Dhivehi Bas

ވަގުތީ އުފާ ހޯދުމަކީ ދިރިއުޅުން ބާއްޖަވެރިކުރުވާ ކަމެއް ބާ؟

ޕްރޮފެސަރު އުގެއިލްގެ ކޮލަމް 

ތިބާއަށް ހޯދެން އޮތް އުފަލެއް ފަހުން ލިބިދާނެ ބޮޑު އިނާޔަތަކަށްޓަކައި ފަސްކޮށްލާނަން ހެއްޔެވެ؟ ނުވަތަ ފަހުން ލިބިދާނެ އިނާޔަތެއްގެ ބަދަލުގައި ވަގުތީ އުފަލަކަށް އިސްކަންދީފާނަން ހެއްޔެވެ؟ އެހެން ގޮތަކަށް ބުނާ ނަމަ، ތިބާއަށް މީހަކު މިއަދު 100 ރުފިޔާ ދޭން ހުށައެޅުމަށް ފަހު، އެފައިސާ އަތުނުލާ މަޑުކޮށްފި ނަމަ މިއަންނަ އަހަރުގެ ހަމަމިދުވަހު 140 ރުފިޔާ ދޭނެ ކަމަށް ބުނެފި ނަމަ މި ދެ ގޮތުން ކުރެ ތިބާ ޚިޔާރުކުރާނީ ކޮން ގޮތެއް ހެއްޔެވެ؟ ގިނަ މީހުން ބޭނުންވާނީ 100 ރުފިޔާ ވަގުތުން ހޯދުމަށެވެ. އަދި ގިނަ މީހުން ދެކޭނީ އަހަރެއް ފަހުން އިތުރަށް ލިބޭ 40 ރުފިޔާ ހޯދުމަށް އިންތިޒާރުކުރުމަކީ ބޭކާރު ކަމެއް ކަމަށެވެ.

މިކަމާ ގުޅޭ ގޮތުން ސައިންސްވެރިން މީގެ 50 އަހަރު ކުރިން ކޮށްފައިވާ ތަހްލީލެއް ހިއްސާކޮށްލާނަމެވެ. މިތަހްލީލުގައި ބޭނުންކުރީ ހަތަރު އަހަރުގެ ކުޑަކުދިންނެވެ. ތަހްލީލުގައި އެއިން ކޮންމެ ކުއްޖެއްގެ އަތަށް ސައިންސްވެރިން މެޓައެއް ދިނެވެ. އަދި މެޓާ ނުކައި އިތުރު ވިހި މިނެޓް ވަންދެން މަޑުކޮށްފި ނަމަ އިތުރު މެޓައެއް ލިބޭނެ ކަމުގެ ފުރުސަތު އޮތް ކަމަށް އެކުދިން ގާތު ބުންޏެވެ. ކޮންމެއަކަސް އެތަނުން ގިނަ ކުދިން ވަގުތުން މެޓާ ކާލި އެވެ. ބާކީ ތިބި މަދު ކުދިންކޮޅު މަޑުކުރީ ވިހި މިނެޓް ފަހުން އިތުރު މެޓައެއް ހޯދުމަށެވެ. މި ތަހްލީލުގައި ބޭނުންކުރި ހުރިހާ ކުދިން ވެސް ބޮޑުވަންދެން އެމީހުންގެ ދިރިއުޅުން ވަރަށް ރަނގަޅަށް ސައިންސްވެރިން މޮނިޓަ ކުރި އެވެ. ފުރަތަމަ ދިން މެޓާ ނުކައި 20 މިނިޓް ވަންދެން މަޑުކުރި ކުދިން ސްކޫލްގައި ރަނގަޅު ވަނަތައް ހޯދި އެވެ. އަދި ކިޔަވާ ނިމިގެން ދިރިއުޅުމެއް ފެށިއިރު ރަނގަޅު ދަރަޖައިގެ ވަޒީފާތަކަށް ވެސް ދިޔަ އެވެ. އަދި ޖުމްލަ ގޮތެއްގައި އެމީހުންގެ ދިރިއުޅުން ބާކީ ތިބި (ވަގުތުން މެޓާ ކާ ލަން ޚިޔާރުކުރި) ކުދިންނާ އަޅާބަލާއިރު ބާއްޖަވެރި އެވެ.

