޮޑަށް!

ސިޔާސީ ދެކޮޅުވެރިކަމުގެ ފިތުނާގައި ޖެހި ، ހިތްތައްކަޅުވެ، ގުޅުންތައް ކެނޑި، ފިތުނައިގެ މުސީބާތުގައި ޖެހިފައިވާ ރައްޔިތުންގެ ހިތްތައް ، ދެއަވަށުގެ ވާދަވެރިކަމުގެ ފިތުނައިގެ ތެރެއަށް ގެނބުނީ ނިމިތިޔަ ގައުމީ އަންހެނުންގެ ވޮލީ މުބާރާތުގެ ތެރޭގައެވެ. ކުޅިވަރުގެ ފޯރީގައިޖެހި އިތުރު ބައިބައިވިމެއް އުފެދުނީ އެވެ.

ވޮލީ މުބާރާތަށް ދެއަވަށުގެ ދެކުލަބު ތައްޔާރުވީ ކަށިން ހިތްވަރުނެރެގެންނެވެ. މުބާރާތައް ހަރަދުކުރުމަށް ފައިސާ ހޯދީ ކަށީގެ މަދުން ހިތްވަރުނެރެގެންނެވެ. މުބާރާތް ކާމިޔާބުކޮށް ތަށިގެންދިޔައީ ޕޮލިސް ކުލަބެއެވެ. މާދުރުންއައި އެހެންބަޔެކެވެ.

ދެހާހުގެ ކުރީކޮޅު ރަށުގައި ބޭއްވީ ޒޯން ވޮލީ މުބާރާތައްވެސް މިބީދައިން މި ދެކުލަބުން ތައްޔާރުވެ ފިތުނައިގެ ތެރެއަށް ރަށްވެއްޓުނެވެ.

ރަށުތެރޭގައި މީހުންގެ ތުންތުންމަތިން ވާހަކަ ދެކެވެއެވެ. ދެކުލަބުންވެސް މުބާރާތް ކާމިޔާބު ކުރުމަށްޓަކައި ޝައިޠާނާގެ އެހީތެރިކަން ހޯދިއެވެ. ދުނިޔޭގެ ބޮޑެތި ކުޅިވަރު މުބާރާތްތަކުގައިވެސް ޖިންނި ޝައިޠާނުންގެ މަދަދަރުވެރިކަން ހޯދާކަމަށްވެއެވެ.

ކުދިކުދި މުޖުތަމަޢުތަކުގައި މިފަދަ ޝައިޠާނީ މަދަދުވެރިކަމުގެ ނަތީޖާ ފަހުން އަންނަނީ ނަމާންކަމާއި ބިރުވެރިކަމާއެކުއެވެ. ސަބަބީ ޖިންނި ޝައިޠާނުންގެ އާލަމަކީ ވަކިތަނެކެވެ. އެތަނުން، ﷲ ގެ ރަހުމަތުން ދުރުކުރެވިފައިވާ ޝައިޠާނުންތަކަށް އަހަރެމެން ދައުވަތު ދިނުމުން އެސޮރުމެން އިންސާނީ މިކުޑަކުޑަ މުޖުތަމަޢަށް ބާރުހިންގަން މަސައްކަތްކުރާނެއެވެ.

ޖިންނި ޝައިޠާނުންގެ އެހީތެރިކަމާއި މަދަދުވެރިކަން ހޯދާ މީހުންނަކީ ސިހުރުވެރިންނެވެ.

ޢަބުދުﷲ  އަނބިމީހާއާއި ދެކުދިންނާއެކު އިހަވަންދޫއަށް ހިޖުރަކުރީ އޭނާ ކުރާ ސިހުރުހެދުމުގެ މަސައްކަތުގައި އިހަވަންދޫގައި ރަގަޅު ޑިމާންޑެއް އޮތްތަން ފެނިގެންނެވެ. މުހައްމަދުބޭ ރަށްޓެހިކަމުގައި އަބުދުﷲ އެތައްފަހަރަކު އިހަވަންދޫއަށްވަނީ އައިސް ގޮސްފައެވެ. މިއިން ކޮންމެ ދަތުރެއްގައި ފަންޑިތަ ސިހުރުގެ ކަންތައްތައް މީހުންނަށް ކޮށްދީގެން ރަގަޅު އާއްމުދަނީއެއް ލިބެއެވެ.

