އިބްރާހިމް ރަޝީދު، ހޯރަ
ދިވެހިރާއްޖެއަކީ
ޒަމާންވީ ގައުމެކެވެ. މުއްސަނދި ދިގު ތާރީޚެއް އޮތް ޢުމުރުން ނުހަނު ދޮށީ
ގައުމެކެވެ. އިންޑިޔާ ކަނޑުގެ މެދުގައި ދުނިޔޭގެ އުތުރާއި ދެކުނަށް
ދެމިގެން މިވާ މުތްތަކެއް ފަދަ ރީތި ޖަޒީރާ ގައުމު މިގޮތުގައި މިއަދާ
ހަމައަށް ދެމިގެން އާދެވުނު އެތަކެއް ސަބަބު ތަކާ ސިއްރުތަކެއް ވާނެއެވެ. އިންޑިޔާ އަކީ ދުނިޔޭގެ މާސިންގާ އެއްބައްރުގެ މައްޗަށް ބިނާވެ އޮތް، ބިޔަކަމުގައި ދުނިޔޭގެ ބިތެއްފަދަ ބޮޑު ގައުމެކެވެ. ގުދުރަތީ ވަޞީލަތް ތަކާ އާބާދީ އާއި ޢިލްމާ ހުނަރު ގައި އަރާއޮތް ގައުކެވެ. ދަތްކޮއްޓާ އިލޮށިން ފެށިގެން ނިއުކްލިއަރ ވޯހެޑާއި ހަމައަށް އަމިއްލަ އުފެއްދުންތެރި ކުރިއަރާފައިވާ ގައުމެކެވެ. އިންޑިއާ އަކީ އެގައުމުގެ އިގްތިޞޯދު ގައި ފިސާރި ޖޯރު ހުރި އަސްކަރީ ވަރުގަދަ ބާރެއްވެސް މެއެވެ. އިންޑިޔާ އަށް ލިބިފައިމިވާ ހުރިހާ ސިފަތަކެއްގެ މަންފާ އާއި ލާބަ ދިވެހިރާއްޖެ އަށް އަބަދުވެސް ކެނޑިނޭޅި ފޯރަމުން ދެއެވެ.
ގުދުރަތީ ގޮތުން އުފެދި އޮތުމުގައި އިންޑިޔާއާ ދާދި ގާތުގައި ދިވެހިރާއްޖެ ލައްވާފައިވުން އެއީ މިދެގައުމުގެ ގުޅުން ޚާއްޞަވި އެއް ސަބަބެވެ. އުފެދި، އާބާދުވެ ، ޒަމާންވީ ދިގު ތާރީޚެއް ކަޑައްތު ކުރުމުގެ ނަޞީބު ދިވެހިންނަށް ލިބިފައިވުމުގެ އެއްސަބަބަކީ ދިވެހިރާއްޖެ އަކީ އިންޑިޔާގެ އަވަށްޓެރި ގައުމަކަށް ވެފައި ވުމެވެ. ތަނެއްގައި މާމޮޅު އަދި މާގަދަ ގައުމެއް އޮވެދާނެ އެވެ. އެހެނަސް ތާކު އަދި އޮންނަހާ ގައުމަކީ އަވަށްޓެރި ގާތް ގައުމަކަށް ނުވާނެއެވެ. އެހެން ކަމުން ދިވެހިރާއްޖެއާ އިންޑިއާ އާ ދެމެދު މިވާ އެތައް ސަތޭކަ އަހަރެއްވީ ގުޅުމުގެ ވަރުގަދަ ކަމުގެ ރަމްޒަކީ ދެގައުމުގެ ރައްޔިތުންގެ މެދުގައި އޮތް ޒަމާންވީ ގުޅުމާ، ކުލުނާ، ގާތްކަމާ ލޯތްބެވެ. ނަތީޖާ އެއްގެ ގޮތުން އެއީ އެއްވެސް ހާލެއްގައި ވަކި މީސްކޮޅެއްގެ އަމިއްލަ ޒާތީ މަޞްލަހަތެއްގެ ބޭނުމުގައި ފުނޑު ފުނޑުކޮއް ގުރުބާން ކޮއްލެވޭ ވަރަށް ވުރެ ފުން ގުޅުމެކެވެ. މިސަބަބަށް ޓަކާ ، ދިވެހިންގެ ގާތް ކަމާ، އިޚުލާޞް ތެރިކަން އިންޑިއާ އަށް އަބަދުވެސް ދޭން ޖެހޭނެއެވެ. އިންޑިއާގެ އިއްޒަތާ ކަރާމަތާ ހައިބަތު ހިފަހައްޓާ ދެމެހެއްޓުމުގައި ދިވެހިންގެ އިޙުތިރާމާ ލޯބި އަދި ވަކިން ޚާއްޞަކޮއް ދިވެހިންގެ އިޚުލާޞްތެރިކަން އިންޑިއާ އަށް ދިނުން އެއީ ދިވެހިންގެ އަޚުލާގީ މަސްއޫލިއްޔަތެކެވެ. ހަމަ އެފަދައިން ދިވެހިންނަށް ދިމާވާ ކޮންމެ ބޮޑުކަމެއްގައި އެންމެ ފުރަތަމަ އެންމެ ގާތުގައި މިހާތަނަށް އޮތީވެސް އަދި މާދަމާ އޮންނާނީވެސް ހަމަ އިންޑިއާ އެވެ. ހަމައެފަދައިން އިންޑިއާ އަކީ ދުނިޔޭގެ އެންމެ ބޮޑު ޑިމޮކްރަސީ ކަމުގައިވާ ޙާލު ، ދިވެހިރާއްޖެ އަށް އަލަށް ގެނެވުނު ޑިމޮކްރަސީ ގައި އެންމެ 3 އަހަރު ފަހުން މޫނު ކަފަގަނޑު އަޅާ ކަފުންކޮއް ވަޅުލެވޭ އިރު ހަމަ އެކަނި ޖަނާޒާގައި ބައިވެރިވާ ގައުމެއްގެ ގޮތުގައި އިންޑިއާވުމަކީ އެބޮޑު މާސިންގާ މަހާ ބަހާރަތު ކިޔޭ ގައުމަށް ވެސް ހަގީގަތުގައި ލަދުވެތި ކަމެކެވެ.
