ކޯނީގެ ނިންމުން: ވެރިކަން ބަދަލުވީ ގާނޫނު އަސާސީއާ އެއްގޮތަށް

 

1203 ކުރީގެ މިނިސްޓަރު މުހައްމަދު އަސްލަމް: ރިޕޯޓް ލިޔުނީ ފަސް މެމްބަރުންނަށް އެއްބަސްވެވޭ ގޮތަކަށް ނޫން. އެހެންކަމުން ގަހާ ސައީދު އިސްތިއުފާދެއްވީ. ކޮމިޝަނުން ވީޑިއޯތައް ބަލާފައެއް ނެތް. ކުރިހާ ވެސް ކަމަކީ މީހުންގެ އިންޓަވިއުތައް ނެގީ. ޖެނެރަލް މޫސާ އަލީ ޖަލީލް އާއި ކާނަލް ޒިޔާދު އާއި ޖެނެރަލް އިބްރާހީމް ދީދީގެ ބަޔާނަށް ރިއާޔަތްކޮށްފައެއް ނެތް. [ކުރީގެ ޕޮލިސް ކޮމިޝަނަރު] ފަސީހު ވިދާޅުވި، މިއީ މިއުޓިނީއެކޭ، މިއީ ބަޣާވާތެކޭ، އެ ވާހަކައެއް ލިޔެފައެއް ނެތް. ކޯނީން މި ބުނީ ތި މީހުން ތީ އަނދިރި ބައެކޭ. މި ރިޕޯޓަކީ އަޅުގަނޑުމެންގެ މޫނުމަތީގައި ޖެހި ތަފާލެއް. އަޅުގަނޑުމެން މިކަމާ އިހުތިޖާޖުކުރާނަން. އަޅުގަނޑުމެން ގަބޫލު ނުކުރާ ކަންތައްތަކެއް އޭގައި ހުރި ކަމަށް ބުނަން އަޅުގަނޑުމެންނަށް ގާނޫނު އަސާސީ ޖާގަ ދޭ، މަގުމައްޗަށް ނުކުންނަން ވެސް. ވެރިކަން ބަދަލުކުރެވޭނީ ހަމައެކަނި 6، 7 ގަ އެއެއް ނޫން. މިއަދު ވެސް ކުރެވޭނެ، މާދަމާ ވެސް ކުރެވޭނެ. 

11:59 ކުރީގެ މިނިސްޓަރު މުހައްމަދު އަސްލަމް: އާ ކޯނީ އަޅުގަނޑުމެން ގަބޫލުކުރީ. ތިން މެމްބަރުންގެ ކޯނީން ކުރި މަސައްކަތް އަލުން ބަލަން އަޅުގަނޑުމެން ހުށަހެޅީ. އެކަމަކު ކޮމިޝަނުން އެއްވެސް މަސައްކަތެއް ނެތް، އެއްވެސް މީހެއްގެ ފޯން ލޮގް ހޯދާކަށް. ބެލީ ޖުމްލަ ތިން މީހެއްގެ ބޭންކް ސްޓޭޓްމެންޓެއް.

  1153 އެމްޑީޕީގެ ގައުމީ ހިންގާ ކޮމިޓީގެ ބައްދަލުވުން ދަރުބާރުގޭގައި ކުރިއަށް ދަނީ . މިވަގުތު ވާހަކަފުޅު ދައްކަވަނީ ޕާޓީގެ ޗެއާޕާސަން ރީކޯ މޫސާ މަނިކު.

11:38 ރިޕޯޓް ދިރާސާކޮށް، އަޅަންވީ ފިޔަވަޅުތައް ބަލަން ފަށައިފިން: ޕީޖީ އޮފީސް

11:37 ކޮމިޝަން އުފެއްދެވުމުގެ ގަރާރު އުވާލެއްވުމަށް ރައީސް ވަހީދު މިއަދު ސޮއިކުރެއްވުމުން އެ ކޮމިޝަނުން އުވިއްޖެ 

.

