ދަރިވަރުން ބައިވެރިކޮށްގެން އުނގަންނާދޭ ކިލާސްރޫމް

ތުއްތަނިކު

ދަރިވަރުން ބައިވެރިކޮށްގެން އުނގަންނާދޭ ކުލާސްރޫމްގައި ، ދަރިވަރުން މުދައްރިސުންނަށް ހުރިހާ ވަގުތެއްގައި ބަރޯސާއެއް ނުވެއެވެ. އެއްދަރިވަރު އަނެއް ދަރިވަރަށް އިހްތިރާމް ކުރާނެއެވެ. އެއްކުއްޖަކު އަނެއްޖެއްގެ ހިއްސާއޮންނާނެއެވެ. އެއްދަރިވަރު އަނެއް ދަރިވަރާ ވާހަކަ ދައްކާ މައުލޫމާތު ބަދަލުކުރާނެއެވެ. ވާހަކަ ދައްކާނެއެވެ. އެއްކުއްޖަކު އަނެއް ކުއްޖެއްގެ ކިބައިން ދަސްކުރާނެއެވެ. އޮޅުން އަރައި ނޭގިއްޖެ ނަމަ މުދައްރިސުންގެ ގާތުގައި އަހާނެއެވެ. އެއަށްފަހު މައްސަލަ ހައްލުކުރަން މަސައްކަތް ކުރާނެއެވެ. ގްރޫޕްގައި މަސައްކަތް ކުރުމަށް އިސްކަން ދޭނެއެވެ. ދަރިވަރުންގެ ބަހުގެ ހުނަރުތައް ތަރައްގީ ކުރުމަށް މުދައްރިސް އެހީތެރިވެދޭނެއެވެ.

ދަރިވަރުން ބައިވެރިކޮށްގެން އުނގަންނާދޭ ކުލާސް ރޫމަކީ ދަރިވަރުން ބޭނުންހައި ގޮތަކަށް އުޅެން ދޫކޮށްލާ ކުލާސް ރޫމެއް ވެސް ނޫނެވެ. އެކުދިން ބޭނުން އެއްޗެއް އުނގަންނާދޭ ކުލާހެއްވެސް ނޫނެވެ. އެއީ ދަރިވަރުން އިހްސާސްތަކާއި ބޭނުންތައް ދެނެގަންނަ، މުދައްރިސުން ކިޔަވައިދެއްވާ ކުލާސް ރޫމެވެ. ވަކިވަކި ދަރިވަރުންގެ ގޮތުގައެވެ. ގްރޫޕްތަކުގެ ގޮތުގައެވެ. އުނގެނުމުގައި ދަރިވަރުންގެ ހިއްސާއާއި ބައިވެރިވުމަށް ބާރުއަޅާ ކުލާސް ރޫމެވެ. މިކުލާސް ރޫމުގައި މުދައްރިސްގެ ދައުރަކީ އިރުޝާދާއި ބުނެދިނުމަށްވުރެން ފެސިލިޓޭޓް ކޮށްދިނުމެވެ. އެހީތެރިވެދިނުމެވެ. ކަންތައްތައް ފަސޭހަކޮށްދިނުމެވެ. އުނގެނުމުގައި އަމަލީ ގޮތުން ބައިވެރިވާނީ ދަރިވަރުންނެވެ. މުދައްރިސް ހުންނަވާނީ މަގުދައްކަވާށެވެ. 

ދަރިވަރުން ބައިވެރިކޮށްގެން އުނގަންނާދޭ ކުލާސް ރޫމުގައި ދަރިވަރުން ދަސް ކުރާނީ އެކަނި، ދެކުދިން އެކުގައި ނުވަތަ ގްރޫޕްގައެވެ. ދަރިވަރުން މަސައްކަތް ކުރަމުންދާއިރު ހިތްވަރު ދިނުމަށާއި އިރުޝާދު ދިނުމަށް މުދައްރިސް ހުންނަވާނެއެވެ. ދަރިވަރުންގެ މަސައްކަތް ނިމުމުން މުދައްރިސް ފީޑްބެކް ދެއްވާނެއެވެ. މަސައްކަތްތައް ބަލާނެއެވެ. ދަރިވަރުންގެ ސުވާލުތަކަށް ޖަވާބު ދެއްވާނެއެވެ.