ސަމާސާ އަދަބު: ކަލޭފާނުގެ އައު އައިނު

ކަލޭފާނަކީ، އޭނާގެ ރަށުގައި ހުރި އެންމެ ބަސްވިކޭ، މީހުން ގަދަރުކުރާ އިއްޒަތްތެރި ބަނިޔާދަން ވެރިޔާ އެވެ. ލިޔެކިޔުމުގެ މަސައްކަތް، ސީދާ އޭނާޔަށް ކުރާން ނުޖެހުނަސް މީސްމީހުން ލިޔެފައި ހުށަހަޅާ ތަކެތި ބަލައި ކިޔައި މިހެން ހެދޭލެއް މާ ގިނަކަމުން ކަންނޭނގެ އެވެ. ކަލޭފާނުގެ ލޯ ހިސާބަކަށް ފުސްވާކަމަށް އޭނާއަށް ލަފާކުރެވިއްޖެ އެވެ.

މިހެންވާން ފެށުމުން އަވަހަށް މާލެ އައިސް ލޮލުގެ ކަންތަކަށް އެންމެ ރަނގަޅު ޑޮކްޓަރުންނަށް ދައްކައި ހަދައިގެން ވީ ގޮތަކީ، ގިނަ ޑަކްޓަރުން ބުރަވަނީ، ބޭރަށް ގޮސް ލޯ ދައްކާލައި މިތަނުން ހެދެން ނެތް ޓެސްޓްތައް ހަދާލައި، ގިނަ ޑޮކްޓަރުން ބުރަވާ ގޮތަކަށް ލޮލުގެ ކަންތައް ކުރިޔަށް ގެންދިޔުމަށެވެ. 

ކަލޭފާނުގެ މަހަށް ފުރާ ތިން ދޯނި އޮވެ އެވެ. ރަށުގެ ބިމުގައި ދިރޭ މުދާ އެހައި ގިނަ އެވެ. އެހެންކަމުން މުޅި ގޭތެރެއިން ވެސް ފެނިފެނި ހުންނަނީ، ތިޔާގިކަމުގެ އަސަރުތަކެވެ. 

ކަލޭފާނަކީ، އޭނާގެ މަގާމު އުފުލުނީއްސުރެ އައިނު އަޅާހިތްވާ މީހެކެވެ. އޭނާގެ ނަޒަރުގައި އެހިސާބުގެ ވެރިޔެއްގެ ގަދަރު އެންމެ ބޮޑަށް އުފުލޭ އެއްޗަކީ، އޭނާ އަޅާ އައިނެވެ. 

ކޮންމެއަކަސް ޑޮކްޓަރުންގެ އިރުޝާދާ އެއްގޮތަށް ލަސްތަކެއްނުވެ ރާއްޖެއިން ބޭރަށް ދިއުމަށްޓަކައި މާލެ އައުމަށް އޭނާ ރަށުން ފުރައިފި އެވެ. މާލެ އާދެވުމުން ވެސް އޭނާގެ އެންމެ ބޮޑު ޝައުގުވެރިކަމަކާ އެކު ނޫންކަމަށް ހަދައިގެން ހުރެ ބަލަމުން ގެންދިޔައީ، އައިނު އަޅައިގެން ތިބޭ މީހުންގެ އައިނުގެ ވައްތަރުތަކާއި ދުނިގަނޑުތަކަށެވެ. އަދި ބައެއް ދުވަސްދުވަހު، އައިނު ހަދާ ތަންތަނަށް ވަދެލައި ވެސް އުޅެ އެވެ. ހަމަ އެ ބޭނުމުގަ އެވެ. ބައެއް ރައްޓެހިން އޭނާ ފުރާ ދުވަހާ ބެހޭ ގޮތުން ސުވާލުކޮށް ހަދަ އެވެ. އަނެއް ބައި ރައްޓެހީން ކުރަން ޖެހިދާނެ އޮޕަރޭޝަނަކާ ބެހޭ ގޮތުން ސުވާލުކޮށް ހަދަ އެވެ. 

މީގެ އިތުރުން ބައެއް މީހުން ދޭ ޚަބަރުން ދަތުރު ހުއްޓާލަން ވީއޭވެސް އޭނާގެ ހިތަށްއަރަ އެވެ. އެހެންނަމަވެސް ހިތްވަރު ގަދަކޮށްލައިގެން މަސައްކަތުގައި ކުރިޔަށް ދިޔަ އެވެ. 

