މިއަޑުތައް އަހާނެ ކަންފަތެއް އަދަކުނެތެވެ. މިއިހުސާތައް އިހުސާސްކުރާނެ ހަމެއް، ހިތެއް ނެތެވެ. މިވާހަކަތައް ދައްކާނެ ދުލެއް ނެތެވެ. އިސްލާޙަށް ، އިސްވާނެ މީހަކު ނެތެވެ. ނަމަވެސް އިހުސާސްތައް ހިތުގައި ބަހައްޓައިގެން ބުނެދޭކަށް ނެތީމެވެ. ނުބުނެމިތާ ހުރެވޭކަށްވެސް ނެތެވެ. މިސްރާބު މިދަނީ އަޅުވެތިކަމުގެ ކިއްލާއަކަށެވެ. "ރަށްހިންގާ" "ބޮޑުބާުރުން"ގެ އަޅުވެތިކަމަށެވެ. ރަށަށްބޭނުންވާ ޚިދުމަތެއްވެސް، ތަރައްގީގެ މަޝްރޫއެއްވެސް އަންނާނީ "ބޮޑުބާރުން"ގެ ތަރައްގީގެ ޕްލޭންގެ ދަށުންނެވެ. ގައުމީތަރައްގީގެ ޕްލޭން އޮތީ "ބޮޑުބާރުން"ގެ އަންބޮނޑިދަށުގައެވެ. "ބޮޑުބާރުން" ހަދަނީ ތަޞަައްވަރެކެވެ.
އެ ތަޞައްވަރުގައި އޮވެއެވެ. ކުންފުނިތަކާއި ކޯޕަރޭޝަންތަކުގެ ވަޒީފާތަކަށް ޝަރުޠުހަމަވާނީ "ބޮޑުބާރުން"ގެ ރުހުން ލިބިގެންވެ. މިދާކަށް ދުވަހު ރަށްޓެހި ޒުވާނަކު ފެނިއްޖެއެވެ. އަހާލީމެވެ. އޮފް ޑޭ އަކަށް ޖައްސާލީތޯ އެެވެ! ޖަވާބުގައި ބުންޏެވެ. ނޫނެކެވެ. ވަޒީފާދޫކޮށްލާފައި އައިސް ޕްލާންޓްގެ ވަޒީފާއަށް ބަދަލުވީ އެވެ. އަހާލީ މެވެ. އޯކޭ ވެއްޖެ ހެއްޔެވެ! އޯކޭވާނެއްނު. "ބޮޑުބާރުން" އޯކޭ ދީއްފެވެ. ހެވިލާފައި ޒުވާނާ ޖަވާބު ދިނެވެ.
މެއި 24 ވަނަ ދުވަހު ފެނިއްޖެ އެވެ. ހަވީރުނޫހުގެ ސުރުހީތަކުންނެވެ. " އިހަވަންދޫގައި ފެލިވަރު ހިންގާ އައިސް ޕްލާންޓްގެ މަސައްކަތް ވަގުތީ ގޮތުން ހުއްޓާލައިފި" އެވެ. ހިތަށް އެރިއެވެ. އެއްކަލަ ޒުވާނާއަށް މިލިބުނީ ކޮންފަދަ ބޮޑު އަޒާބެއް ހެއްޔެވެ. ކިހާބޮޑު ވޭނެއް އަނިޔާ އެއް ހެއްޔެވެ. އެޒުވާނާގެ އަނބިދަރިިން ....... ވަޒީފާ ގެއްލުނީ އެވެ. މަސްވެރިކަމެއްވެސް ނެތެވެ.
މިދެންނެވި ތަޞައްވަރަކީ ކުލަހުވަފެން ތަކެކެވެ. ބިލާހެކެވެ. މިހުވަފެންތަކުގެ ތަޢުބީރަކީ އަޅުވެތިކަމެވެ. ބޮޑުބާރުންނަށް ކުރުނީސް ކުރުމެވެ.
ދެން ވިސްނާލީމެވެ. "ރަށްގޮވާއަޑަ" ށެވެ. " އިހަވަންދޫގައި ފެލިވަރު ހިންގާ އައިސް ޕްލާންޓްގެ މަސައްކަތް ވަގުތީ ގޮތުން ހުއްޓާލައިފި" އެވެ. މިދައްކަނީ ކޮންވާހަކަ އެއްތޯ އެވެ. ހުއްޓާލީ ތޯ އެވެ. އާދެ ހުއްޓާލީ އެވެ. އައިސް ޕްލާންޓަށް ބޭނުންވާ ލޮނު ނުލިބޭތީ އެވެ. ކަނޑުގެ ލޮނުގަނޑު ހިކުނީތޯ އެވެ. ތަންކޮޅެއް ފުންކޮށް ވިސްނާލީމެވެ.
