މަކުނުވާ – ގުދުރަތުގެ ހައިރާން ކުރުވަނިވި އެއް އަޖާއިބު

ޕްރޮފެސާ ހަސަން އުގެއިލް

 

ދުނިޔޭގައިވާ ތަފާތު އެކި ވައްތަރުގެ ދިރޭތަކެތީގެ ތެރެއިން ފައިދިގު މަކުނަކީ ވަރަށް ވެސް އަޖާއިބު ކުރުވަނިވި އެއްޗެކެވެ. ފައިދިގު މަކުނުގެ އާއިލާގެ އެކި ވައްތަރުތައް ދުނިޔޭގައި އުޅޭތާ ހަތަރު މިލިއަނަށް ވުރެ ގިނަ އަހަރު ވެފައިވާ ކަމަށް ލަފާކުރެވޭއިރު، މި އާއިލާތައް ވަނީ ދުނިޔޭގެ އެކި ބައްރުތަކަށް ފެތުރިފަ އެވެ. މިގޮތުން ފައިދިގުމަކުނުގެ އާއިލާގެ ސާޅީސްހާސް ވައްތަރު މިހާތަނަށް ސައިންވެރިން ވަނީ ހޯދާފަ އެވެ.

ދުނިޔޭގައިވާ އެތައް މިލިއަން ދިރޭތަކެތީގެ ތެރެއިން ފައިދިގު މަކުނު ތަފާތުވަނީ އޭގެ ވާފުރުމުގެ ކުޅަދާނަކަމުންނެވެ. ފައިދިގުމަކުނު ފުރާ "މަކުނުވާ"' ގައި ހިމެނެނީ "ސިލްކް" ނުވަތަ ފަށުއި އެވެ. މަކުނު ނޫނަސް ސިލްކް ވާމް ފަދަ ބައެއް ދިރޭ ތަކެތި ވެސް ސިލްކް އުފައްދަ އެވެ. އެހެންނަމަވެސް ފައިދިގުމަކުނަށް ލިބިފައި ވާވަރުގެ ވާފުރުމުގެ ކުޅަދާނަކަމެއް އެހެނިހެން ދިރޭތަކެއްޗަށް ލިބިފައެއްނުވެ އެވެ. ކޮންމެއަކަސް، ފައިދިގު މަކުނު ސިލްކު އުފައްދަނީ ކިހިނެއް ކަމެއް މުޅިއަކުން ސައިންސްވެރިންނަށް ހޯދިފައެއް ނުވެ އެވެ. އެހެންނަމަވެސް، މަކުނުތައް ވާފުރާ ގޮތް ކޮންމެވެސް ވަރަކަށް ވަނީ ހޯދިފަ އެވެ.

މަކުނުވާފުރުމުގައި، ފައިދިގުމަކުނު ވަކި ޚާއްސަ މިންތަކެއް ވެސް ގެންގުޅެ އެވެ. މިގޮތުން މިން އެޅުމުގައި މަކުނު ބޭނުންކުރަނީ އޭގެ ހަށިގަނޑުގެ ބޮޑުމިނެ އެވެ. ކޮންމެ މަކުނުވާއެއް ވެސް ފެށެނީ އެންމެ ހިމަ ރޮއްޖަކުންނެވެ. މަކުނުވާ ފުރުމަށްޓަކައި އެންމެ ފުރަތަމަ ފައިދިގުމަކުނު ރަނގަޅު ތަނެއް ހޯދަ އެވެ. މިސާލަކަށް ގަހެއްގެ ދެ ގޮފިގަނޑު ދެމެދެވެ. މިގޮތުން، ވާފުރާނެ ރަނގަޅު ތަނެއް ފެނުމުން، ފައިދިގުމަކުނު ސިލްކް ހިމަ ރޮއްޖެއް ވައިގެ ތެރެއަށް ދޫކޮށްލަ އެވެ. ސިލްކު ރޮދި ތަނެއްގައި ރަނގަޅަށް ހަރުލައިފިކަމަށް ފައިދިގުމަކުނަށް ޔަގީންވުމުން ފައިދިގުމަކުނު އޮތް ތަނުގައި އެރޮދީގެ އަނެއްކޮޅު ހަރުކުރެ އެވެ. އެއަށް ފަހު، ހަރުކުރެވިފައިވާ ރޮދީގެ ހުރަހަށްވާ ގޮތަށް ތިރިން އަނެއްކާވެސް ދެވަނަ ރޮއްޖެއް ދޫކޮށްލުމަށް ފަހު ދެ ރޮދި ދިމާވާ ހިސާބަށް މަކުނު އަރަ އެވެ. އެއަށް ފަހު، އެންމެ މެދުން ބޭރަށް ދާ ގޮތަށް ވައް ބުރެންހެން ފަސް ރޮދި މަކުނު ފުރަ އެވެ. މި މަރުހަލާއަށް ފަހު، މެދުން ބޭރަށްވާ ގޮތަށް ވައް ބުރެންހެން ވާގޮތަށް ރޮދިތައް ފުރަން ފަށަ އެވެ. މިގޮތުން ފުރާލެވޭ ރޮދިތަކުގައި ތަތް ލަވާ ގޮތެއް ނުހުންނާނެ އެވެ. އޭގެ ފަހުން އެންމެ ފުރަތަމަ ފުރި ވައް ބުރުގެ ވާތަކުގެ މެދުން ތަތްލަވާ ވާތަކެއް މަކުނު ފުރަން ފަށަ އެވެ. ކޮންމެ ވައް ބުރެއްގެ ދެމެދުގައި ހުންނާނީ މަކުނުގެ ފަހަތު ފަޔާއި މަކުނުވާ ރޮދިތައް މަކުނުގެ ހަށިގަނޑުން ބޭރުކުރާ ހިސާބާ ދެމެދު ހުންނަ ދިގުމިނެ އެވެ. މަކުނު ވާތައް ފުރުމުގެ ބުރަ މަސައްކަތް ނިމުމުން، އެންމެ ފަހުން މަކުނުވާގައި ހިމެނޭ ތަތްނުލަވާ ރޮދިތައް ނައްޓާލުމަށް ފަހު، ޝިކާރަކުރުމަށްޓަކައި މަކުނުވާގެ މެދުގައި ފައިދިގުމަކުނު މަޑުކުރެ އެވެ.