އެކަކު ބުންޏެވެ. އަހަރެން ލޮލުގެ ފަރުވާއަށް ދިަޔައީ ބެންކޮކަށެވެ. އެތަނުން އޮޕަރޭޝަންކޮށްފައި ދޫކޮށްލިއިރު ކަނާތު ލޯ މަރާލާފައި ވާތު ލޮލުން ބަލާލާއިރު ފެންނަނީ ކަޅު ބުޅަލެކެވެ. ނަގޫ ވެސް އޮންނަނީ ހަށިގަނޑާ ދިމާއަށް ލަބާލައިގެންނެވެ. އެވާހަކަ ޑަކްޓަރު ގާތުގައި ބުނީމާ ބުނީ، އެއީ، ގަނޑު ލޭކޮޅެއް ކަމަށެވެ. އެފިލާނީ ތަންކޮޅެއް ފަހުން ކަމަށެވެ. އެބުނާ ފަހެއް އަދި ނާދެ އެވެ. މިހާރު އެއް އަހަރު ވީއެވެ. 

އަނެކަކު ބުންޏެވެ. އަހަރެން ލޮލުގެ އޮޕަރޭޝަންކުރީ މަދޫރާއިންނެވެ. ފިސާރިތެދެކެވެ. ތެދަށް އޮންނަ ދަނޑިޔެއް، ތެދު ރޮނގެއް މިހާރު މަގޭ ލޮލަކަށް ނުފެނެ އެވެ. މުށިޖަހާފައި ވެސް މިހުންނަނީ، ކަތިކޮށެވެ. ތެދަށް ހުރި ގޮޅިއެއް ނުފެނެ އެވެ. 

މިވާހަކަތައް އަޑުއަހާފައި ކަލޭފާނު ހިތަށްއެރި އެވެ. އެހެންވިއްޔާ އަހަރެން ދާނީ، ސިންގަޕޫރަށެވެ. އެތާނގައި މިކަހަލަ ކަންތައް ބަރާބަރުވާނެ އެވެ. 

ކޮންމެއަކަސް ސިންގަޕޫރުގެ ދަތުރުގެ ތަޖުރިބާ ހުރި މީސްމީހުންނާ ވާހަކަ ދައްކައި ހަދައިގެން، ސިންގަޕޫރަށް ދާން ފުރައިފި އެވެ. އަތަނުން ލޮލުގެ އެންމެ ރަނގަޅު ޑޮކްޓަރުންގެ ނަން އޮޅުންފިލުވައިގެން ލޮލުގެ ރަނގަޅު ތަނަކަށް ހިނގައްޖެ އެވެ. ކަލޭފާނު ވަރަށް އުފާވި އެވެ. ލޮލުގެ ޓެސްޓްތައް ހަދައިދޭން ތިބީ ރީތި ޅަފުރާގެ ޒުވާން އަންހެން ކުދީންނެވެ. ވަރަށް ގަޔާވެގެން ޓެސްޓުތައް ނިންމާލުމަށް ފަހު ޑަކްޓަރާ ބައްދަލުކުރަން އޭނާގެ ކޮޓަރިއަށް ވަދެއްޖެ އެވެ.

ޑޮކްޓަރު ރިޕޯޓުތައް ބަލައި ނިންމުމަށް ފަހު، ލޯ ވެސް ދެތިން ހަތަރު ގޮތަށް ބަލައިލުމަށް ފަހު، ބުނީ ލޯ ރަނގަޅު ކަމަށެވެ. އޮޕަރޭޝަނެއް ކުރާން ނުޖެހޭ ކަމަށެވެ. ހަމައެކަނި، އައިނު އަޅައިގެން އުޅެނިކޮށް ހުރި އުނދަގޫ ވެސް ރަނގަޅު ވެދާނެ ކަމަށެވެ. ދެން އޭނާ ދިއްކޮށްލެއްވީ އައިނު ހައްދަން ނަގާފައި އޮތް އައިނު ނަންބަރާއި އެއާ ބެހޭ ލިޔުންތަކެވެ. މިދިއްކޮށްލަމުން އައިނު ހަދަން ދާންވީ ތަނުގެ އެޑްރެސް ވެސް ދިނެވެ.

