ލަޝްކަރީން! ހުޝިޔާރު! ހަތިޔާރު ކޮނޑަށް! ކަނާތުން އަވަސް ހިންގަވާ: ލަޝްކަރީންގެ ސަފުތައް އެތެރެއިން ބަދަހި ކުރައްވާ އިޝްތިރާކީންގެ ވެރިކަން ނިމުމަކަށް ގެންނަވާށެވެ!

ޑރ. މުހައްމަދު ސައުދު

އިޝްތިރާކީންނަކީ ވިސްނުމުގައި ނުރައްކާތެރި، ލާދީނީ ބަޔެކެވެ. އެބައި މީހުންނަކީ ފައިސާއަށް އީމާންވާ، އަދި އެމީހުން އެދޭ ކޮންމެ ކަމެއް ހޯދައިގަތުމުގައި ފައިސާ ބަހައްޓާ މީހުންނެވެ. އެއީ އިންތިހާ ދަރަޖައިގެ އިންސާނިއްޔަތާއި ޚިލާފު، އަނިޔާވެރި ވިސްނުމެއްގެ ވެރި ބަޔެކެވެ. އެމީހުންގެ ނަޒަރުގައި ފައިސާ ބަހައްޓައިގެން އެމީހުންނަށް މީހެއްގެ ފުރާނަ ހިފިދާނެއެވެ. އަދި ފައިސާ ބަހައްޓައިގެން މީހެއްގެ ފުރާނަ ނުހިފާ ދޫވެސް ކޮށްލެވިދާނެއެވެ. އެމީހުން ޤަބޫލުކުރާ ގޮތުގައި އިންސާފު ލިބެންވާނީ ފައިސާ ބަހައްޓާ މީހާއަށެވެ. މިނިވަންކަން ލިބެންވާނީ ފައިސާ ބަހައްޓާ މީހާއަށެވެ. ހަމަހަމަކަމުގައި ބައިވެރިވެވޭނީ ފައިސާ ބަހައްޓާ މީހާއަށެވެ. ޚިޔާލު ފާޅުކުރެވޭނީ ފައިސާ ބަހައްޓާ މީހާއަށެވެ. އަދި އަމުދުން ވެރިކަމުގެ ބާރުތަކުގައި ބައިވެރިވެވޭނީވެސް ފައިސާ ބަހައްޓާ މީހާއަށެވެ. މިލިޔުމުގައި ބަލައިލާނީ އިޝްތިރާކީން ރާއްޖޭގެ ވެރިކަމުގެ މައްޗަށް ގަދަވެގަތުމުގެ ގޮތުން ދައުލަތާއި ދެކޮޅަށް ހިންގާ އުދުވާނުގެ މައްޗަށެވެ. ދީނާއި ޤައުމުގެ ހިމާޔަތުގައި ރާއްޖޭގެ ރަށްރަށުން އައިސް ޤައުމުގެ ސަލާމަތީ ބާރުތަކުގެ ސަފުތައް ގަތާލި ފަޚުރުވެރި ސިފައިންނާއި ފުލުހުންގެ ފައުޖުތައް ބައިބައިކޮށް ފިތުނަވެރި ކޮށްލި ގޮތާއި މެދުއެވެ. އަދި މިޙާލަތުން ސަލާމަތް ވުމަށްޓަކައި ދެން ކުރެވިދާނެ ކަމަކާއި މެދުވެސް ބަލައިލެވޭނެއެވެ.