1129  ކޯނީގެ ރިޕޯޓް ލިބިވަޑައިގެންފި ކަމަށް ޕީޖީ އަހުމަދު މުއިއްޒު ވިދާޅުވެއްޖެ 

.

11:26 ކޯނީގެ ނިންމުންތައް:

1. 7 ފެބްރުއަރީ 2012 ވަނަ ދިވެހިރާއްޖޭގެ ވެރިކަން ބަދަލުވެފައިވަނީ ގާނޫނު އަސާސީ އާއި ގާނޫނާ އެއްގޮތްވާ ގޮތުގެ މަތިން

2. ފެބްރުއަރީ 6، 7 ގައި ހިނގާދިޔަ ހާދިސާތަކުގެ މައިގަނޑު ސަބަބަކީ ކުރީގެ ރައީސް ނަޝީދުގެ އަމަލުތައް

3. ކުރީގެ ރައީސް ނަޝީދު އިސްތިއުފާ ދެއްވީ އަމިއްލަ އިހްތިޔާރާ އެކު، ގާނޫނާ ހިލާފު މަޖުބޫރުކުރުމެއް ނުވަތަ ބިރުދެއްކުމެއް ނެތި

4. ފެބްރުއަރީ 6، 7، 8 ގައި ފުލުހުން ހިންގި އަނިޔާވެރި އަމަލުތައް ކަމާބެހޭ އިދާރާތަކުން ތަހުގީގު ކުރަންޖެހޭ

11:24 އެމްޑީޕީގެ ގައުމީ މަޖިލީހުގެ ބައްދަލުވުމެއް ދަރުބާރުގޭގައި 11:30 ބާއްވާ ގޮތަށް ހަމަޖައްސަވައިފި. ނަޝީދު މިހާރު ވަނީ އުސްފަސްގަނޑުން ވަޑައިގެންފައި.

11:22 ރައީސް ވަހީދު: ސަރުކާރުގެ އިސް ބޭފުޅުންނަށާއި ސިފައިންނަށާއި ފުލުހުންނަށާއި އަޅުގަނޑުގެ އާއިލާގެ މެމްބަރުންނަށާއި ރަހުމަތްތެރިންނަށް ޝުކުރު ދަންނަވަން. ޚިދުމަތުގައި ދެމި ހުންނާނަން ކަމުގެ ފުރިހަމަ ޔަގީންކަން އަރުވަން.

11:21 ރައީސް ވަހީދު: ސަރުކާރުގެ ސައްހަ ކަމާ މެދު ސުވާލު އުފެއްދުން މިއަދުން ފެށިގެން ހުއްޓާލަން އެބަޖެހޭ. ކޯނީގެ ރިޕޯޓް ވިދާޅުވުމުން މިކަން ސާފު ވާނެ. މި ވަގުތަކީ ސިޔާސީ ލީޑަރުންގެ ލީޑަޝިޕް ދައްކަންވީ ވަގުތު. މިއީ ކުރިއަށް ދާންވީ ވަގުތު. ސުލްހަ އާއި މަޝްވަރާގެ މަގު ޚިޔާރުކުރަންވީ ވަގުތު. ހިއުމަން ރައިޓްސް ކޮމިޝަނުން އެކުލަވާލި ރިޕޯޓްގައި ގާނޫނީ ގޮތުން ފުރިހަމަ ކުރަން ޖެހޭ ކަންކަން ކުރަން މަޖިލީހަށް އަޅުގަނޑު ގޮވާލަން. ރިޕޯޓާ ގުޅިގެން އަޅުގަނޑު ކުރަން ޖެހޭ ކަންކަން ބަރާބަރަށް ކުރާނަން. އަޅުގަނޑު ފަށާ ޕާޓީތަކުގެ މަޝްވަރާތައް ކުރިއަށް ގެންދާނަން.

ރައީސް ވަހީދު ގައުމާ މުޚާތަބްކުރައްވަނީ.