މަކުނު އުފައްދާ ސިލްކަކީ ވަރަށް ވެސް ވަރުގަދަ އެހެންނަމަވެސް މަޑުމަޑު އެއްޗެކެވެ. އެހެނީ މިސިލްކަކީ ސްޓީލް ނުވަތަ ދަގަަނޑަށް ވުރެ ވަރުގަދަ އެހެންނަމަވެސް، އޭގެ މަޑުކަމުގެ ސަބަބުން ބޭނުން ގޮތަކަށް ބައްޓަން ކޮށްލެވޭ އެއްޗެކެވެ. މަކުނުވާގައި ހިމެނޭ އަޖައިބުކުރުވަނިވި ސިފަތައް ދަނެގަތުމަށްޓަކައި ފައިދިގުމަކުނު މަކުނުވާގެ ބޭނުންކުރާ ގޮތާ މެދު ވިސްނާލުން މުހިންމެވެ. މިގޮތުން މަކުނުވަލަކީ މަކުނު ދިރިއުޅޭ ތަނުގެ އިތުރުން، މަކުނު ކެއުމަށްޓަކައި އެހެނިހެން ދިރޭތަކެތި ޝިކާރަ ކުރުމަށް ބޭނުންކުރާ ދަލެކެވެ. އެހެންކަމުން، މަކުނުވާ ވާން ޖެހޭނީ އެއަށް ހަމަލާދޭން އަންނަ ދިރޭތަކެއްޗަށް ހުރި ނުރައްކަލަކަށް ވުމުގެ އިތުރުން، ބައެއް ފަހަރު ބާރުގަދަ ވައިންނާއި ތޫފާން ފަދަ ތަކެތިން ވެސް ސަލާމަތް ކޮށްދޭވަރުގެ އެއްޗަކަށެވެ.

މަކުނުވާގައި ހިމެނޭ އަޖައިބުކުރުވަނިވި ކަންތައްތައް ހޯދުމަށްޓަކައި ސައިންސްވެރިން ވަނީ އޭގައި ހިމެނޭ ސިލްކުގެ ކޮމްޕިއުޓަރު މޮޑެލްތަކެއް ހިސާބުގެ އަލީގައި ތައްޔާރުކުރުމަށް ފަހު، ދިރާސާތަކެއް ކޮށްފަ އެވެ. މިދިރާސާތަކުން ދައްކާ ގޮތުގައި މަކުނުވަލަކީ ހައިރާންކުރުވަނިވި އެއްޗަކަށް ވެގެންދަނީ ތަފާތު އެކި ހާލަތްތަކަށް މަކުނުވާ ހޭނިގެންދާ ގޮތް ތަފާތުވުމުންނެވެ. މިސާލަކަށް މަޑުމަޑު ވަލެއް މަކުނުވާއަށް އެޅުމުން، މުޅި ވާ އެއްކޮށް މަޑުވެގެންދެ އެވެ. މީގެ ސަބަބުން މަކުނުވާގެ އެއްވެސް ހިސާބަކަށް ބަދަލެއް ނައިސް އިތުރަށް ބޮޑު ވެގެން ނުވަތަ ފުޅާވެގެންދެ އެވެ. އަދި ހަމަ އެހެންމެ، މަކުނުވާގެ ވަކި ހިސާބަކަށް  އާދަޔާ ޚިލާފު ބާރެއް ފޯރައިފި ނަމަ، ނުވަތަ ވަކި ހިސާބަކަށް އެއްޗެއް ކޮއްޕާލުމުން އެހިސާބަކުން ސިލްކު ރޮދި ބުރިވެ ހަލާކުވެގެންދެ އެވެ. މީގެ އެންމެ ހައިރާންކުރުވަނިވި ކަމަކީ މިގޮތަށް މަކުނުވާގެ ވަކި ހިސާބެއް ނެތި ހިނގައްޖެ ނަމަ، މަކުނުވާ އިތުރަށް ވަރުގަދަވެގެން ދާކަމެވެ! ދިރާސާކުރާ ފަރާތްތަކަށް ހޯދިފައިވާ ގޮތުގައި، މަކުނުވަލެއްގެ އެކި ހިސާބުތަކުން ދިހަބައިކުޅަ އެއްބައި އުނިކުރުމުން، މުޅި ވާގަނޑު އިތުރަށް ތިނެކާއި ދިހައިން ސައްތައާ ދެމެދުގެ އަދަދަކަށް އިތުރަށް ބަރު އުފުލެ އެވެ. މިސަބަބުތަކާ ހުރެ ދަގަނޑު ފަދަ ބާރުގަދަ އަދި ހަރު އެއްޗިއްސާ އަޅާބަލާއިރު، މަކުނުވާ މާ ވަރުގަދަ އެއްޗަކަށް ވެގެން ދިއުމުގެ އިތުރުން މާ ބޭނުންތެރި އެއްޗަކަށް ވެސް ވެއެވެ.