ސިހުރު ހާހޫރާއިގެ ކަންތައްތަކަކީ ރަށުގެ ވަރަށް ގިނަމީހުން ގަބޫލުކުރާ ކަމެކެވެ. އެންމެ ގިނައިން ރަށު މީހުން ސިހުރުހާހޫރަ ފަންޑިތަ ހަދާފައިވަނީ މީހުންގެ ހަލާކަށާއި މަސްއޮޑިފަންޑިތައެވެ. އިސްތިރި ވަރިތޮޅިވެސް ހަދާއުޅެއެވެ.

މިފަދަ ސިހުރުގެ ކަންތައްތައް އެތައް ދުވަހެއްފަހުން، ރޫހާނީވެ، ބައެއްކުދިންނަށާއި މީހުންނަށް ޖިންނި އުނދަގޫވެ މޮޔަވެއެވެ.

ސިހުރު ފަންޑިތަ ހެދި ގިނަމީހުން އެމަސައްކަތް ކުރުންވަނީ ހުއްޓާލާފައެވެ. އޮޑިދޯނިފަހަރުގައި އޮގަރުބައި މިހާރަކު ނާޅާއެވެ. ވަރަށް މަދު އޮޑިއެއް ފިޔަވައެވެ. ނަމަވެސް ސިހުރުހެދުން ކަށީގައި ހިފާފައިބައެއް މުސްކުޅިން އަދިވެސް އެކަންކުރެއެވެ. ފަންޑިތަ ތަޖުރިބާކުރުމަށްވެސް ކޮށްއުޅެއެވެ.

އަބުދުﷲ ، މޫސަބޭއާ ގުޅުން ބަދަހި ކުރީ މުހައްމަދުބޭގެ ފަރާތުން މޫސާބޭގެ މައުލޫމާތު ލިބިގެންނެވެ. ފަންޑިތަހެދުމަށް މޮޅު މީހެއްކަމަށް ބުނެގެންނެވެ. އަބުދުﷲ އަތުގައި ނެތް ސުލޫސުލްއަންވާރުފަދަ މޮޅުއެތައް ފަންޑިތަ ފޮތްތަކެއް މޫސާބޭއަތުގައި ހުއްޓެވެ. އަރަބި ބަހުންނާއި އުރުދޫ ބަހުން މިފޮތްތައް ހުރީމާ މުސާބޭއަކަށް ފޮތްތަކުގެ ބޭނުމެއް އެންމެ އެދެވޭގޮތުގައި ނުހިފެއެވެ. އަބުދުﷲއަށް ކޮންމެވެސް ވަރަކަށް އަރަބި ބަހާއި އުރުދޫބަސް އެނގޭތީވެ، އަބުދުﷲ އަށް އިހުސާސްކުރެވުނީ އޭނާގެ ހަޔާތުގައި ފަންޑިތަވެރިކަމުގެ އާބާބެއް ފެށުނުހެންނެވެ.

އަބުދުﷲގެ މިމަސައްކަތާއިއެކު އިހަވަންދޫ ނާމާންވެފައިވާކަމަށް ރަށުގެ ވަރަށްގިނަމީހުން ބުނެއެވެ. އަބުދުﷲގެ ފަންޑިތަ ސިހުރުހެދުމުގެ މަސައްކަތަށް ފާޅުގައި ދެކޮޅުހަދާ ޒުވާބެއްތިނީ އަހުމަދު ރަޝީދެވެ. އަބުދުﷲ ކުރާ މަސައްކަތުގެ މައުލޫމާތާއި ފަންނުވެރިކަން ރަޝީދަށް ކޮންމެވެސް ވަރަކަށް އެނގޭތީ އެވެ.

މިހާލަތުގައި ކޮންމެ މީހަކަށްވެސް ފަންޑިތަ ސިހުރުވެރިކަމެއް ޖެހިދާނެއެވެ. ސިހުރު ނުވަތަ ފަންޑިޔަތަ ޖެހިފައިވާ ކަމުގެ އަލާމާތްތައް ވަރަށް ގިނައެވެ.  

