Dhivehi Bas

ރައީސް ޑރ.ވަޙީދުގެ އިހަވަންދޫ ދަތުރު

ތުއްތަނިކު

"بســم اللّـه الرّحمـن الرّحيــم

اَلحَمْـدُ لِلّـهِ رَبّ العَـالَمِـين‘ وَالصّـلاة وَالسّلام علـى محـمَّدٍ‘ وعلى آلـه وصحبـه أجمعـين.

ޢިއްޒަތްތެރި ރައްޔިތުންގެ މަޖިލީހުގެ މެންބަރުން، ވަޒީރުންގެ މަޖިލީހުގެ ޢިއްޒަތްތެރި ވަޒީރުން. އަދި މިތަނަށް ވަޑައިގެން ތިއްބެވި އެންމެހާ ޢިއްޒަތްތެރިން. އިހަވަންދޫގެ ލޮބުވެތި އަޚުންނާއި އުޚުތުން.

السّــلام عليــكم ورحـمــة اللّـه وبـركاتـه" 

ރައީސް ޑރ. ވަޙީދު އިހަވަންދޫގެ ރައްޔިތުންނާ ބައްދަލުކުރައްވައި ވާހަކަ ފުޅު ދައްކަވަންފެއްޓެވީ މިދެންނެވި އިބާރާތުންނެވެ. ރައީސް ނަޝީދު ވާހަކަ ފުޅު ދައްކަވަން ފައްޓަވާގޮތާ ތަފާތުކޮށްނެވެ. 

ރައީސުލް ޖުމުހޫރިއްޔާގެ ވާހަކަފުޅުގެ ކުރިއަށް ޖަލްސާ ތަޢާރަފްކުރެއްވުމާއި އެކު ރައްޔިތުން މަޖިލީހުގެ ކާށިދޫ ދާއިރާގެ އިއްޒަތްތެރި މެންބަރު އަބްދުﷲ ޖާބިރުގެ ވާހަކަ ފުޅާ އެކު ދެ ބޭފުޅުން ވާހަކަ ދެއްކެވި އެވެ. 

ޖަލްސާ ތަޢާރަފްކޮށް މަރުހަބާދެންނެވީ އިހަވަންދޫ ކައުންސިލް އިދާރާގެ ޒިންމާދާރުވެރިޔާ އުޑުވިލާގޭ މުހައްމަދު އިބްރާހީމް އެވެ. ޤުރުއާން ކިޔަވައިވިދާޅުވީ އިސްލާމް މުދައްރިސް ރޯޒީވިލާ އަހުމަދު ރަޝީދު އެވެ. 

ޖަލްސާ ތަޢާރަފްކުރުމަށް 45 މިނެޓް ހޭދަވިއެވެ. މީހުން ފޫހި ވިއެވެ. ދެއްކެވި ވާހަކައެއް ހަނދުމައެއް ނެތެވެ.   ހޯރަފުށީ އާދަމް ސަލީމުގެ ޅެންބައިތެއްވެސް ވިދާޅުވިއެވެ. 

" އެމާއެއްލާލެވޭކަށް ނެތް.................." މިޅެންބައިތެވެ. 

ޖަލްސާގައި އަޅުގަނޑު އިނީ ހޯރަފުށީ އާދަމް ސަލީމްގެ ބޭފުޅެއް ކަމަށްވާ މުހައްމަދު ސަލީމާއި ރައީސުލް ޖުމުހޫރިއްޔާގެ ޕޮލިޓިކަލް އެޑްވައިޒަރ ތަޢުފީޤް / ޓޯޕީ ފަހަތްޕުޅުގައެވެ. ޓޯޕި ސަމާސާ ރާގެއްގައި ވިދާޅުވި އެވެ. އަނެއްކާ މިދައްކަވަނީ ކޮންވާހަކައެއްތޯ އެވެ. ދެއަތްބަށް މިބޭފުޅާ ކައިވެންޏެއް ކުރައްވަން އުޅުއްވަނީ ތޯ އެވެ. 