ހަނދާނަށް އައީ ކުރީ ދުވަހެއްގައި ރަދުން ބައްދަލުވެގެން ދެންނެވި ވާހަކަ އެކެވެ. އިހަވަންދޫގައި ކަންހިނގާ ގޮތުން ތަރައްގީގެ މަޝްރޫޢުތައް ކުރިއަށް ގެންދަށް ހުރަސްއެޅޭ ވާހަކައެވެ. ނަމަވެސް ހުރަސްތައް ގިރާކޮށް ކާމިޔާބު ކުރާނެ ވާހަކަ ދެންނެވި އެވެ. ދެން ހަދާންވީ ބޮޑުތިލަދުންމަތީގެ ނަމުގައި ކޯޕަރޭޓީވް ސޮސައިޓީއެއް އުފެއްދި ވާހަކަ އެވެ. މިސޮސައިޓީގެ ފައުންޑަރުންނަކީ އިހަވަންދޫގެ ނޫކަށި ޒުވާނުންނެވެ. ރަށުގެ ތަރައްގީއަށް ކަރުހިއްކައިގެންފައިވާ މުޖާހިދުންތަކެއް ފަދަ ހިތްވަރުގަދަ ފަހުލަވާނުންނެވެ. ކުރެވުނު ހީ ޔަގީނާ ގާތްވި އެވެ. އިހަވަންދޫގެ ފަޅާއި، ކަނޑާއި ، ކަނޑުއޮޅިއާއި ، ކަނޑު ގެ ލޮނާއި، އެކަނޑުގެ މަސްމަހާމެހި މިދެންނެވި ކޯޕަރޭޓިވްގެ ދަށަށް ދިޔައީ އެވެ. އިހަވަންދޫގެ ބިމުގައި އިހަވަންދޫގެ ކައުންސިލަށް ނުވަތަ މިދެންނެވި ކޯޕަރޭޓިވްއަށް އެއްވެސް ނަފާއެއް ނެތްގޮތަކަށް އެހެންބަޔެއްް ޖީބު ބޮޑުކުރަން " ބޮޑުބާރުން"ގެ އިއްޒަތް ބޮޑުކުރަން ދޫކޮށްގެން ތިބެވޭކަށް ނެތެވެ.
ބޮޑުތިލަދުންމަތި ކޯޕަރޭޓިވް ސޮސައިޓީ އާއި ފެލިވަރު ފިޝަރީޒް މޯލްޑިވްސް އާ ޖެހި މުޑި އެރީ އެވެ. އެހެންވީމާ، "އޮޕަރޭޝަނަލް ޚަރަދުވެސް ހަމަނުޖުހޭ" ނެއެވެ. " އެހެންވެ މަސްވެރިނަށް އައިސް ޕްލާންޓް ހުއްޓާލިއަސް މާބޮޑު ދައްޗެއް ނުވާނެ" އެވެ. މަސްވެރިންގެ ކުންފުނި މިފްކޯ އުވާލާނެ މަގެއް ކޮށާ، މިވާން އުޅޭ އެއްޗެއްގެ ވަސް މަސްވެރިންނަށް ދޮވި ހިސާބުން އިހަވަންދޫ އައިސް ޕްލާންޓަކުން އިހަވަންދޫ މަސްވެރިންނެއް އައިސް އެއް ނުގަނެއެވެ. އައިސް ގަންނަން އަންނީ މާލެ އެވެ. ބޮޑުބާރުންގެ، ބާރުން، އިހަވަންދޫގެ 50 ހަކަށް އަންހެނުންނަށް ފެލިވަރުން ވަޒީފާ ތަނަވަސްކޮށް އަނބިން ފެލިވަރަށް ވަޒީފާއަށް ދިޔާމާ ވާނެގޮތް، އަމިއްލަ އެދުމުން އަންބޮޑި ބޮޑުވެެފައިވާ ބޮޑުބާރުންނަށް ނުވިސްނުނަސް، އަތްވާއި ވާރޭގައި މިގައުމުގެ އިގުތިޞާދުގެ ލޭނާރު ހިންގާ ބަލަހައްޓާ، ހާހަލާއި ގިރިތައް ދަންނަ ނިކަމެތި މަސްވެރިންނަށް އެނގެއެވެ. މުންޑުކޮށިކޮށްގެން ދެއިރު ދެދަޅައަށް ރަށުކައުންސިލްގެ އިދާރާއަށް ވަނަސް ނުވިސްނޭނެއެވެ. އަދި ކީއްތޯ އެވެ. ޖުވާކުޅޭ ބީދައިން ފިނިއަށީގައި ތާސްކުޅެގެން ތައްރަގީ އަކީ ގެނެވޭނެ އެއްޗެއް ނޫނެވެ.
Comments