މިދެންނެވި ތަހްލީލު އެހެނިހެން ތަފާތު ގޮތްގޮތަށް ވެސް ސައިންސްވެރިން ތަކުރާރު ކޮށްފައިވެ އެވެ. މިގޮތުން ތަކުރާރުކޮށް ކުރި ތަހްލީލުތަކުގެ ނަތީޖާ ވެސް ހަމަ އެއްގޮތެވެ. އަދި މިފަދަ ދެ ގްރޫޕެއްގެ މީހުންގެ ސިކުނޑީގެ ސްކޭންތަކުން ދައްކާ ގޮތުގައި، ސިކުނޑީގެ ހަރަކާތްތައް ވެސް ޖުމްލަ ގޮތެއްގައި ތަފާތެވެ. މިގޮތުން ސިކުނޑީގެ "ޕްރިފްރޮންޓަލް ކޯޓެކްސް"ގެ ހަރަކާތްތައް މެޓާ ނުކައި ފަސްކުރި ކުދިންގެ ގިނަ އެވެ. އަނެއް ބައި ކުދިންގެ ކިބައިން ފެނުނީ ސިކުނޑީގައި ހިމެނޭ ކަންކަމަށް ދެވިހިފުމުގެ ބައިގެ ހަރަކާތްތައް ހަލުވިކަމެވެ. އެހެންކަމުން އިންސާނާގެ މިފަދަ އާދަތައް އުމުރު ދުވަހަށް ވެސް ދެމިގެން ދާ ކަމަށް މި ދިރާސާ އިންނާ މިއާ ގުޅޭ އެހެނިހެން ދިރާސާތަކުން ހާމަވެ އެވެ.

މިފަދަ ދިރާސާތަކުން އެނގޭ ގޮތުގައި، ވަގުތީ އުފަލަކަށްޓަކައި ކަންތައްތައް ކުރުމަކީ އަހަރެމެންގެ ތެރެއިން ގިނަ މީހުންގެ ކިބާގައި ހަރުލާފައިވާ އާދައެކެވެ. އެ އާދަ އަށަގަންނަނީ ތިމާގެ މުސްތަގްބަލަށް އޭގެ އަސަރު ކޮށްފާނެ ކަން ވެސް ގިނަ ފަހަރަށް އެނގި ހުރެ އެވެ. މިކަން އެންމެ ރަނގަޅަށް ދޭހަވާ އެއް މިސާލަކީ އެއްފަހަރާ ބޮޑު ލާރިގަނޑެއް ލިބުމުން އަހަރެމެން އަމަލުކުރާ ގޮތުންނެވެ. ލާރި ހުރި ނަމަ، ކުރިއަށް އޮތް ތަނަށް ވިސްނާލުމެއް ނެތި ގިނަ މީހުން ހޭދަކޮށްލަ އެވެ. މިކަމުގެ ނަތީޖާއަކަށް ވެގެން ދަނީ ދިރިއުޅުމުގެ ފެންވަރު ދަށްވުމެވެ.

މިކަމާ ގުޅޭ ކަންތައް ދެނެގަތުމަށް ތަރީޚުގެ ތެރެއަށް ނަޒަރު ހިންގާލި ކަމަށް ވިޔަސް އަހަރެމެންނަށް އެއް ކަމެއް ފާހަގަވާނެ އެވެ. އެއީ އެންމެ ބޮޑެތި ކާމިޔާބީތައް ހޯދާފައިވާ މީހުންނާއި އެންމެ މުއްސަނދި މީހުން އެކަންތައްތައް ހާސިލްކޮށްފައި ވަނީ ބުރަ އަދި ގިނަ ދުވަހުގެ މަސައްކަތުންކަމެވެ. މިފަދަ މީހުންނަކީ މިސާލަކަށް އެއްފަހަރާ ކުއްލިއަކަށް ގިނަ އަދަދެއްގެ ފައިސާ ލިބިއްޖެ ނަމަ ފަހަށް ވިސްނައިގެން އެއެއްޗެހީގެ ބޭނުން ފުރިހަމަ ގޮތުގައި ހިފަން މަސައްކަތް ކުރާ މީހުންނެވެ. (ނޯޓް، މިތާގައި މުއްސަނދި މީހުންގެ ގޮތުގައި މިހިމަނާލީ ރަނގަޅު ގޮތުގައި ފައިސާ ހޯދަން މަސައްކަތް ކުރާ އަދި މުޖްތަމައުގެ އިހްތިރާމާއި ގަދަރު އެމީހުންނަށް ލިބޭ މީހުންނެވެ.)