އަޅުގަނޑު ހިތަށް އެރިއެވެ. އެޅެންބައިތުގެ މާނަ މިފަދަ މާހައުލެއްގައި ޓޯޕީއަށް ފަހުމުވާނެނަމަ އޭ! މުހައްމަދު އިބްރާހިމް އަށް އެ ވިދާޅުވެވުނީ ރައީސް ނަޝީދަކީ އަދިވެސް މިގައުމުގެ ރައީސް ކަމެވެ. ޑރ.މުހައްމަދު ވަހީދަކީ ރައީސް ނޫންކަމުގައި ބަލައިނުގަނެ ވާކަށްވެސް ނެތް ވާހަކަ އެވެ. މުހައްމަދު އިބްރާހިމް އެދިގު ތަޢާރަފުން ކާށިދޫ މެންބަރު އަބުދުﷲ ޖާބިރަށް ދޭހަވީ އެންމެ އެއްޗެކެވެ. އަންނި ރައީސް ވީ އެންމެ އަވަހަކަށް ހައްޔަރުކުރަން ވެއްޖެކަމަށެވެ. އެކަން ކުރައްވާނެ ކަމަށް ޖާބިރުގެ ވާހަކަ ފުޅުގައި ވިދާޅުވި އެވެ. ދެން ޖަލްސާއަށް ހާޒިރު އެންމެން ހޯބޯލަވާ ހަޅޭލަވައިގަތެވެ. މައުލޫއަކީ މިއެއް ނޫނެވެ. ރައީސް ޑރ.ވަހީދު އިހަވަންދޫއަށް ކުރެއްވި ދަތުރުގެ ވާހަކައެވެ. 

ރައީސުލް ޖުހޫރިއްޔާގެ ވާހަކަފުޅުގައި ވިދާޅުވިއެވެ. "އަޅުގަނޑު މިރަށަށް އައުމުގެ ކުރިން، ބައެއް ބޭފުޅުން ވިދާޅުވި، ފަހަރެއްގައި މިރަށަށް އަޅުގަނޑު އަންނައިރުގައި، ބައެއްކަހަލަ އަޑުއަޑު އިވިދާނޭ. ކުޑަކޮށް އެހެން ފިކުރުގެ ބޭފުޅުންވެސް އެބައުޅުއްވައޭ. ނަމަވެސް، އަޅުގަނޑު މިރަށަށް އައިސް ފޭބިއިރުގައި، އަޅުގަނޑަށް ހަމަ އިވުނީ ހަމަ އެންމެ އަޑެއް. ތަރުޙީބުގެ އަޑު" 

އެމަނިކުފާނުން ވަޑައިގަތުމުގެ ކުރީން އަދި ވަޑައިގެންނެވިއިރު ލޯއަޑް ސްޕީކަރ ކަރުކޮށްފައި އޮތް ޕިކަލެއްގައި އެމްޑީޕީ އަށް ސަޕޯޓްކުރާ މީހުން ލަވަޖަހަމުން އަޑުގަދަކުރަމުން ގެންދިޔައެވެ. ހަމަ ނުޖެހުންވެސް ހިންގިއެވެ. ތަރުހީބުގެ އަޑުން އަޑުގަދަކުރައްމުން ގެންދިއައީ މުދިމް ހުސެއިން ރަޝީދާއި މިރާޒް ފާރޫގް އެވެ. މި ދެބޭފުޅުންގެ އަޑުވަރަށްވެސް ގަދައެވެ. ދެބޭފުޅުންވެސް ތިބެއްވީ ލައުޑް ސްޕީކަރ ހަރުކޮށްފައިވާ ޕިކަޕެއްގައެވެ. 

