ކުރީ ޒަމާނުގައި އިންސާނާގެ އިނގިލީގެ ނިޝާންތަކާމެދު މާބޮޑު އެއްޗެއް އިންސާނުންނަށް އެނގިފައެއް ނުވެއެވެ. މާބޮޑު ހޯދުންތަކެއް ހޯދިފައެއް ނުވެއެވެ. ނަމަވެސް 1856 ވަނަ އަހަރުން ފެށިގެން އިންސާނާގެ އިނގިލީގެ ނިޝާންތަކާމެދު ހޯދުން ތަކެއްވަނީ ހޯދާފައެވެ. މި ހޯދުންތައް ހޯދީ ގެން ގިންސެން ނަމަކަށް ކިޔާ އިނގިރޭސި ވިލާތުގެމީހެއްކެވެ. އޭނާ ހޯދީ ކޮންމެ އިންސާނެއްގެ އިނގިލިތަކުގެ ކުރީގައި ހާއްޞަ ރޮނގުތަކެއް ވާކަކެމެވެ. މިރޮނގުތައް ދެމީހަކު އެއްގޮތް ނުވާކަމެވެ. މި ހޯދުންތަކުގެ އަލީގައި މިކަންތައްތައް ވަނީ އިތުރަށް ދިރާސާކޮށް ހޯދާފައެވެ.
މިހޯދުމަކީ އިންސާނާ އޭނާގެ ކާކުކަން އަންގައި ފުރިހަމަ އައިޑެންޓިޓީ ކާޑެކެވެ. ކުށްވެރިން ހޯދުމުގައި ފުލުހުންދަނީ އިނގިލީގެ ނިޝާން ބޭނުން ކުރަމުންނެވެ. ފޮރެންސިކް ސައިންސްގެ އެހީގައި ކުށްވެރިން ދެނެގަތުމަށެވެ. އެތައް ބިލިއަން އިންސާނުން ދުނިޔޭގައި އުޅޭއިރުވެސް އެއްވެސް އިންސާނެއްގެ އިނގިލީގެ ނިޝާން އެއްގޮތެއް ނޫނެވެ. ނިބޫ މީހުންގެ ސޫރަ ކޮންވެސް ވަރަކަށް ވައްތަރަސް އިނގިލީގެ ނިޝާން ތަފާތެވެ. ހަމަ މުޅިން ތަފާތެވެ.
އިންސާނާގެ ހަށިގަނޑުގައި ފެންނަން ހުންނަ ސިފަތައް ބަދަލުވެއެވެ. އުމުރުން ދުވަސްވުމާއި ޖިސްމާނީ އަދި ނަފުސާނީ ގޮތުން ލިބޭ އަނިޔާއާއި ގެއްލުމުގެ ސަބަބުންނެވެ. ނަމަވެސް އިނގިލީގެ ނިޝާނެއް މިއިން ސަބަބަކުން ބަދަލެއް ނާދެއެވެ. މިއައިޑެންޓީ ކާޑެއް ބަދަލެއް ނުކުރެވޭނެ އެވެ. އަތްލާކޮންމެ ތަނެއްގައި މިނިޝާންތަކުން އިންސާނާގެ އޭނާގެ އިނގިލިތަކުގެ ސޮއި އެޅެއެވެ. އެކަމުން އޭނާއަށް އިންކާރު ނުކުރެވޭ ބީދައަކުންނެވެ. އިންސާނާ އޭނާ އެންމެ ފަހު ދުވަހާ ހަމަޔަށް މިނިޝާންތައް ބަދަލުނުވެ ދެމިހުރެއެވެ. މުސްކުޅިވުމަކުން ، ހަންގަނޑު އެނދުމަކުން ، އަދި އެހެންގޮތަކުންވެސް މިނިޝާންތަކެއް ބަދަލެއް ނުވެއެވެ.