11:19 ރައީސް ވަހީދު: އިގްތިސާދު ހަމަޔަކަށް އެޅުވުމަށް ދިގު މުއްދަތެއް ނަގާނެ. ގެއްލިގެން ދިޔަ އިންވެސްޓަރުންގެ އިތުބާރު އަލުން ހޯދަން ބޮޑެތި މަސައްކަތްތަކެއް ކުރަން ޖެހޭ. އިގްތިސާދު އަލުން ރަނގަޅު ކުރެވޭނެ ކަމުގެ ފުރިހަމަ ޔަގީންކަން އެބައޮތް. އިޖުތިމާއީ ފޭރާން ވަރުގަދަކުރެވޭނެ ކަމުގެ ޔަގީންކަން އެބައޮތް. މިއީ ދިވެހި ގައުމައިގެން އަޅުގަނޑުމެން ކުރިއަށް ދާންވީ ވަގުތު. އިޚްލާސްތެރިކަން ކުރިއަށް ނެރެންވީ ވަގުތު. ބައިބައިވުމާއި ހަމަނުޖެހުމަށް ފުރުސަތު ނުދީ މަސައްކަތްކުރުމުގެ ވަގުތު. އަޅުގަނޑުމެންނަކީ އެއް ބައެއް. މިއީ އެހެން ގައުމުތަކަށް ލިބިފައިވާ ނަސީބެއް ނޫން. މިއީ ވަރަށް ބޮޑު ރަހުމަތެއް. މި ރަހުމަތުގެ ބޭނުން އެންމެ އެދެވޭ ގޮތުގައި ބޭނުން ކުރުމަށް އަޅުގަނޑު ގޮވާލަން. އިސްލާމް ދީނަށް ހުރުމަތްތެރިކޮށް ހިތުމާ އެކު ގައުމުގެ މަސްލަހަތު އިސްކޮށްގެން މަސައްކަތްކުރުމަށާއި ސަރުކާރަށް ފުރިހަމަ އެއްބާރުލުން ދެއްވުމަށް އަޅުގަނޑު އެދެން. ރާއްޖެ އަށް ސުލްހަވެރި އަމާން ގައުމެއް ކަމަށް ދުނިޔެ އަށް ދައްކައިދިނުމަށާއި ތަރައްގީގެ އާ ސޮފްހާއެއް ހުޅުވައިދެއްވުމަށް އަޅުގަނޑު އެދެން.

11:16 ރައީސް ވަހީދު: ފެބްރުއަރީ 7 ގައި ވެރިކަން ބަދަލުވުމުން ރާއްޖެ އަށް ވަރަށް ބޮޑެތި ގޮންޖެހުންތަކެއް ކުރިމަތިވި. އަޅުގަނޑުމެން މި ވޭތުވެދިޔަ ދުވަސްތައް ހޭދަކުރި ގޮތް ހަނދާންކުރަން އެބަޖެހޭ. ގައުމުގެ މަސްލަހަތަށް ވުރެ އަމިއްލަ މަސްލަހަތު އިސްކުރަން ބަޔަކު ކުރި މަސައްކަތުގެ ސަބުން ރާއްޖޭގެ އިގްތިސާދަށާއި އިޖުތިމާއީ ފޭރާމަށް ލިބުނު ގެއްލުންތައް ވަރަށް ބޮޑު.

11:14 ރައީސް ވަހީދު: ކޮމިޝަންގެ ނިންމުންތައް ވަރަށް ސާފު. މިކަންކަމާ މެދު ސުވާލު އުފައްދާނެ ޖާގައެއް އޮތް ކަމަކަށް ނުދެކެން. ކޮމިޝަންގެ މެމްބަރުންނަށް ޝުކުރު ދަންނަވަން. ސެލްވަމް އަށް ކުރި ފުރައްސާރަ ވަރަށް ހަރުކަށި އިބާރާތުން ކުށްވެރިކުރަން.

