އާ ކައިވެނި ބާވެ، އާ ސަރުކާރު ބާވޭ

އަޅުގަނޑުމެންގެ ތެރެއިން ވަރަށް ގިނަ ޒުވާނުން މިރަމްޟާން މަހުގެ ކުރިން ކައިވެނިކޮށްފި އެވެ. އެއީ އެޒުވާނުންގެ އާ ކައިވެންޏެވެ. އެއީ އެކުދިންނަށް އާ ތަޖުރިބާ އެކެވެ. މިތަޖުރިބާ ނިކަން އަވަހަށް ބާވެއެވެ. މިއީ އެޒުވާނުންގެ މާމުއި ހަނދުގެ ދުވަސްތަކެވެ. ހަޔާތުގެ އެންމެ އުހައުވެރި ދުވަސްތަކެވެ. މިދުވަސް ގިނަ މީހުންނަށް ވަރަށް ކުރެވ. އެހެންވެ މާމުއި ހަނދުގެ ދުވަސް އާ ކުރުމަށް ބައެއް ޒުވާނުން ވަރަށް މަސައްކަތްކުރެއެވެ.  

މި މާމުއި ހަނދުގެ ކުރުއުމުރު ސިޔާސީ ކަންކަމަށްވެސް އާދެއެވެ. ރައީސް މުހައްމަދު ނަޝީދުގެ ވެރިކަމުގެ މާމުއި ހަނދުގެ ދުވަސްތައް މާޒީވީ ދުނިޔޭގެ ތާރީޚުންވެސް ފޮޅުވަތެއް އަޅަމުން ޖާހަގަ ހޯދަމުންނެވެ. އިއްތިހާދުންގެ ތެރެއިން އުފެއްދި ލޯބީގެ ވައުދުތަކާއި ހުވާތައް އުވާލަން ޖެހުނީ 3 ޑިސެންބަރު 2008 ގައެވެ. އާ ސަރުކާރުގެ އުފެދުނުތާ އެންމެ 22 ދުވަހުގެ ތެރޭގައެވެ. އިއްތިހާދުގެ ލޯބިވެރިންގެ ތެރެއިން ހޯމް މިނިސްޓަރ ގާސިމް އިބްރާހިމް އެމަގާމުން "ވަރިކުރަން" ޖެހުނެއެވެ. ގާސިމް އަމިއްލަ ފުޅަށް " ވަރިއަށް" އެދިލެއްވީ އެވެ. އެހެންވެ ދޫކޮށްލަން މަޖުބޫރު ވީ އެވެ. ދުވާމަހެއްގެ ނަގުލަކު ނުހިފޭނެއެވެ.

ރައީސް ނަޝީދުގެ ކެބިނެޓުން އެހާ އަވަހަށް ގާސިމް އިސްތިޢުފާ ދެއްވީ ، ރީތި ރަށުގެ މުވައްޒަފުންގެ ހަޅުތާޅެއް ހުއްޓުވުމަށް ފުލުހުން ފޮނުވުމުންނެވެ. އެކަމާއެކު އުފެދުނު ނާޒުކު މައްސަލައިގެ ސަބަބުން ނެވެ. ރައީސް ނަޝީދަށް ނުދަންނަވަ އެފިޔަޅު ގާސިމް އެޅުއްވީމައެވެ. ފުލުހުންގެ ބާރު ދެއްކުމުގައި އެތައް ބަޔަކަށް ހާނިކަ ވީމައެވެ. އެހެންވެ، ސަރުކާރުގެ އަގު އެތެރެޔާއި ބާރުގައި ވެއްޓޭނެކަމަށް ރައީސް ނަޝީދާއި އެމްޑީޕީ ގަބޫލުކުރީމައެވެ. ޔައުނީ ، ހަޅުތާޅު ކުރުމާއި މުޒާހަރާ ކުރުމާއި މިނިވަން ޚިޔާލު ފާޅުކުރުމަކީ އެމްޑީޕީ ސަރުކާރުގެ އެންމެ މުހިންމު އެއް ރުކުނެވެ. މިފަދަ ކަމަކަށް ފުލުހުންގެ ފަރާތުން އަނިޔާވެރިކަމާއި ދެކޮޅުވެރިކަން ނުފެނުމަކީ ނަޝީދުގެ ސަރުކާރުގެ އެންމެ މުހިންމު އެއް އަސާސެވެ. އެހެން ކަމުގެ ގާސިމްގެ މި ފިޔަވަޅު ރައީސް ނަޝީދު ހިތްޕުޅު ހަމަޖެހިވަޑައި ނުގެންނެވީ އެވެ.

ރައީސް ނަޝީދުގެ އަރިސް ބައެއް ބޭފުޅުން ގަބޫކުރައްވާ ގޮތުގައި އެމަނކުފާނުންގެ ކެބިނެޓްގައި ގާސިމް ހިމެނި ވަޑައިގަތުމަކީ " ދެ ސަރުކަރު ހިންގުން" ފަދަ ކަމެކެވެ.

ސަރުކާރުން ގާސިމް ވަކިވެވަޑައިގަތުމަކީ ރައީސް ނަޝީދަށް ބޮޑުކަމެކެވެ. ގާސިމް ދެން ފެނުނީ ނަޝީދަށް އެންމެ ބޮޑަށް ފާޑުވިދާޅުވި، އެންމެ ބޮޑު ގޮންޖެހުންތަކެއް ކުރިމަތި ކުރުވި ސަރުކާރާ ދެކޮޅު އެންމެ ބޮޑު ލީޑަރުގެ ގޮތުގައެވެ.

ގާސިމަށް ފަހު ނަޝީދުގެ ފުރަތަމަ އެޓާނީޖެނެރަލް ފާތުމަތު ދިޔާނާ އާއި ކޮމިޔުނިކޭޝަން ވަޒީރު ޑރ. މުހައްމަދު ޖަމީލް އަހުމަދު ވެސް އިސްތިޢުފާ ދެއްވި އެވެ. މިއީ އެމްޑީޕީއަކަށް މައްސަލައެއް ނޫނެވެ. ނަމަވެސް އެބޭފުޅުން ރައީސް ނަޝީދާއި އެމަނިކުފާނުންގެ ސަރުކާރުގެ ފަތިފުށް ވަތުއަޑިއަށް ދާންދެން ނަގާ ހާމަކޮށްލި އެވެ. އަދި ތިން އަހަރުފަހުން ރައީސް ނަޝީދުގެ ވެރިކަމުގެ ކިއްލާގައި ރެނދުގައި ބޮޑެތި ގުނޑުންތައް އެރީ މިބޭފުޅުން ފަހަތުގައި ތިއްބަވައިގެން ހިންގެވި ސިޔާސީ ހަރަކާތްތަކުގެ ސަބަބުންކަމާމެދަކު ކުޑަވެސް ޝައްކެއް ނެތެވ.