މިނިޝާންތައް އިންސާނާގެ ހަށިގަނޑުގައި އުފެދެންފަށާނީ، މައިމީހާގެ ބަނޑުގައި އިންސާނާ ގަރުބަގަނެ އެންމެ 3 މަހު ގައެވެ. ކުރީޒަމާނުގައި އިނގިލީގެ ނިޝާނަށް މާބޮޑު ސަމާލުކަމެއް ދެވިފައި ނެތަސް ، ނެތުމުގެ ތެރެއިން އިންސާނާ އުފައްދަވައި ، އެއިންސާނާ މަރުވުމަށްފަހު ، އަލުން ދިރުއްވާ މަހުޝަރުކުރައްވާ ކަށަކުޅަދުންވަންތަ މާތްﷲ ސުބުހާނަހޫ ވަތަޢާލާވަނީ ކީރިތި ގުރުއާނުގައި އިނގިލީގެ ނިޝާނުގެ ވާހަކަ ބަޔާންކުރައްވާފައެވެ.
ސޫރަތުލް ގިޔާމާގެ 3ވަނަ އާޔާތާއި 4 ވަނަ އާޔަތުގެ މާނާގައި ވެއެވެ. " އިންސާނާ ހީކުރަނީ، ތިމަންރަސްކަލާނގެ އޭނާގެ ކަށިތައް އެއްނުކުރައްވާނެ ކަމަށްހެއްޔެވެ؟ އެހެންނަކުން ނޫނެވެ. އެ އިންސާނާގެ އިނގިލިތަކުގެ ކުރިތައް ހަމަކުރެއްވުމަށްވެސް، ތިމަންރަސްކަލާނގެ ކުޅަދުންވަންތައެވެ. "
ގިޔާމަތްދުވަހަށް އީމާންނުވާ މީހުން ، އަލުން އިންސާނާ އުފެއްދުމާއި ދިރުއްމުމާއި މެދު ސުވާލުކޮށް ޖަދަލުކޮށް ހަދައެވެ. މިފަދަ މީހުން ގަބޫލުކުރާގޮތުގައި އިންސާނާ މަރުވުމަށްފަހު އޭނާގެ ކަށިތައްފީވެ ، ބިމުގެ ވެއްޔަށް ބަދަލުވެގެން ދިއުމަށްފަހު އަލުން އެކަށިތަކަށް ދިރުމެއްއައުމަކީ މުސްތަހީލް ކަމެކެވެ. ނަމަވެސް ފުރަތަމަ ފަހަރަށް އިންސާނާ ހަލްގުކުރެއްވުމާއި މެދު ފިސްނާލައިފިނަމަ، ދެވަނަ ފަހަރަށް އަލުން ދިރުއްވުމަކީ މާފަސޭހަކަމެއް ކަން ގަބޫލުކުރެވެއެވެ.
ޔާސީން ސޫރަތުގެ 78، 79 ވަނަ އާޔަތުގެ މާނާގައި ވެއެވެ. '' އަދި އެ އިންސާނާ ތިމަންރަސްކަލާނގެއަށް މިސާލެއް ޖެއްސެވެ. އަދި އޭނާ ހެއްދެވިގޮތް އޭނާ ހަނދުމަނައްތައިލީއެވެ. އޭނާ ބުންޏެވެ. ކަށިތައް ފީވެ، ހަލާކުވެފައިވަނިކޮށް، އެތަކެތި ދިރުއްވާނީ ކާކުހެއްޔެވެ؟ ކަލޭގެފާނު ވިދާޅުވާށެވެ! އެ ކަށިތައް އަލުން ދިރުއްވާނީ، ފުރަތަފަހަރު އެކަށިތައް އުފެއްދެވި ރަސްކަލާނގެއެވެ. އަދި އެކަލާނގެއީ، ހުރިހާ މަހުލޫޤުން ގެ ކަންތައް މޮޅަށް ދެނެވޮޑިގެންވާ ރަސްކަލާނގެއެވެ."
މިއާޔަތްތަކާމެދު ފުންކޮށް ވިސްނާލައިފިނަމަ، ދޭހަވަނީ އިންސާނާގެ އިނގިލިތަކުގެ ކުރިތަކުގައި އަދި އިންސާގެ ހަށިތަކުގައި ޙާއްޞަ ސިފަތަކެއް ލައްވާފައިވާކެމެވެ. އަދުގެ ކުރިއަރާފއިވާ ސައިންސްގެ އަލީގައި ކީރިތި ގުރުއާނުގެ މިއިލްމީ މުޢުޖިޒާތްވަނީ ސާބިތުވެފައެވެ. ވިސްނާފިކުރުކުރާބަޔަކަށް މިކަމުގައި ހެކިތަކެއްވެއެވެ.
Comments