ކަން މިހެންވާން ޖެހެނީ ސަބަބުތަކެއް ނެތި އެއް ނޫނެވެ. ގާތުގައި އޮވެވޭނީ ހަގީގަތުގައިވެސް މިދެގައުމަކީ ގާތުގައި އޮތް އަވަށްޓެރި ޒަމާންވީ ގުޅުންތަކެއް ޙިއްޞާ ކުރުމުގައި ދެމި ތިބެ، އެކަމަށް އާދަވެފައިވާ ދެގައުމު ކަމަށް ވާތީއެވެ. އެއީ މިދެގައުމުގައި ވަކި ޒަމާނެއްގައި އޮތް ވަކި ސަރުކާރަކުން، ވަކި ކަމެއް ކޮއްގެން ވީކަމެއް ނޫނެވެ. އެއީ ގުދުރަތީ މިހަގީގަތުގެ މަތީގައި ދެމިއޮތް މިފަދަ ކޮންމެ އަވަށްޓެރި ދެގައުމެއްގެ ރައްޔިތުންގެ މެދުގައި ވެސް އުފެދޭނެ ގުޅުމެކެވެ. އިންޑިއާ ރައްޔިތުންނާ ދިވެހިރައްޔިތުންގެ ދެމެދުގައި މިވާ ގުދުރަތީ ވަރުގަދަ ގުޅުމަކީ އިންޑިއާ އާއި ދިވެހިރާއްޖޭގައި އެހިނަދަކަށް އޮތް ވެރިކަމަކަށް ވެސް އަދި ދެގައުމުގައި ދިރިތިބި ރައްޔިތުންނަށްވެސް އިންކާރު ކުރެވެން ނެތް ހަގީީގަތެކެވެ.
ދިވެހިރާއްޖޭގެ ޒަމާންވީ ގާތްކަމާ އިޚުލާޞްތެރިކަމުގެ ޚާއްޞިއްޔަތާ ނުލައި އިންޑިއާ ގެ ހިތުގައި ފިނިކަން އުފެދުން ދަތިވާނެއެވެ. އަދި އިންޑިޔާގެ ގާތްކަމާ އަޅާލުމާ އެހީތެރިކަމާ އެއްބާރުލުން ނެތި އުޅުން އެއީ ހަގީގަތުގައި ދިވެހިންނަށްވެސް ފަސޭހައިން ތަހަންމަލު ކުރެވޭނެ ތަކުލީފެއް ނޫނެވެ.
"ނަޔޭ ޒަމީންތީ- ނަ އާސްމާންތާ- ނަޗާނދު ތާރޯނކާހީ ނިޝާންތާ- މަގަރްޔެ ސަޗްހޭ – ކެ އުންދިނޯންބީ- ތެރާ މެރާ ޕިޔާރް ޔޫނހި ޖަވާންތާ" މިއީ މާކުރިންސުރެ ދިވެހިން އަޑު އަހާ ދަސްވެ ބާވެފައިވާ ހިންދީ ލޯބީގެ ލަވައެއްގައި މަރުޙޫމް މުޙަންމަދު ރަފީޢުގެ ރަން އަޑުން ވިރުވާ އަޅާލި ބަސްތަކެކެވެ. " މިބިމެއް އުޑެއް އަދި ހަނދާ ތަރިތަކުގެ ހިލަމެއްވެސް އޭރަކު ނެތެވެ. އެކަމަކު މީ ތެދެވެ. އޭރުވެސް ކަލާއާ އަހުރެންގެ ލޯބިވަނީ ހަމަ އޭގެ ޒުވާން ކަމުގައެވެ" މިއީ އިންޑިއާ އަދި ދިވެހިރައްޔިތުންގެ މެދުގައިވާ ލޯބީގެވެސް މިސާލެވެ.