11:13 ރައީސް ވަހީދު: ގަހާ ސައީދު ފިޔަވައި އެހެން ހުރިހާ މެމްބަރުން ރައީސް އޮފީހަށް ވަޑައިގެން އަޅުގަނޑަށް ރިޕޯޓްގެ ތަފްސީލް ދެއްވި.

11:12 ރައީސް ވަހީދު: ވެރިކަން ބަދަލުވުމާ މެދު ޚިޔާލު ތަފާތުވުން އުފެދުމުން އަޅުގަނޑު ބޭނުންވީ އެ ކަމަށް ރަސްމީ ޖަވާބެއް ހޯދުމަށް.

އެކަން ކުރުމަށްޓަކައި ކޮމިޝަނަށް އަޅުގަނޑު ކަނޑައެޅީ ތައުލީމީ، ގާބިލް ވަރަށް މިނިވަން ބޭފުޅުންކޮޅެއް. ބައިނަލްއަގުވާމީ ލަފަޔާ އެކު ކޮމިޝަނަށް އިތުބާރު ހޯދުމަށް އަޅުގަނޑު އިސްކަން ދިނިން. އެހެންކަމުން ބޭރުގެ ތަޖުރިބާކާރު ފަނޑިޔާރަކާއި ކުރީގެ ރައީސްގެ މަންދޫބެއް ކޮމިޝަނަށް ކަނޑައެޅިން. ސިންގަޕޫރުގެ ފަނޑިޔާރު ސެލްވަމްގެ ޚިދުމަތަށް ދިވެހި ގައުމު ފަޚުރުވެރިވުން ހައްގު. ނަޝީދުގެ މަންދޫބު އަހުމަދު ސައީދަށް ވެސް އަޅުގަނޑު ޝުކުރު ދަންނަވަން. ކޮމިޝަން އޮބްޒާވްކުރުމަށް ކޮމަންވެލްތާއި އދ އިން ދެ ބޭފުޅުން ހުށަހެޅުމުން އެކަން ވެސް އަޅުގަނޑު ގަބޫލުކުރިން. ކޮމިޝަންގެ މިނިވަންކަން ބައިނަލްއަގުވާމީ ފަރާތްތަކާއި އެމްޑީޕީން ވެސް ގަބޫލުކުރި. ކޮމިޝަންގެ މަސައްކަތް ވަރަށް މުސްތަގިއްލު. އަޅުގަނޑުގެ އެއްވެސް ނުފޫޒެއް ނުފޯރުވަން. ފުރިހަމަ އެއްބާރުލުން ދިނިން. އަޅުގަނޑު ގަބޫލުކުރާ ކޮމިޝަނުން ވަރަށް ފުޅާ ދާއިރާއެއްގައި ވަރަށް އިންސާފުވެރި ގޮތުގައި ދިރާސާތަކެއް ކުރެއްވި.