ސައިކޮލޮޖިސްޓުން އިންސާނުންގެ މިޒާޖަށް ބަލައިގެން އިންސާނުން ތިން ބަޔަކަށް ބަހާލާފައިވެ އެވެ. އެއީ "ފިއުޗަ ފޯކަސްޑް" ނުވަތަ މުސްތަގްބަލާ މެދު ވިސްނާ މީހުން، "ޕްރެޒެންޓް ފޯކަސްޑް"، ނުވަތަ ވަގުތީ އުފާތަކަށް ސަމާލުކަން ދޭ މީހުން އަދި "ޕާސްޓް ފޯކަސްޑް" ނުވަތަ އިސްވެދިޔަ ކަންތައްތަކާ މެދު ސަމާލުކަން ދޭ މީހުންނެވެ.

މީގެ ތެރެއިން މުސްތަގްބަލާ މެދު ވިސްނާ މީހުން މުސްތަގްބަލުގައި ހާސިލްކުރަން ބޭނުންވާ ކަންތައް ކުރުމަށް އެހީތެރިކަން ހޯދަނީ މިއަދު ނިންމާ ނިންމުންތަކުން ކަމަށް ގަބޫލުކުރެ އެވެ. އެހެންކަމުން އެމީހުންގެ އުންމީދުތައް ހާސިލްކުރުމަށް ބުރަ މަސައްކަތްތައް ކުރުމާއި ފަހަށް ރައްކާކުރުމާއި، ދިރިއުޅުން ބާއްޖަވެރިކުރުމުގެ މަސައްކަތްތަކުގައި މި މީހުން އަވަދި ނެތި އުޅެ އެވެ. ގިނަ ފަހަރަށް، މުސްތަގްބަލާ މެދު ވިސްނާ މީހުންނަކީ ތައުލީމީ ގޮތުން ވެސް އަދި އަދާކުރާ ވަޒީފާގެ ގޮތުން ވެސް އެހެން މީހުންނަށް ވުރެ ކާމިޔާބު ބައެކެވެ. އަދި އެއީ ދުޅަހެޔޮ ސިއްހަތަށް ވެސް ލޯބިކުރާ ބަޔެކެވެ. އެހެންނަމަވެސް، ގިނަ ފަހަރަށް މުސްތަގްބަލަށް އެމީހުންނަށް މާ ބޮޑަށް ސަމާލުކަން ދެވުމުގެ ސަބަބުން ވަގުތީ އުފާތަކާއި ހިތްހަމަޖެހުމަށް މާ ބޮޑު ސަމާލުކަމެއް ނުދެވެ އެވެ.

ވަގުތީ އުފާތަކަށް ސަމާލުކަންދޭ މީހުން ބޮޑަށް ވިސްނަނީ ގުޅުންތައް ބަދަހިކުރުމާއި، ވަގުތީ ހިތްހަމަޖެހުންތަކަށެވެ. ބުރަ މަސައްކަތް ކުރަން ޖެހޭ ކަންތައްތަކަށް އެމީހުން މާ ބޮޑު ސަމާލުކަމެއް ނުދެ އެވެ. މިގޮތުން މިފަދަ މީހުން ބޮޑަށް އިސްކަންދެނީ މުނިފޫހިފލުވުމަށެވެ. އަދި އެންމެ ފަސޭހައިން މަސްތުވާތަކެއްޗާ ދިމާލަށް ދަނީ ވެސް މިފަދަ މީހުންނެވެ. ކަސްރަތުކުރުމާއި، ދުޅަހެޔޮ ސިއްހަތަކަށްޓަކައި ކުރަން ޖެހޭ ކަންތައްތަކުން ވެސް މިފަދަ މީހުން އާންމު ގޮތެއްގައި ދުރުހެލިވެ އެވެ.