އާދޭހެވެ! ދިވެހިރާއްޖެއަށް ފުރިހަމަ ސިޔާސީ މިނިވަންކަމެއް ލިބުނީއްސުރެ ދިވެހިން އައީ ތަރައްގީއާއި ތަހުޒީބުގެ ރޮގުތަކުން ކުރިއަރަމުންނެވެ. ރައްޔިތުންގެ ޙަޤީޤީ ވެރިކަމެއް ގާއިމު ކުރުމަށްޓަކައި ފުރިހަމަ ޑިމޮކްރަސީއަކަށް ދިއުމަށް އަތުކުރި އޮޅަމުންނެވެ. ދުނިޔޭގެ ކަން ހިނގާ މަގު ބަލައި ވަޒަންކުރަމުންނެވެ. މިގޮތުން ހެޔޮވެރިކަމެއް ޤާއިމުކުރުމަށް ބާރުއަޅާ އދ ގެ ޗާޓަރުތަކާއި ޤަރާރުތަކުގައި ސޮއި ކުރުމުގެ އިތުރުން މުހިއްމު އެހެން ދެލިޔުމެއްގައި ރާއްޖެ ބައިވެރިވެ ސޮއި ކޮށްފައި ވެއެވެ. އޭގެ ތެރެއިން އެއް ލިޔުމަކީ 1992 ގައި ބްރެޒިލްގެ ރިއޯ ޑި ޖެނީރޯ ގައި ބޭއްވުނު ދުނިޔޭގެ ލީޑަރުންގެ ސަމިޓުން ފާސްކުރެވުނު އާތް ޗާޓަރެވެ. އަނެއް ލިޔުމަކީ 1991 ގައި ޒިންބާބުވޭގެ ހަރާރޭގައި ކޮމަންވެލްތުގެ ވެރިންގެ މެދުގައި އެއްބަސްވެވުނު ހަރާރޭ ޑިކްލަރޭޝަންއެވެ.

މިކަންކަމަށާއި، އަދި ދުނިޔެ ޤަބޫލުކުރާ އުޞޫލުތަކުގެ މައްޗަށް ބިނާކޮށް ރާއްޖޭގެ ވެރިކަން ހިނގާ ނިޒާމު ޑިމޮކްރެޓިކް އުޞޫލުތަކަށް ފައްތާ، ޕާޓީ ސިސްޓަމް ތަޢާރަފްކޮށް ޤާނޫނު އަސާސީން ވެރިކަމުގެ ތިން ބާރު ވަކިކުރުމަށް ރައްޔިތުންގެ ޚާއްޞަ މަޖުލިސް އެއްކުރެވުނެވެ. ނަމަވެސް ޚާއްޞަ މަޖުލީސް އެއްކުރެވުނު ހިސާބު ވެގެން ދިޔައީ ދައުލަތް ޙިޞާރުކުރުމަށް އިޝްތިރާކީންނަށް ލިބިގެންދިޔަ ރަނުގެ ފުރުޞަތަކަށެވެ. އިޝްތިރާކީންގެ ވިސްނުމަކަށް ވެގެން ދިޔައީ އެމީހުނަށް ފަހިވާގޮތަށް ޤާނޫނު އަޞާސީގައި މާއްދާތަކެއް ހިމަނައިގެން، ހެޔޮވެރިކަމެއްގައި ހިމެނޭ މުހިންމު 'ގުނަވަންތައް' އައްސިކޮށްލުމަށްފަހު ދައުލަތުގެ ބާރުތަކުގެ މައްޗަށް ގަދަވެގަތުމެވެ. މިޢުދުވާނު ހިންގުމަށްޓަކައި އެމީހުން ފައިސާ ބަހައްޓާފައިވަނީ މައިގަނޑު ދެކަމެއް ކުރާށެވެ. އެއްކަމަކީ ދީނީ ދަންނަ ބޭކަލުންގެ ރުހުން ހޯދުމެވެ. އަނެއްކަމަކީ މަޖުލީހުގެ މެމްބަރުންގެ ރުހުން ހޯދުމެވެ.

ދީނީ ދަންނަބޭކަލުން:

ރާއްޖެއަށް މިއަންނަން ފެށި ބަދަލު ދީނީ ދަންނަ ބޭކަލުންނަށް ފެނުނީ ރަނުގެ ފުރުޞަތެއްގެ ގޮތުގައެވެ. ކުރިން އެމީހުން ދީނީ ނަސޭޙަތްދީ ވަޢުޡު ބުނަމުން އައީ ހެޔޮކަމާއި ދަރުމަ އަދި ޘަވާބަށް އެދިގެންނެވެ. މިހާރު އެކަން ކުރަނީ އާމްދަނީ ހޯދުމާއި، ދުނިޔޭގެ މުއްސަނދިކަމާއި، ބާރާއި ނުފޫޒު ހޯދުމަށް އޮތް ވަޞީލަތެއްގެ ގޮތުގައެވެ. އިޝްތިރާކީންގެ އުނގަށް އެމީހުން ވަނީ ވެއްޓި ނިމިފައެވެ. ކުރިމަތީގައި ބެހެއްޓިއްޔާ ބެހެއްޓިހާ ފައިސާއެއް އެމީހުން ދަނީ ގުނަމުންނެވެ. ގިނައިން ފައިސާ ބަހައްޓާ މީހަކު އެބޭނުންވާ ގޮތަކަށް ޤުރުޢާނުގެ އާޔަތްތަކުންނާއި، ރަސޫލާގެ ސުންނަތާއި ޙަދީސުން، ހުއްޖަތާއި މާނަ ނެރެ، އިޝްތިރާކީންނަށް މަގު ފަހިކޮށްދޭ ބަޔަކުކަމުގައި އެބޭކަލުންވެ ނިމިއްޖެއެވެ. ފުރަތަމަ އެމީހުން ވަޢުޡުދީ، ދުޢާ ދަންނަވާދީފައި ވަނީ ރައީސް މައުމޫނުގެ ވެރިކަން ވެއްޓުމަށްފަހު ރައީސް ނަޝީދަށް ވެރިކަން ދެއްވުމަށް އެދިއެވެ. އެފަހުން ނުކުމެ ދެން އެބައިމީހުން ވަޢުޡުދީ ދުޢާ ކޮށްދީފައިވަނީ ކުރިއާއި ދިމާ އިދިކޮޅަށެވެ. ރައީސް ނަޝީދުގެ ވެރިކަން ރައީސް ވަޙީދު މެދުވެރިކޮށް އިޝްތިރާކީންނާއި ޙަވާލުކޮށްދެއްވުމަށް އެދިއެވެ.

މިފަދަ ބޭކަލުންގެ މިސާލަކީ ﷲ ކީރިތި ޤުރުއާނުގައި ބަޔާން ކުރައްވާފައިވާ ބަނީ އިސްރާއީލު ބާގައިގެ ޔަހޫދީންގެ މިސާލެވެ. އެމިސާލަކީ، ބަނީ އިސްރާއީލުގެ ޔަހޫދީން އެބައިމީހުންގެ މައްޗަށް ވެރިޔަކު (ރަސްކަލަކު) ދެއްވުމަށް އެދި ﷲ އަށް ދެންނެވިއެވެ. ދެން މާތްﷲ އެބައިމީހުންގެ މައްޗަށް ވެރިޔަކު ކަމުގައި ޠާލޫތު ލައްވަވައި އެކަން އަންގަވައިފިއެވެ. ދެން އެބައިމީހުން ޖަދަލުކޮށް ދެންނެވިއެވެ. ތިޔައީ ކީއްކުރާ، ކޮންކަހަލަ، ވެރިއެއްހެއްޔެވެ. އޭނާއަކަށް މުއްސަނދިކަމެއް (ފައިސާއާއި، މުދަލެއް، ދަނޑު ބިންތަކާއި، އުސްބިނާތަކެއް، ނުފޫޒާއި ބައިބޮޑު ޢާއިލާއެއް) ލިބިގެނެއް ނުވެއެވެ. ތިޔަ ކަހަލަ ވެރިޔަކު ތިމަންނާމެން ބޭނުމެއް ނޫނެވެ. ދެން ﷲ އެންގެވިއެވެ! ތިމަން ﷲގެ ދެނެވޮޑިގަތުން މާ ބޮޑެވެ. ތިމަން ﷲ ޠާލޫތަށް ޢިލްމާއި ޙިކުމަތްތެރިކަން ދެއްވީމެވެ (ބަޤަރާ ސޫރަތް: 247). އެހެންވީމާ ފައިސާއަށް ހެއްލިގެން ތިބެ ދީނުގެ ނަމުގައި މިއަދު ވާހަކަދައްކަމުން އެދާ ގިނަ މީހުންނެކޭ އެދުވަހުގެ ބަނީއިސްރާއީލު ބާގައިގެ ޔަހޫދީންނެކޭ އެއްވެސް ތަފާތެއް އެބަހުރިތޯއެވެ.