ދިވެހި ޤައުމު ދުށް ކަޅު ތިން އަހަރު

 މުހައްމަދު ބުޝްރީ

ލޯބިން މީހުންނާ ކައިވަނި ކުރުމަށް ފަހު ގޮތް އެނގުމުން ވަރި ވެސް ކުރެއެވެ. އެމް.ޑީ.ޕީ. އާއި ރައީސް ނަޝީދުގެ މެނިފެސްޓޯ އާއި ވަޢުދުތައް އަޑު އެހުމަށް ފަހު ކުރެވުނު އިތުބާރަކާއި އެކު ނަޝީދަށް ތާއީދު ކުރެވުނެވެ. ނަމަވެސް ނަޝީދަށް ތާއީދު ކޮށް ދެއްކުނުހައި ވާހަކައަކާއި ކުރެވުނުހައި މަސައްކަތެއް މިހާރު މި ވަނީ ފަނުފުލުން ގޮސްފައެވެ. 

މި ސަރުކާރަކީ ސުޕްރީމް ކޯޓުގައި ބޮޑު ތަޅު އެޅުވި ސަރުކާރެވެ. އެ ދުވަހު ރާއްޖޭގެ އުއްތަމަ ފަނޑިޔާރަކަށް ތަންކޮޅެއް ކެރޭ ފަނޑިޔާރަކު ހުންނެވި ނަމަ ގާނޫނު އަސާސީގެ ބާރު ކަނޑުވާލުމުގެ ކުށުގައި ރައީސް ނަޝީދު މަގާމުން ވަކި ކުރުމަށް ހުކުމް ކުރެއްވީސް ކަން ޔަގީނެވެ.

މި ސަރުކާރަކީ އެންޓި ކަރަޕްޝަން ބޯޑަކީ ކޫޑި ތަނަކަށް ހެދި ސަރުކާރެވެ. ތިލަފުށީ ފަޅު ހިއްކުމަށް އެމް.ޑީ.ޕީ. ގެ އިސް މެމްބަރ ރީކޯ މޫސަގެ ކުންފުންޏަކާ ހަވާލު ކޮށްފައި ވަނީ ގަވާއިދާ ހިލާފަށް ކަމަށް ޝައްކު ކުރެވިގެން އެ މަޝްރޫއުގެ މަސައްކަތް ވަގުތީ ގޮތުން ހުއްޓާލަން އެންޓި ކަރަޕްޝަން ބޯޑުން (އޭސީސީ) އެންގުމުން ރައީސް އޮފީހާއި ފިނޭންސް މިނިސްޓްރީން އެކަމުގެ ތެރެއަށް ދަނޑި ބާނައިގެން އޭސީސީގެ ބާރު ވަނީ ކަނޑުވާލައިފައެވެ.
ރައީސް ނަޝީދަކީ ރައީސުލް ޖުމްހޫރިއްޔާގެ މަގާމުގެ ގަދަރު ކުޑަ ކޮށްލި ރައީސެކެވެ. ކިބުރުވެރި ވުމަކަށް އެއްވެސް ހަމަ ވިސްނޭ ރައްޔިތަކު ތާއީދެއް ނުކުރާނެއެވެ. ނަމަވެސް ރައީސް ނަޝީދަކީ ކާމިޔާބީގައި ކިތަންމެ ހިތްތިރި ބޭފުޅަކަށް ވިޔަސް ރައީސުލް ޖުމްހޫރިއްޔާގެ މަގާމުގެ ޝަހުސިއްޔަތު ހިފަހައްޓަން ޖެހޭނެއެވެ. އެމް.ޑީ.ޕީ. ގެ އެކްޓިވިސްޓުންނާ އެކު ދިވެހި ރައްޔިތުންނާ ދެކޮޅަށް ރައީސް ނަޝީދު މުޒާހަރާ ކުރެއްވުމަކީ މަގާމާ އެކަށީގެން ވާ ވަރަށް ވުރެ ދަށު ދަރަޖައިގެ އަމަލެކެވެ.

