މީރު ލުނބޯފަނި ގިރަނީ ހުތްލުނބޮއިންނެވެ.

ދިޔަތިކި

ވިސްނުން ހުޝިޔާރު މީހުން ގެއްލުން ފައިދާއަށް ބަދަލުކޮށްލައެވެ. ނަމަވެސް ތަންދޮރު ނުދަންނަ ގަބު މީހުން މުޞީބާތެއް  ކުރިމަތިވެއްޖެ ނަމަ ދެއާފާތަށް ހަދައިލައެވެ. ކީރިތި ރަސޫލާ މައްކާއިން ބޭރުކޮށްލެއްވުމުން މަދީނާގައި ބާރުހުރި އިސްލާމީ ދައުލަތެއްގެ ބިންގާ އެޅުއްވި އެވެ. އެދައުލަތުގެ ކީރިތި މޫރިތިކަމާމެދު ތާރީޚު ޙއިރާންވެ އަންތަރީސްވި ދައުލަތެކެވެ. އެދައުލަތުގެ ޝާންޝާއުތަކާމެދު އިނގިލިކުރީގައި ދަތްއަޅައިލާން ޖެހުނު ދައުލަތެކެވެ.

އިމާމު އަހުމަދު ބިން ޙަންބަލަ ޖަލަށް ލެވި އެކަލޭގެފާނުގެ ގައިކޮޅުގައި ހަންމުށިން ތެޅުވުނު ހިނދު އެކަލޭގެފާނު ވެވަޑައިގަތީ ސުންނަތް ޖަމާޢަތުގެ އިމާމުންކުރެ އެއް ބޭކަލެއް ކަމުގައެވެ. އިމާމު އިބުނު ތައިމިއްޔާ ހައްޔަރުކުރެވި ޖަލަށް ލެވުމުން އެކަލޭގެފާނު ޖަލުން ނިކުމެވަޑައިގަތީ އިލްމުގެ ހުސްނުވާފަދަ ބޮޑު ޚަޒާނާއެއް ހިތްޕުޅުގައި ޖަމާކުރައްވައިގެންނެވެ. ދެ ޖިލްދުގެ މައްޗަށް އެކުލެވޭ ފިޤުހު ފޮތެއް ލިޔުއްވިއެވެ. އިބުނުލްއަޘީރު ގޭގައި ބަންދުކުރެވުމުން ޖާމިއުލްއުޞޫލާއި އައްނިހާޔަތު ލިޔުއްވި އެވެ. ނުހަނު ބޭނުންތެރި އެހާމެ މޮޅު ދެފޮތެވެ. އިބުނުލްޖައުޒީ ބަޣުދާދުން ބޭރުކޮށްލެވުމުން ހަތް ޤިރާޢަތުގެ ތަޖުވީދު ތައްޔާރުކުރެއްވިއެވެ. މާލިކު ބުނުއްރައިބު އވަހާރަވި ހުމުގެ އާލާސްކަންފުޅު ޖެހިވަޑައިގަތުމުން އައްބާސީ ޚާލީފާއިންގެ ބޮޑެތި ދީވާންތަކާ ނުބައްދަލު މޮޅު ޤަޞީދާއެއް އެކުލަވައިލެއްވިއެވެ. އަބޫޒުރައިބު އަލްހުޛަލީގެ ދަރިކަލުން އަވަހާރަވުމުން ޒަމާންތައް އަންތަރީސްވެ ބަސްހުއްޓުނު މަރުޘިއްޔާ އެކުލަވައިލެއްވިއެވެ. ތާރީޚް ވަނީ އެޅެމަށް އައްސަރިބަހާއި ސާބަސް ރައްދުކޮށްވަރުބަލިވެފައެވެ.