ރައީސުލް ޖުމުހޫރިއްޔާ ވަޑައިގަތުގެމުގެ ކުރިން އެމްޑީޕީގެ ސަޕޯޓަރުންނާއި ފުލުހުން ކުރިމަތިލައި ޝުޢޫރުފާޅުކުރި އެމްޑީޕީގެ 14 އެކްޓިވިސްޓުންވަނީ  ވަރަށް އަނިޔާވެރިކޮށް ފުލުހުން ހައްޔަރުކޮށްފައެވެ. އެމްޑީޕީގެ އެކްޓިވިސްޓުން ޝުޢޫރުފާޅުކުރަމުން ގެންދިޔައީ ރައީސަށް މަރުހަބާ ދެންނެވުމަށް ކަނޑައަޅާފައިވާ ސަރަހައްދުގައި ދަމާފައިވާ ޕޮލިސް ލައިންގެ ފަހަތުގައި ތިބެގެންނެވެ. އެމްޑީޕީގެ ސަޕޯޓަރުން ތިބީ ކާޅު ހިފައިގެންނެވެ. ކާޅު ފެނުމާއެކު ފުލުހުން އަސޭމިރުސް ސްޕްރޭ ކާޅު ގެންގުޅުނު މީހުން ގެ ލޮލަށް ޖަހައި ހުރިހާ ކާޅެއް އަތުލިއެވެ. އަދި  ފުލުހުންގެ މަރުކަޒަށް ކާޅުތައް ވައްދައި އެތަކެއްޗަށް ހިމާޔަތްދިންއިރު ، ފުލުހުންގެ އަމުރަށް ނުކިމަންތެރިވި މީހުންނަށް ލާއިންސާނީ އަނިޔާދެމުން ގެންދިޔައެވެ. ދުރުގަ ހުއްޓަސް ވަކިމީހަކު ބުނާ މީހަކު ފުލުހުން ލުހެ އުފުރަމުން ދިޔައީ އެޔެއް މިޔެއް ނުބަލައެވެ. ހަމަ އެވަގުތު އެމްޑީޕީގެ ސަޕޯޓަރުން ލޮނުމިރުސް ވައިގެ ތެރެއަށް ބުރުވައިލި އެވެ. މިކަމުގެ ދިލަ އެރީ ބޮޑެތި ކެމެރާތައް ކޮނޑުޖަހައިގެން ތިބި ނޫސްވެރިންނަށެވެ.

ޕޮލިސް ލައިން އެތެރޭގައި ރައީސްގެ އިސްތިގްބާލުގައި ތިބި އެތައްބަޔަކާ ރައީސް ސަލާމް ކުރައްވަމުން ދިޔައިރު ، ލައިންގެ ބޭރުގައި އެމްޑީޕީ މީހުން ދިޔައީ އިޖުތިހާދު ކުރަމުންނެވެ. ޝުޢޫރު ފާޅުކުރަމުންނެވެ. އަވަސް އިންތިހާބަކަށް ގޮވަމުންނެވެ. އެމަނިކުފާނަށް މަރުހަބާ ދެންނެވުމަށް އައިސްތިބި ޒުވާން ނޫކަށި ކުދިންކޮޅެއް އަވަސް އިންތިޙާބެއް ނުބޭއްވުމަށް ނަޞޭޙަތްތެރިވިކަމަށް އެމަނިކުފާނުން ކުރެއްވި ޓްވީޓެއްގައި ވެއެވެ. 