ރީކޯ މޫސަ ބޮލުގައި ރީނދޫ މަލެއް ޖަހައިގެން، ބުޑިސްޓު ހާމުދުރެއްގެ ސިފައިގައި ހަޅޭއްލަވަމުން މައުމޫނަށް ނިސްބަތް ކޮށް "ގޮޅާބޯ، ގޮޅާބޯ" އޭ ގޮވި އިރު ރައީސް ނަޝީދު ހުންނެވި ހިނިފުޅުވަޑުވައިގެންނެވެ. ހަމަ އެ މުޒާހަރާގައި މާރިޔާގެ ބަހުރުވަ އެންމެ ދަށު ދަރަޖައަށް ވެއްޓިގެން ގޮސް އިދިކޮޅު ފަރާތްތައް ކޮންމެވެސް ތަނަކަށް "ކޮފޭނޭ" ބުނި އިރު ވެސް ނަޝީދުގެ މޫނުފުޅުމަތީން އުފާވެރިކަން ފާޅުވޭވޭ ހުއްޓެވެ. ތަކެތީގެ އަގު ބޮޑު ވެގެން ދިވެހި ރައްޔިތުން މުޒާހަރާ ކުރުމަކީ ބަނީ އިސްރާއީލު ބާގައިގެ މީހުން މަންނާ އާއި ސަލްވާ ބާވައިލައްވާތޯ ނާށިގަނޑު ހިފައިގެން ގޮސް ތިބި ފަދައިން ދިވެހި ރައްޔިތުން ތިބި ތިބުމެއް ކަމަށް ސިފަ ކުރައްވައި އެމް.ޑީ.ޕީ. ގެ ނައިބު ރައީސް އަލްހާން ދެއްކެވި ކުފުރު ވެދާ ފަދަ ވާހަކަފުޅަށް ވެސް ރައީސް ނަޝީދު ދެއްވީ ތަރުހީބެވެ.
ޑޮލަރުގެ އަގު ބޮޑު ވުމުން މުޒާހަރާ ކުރި ދިވެހި ރައްޔިތުންނާ މުހާތަބު ކުރައްވައި ރައީސް ނަޝީދު ދެއްކެވި ވާހަކަފުޅުގައި ވިދާޅުވީ މުޒާހަރާ ކޮށްގެން ޑޮލަރުގެ އަގު ބަދަލު ކުރަން މަސައްކަތް ކުރުމަކީ މުޒާހަރާ ކޮށްގެން ބިމުން ގަސް ފެޅުން ހުއްޓުވުމަށް މަސައްކަތް ކުރުން ފަދަ ކަމެއް ކަމަށެވެ. މިއީ އިންސާނުން ކުރާ ކަމަކާއި ﷲ ސުބުޙާނަހޫ ވަ ތަޢާލާގެ ކުޅަދުންވަންތަކަމުން ކުރައްވާ ކަމަކާ އެއްފަދަ ކުރުމެވެ. މިއީ ވަރަށް ދަށު ދަރަޖައިގެ ވާހަކައެކެވެ.

ރައީސް ނަޝީދު ވެރިކަން ކުރައްވަނީ ހަމައެކަނި އެމް.ޑީ.ޕީ. ގެ އެކްޓިވިސްޓުންނަށް ހެން ހީވާ ފަދައެވެ. މި މަނިކުފާނު ހުންނަވަނީ 24 ގަޑި އިރުގެ ތެރެއިން 12 ގަޑި އިރު ޗާރޓުން ބޭރުގައެވެ. އަނެއް 12 ގަޑި އިރު ހުންނަވަނީ ބުއްދީގެ ހަމަތަކުން ބޭރުގަހެން ހީވެއެވެ.
އަޅުގަނޑުމެން އަމިއްލަޔަށް ދާ އޮހޮރުވައިގެން ވެރިކަމަށް ގެނެސްފައި މިހިރީ ވާ ވެރިއެކެވެ. މިއީ ވެރިކަމެއް ނޫނެވެ. ކެހިވެރިކަމެކެވެ.

ދިވެހީންގެ އަމިއްލަ ޤައުމުގައި، އަމިއްލަ ފަސްގަނޑުގައި ދިވެހީންނަކީ ދެވަނަ ދަރަޖައިގެ ބަޔަކަށް ވެއްޖެއެވެ. ރައީސް ނަޝީދުގެ ދައުރުގެ ބާކީ އޮތް ދެ އަހަރު ތެރޭ މި ޤައުމުގެ ހުރިހާ ހަރު މުދަލެއް އިންޑިޔާގެ އެކި ކުންފުނިތަކަށް ވިއްކައި ހުސް ކުރުމުގެ ބިރު ވަރަށް ބޮޑެވެ.

އެމް.ޑީ.ޕީ. ގެ ޖަލްސާތަކުގައި ރައީސް އޮފީހުގެ ސްޕޯކްސްޕާރސަން އައްޑުވަސް ހޯރައިއްބެ (އިބްރާހީމް ރަޝީދު) އަރުވައިގެން ޝާއިރީ ވާހަކަތައް ދެއްކުވިޔަސް ދިވެހި ރައްޔިތުންނަކަށް ހަގީގަތެއް ނޯޅޭނެއެވެ. ރައީސް ނަޝީދުގެ ކިބައިގައި ދިވެހި ރައްޔިތުންނަށް އިޚްލާސްތެރި ވުމުގެ ސިފަފުޅު ހުރި ކަމަކަށް ގިނަ ބަޔަކު މިހާރު ޤަބޫލެއް ނުކުރެއެވެ.

މި ޤައުމުގެ ރައްޔިތުންނަކީ ހަމައެކަނި ރީކޯ މޫސައާއި މާރިޔާއެއް ނޫނެވެ. މައުމޫނުގެ ވެރިކަމުގައި ނުހައްގުން އަނިޔާ ލިބުނު ހަމައެކަނި މީހަކީ ރީކޯ މޫސައެއް ވެސް ނޫނެވެ. ވީ އިރު މި ޤައުމުގެ ތިން ލައްކައަށް ވުރެ ބޮޑު އާބާދީގެ ހުރިހާ ރައްޔިތުންގެ މަސްލަހަތަށް ވުރެ މާރިޔާ އާއި ރީކޯ މޫސަގެ މަސްލަހަތު އިސް ވުމަކީ ދިވެހި ރައްޔިތުންގެ މޫނުގައި ކޮޅުފައިން ޖެހުން ފަދަ އަމަލެކެވެ.

މީގެ ކުރީގެ ކެޔޮނިރު ކޮލަމުގައި އަޅުގަނޑު ފާހަގަކުރި ފަދައިން މައުމޫނު، ތަސްމީނު، ޔާމީނު، ޑރ. ހަސަން ސައީދު ފަދަ ބޭފުޅުންނަކަށް ވެސް ތާއީދެއް ނުކުރެވެއެވެ. ނަމަވެސް ނަޝީދުގެ ވެރިކަމުގައި ގައުމުގެ ހާލަތު ގޮސްފައި ވާ ދަށު ދަރަޖައަށް ބަލާ އިރު އަޅުގަނޑަށް ބުނެވޭނީ ކޮންމެ މީހަކު ވެރިކަމަށް ގެނެސްގެން ނަމަވެސް މި ބޮޑު މުސީބާތުން ދިވެހި ގައުމާއި ދިވެހި ވަތަން ސަލާމަތް ކުރަން ވެއްޖެއެވެ. އަޅުގަނޑަށް މިހާރު ވިސްނޭ ގޮތުގައި ޑރ. ހަސަން ސައީދު ނުވަތަ އަދި އެހެން ބޭފުޅަކު ވެރިކަމަށް ވަޑައިގަތަސް ނަޝީދަށް ވުރެ އިޚްލާސްތެރި ހެޔޮ ވެރިކަމެއް ކުރައްވާނެއެވެ.

ރައީސް ނަޝީދު އަޅުގަނޑުމެން ވާ ވައްދަވައިގެން ގެންދަވަން އެ އުޅުއްވާ އަނެއް ދިވެހިރާއްޖެއަކަށް ދާން އަޅުގަނޑުމެން ބޭނުމެއް ނޫނެވެ. ރައީސް ނަޝީދު ތިޔަ ވިދާޅުވާ ބޮޑު މަންޒަރުގައި އޮޅުލައްވައިގެން އަމިއްލަފުޅަށް އޮންނަވާށެވެ. ތިޔަ ބޮޑު މަންޒަރު ފެނިއްޖެ ނަމަ އަޅުގަނޑުމެން ހޭ ހުސް ވެދާނެއެވެ.
ރައީސް ނަޝީދު އެ ވިދާޅުވާ ހެޔޮ ވެރިކަން ދިވެހި ރައްޔިތުންގެ ގިނަ ބަޔަކަށް އިހްސާސް ކުރެވެނީ ނުލަފާ ދޮން މަންމައެއްގެ ވަކިތަކުގެ ޝިކާރައަކަށް ވެފައި ވާ ދޮން ދަރީންތަކަކަށް ކުރެވޭ ފަދަ މާޔޫސްކަމާއި ހިތާމައިގެ އިހްސާސްތަކެއްގެ ގޮތުގައެވެ.

މިއީ ދިވެހި ގައުމު ދުށް ކަޅު ތިން އަހަރެވެ. އެ ކަޅު ތިން އަހަރު ކަޅު ފަސް އަހަރަށް ނުހައްދަވައި އަވަހަށް ވަޑައިގަންނަވާށެވެ. ދިވެހި ރައްޔިތުންނަށް މަލާމާތް ނުކުރައްވާށެވެ!