އެމީހެއްގެ މާޒީއާ މެދު ދެކޭ ގޮތަކީ ވެސް މުސްތަގްބަލް ބިނާކުރުމަށްޓަކައި ވަރަށް މުހިންމު ރޯލެއް އަދާ ކުރާ ބައެކެވެ. އެމީހެއްގެ މާޒީ އުފާވެރި މާޒީއެއްގެ ގޮތުގައި ދެކޭ ނަމަ (ނުވަތަ މާޒީގައި ކުރެވިފައިވާ ހިތި ތަޖްރިބާތައް ފަސޭހައިން ހަނދާން ނައްތާލެވޭ ނަމަ)، އެމީހަކަށް ލަފާކުރެވޭނީ މުސްތަގްބަލް ވެސް އުފާވެރިކޮށެވެ. އަދި ހިތާމަވެރި މާޒީއެއް ނަމަ، އެމީހަކަށް މުސްތަގްބަލް ސިފަވާނީ ހިތާމަވެރި ގޮތުގަ އެވެ.

މި ވާހަކަތަކުން ދޭހަކުރެވެނީ މާ ބޮޑަށް އެއް ކަމަކަށް ގޮސް ހުސްވުމަށް ވުރެ ދިރިއުޅުމުގެ ހުރިހާ ކަމައްގައި ވެސް މެދު މިންގަނޑެއް ޚިޔާރުކުރުމުގެ މުހިންމު ކަމެވެ. ދިރިއުޅުމަށް މަޖަލާއި ހިތްހަމަޖެހުން ގެނެއުމަށްޓަކައި، ކޮންމެވެސް ވަރަކަށް ވަގުތީ އުފާތަކަށް ސަމާލުކަންދޭ މީހަކަށް ވުމަކީ ވެސް ރަނގަޅު ގޮތެކެވެ. އެހެންނަމަވެސް މާ ބޮޑަށް އެދިމާލަށް ދެވޭ ނަމަ މީހާގެ ދިރިއުޅުން ބާއްޖަވެރި ނުވެދާނެ އެވެ. އަދި ހަމަ އެހެންމެ، އަހަރެމެންގެ ކަށީގައި މުސްތަގްބަލާ މެދު ވިސްނާ ފިކުރުކުރުމުގެ އާދަ ވެސް ހަރުލާފަ ހުރުން މުހިންމެވެ. އެންމެ ކާމިޔާބު އަދި އެންމެ އުފާވެރި މީހުންނަކީ އެމީހުންގެ ދިރިއުޅުމުގައި މިހުރިހާ ކަންތައްތައް އެއް ހަމައެއްގައި ބަހައްޓާ މީހުންނެވެ. މިގޮތުން ނިންމަން ބޭނުންވާ މަސައްކަތެއް އޮތް ނަމަ، މުސްތަގްބަލާ މެދު ވިސްނާ "ފިއުޗަ ފޯކަސްޑް" މީހަކަށް ވާށެވެ. އަދި މަސައްކަތް ނިމުމުން، "ޕްރެޒެންޓް ފޯކަސްޑް" މީހަކަށް ވާށެވެ. އޭރުން، މީހާ ހަމައަކަށް އެޅި ހުސް ވަގުތުގައި ހިތްހަމަޖެހޭ ކަންތައްތަކުގައި މަޝްއޫލުވެގެން އުޅެވޭނެ އެވެ. އާއިލާ އާއި ރައްޓެހިންނާ އެކު ވަގުތުތައް ހޭދަކުރާއިރު، އިސްވެދިޔަ ކަންތައްތަކާ މެދު ވިސްނާ "ޕާސްޓް ފޯކަސްޑް" މީހަކަށް ވާށެވެ. އޭރުން އާއިލީ އަދި ދުނިޔެވީ އާދަކާދަތަކަށް އިސްކަންދެވި އާއިލާ އާއި ރައްޓެހިންނާ އެކު އުފާވެރި ވަގުތުތަކެއް ހޭދަކުރެވޭނެ އެވެ.