ޖެހިގެން އައި ދުވަސް ޚާއްޞަކުރީ، އައިނު ހައްދާ ތަނަކަށް ދިއުމަށެވެ. އެތަނަށް ގޮސްގެން އެތަނުން، ވަރަށް ރީތި ރަން ދުނިގަނޑެއް ފެނުނެވެ. އެ ވަރަށް ހެޔޮވަރު ވެސް މެއެވެ. އެމީހުން ބުނީ، މާދަމާ ބަލާ އައުމަށެވެ. މެންދުރު ފަހު 2.00 އަށެވެ.

ކަލޭފާނު ހަމަ، ގަޑިއަށް އެތަނަށް ގޮސް އައިނު އަޅާލާފައި އެތާ ހުރި ލޯގަނޑުން ބަލައިލުމާ އެކު ހީވީ، އަންހެންކުއްޖަކު މިހެން ބުނެލިހެންނެވެ. "އައްދޭ ތިޔައީ، މިހާރު މުޅިން އެހެން މީހެއްނު؟" ކަލޭފާނު އުފާވެލާފައި އަގުއަދާކޮށް ނިންމާލުމަށް ފަހު، ހޮޓަލަށް ހިނގައްޖެ އެވެ. 

ކަލޭފާނު، ސިންގަޕޫރު ދަތުރު ނިންމާލުމަށް ފަހު މާލެ އަތުވެއްޖެ އެވެ. މާލޭގެ ރަހުމަތްތެރިން ވެސް އެ އައިނަށް ވަރަށް ތާރީފުކުރި އެވެ. ކަލޭފާނަކީ ރީތި، ހޮވަން ދަންނަ މީހެއްކަމުގައި އެމީހުން ބުންޏެވެ. ކަލޭފާނުގެ ދަތުރު އަވަސްކޮށްލައިގެން ރަށަަށް ދާން ފުރައިފި އެވެ. ކަލޭފާނު ދުރުވާ ވާހަކަ މުޅި ރަށުގައި ފެތުރިގެންފި އެވެ.

ކަލޭފާނުގެ އުޅަނދު ރަށުގެ ބަނދަރަށް ވަދެގެން އައި އިރު ރަށުގެ އެތައް މިތަނުން ކުދިބޮޑު އެންމެން އަތިރި މައްޗަށް ޖަމާވަމުން ދިޔައިރު ހީވަނީ، ހިނި ދަރުގަނޑަކުން ހިނި އުތުރޭ ހެންނެވެ. 

އުޅަނދު ފާލަމު ކޮޅަށް މަޑުކޮށްލީމާ އެންމެ ކުރިން ފާލަމަށް ފައިބަން ހަމަޖެއްސީ ކަލޭފާނެވެ. ރަށުގެ ރައްޔިތުން އޭނާގެ އިންތިޒާރުގައި ތިބީތީ އެވެ. 

އުޅަނދުން ބޭރަށް ނުކުންނަވާފައި ކަލޭފާނު ހިތަށްއެރި އެވެ. ރަށަށް ފައިބަންވާނީ، މި ރީތި އައިނު އަޅާލައިގެންނެވެ. މިހެން ހީކޮށް ފާލަން މައްޗަށް ފޭބުމަށް ފަހު، އައިނު ނަގާ އައިނު ފޮށީގައި އޮތް މަޚުމާ ފޮތިކޮޅުން އޭގެ ދެ ލޯ ފޮހެލައިފި އެވެ. ދެން އައިނު އަޅައިލުމަށް ފަހު ތިރިޔަށް ފައިބަން ހުރި ހަރުފަތްތަކުގައި ފައި އަޅާލަން ގަސްތުކުރި އެވެ. އެވަގުތު އައިނުގައި ފޮތް ބަލަން ހުރި ތަންކޮޅާއި ދިމާވެފައި ހުރުމާ އެކު ފުރަތަމަ ހަރުފަތްގަނޑުގައި އަޅަން ގަސްތުކުރިފައި ދެވަނަ ހަރުފަތާ ދިމާއަށް ދިޔަހެން ހީވި އެވެ. 

ސަހަރޯ އެވެ! ކަލޭފާނު އެހިސާބުން ނައްޓާލައިގެން ބުރުއަޅަމުން އަޅަމުން އައިސް އެޖެހުނީ މޫދަށެވެ. ކަލޭފާނު ތެމިފޯވީ އެވެ. ޖީބުގައި ހުރި ތަކެތި ގިރިގެން ދިޔަ ކަހަލ ައެވެ. އެއޮށް ފަދަ ރީތި އަގުބޮޑު އައިނު ވެސް އެކަތިވީތަން އަނެކައްޗަށް ނޭނގި ކުދިކުދިވީ އެވެ.