ފައިދިގުމަކުނު އުފައްދާ ސިލްކަށް ވެސް ސައިންސްވެރިން ވަނީ ވަރަށް ގިނަ ގޮތްގޮތުން ޝައުގުވެރިކަން އުފެދިފަ އެވެ. އެހެންނަމަވެސް ވަރަށް ފަހަކާ ޖެހެންދެން މެނުވީ އިންސާނުންނަށް ސިލްކުން މާ ބޮޑު ބޭނުންތަކެއް ކުރެވިފައެއް ނެތެވެ. ފައިދިގުމަކުނުން ބޭނުންކުރެވޭ ވަރަށް ސިލްކު ހޯދުމަކީ ވަރަށް އުނދަގޫ ކަމެކެވެ. އެހެނީ ކޮންމެ ފައިދިގުމަކުނެއްގައި ހިމެނެނީ ވަރަށް މަދު މިންވަރެއްގެ ސިލްކްކޮޅެކެވެ. ފައިދިގުމަކުނު ބޭނުން ކޮށްގެން ގިނަ އަދަދަކަށް ސިލްކު އުފެއްދޭނެ ގޮތެއް ސައިންސްގެ އަލީގައި ހޯދިއްޖެ ނަމަ، ކުރިއަށް އޮތް ތަނުގައި، ވައިގެ އުޅަނދުތަކާއި، އިމާރާތްތައް އަދި ބަޑީގެ ވަޒަން ނާރާ ވައްތަރުގެ ދަހަނާ ފަދަ ތަކެތި އުފެއްދުމަށް ސިލްކުގެ ބޭނުން ކުރެވިދާނެ ކަމަށް ސައިންސްވެރިން ގަބޫލު ކުރެ އެވެ.

މީގެ އިތުރުން ވެސް، މަކުނުވާ ބައްޓަން ކުރެވިފައިވަނީ ނެޓްވާކެއް ގޮތަށް ވަކި ޚާއްސަ ސިފައަކަށެވެ. މިގޮތުން މަކުނުވަލެއްގެ ބައްޓަން އަހަރުމެން ޒަމާނީ މުއާސަލާތީ ވަސީލަތެއްގެ ގޮތުގައި ބޭނުންކުރާ ކޮމްޕިއުޓަރު ނެޓްވާކްގެ "ސިފަ" ބައްޓަން ކުރުމަށް ވެސް ބޭނުން ކުރެވިދާނެ އެވެ. އެހެނީ، މަކުނުވަލަށް ދިމާވާ ކުދިކުދި ލޮޅުންތަކާ އެކު ވެސް، އޭގެ ބައްޓަމުގެ ފުރިހަމަކަމަށް އިތުރު ބަދަލެއް ނާދެ އެވެ.  އެހަންކަމުން، އިންޓަނެޓް ފަދަ ވާޗުއަލް ނެޓްވާކްތަކަށް ހެކަރުންގެ ފަރާތުން އަންނަ ހަމަލާތަކުން ސަލާމަތްވުމަށް އެފަދަ ނެޓްވާކްތައް މިހާރަށް ވުރެ ފުރިހަމައަށް ޑިޒައިން ކުރުމުގައި މަކުނުވަލުގެ ސިއްރުތައް ބޭނުންކުރެވިދާނެ ކަމަށް ވެސް ސައިންސްވެރިން ގަބޫލުކުރެ އެވެ.