11:08 ރައީސް ވަހީދު: އަޅުގަނޑު މަގާމާ ހަވާލުވީ އޭރުގެ ރައީސް ގާނޫނު އަސާސީގައިވާ ގޮތުގެ މަތިން އިސްތިއުފާދެއްވުމާ ގުޅިގެން. އެއްވެސް ސަބަބަކާ ހުރެ ރައީސްގެ މަގާމް ހުސްވެއްޖެ ނަމަ ހަވާލުވަނީ ނާއިބު ރައީސް ކަމަށް ގާނޫނު އަސާސީގައި ބަޔާންކޮށްފައި ވުމާ އެކު އަޅުގަނޑު ހަވާލުވީ އެ ގޮތުގެ މަތިން. އޭގެ 24 ގަޑިއިރު ނުވަނީސް އެމްޑީޕީން ސަރުކާރުގެ ގާނޫނީ ހައިސިއްޔަތާ މެދު ސުވާލު އުފައްދައި ހަމަނުޖެހުންތައް އުފައްދަން ފެށި. ރައްޔިތުންގެ އިމާރާތްތަކުގައި ހުޅުޖަހައި ގައުމުގެ އަމަންއަމާން ކަން ނަގާލައި ބޮޑެތި ގެއްލުންތައް ދިން. އެ ގެއްލުންތައް ސަތޭކަ އެތައް މިލިއަން ރުފިޔާ އަކުން ގުނާލެވޭ. ގާނޫނުއަސާސީއާ ޚިލާފް އެއްވެސް ކަމެއް ނުހިންގާނެ ކަމުގެ ޔަގީން ކަން އަޅުގަނޑު އެރުވިން. ޝަރީއަތްތަކަށް ނުފޫޒު ނުފޯރުވާނެ ކަމުގެ ޔަގީންކަން އެރުވިން. އަޅުގަނޑުގެ އަޒުމަކަށްވީ ރައްޔިތުންނަށް ހަމަހަމަ ކަމާއި އިންސާފުވެރިކަމާ އެކު ކަންތައް ކޮށްދިނުން އަދި ގާނޫނާ ޚިލާފްވާ ފަރާތްތަކާ މެދު ފިޔަވަޅު އަޅައި އަދަބު ދިނުން. މިއަދު ވެސް މި ހުރީ އެ އަޒުމުގައި. 

11:05 ރައީސް ވަހީދު ނިއުސް ކޮންފަރެންސަށް ވަޑައިގެންފި.

11:04 ރިޕޯޓް ލިޔެފައިވަނީ އިނގިރޭސި ބަހުން

11:03 ކޯނީގެ ރިޕޯޓް އެ ކޮމިޝަންގެ ވެބްސައިޓްގައި އާއްމުކޮށްފި. ރިޕޯޓްގައި 65 ސޮފްހާ.

11:02 ރިޕޯޓްގައި ސޮއި ނުކުރައްވަނީ ކޮމިޝަނުން ރޭ އިސްތިއުފާދެއްވި ގަހާ އަހުމަދު ސައީދު އެކަނި. އޮބްޒާވަރުން ވެސް ވަނީ ސޮއިކުރައްވާފައި.

11:01 ރައީސްގެ ބަޔާނަށް ފަހު ބާއްވާ ނިއުސް ކޮންފަރެންސް ކެންސަލްކޮށްފި. ރައީސް އޮފީހުގެ ތަރުޖަމާން އައްބާސް އާދިލް ރިޒާ ދެންމެ ވިދާޅުވީ ރިޕޯޓްގެ އެގްޒެކެޓިވް ސަމަރީގެ ކޮޕީއެއް ނޫސްވެރިންނަށް ދޭނެ ކަމަށާއި އެއަށް ފަހު ސަރުކާރުގެ އިސް ބޭފުޅުން ނޫސްވެރިންނަށް އެވެއިލެބްލް ވާނެ ކަމަށް.

10:54 ރިޕޯޓްގެ ނިންމުމުގެ ހަތަރު ވަނަ ޕޮއިންޓް: ފެބްރުއަރީ 6، 7، 8 ގައި ފުލުހުން އަނިޔާވެރި އަދި ކަމާބެހޭ ފަރާތްތަކުން އެކަން ތަހުގީގުކުރަން ޖެހޭ.

10:39 މި ވަގުތު އެމްޑީޕީގެ ސަޕޯޓަރުން އުސްފަސްގަނޑުގައި ތިބި އިރު ކުރީގެ ރައީސް ނަޝީދު އުނދޯއްޔެއްގައި އެބަ އިންނެވި.

10:36 ނަޝީދު އިސްތިއުފާ ދެއްވީ އަމިއްލަ އިޚްތިޔާރުގައި: ކޯނީ

10:36 ކޯނީގެ ރިޕޯޓްގެ ނިންމުމުގައި ހަތަރު ނުކުތާއެއް ވޭ.

10:35 ކޯނީން ނިންމާފައި ވަނީ ވެރިކަން ބަދަލުވީ ގާނޫނު އަސާސީ އާއި ގާނޫނުތަކާ އެއްގޮތަށް