ސިޙުރު އަދި ޖިންނި ބަލީގެ ބައެއް ޢަލާމާތްތައް: - ނަމާދު ކުރުމާއި ޤުރުއާން ކިޔެވުމާއި ދުރުހެލިވުން، މިކަންކަން ކުރާހިތްނުވުން އަދި ކުރާއިރު އުނދަގޫވުން. ޣާފިލުވުން (މިހެންވާނަމަ ގިނަގިނައިން أَعُوذُ بِاللهِ مِنَ الشَّيْطَانِ الرَّجِيْمِ) ކިޔާށެވެ. އަދި ކޮންމެދުވަހަކު 11 ފަހަރު كَافِرُون ސޫރަތް ކިޔަވާށެވެ. މިގޮތަށް މެދުނުކަޑައި މަދުވެގެން 11 ދުވަހު ޢަމަލު ކުރާށެވެ. އިރާދަކުރެއްވިއްޔާ އަޅުކަމާ މަޝްޢޫލުވާހިތްވެ ނަމާދާއި ގާތްވާހުއްޓެވެ. - ޢާއްމުކޮށް ބޮލުގައި ރިހުން (މެންދުރުވެގެން އަންނަ ވަގުތު އަދި ބޮޑަށް އިރުއޮއްސިގެން އަންނަ ވަގުތު ވަކިން ބޮޑަށް ރިހުން) އަދި ބޮލުގައި މީހަކު ހިފާފަ ހުންންގޮތަށްވެ ބަރުޖެހުން. - ހުވަފެނުގައި ތަންތަނުން ވެއްޓޭތީފެނުން، ޢާއްމުކޮށް އުސްތަންތަނުން ވެއްޓޭތީފެނުން (އަދި ހޭލެވޭއިރު ވެއްޓެން ދާގޮތަށް ވުން.) - މީހާ މަޑުނެގިވެފައި ހުރުން (ކަންކަން ކުރާހިތްނުވުން، މަސައްކަތްކުރާހިތްނުވުން ކަންކަމުގައި އަޅައިނުގަނެ ހަރަކާތް ލަސްވުން). - ފާޚާނާގައި ގިނައިރުވުން، ފާޚާނާ ކުރާވަގުތު އަމިއްލަ ހިތާ ނުވަތަ އަމިއްލަ އަމިއްލައަށް ވާހަކަދެއްކުން. - އަންހެނެއްނަމަ ޙައިޟު ގެ މައްސަލަ އާއްމުކޮށްޖެހުން. (މާގިނައިން ވުން، ވެފަ އަވަހަށް ރަނގަޅުނުވުން) - ދެމަފިރިންގެ އެއްވެސް ޖިސްމާނީ މައްސަލައެއް ނުވަތަ ޑޮކްޓަރީ ބައްޔެއްނެތި ކިތަންމެ މަސައްކަތް ކުރިނަމަވެސް ދަރިން ނުލިބުން. - ހުވަފެންތެރޭގައި ޖިންނީން ފެނުން އެތަކެއްޗާ ތަޅާފޮޅާތީ ނުވަތަ މުޢާމަލާ ކުރާތީ ފެނުން. ބިރުވެރި ހުވަފެން ޢާއްމުކޮށް ފެނުން. ޢައުރަ ނިވާނުކޮށް ތިބޭމީހުން ގިނައިން ފެނުން، ހަރުފަ ބުޅާ ފަދަ ޖަނަވާރު ފެނުން ބިރުވެރި ސިފައިގައި ތިބޭ މީހުން ފެނުން. ތަންތަނުން ވެއްޓޭތީ ފެނުން. -ހޭލެވޭއިރު ވަރުބަލިވެ ބިރުގަނެ ހާސްވުން. ހަމަނިދި ނުނިދުން. ނިދަން އުނދަގޫވުން. ޢާއްމުކޮށް ދަންވަރަށް ނުނިދިގެން އުޅުން. - ނިދީގައި ބާރަށް ވާހަކަދެއްކުން. ބާރަށް ގުގުރިދެމުން، ނިދީގައި ރޮވުން. - ނިދީގައި ކުއްލިއަކަށް ސިއްސައިގެން ގޮސް ހޭލެވުން. - އެކަނި އިންނަ ވަގުތު ސިއްސަސިއްސައިގެން ދިޔުން. - ގިނައިން އެކަނިވެރިވުން / އެކަނި މީހުން ނޫޅޭތަންތާގައި މާގިނައިން އިންނަ ހިތްވުން. ކަމަކާ ނުލައި ފިކުރު ބޮޑުވުން، އަދި ހާސްވުން. އެކަނި ހުންނައިރުވެސް ކައިރީ މީހަކު އުޅޭހެން ހީވުން. - ޒިނޭކުރާތީ ޢާއްމުކޮށް ހުވަފެނުގައި ފެނުން އަދި މިފަދަ ހުވަފެނުންހޭލެވޭ އިރު ޝަހުވަތްތެރިވުން ނުވަތަ އެދުން ފުދިފައި އޮތުން. ނުވަތަ އެމީހަކު މިފަދަކަމެއް ކުރަން ހިތްކިޔާ މީހަކާއެކު މިފަދަ ގޮތަކަށް މާގިނައިން ފެނުން. - ކާހިތްނުވުން، ކެއުމުގައި އުނދަގޫވުން ނުވަތަ އާދަޔާ ޚިލާފަށް ގިނައިން ކެވުން. ކިތައްމެވަރަށް ކެއަސް ބަނޑުހައިހޫނުކަން ނުފިލުން ނުވަތަ މާއަވަހަށް ބަނޑުހައިވުން. - ފާޚާނާ ކުރާއިރު މީހަކު ހުންނަހެންހީވުން/ފެންވަރާއިރު މީހަކު ބަލަން ހުންނަހެން ހީވުން. - މާގިނައިން މީހަކު ގައިގައި އަތްލާހެން ހީވުން (ޢާއްމުކޮށް އެކަނި އުޅޭވަގުތު) އަދި ގޮވާހެން ހީވުން. - ގައިގެ ތަންތަން ހޭލާއިރު ރަތްވެފައި ހުރުން، ނުވަތާ ނޫފާވެފައި ހުރުން ނުވަތަ ވަކިދެމިފައި ހުރުން ނުވަތަ ފިހިފައި ހުންނަހެން ހުރުން. - ސާފުތާހިރުކަމާ ދުރުވުން، ފެންވަރާހިތްނުވުން. - އަނދިރީގައި އުޅޭހިތްވުން، / މާބޮޑަށް ބިރުގަތުން އަދި އެކަނިވާނަމަ ބިރުގަތުން. - މާބޮޑަށް ހަނދާންނެތުން، ކުރަން އުޅޭކަންތައްވެސް އެވަގުތެއްގައި ހަނދާންނެތުން. - ސަބަބަކާނުލައި ގައިގެ އެކިތަންތާގައި ރިއްސުން. ރިހުން އެކިފަހަރު އެކިތަނުގައި ހުރުން. - ގައިގެ ތަންތަނުން ދިލަނެގުން، ކުރިމަތިފަރާތުން ދިލަނެގުން، ކުޑަކަމުދިއުމުން ދިލަނެގުން. - ދެމަފިރިން ޖިމާޢު ވާއިރު ދިލަނެގުން ، ރިހުން، ނުވަތަ ޖިމާޢުވެ ނިމުމުން އާދަޔާ ޚިލާފަށް މިފަދަ ކަމެއްވުން. މިއީ ސިޙުރު ނުވަތަ ޖިންނީގެ ބައްޔެއް ޖެހިފައިވާ މީހުންގެ ކިބައިން ފެންނާނެ ބައެއް ޢާއްމު ޢަލާމާތެވެ. މިނޫންވެސް އެކި އެކި ތަފާތު އަލާމާތް ތަފާތު ވައްތަރުގެ ސިޙުރުގެ އަދި ޖިންނީގެ ޢަލާމާތްތައް ވެއެވެ. ދަންނަންޖެހޭ ޙަޤީޤަތަކީ މީގެން ޢަލާމާތެއް މީހެއްގައި ހުންނަ ކޮންމެ ފަހަރަކު އެއީ ޖިންނި ބަލި ނުވަތަ ސިޙުރު ކަމުގައި ނުވެދާނެއެވެ. އެހެންކަހަލަ ބައްޔެއްގެ ސަބަބުންވެސް މިފަދަ ޢަލާމާތެއް ފެނުން އެކަށީގެންވެއެވެ. ޖިންނި ނުވަތަ ސިޙުރު ކަމުގައި ބެލެވޭނީ ޖުމްލަކޮށް ހުރިހާ ޢަލާމާތްތަކަކަށް ބަލައިގެނެވެ. އަދި ރުޤުޔާ އަޑުއެހުމުން މިފަދަ ކަމެއް ހުރިނަމަ އުނދަގުލެއްވާނަމައެވެ.