އިހަވަންދޫގެ ރައްޔިތުންނާ ބައްދަލުކުރައްވައި ދެއްކެވި ވާހަކަ ފުޅުގައި އެމަނިކުފާނުން ވިދާޅުވީ " މިރަށަށް އައިސް އަޅުގަނޑު މިވީ ކުޑަވަގުތުކޮޅުގެ ތެރޭގައި އަދި މިތަނުން އަޅުގަނޑަށް މިފެނުނު މަންޒަރުންވެސް އަޅުގަނޑަށް ކުއްލިއަކަށް ވިސްނުނު އެއްޗެއްގެ ވާހަކަ ދަންނަވާނަން. އަޅުގަނޑަށް ވިސްނުނުގޮތުގައި، ދިވެހިރާއްޖެއަކީ ވަރަށް ފުރިހަމަ ޑިމޮކްރަސީއެއް އޮތް ޤައުމެއް. އަދި ރާއްޖޭގެ ރައްޔިތުންގެ ޠަބީޢަތާއި، އަޚްލާޤާއި ދިރިއުޅުން ބިނާވެފައި ހުރިގޮތުން، ދިވެހިރާއްޖެއަކީ ފުރިހަމަ ޑިމޮކްރަސީއެއް ޤާއިމްކޮށް ހިންގުމަށް، ހަމަ އެންމެ ކުޅަދާނަ، އެންމެ އެކަށީގެންވާ އެއް ޤައުމު. މިހެން މިދެންނެވީ ކީއްވެގެންތޯ؟ ތިޔަބޭފުޅުން ވިސްނާވަޑައިގަންނަވާ، މިއަދު ދިވެހިރާއްޖޭގައި މި ތަފާތު ފިކުރުގައި މިއުޅޭ ހަމައެކަނި ޕާޓީގެ ބޭފުޅުން، މިއަދުވެސް އެބޭފުޅުން މަޑުމައިތިރިވެވަޑައިގެންފިނަމަ، އެހެން މީހުންނާ އެކީގައި މަސައްކަތް ކުރައްވަން ފަށްޓަވައިފިނަމަ، މި ރާއްޖެ އޮންނާނީ، ވަރަށް ޞުލްޙަވެރި، ވަރަށް އޮމާންކޮށް، އަމާންކޮށް އޮތް ތަނެއްގެ ގޮތުގައި. މި ރާއްޖޭގައި ހަމަނުޖެހުމެއް އުފައްދާނެ ހަމަ އެއްވެސް މީހަކު ނުހުންނާނެ" ކަމުގައެވެ. 

އެ މަނިކުފާނު ވިދާޅުވި ގޮތުގައި ވޭތުވެދިޔަ ހަތަރު މަހެއްހާ ދުވަހުގެ ތެރޭގައި، ގައުމުގައި ހަމަނުޖެހުން އުފައްދައި ނުރައްކާތެރިކަމާއި ބިރުވެރިކަން އިތުރުކުރުމަށް މަސައްކަތްކޮށްފައިވަނީ މަދު ބައެކެވެ. އެއީ އެމްޑީޕީގެ ތެރޭގައި ވެސް ތިބި ވަކި ފިކުރެއްގެ ބައެއް ކަމަށް އެ މަނިކުފާނު ވިދާޅުވި އެވެ.

"އެ ފިކުރަކީ އަޅުގަނޑު ދަންނަވާ ގޮތުގައި އަދި އެމްޑީޕީގެ ފިކުރެއް ވެސް ނޫން. އެމްޑީޕީގެ ތެރޭގައި ތިބި މަދު ބަޔަކު، ވަކި ބޭފުޅެއްގެ ފަހަތްޕުޅުގައި ގެންގުޅުއްވާ އާދަޔާ ހިލާފު، ނާތަހުޒީބު، ނާޑިމޮކްރެޓިކް ފިކުރެއް. އެ ފިކުރުގައި ތިމަންނަމެން ބޭނުން ނޫން ގޮތަކަށް ކަމެއްދާ ކަމަށްވާނަމަ، އެބަޔަކަށް ހުރަސް އެޅުމަށްޓަކައި ކޮށްފައި ނުކުރާނެ ކަމެއް ނޯވޭ. އެ ވަރިހަމަ ބައެއްގެ ފުރާނަ އަށް ގެއްލުން ލިބުނަސް. އެ ވަރިހަމަ ރައްޔިތުންގެ މުދަލަށް ގެއްލުން ލިބުނު ކަމުގައިވީ ނަމަވެސް. އެ މީހުންގެ މަގްސަދު ހާސިލްކުރުމަށްޓަކައި ކޮންމެފަދަ ކަމެއް ކުރުމަށް ވެސް އެ ފިކުރުގައި ތިބީ ތައްޔާރަށް،" ރައީސް ވަހީދު ވިދާޅުވި އެވެ.