އިންޑިއާ އާ ދިވެހިރާއްޖޭގެ ރައްޔިތުންގެ ދެމެދުގައިވާ ޒަމާންވީ ލޯބީގެ ފުންކަމާ ފޮނިކަން ޒަމާނުއްސުރެވެސް އެހާމެބޮޑެވެ. އެހެން ކަމުން ދިވެހިރާއްޖެ އާ އިންޑިޔާ ރައްޔިތުންނާ ދެމެދު އޮތް މިދެންނެވި ވަރުގަދަ ގުޅުމަށް ގޮންޖަހަން ދިވެހިންގެ ނުވަތަ އިންޑިއާގެ ވިޔަސް ބަޔަކު އުޅުމަކީ އެބަޔަކު ކުރާނެ އެންމެ ކޮސް، ދެއުޅި އެއްނުވާ ކަންތަކެވެ. ސަބަބަކީ އެބަޔަކަށް އެކަން ދުވަހަކުވެސް ކާމިޔާބު ނުވާނެތީއެވެ. ދެންވެސް އޮތް ގޮތަކީ ރާއްޖޭގައި މިއޮތްކަމަށް ގިނަދިވެހިން އިޝާރާތް ކުރާ "ބަފާނުކަށަވަރު" ސަރުކާރުގެ ރައީސްކަމުގައި ހުންނެވި މުޙަންމަދު ވަހީދު ހަސަނަށް ޖަވާބުދާރީވެ ޒިންމާވާން ޖެހޭ ސަރުކާރުގެ ވެރިން އިންޑިއާ އާ ގުޅޭގޮތުން އިސްކުރާ ބޭއަދަބީ ޢަމަލުތަކާ ބަސްތަކަށް އިންޑިޔާ ސަރުކާރުގެ ކިބައިން ފާޅުގައި ދިވެހިސަރުކާރުން މަޢާފަށް އެދުމެވެ. ސިޔާސީ ގޮތުން "ނަގޫފިތުނަސް" މިދެގައުމުގެ ގުޅުން ފިތުނަވެ ދިއުމަށް ވަރިހަމަވެގެން ހުރުމުގެ ގެއްލުން މާބޮޑުވެދާނެއެވެ. މަޢާފަށް އެދުމަކީ އިންސާނީ ޚުލްގުގާއި ސިޔާސީ ގުޅުމާއި ، އިޖުތިމާޢީ އަދަބުގައި ރިވެތި ސިފައެކެވެ. ވެރިއެއްގެ ގޮތުގައި މާފަށް އެދެން ނުކެރޭނަމަ އަމިއްލަ އަށް މަގާމުން ފޭވެ، އިސްތިއުފާ ދިނުން މޮޅުއިތުރުވެގެން ވެއެވެ. އެއީ ގާނޫން އަސާސީގައިވާ ގޮތުގެމަތިން ދެމަސް ދުވަހުގެ ތެރޭގައި ރިޔާސީ އިންތިޚާބެއް ބާއްވާ، ޑިމޮކްރެޓިކް އެމްޑީޕީ ގެ ރައްޔިތުން އެދޭ ރިޔާސީ ކެންޑިޑޭޓް މުޙަންމަދު ނަޝީދު ރާއްޖޭގެ ރައީސުލް ޖުމްހޫރިއްޔާ ކަމަށް ހޮވުމުގެ ފުރުޞަތު ދިވެހި ރައްޔިތުންނަށް ފަހި ކޮއްދިނުމަށެވެ. އޭރުން ނުކެރުނު މީހުންގެ ކުށަށް، އިންޑިޔާ ސަރުކާރުގެ ފަރާތުން މަޢާފަށް އެދި އެދިވަޑައިގަންނަވަން ޖެހިވަޑައިތުމުން އެކަމަށް ކެރިވަޑައިގަތުމުގެ ހިތްވަރު ރައީސް ނަޝީދުގެ ކިބައިގާ ހުންނާނެތީއެވެ. ދިވެހިރައްޔިތުންގެ ޑިމޮކްރެޓިކް ޕާޓީއަށް، ޑިމޮކްރެޓިކް އިންޑިއާ ސަރުކާރުގެ ކިބައިން މަޢާފަށް އެދުމަކީ ބޮޑު ކަމެއް ނޫނެވެ. އެމްޑީޕީ ކަންބޮޑުވަނީ ދިވެހިރާއްޖެއާ އިންޑިއާ ދެމެދު އޮތް ގާތް ގުޅުން ހީނަރުވެދާނެތީއެވެ. އެއީ ރުހިގެން ތިބުން ހެޔޮވާވަރުގެ ކަމެއް ނޫނެވެ.
Comments