ކަންމިހެން ހުރުމާއެކު މުޞީބާތެއް ކުރިމަތިވެއްޖެނަމަ އެކަމެއްގައި ހިމެނޭ އަލިފަރާތް ފާހަގަ ކުރައްވާށެވެ. ކަލާޔަށް ލުނބޯހުތް ތަށިކޮޅެއް އެރުވިއްޖެނަމަ އެއަށް ހަކުރު އަޅުއްވައިގެން ލުނބޯފަނި ގިރައިލައްވާށެވެ. މީހަކު ކަލާޔަށް މަރުވެފައި އޮތް ހަރުފައެއް އަރުވައިފިނަމަ އޭގެ އަގުބޮޑު ހަން ނަންގަވައި ބާކީ އެއްލައިލައްވާށެވެ. މީހެއްގެ ގައިގައި ބިޗުލެއް ކަށިޖަހައިފިނަމަ އެމީހަކަށް ހަރުފަ ވިހަޔަކުން އަސަރެއް ނުކުރާނެއެވެ. ކިތަންމެ ނުސިޔާނު މޫސުމެއް ކުރިމަތިވިޔަސް އެމޫސުމަކާ ގުޅެ ތައްގަނޑަކަށް ފެތިވަޑައިގަންނަވާށެވެ. ކަލާޔަށް ލިބިވަޑައިގަންނަވާނީ މާމެލާމެލީގެ ހާރުތަކެވެ.

"އަދި ތިޔަބައިމީހުން ނުރުހޭ ކަމެއް އެއީ ތިޔބައިމީހުންނަށް ލާބަހުރި ކަމަކަށް ވެދާނެއެވެ." ( އަލްބަގަރާ:216)

ފަރަންސޭސި އިންޤިލާބުގެ ކުރީން އެތާނގެ އެންމެ މޮޅު ދެ ޅެންވެރިން ޖަލުގައި ބަންދުކުރެވުނެވެ. އޭގެ ތެރެއިން އެކަކީ  ދިމާވާ ކަންތައްތައް ބާއްޖަވެރިކަމުގެ ފާލެއް ކަމުގައި ބަލާ މީހެކެވެ. އަނެކަކީ ފެންނަ ކޮންމެ ކަމެއް ސުންފާކަމުގެ ފާލެއް ކަމުގައި ދެކޭ މީހެކެވެ. އެދެމީހުން އެއްރެޔަކު ކުޑަދޮރުން ބޭރު ބަލައިލިއެވެ. ކަންތައްތަކުން ހެޔޮކަމުގެ ފާލު ދެކޭ މީހާޔަށް ތަރިތައް ފެނިފައި އުފަލުން ހޭންފެށިއެވެ. ސުންފާކަމުގެ ފާލު ދެކޭ މީހާއަށް ޖަލުގެ ކައިރިން މަގުމަތިން ހިރަފުސް އަރާތަން ފެނިފައި ރޯން ފެށިއެވެ. ޙަޔާތާމެދު އިންސާނުން ދެކޭގޮތުގައި މިހާވެސް ފަރަގު ހުރެއެވެ.

ހަގީގަތުގައި ދުނިޔޭގައި ލައްވާފައިވަނީ ހުސް ނުބައިކަމާއި މޮޅިވެރިކަމެއް ނޫނެވެ. އެހެންކަމުން މުޞީބާތެއް ކުރިމަތިވިޔަސް އެކަމުގައި ފޮރުވިފައިވާ ހެޔޮކަމާއި ލާބައިގެ ބައި އަތުލެވޭތޯ ބައްލަވާށެވެ.

ކަލާގެ ދިރިއުޅުއްވުމުގެ ވައްޓަފާޅި ދުވަހެއް ދުވަހަކަށް ރަނގަޅު ކުރައްވާށެވެ. ބިނާކުރަނިވި ގޮތަކަށް ވިސްނުންފުޅާއި ފިކުރު ބަދަލުކޮށްލައްވާށެވެ. ބަސްމަގު ރިވެތިކުރައްވައި ތަހުޒީބު ކުރައްވާށެވެ. މައުލޫމާތުގެ ޚަޒާނާ ފުރާލެއްވޭތޯ މަސައްކަތް ކުރައްވާށެވެ. ޝައްކެއްވެސް ނެތެވެ. މިހާރު ކަލާއަކީ އިހުނަށްވުރެ މާ ކާމިޔާބު މާ އިހުތިރާމު ލިބިވަޑައިގަންނަވާ ބޭފުޅެއް ކަމުގައި ފެނިވަޑައިގަންނަވާނެއެވެ.