އެ މަނިކުފާނު ވިދާޅުވީ ފެބުރުއަރީ 7ގެ ހާދިސާގެ ކަންކަން ވެސް މިހާރު ނިމިގެން ގޮސްފައިވާ ކަމަށާއި އެކަމުގައި ހިތްހަމަނުޖެހިގެން އުޅުނު މީހުން ވެސް ބަލިކަށިވެފައިވާ ކަމަށެވެ. އެހެންކަމުން ކައިރި މުސްތަގުބަލެއްގައި އެއްބައިވަންތަކާއި އުޚުވަތްތެރިކަމާ އެކު އެންމެން މަސައްކަތްކުރާ ތަން ރާއްޖެ އިން ފެންނާނެ ކަމަށް ގަބޫލުފުޅުކުރައްވާ ކަމަށް ވެސް ރައީސް ވަހީދު ވިދާޅުވި އެވެ.

އެ މަނިކުފާނުގެ ވާހަކަފުޅުގައި އެމްޑީޕީން އުސް ފަސްގަނޑު ބޭނުންކުރަމުންދާ ގޮތުގެ މައްޗަށް އަލިއަޅުއްވާލައްވައި އެއީ އެ ބިން ބޭނުންކުރެވިގެންވާނެ ގޮތެއް ނޫން ކަމަށް ވެސް ވިދާޅުވި އެވެ.

"ވަކި ބަޔަކު މާލޭގެ ވަކި ސަރަހައްދެއް ނަގައިގެން، އެ މީހުންގެ ބޭނުމަށްޓަކައި އެތަން ބޭނުންކުރަމުން މިގެންދަނީ. އެހެން ބަޔަކަށް އެތަނަށް ނުވަދެވޭ ގޮތަށް. އާންމު ޕާކްތަކާއި، ހުސް ބިންތަކަކީ ރައްޔިތުންގެ އެންމެން ބޭނުންކުރަން ކަނޑައެޅިފައިވާ ތަންތަން. އެ ތަންތަނަށް ވަކި ބަޔަކު ވަދެ، އެތާނގައި ކޭމްޕްޖަހައި އެތާނގައި ގެދޮރުއަޅައި، އެތާނގައި ފާލަން އަޅާ މި ކަންކަން ކުރުމަކީ އެއީ އެއްގޮތަކަށް ވެސް ގާނޫނު ތަން ދޭ ކަމެއް ވެސް ނޫން،" ރައީސް ވިދާޅުވި އެވެ.

"ކޮންމެ ގޯސް ކަމަކަށް ހުއްޓުމެއް އަންނަންޖެހޭނެ. އެ ގޮތުން، ގާނޫނާއި ގަވާއިދާ ހިލާފަށް ބަޔަކު އުޅެން ފެށުމުން، އެކަން ހުއްޓުވުމަށްޓަކައި ވެސް މަސައްކަތްތަކެއް ކުރަންޖެހޭނެ. ސަރުކާރުގެ ފަރާތުން އެ ކުރަންޖެހޭ މަސައްކަތްތައް ކުރައްވަމުން ގެންދަވަނީ."

ރައީސް ވަހީދު ވިދާޅުވީ ގާނޫނާ ހިލާފަށް ކަންކަންކުރުމުން އެކަން މުއައްސަސާތަކުން ހުއްޓުވާނެ ކަމަށެވެ. އެ މަނިކުފާނު ފާހަގަކުރެއްވި ގޮތުގައި ރައީސުލް ޖުމްހޫރިއްޔާ އަށް ނިސްބަތްކުރައްވައި ރައްޔިތުން ކޮންމެ އެއްޗެއްކީ ނަމަވެސް، އެ ދައްކާ ވާހަކައަކުން އެ މީހަކު މި ސަރުކާރުން ބަންދެއްނުކުރާނެ އެވެ.

"މިހާރު އަޅުގަނޑު ޔަގީންކޮށް އަރުވަން ތިޔަ ބޭފުޅުންނަށް. ދެނެއް ހަމަގައިމު ވެސް އަޅުގަނޑުމެން ދިވެހި ރާއްޖޭގައި މިއޮތް ސަރުކާރު ހިންގުމުގެ އެކިއެކި މަގާމުތަކުގައި ތިއްބައެއް، އެއްވެސް މީހަކު އެ މީހަކު ދައްކާ ވާހަކައަކުން، ކުރާ ކަމަކަށް ޝަރީއަތުގެ ހުކުމެއް ނެތި ޝަރީއަތުގެ އެންގުމެއް ނެތި ހަމަ ގޮސް މީހަކު ތަނެއްގައި ހުއްޓާ ހިފާ ހައްޔަރެއް އަޅުގަނޑުމެން ނުކުރާނެ،" ރައީސް ވަހީދު ވިދާޅުވި އެވެ.

އިހަވަންދޫގެ ތަރައްގީއާ ބެހޭގޮތުން ރައީސް ވަހީދު ވިދާޅުވީ " އިހަވަންދޫގެ ތަރައްޤީއަށްޓަކައި މިހާރުވެސް ތަފާތު މަޝްރޫޢުތައް ހިނގަމުން އެބަދޭ. އެގޮތުން އަޅުގަނޑު ވަރަށް އުފާކުރަން، މިރަށުގެ ބަނދަރު ހެދެމުންދާތީ. އިރާދަކުރެއްވިއްޔާ، ބަނދަރުގެ މަސައްކަތް، ބާރަށް ކުރިއަށްގޮސް، ވަރަށް ކައިރި މުސްތަޤްބަލެއްގައި ބަނދަރު ނިމޭނެ. އަދި ހަމައެހެން، މި ސްކޫލްގެ ޢިމާރާތްވެސް މިހާރުވަނީ 12 ކްލާސްރޫމްގެ ޢިމާރާތް ހަދާ ނިމިފައި. ވަރަށް ކައިރި މުސްތަޤްބަލެއްގައި، އެ ޢިމާރާތަށް ބޭނުންވާ ފަރުނީޗަރުވެސް ލިބި، އެތާނގައި ކިޔެވުން ފެށޭވަރުވާނެ ކަމަށް އަޅުގަނޑު އުންމީދު ކުރަން. މީގެއިތުރުން، މިހާރު ޔޫ.އެން.ޑީ.ޕީ.ގެ އެހީގައި، ފެނުގެ ނެޓްވަރކެއް އެޅުމުގެ މަސައްކަތްތަކެއް ހިނގަމުންދާ ކަމަށް އަޅުގަނޑަށް މަޢުލޫމާތު ލިބިފައި އޮތީ. ނަމަވެސް، މިރަށުގައި ނަރުދަމާގެ ނިޒާމް ޤާއިމް ކުރުމުގެ މަސައްކަތް އަދި ފެށޭ ގޮތަށް ހަމަޖެހިފައި އޮތް ކަމަކަށް އަޅުގަނޑަކަށް މަޢުލޫމާތު ލިބިފައެއް ނެތް. އެހެންނަމަވެސް، އިރާދަކުރެއްވިއްޔާ، އަޅުގަނޑުމެން ދެން މި އާ ޕްރޮޖެކްޓްތައް ރާވަމުން ގެންދާއިރުގައި، މިރަށުގެ ނަރުދަމާގެ ކަންތައްވެސް، އާ މަޝްރޫޢެއްގެ ގޮތުގައި ހިމަނާނެ " ކަމަށެވެ.