މުހައްމަދު ބުޝްރީ
ސަން" މެގަޒިނަށް އަޅުގަނޑު ލިޔުނު ކޮލަމެއްގައި އަޅުގަނޑު އަމިއްލަ ނަފްސާ ސުވާލެއް ކުރީމެވެ. އަދިވެސް މިހުރީ އެމްޑީޕީ މެމްބަރެއްގެ ގޮތުގައިތޯ އެވެ! ޖަވާބުގައި އެއިރު އަޅުގަނޑު ބުނީ އާއެކޭ އެވެ! މިހާރު އަޅުގަނޑުގެ ނަފްސާ އަޅުގަނޑު އެ ސުވާލުކޮށްފި ނަމަ ޖަވާބަކަށް ވާނީ އާއެކޭ، އެމްޑީޕީ މެމްބަރެކެވެ. ނަމަވެސް ރައީސް ނަޝީދުގެ ސަރުކާރަކަށް މިހާރު އިތުބާރެއް ނެތެވެ.
އަތްފޯރާ ފަށަށް ގެނެސްދެއްވި އަގުތަކާ ހަމަޔަށް އަޅުގަނޑުމެން އާއްމު ރައްޔިތުންގެ އަތް ނުފޯރަނީ އެމްޑީޕީ ވެރިކަމަށް އައި ފަހުން އަޅުގަނޑުމެން އިސްކޮޅުން ކުރުވީމަ ކަމަށް ވެސް ވެދާނެ އެވެ. ގެނެސްދެއްވަން ވައުދުވެވަޑައިގެންނެވި ހެޔޮ ވެރިކަން މި ވަނީ އައްޑޫ ބަހުރުވައިން ނަމަ "ކުށުވެރިކަމަކަށް" ބަދަލުވެފަ އެވެ! ތާހިރު ދިރިއުޅުން ނުތާހިރު ވެއްޖެ އެވެ! އަނެއް ދިވެހި ރާއްޖެ މި ވަނީ ބިލާހަކަށްވެފަ އެވެ. ކޮންމެ ޑޮލަރެއްގެ ފަހަތުން ދުވި ފުލުހުން އެ ޑޮލަރުކޮޅު ފޮރުވީ ތޯއްޗެކެވެ. ފުލުހުން ޑޮލަރު ފަހަތުން ދުވަން ފެށިތާ މާ ގިނަ ދުވަހެއް ނުވެ ޑޮލަރުގެ ދަތިކަން އިތުރުވެ، ޑޮލަރުގެ އަގު މިހާރު ވަނީ ކުރިޔަށް ވުރެ ބޮޑުވެފަ އެވެ. ނުވަތަ ކޮންމެ ޑޮލަރެއްގެ ފަހަތުން ދުވި ފުލުހުން ވަރުބަލިވީމާ މިހާރު ޑޮލަރުތައް ފަހަތުން ދުވަނީ ސަރުކާރުގެ އިސް މަގާމުތަކުގައި ތިއްބެވި އެމްޑީޕީގެ މެމްބަރުން ކަމަށް ވެސް ވެދާނެ އެވެ.
އިންޑިޔާގެ ޖީއެމްއާރް އަށް "ވިއްކާލި" އެއާރޕޯޓުގައި އެމީހުން އަޅާދޭނެ ކަމަށް ބުނި އާ ޓާރމިނަލް ފެންނާނީ އެއަރޕޯޓް ރަންވޭ މަތީން ހޫނު ގަދަ ދުވަސްދުވަހު ފެންނަ އަވާމެންދުރެއް ފަދައިންނެވެ. ޖީއެމްއާރް އަށް އެޅޭނީ އާ ޓާރމިނަލެއް ވެސް ނޫނެވެ! ދައުލަތަށް ދައްކަން ޖެހޭ ރޯޔަލްޓީ އިން އެތައް މިލިއަން ޑޮލަރެއް ނުދައްކާ ބޮޑާ ހާކާ ބަޔަކަށް ޓާރމިނަލް އެޅޭނީ އަނެއް ދިވެހި ރާއްޖޭގައި އެކަންޏެވެ. މި ރާއްޖެއަކު ނޭޅޭނެ އެވެ.
އެމްޑީޕީގެ އެތެރޭގެ އިންތިހާބަކީ އެހެން ޕާޓީތަކަށް ނަމޫނާއެއް ކަމަށް ވިދާޅުވެ ރައީސް ނަޝީދު ވައުދުވެވަޑައިގެންފައި ވަނީ އެ އިންތިހާބުން ނާކާމިޔާބުވާ ބޭފުޅަކު ޕާޓީ ދޫކޮށްލެއްވިޔަސް އާއްމު މެމްބަރުން އެ ބޭފުޅެއްގެ ފަހަތުން ޕާޓީއާ ވަކިވެގެން ނުދާނެ ކަމަށެވެ. އެހާ ބޮޑު ޔަގީންކަމެއް ރައީސް ނަޝީދުގެ ކިބައިގައި އޮތީ، ނަޝީދު ހީކުރައްވާ ގޮތުގައި އެމްޑީޕީ އަކީ އިސްލާމް ދީން ފަދަ އެއްޗަކަށް ވާތީ ބާވަ އެވެ؟
ރައީސް ނަޝީދު އެ ވިދާޅުވާ ބޮޑު މަންޒަރަކީ ދިވެހި ރައްޔިތުން ކާބޯތަކެތީގެ އަގުތަކާ ހަމަޔަށް އަތްނުފޯރައިގެން ބަނޑަށް ޖެހޭ ދުވަހުގެ މަންޒަރު ބާވަ އެވެ؟ އެ "ބޮޑު މަންޒަރު" ބަލަން ބޭނުން ނޫން ކަމަށް ބުނެ ހއ. އިހަވަންދޫ ރައްޔިތުން ވަނީ އެމްޑީޕީގެ އެތެރޭގެ އިންތިހާބު ބޮއިކޮޓްކޮށްފަ އެވެ.
އެއަރޕޯޓް ވިއްކާލާފައި، ހުސް ފަޅެއް އޮތިއްޔާ އެ ތަނެއް ވެސް ބައިގަރުނަށް ވިއްކާލާފައި، ދިވެހި ދައުލަތް ދަރަނިވެރިކޮށް، ހުރި ނަމަ ހުރި ހަރުމުދާކޮޅެއް ވިއްކާލާފައި ސަރުކާރުން ބުނަނީ ވަރަށް އަވަހަށް ހުރިހާ ކަމެއް ރަނގަޅުވާނެ ކަމަށެވެ. ރައްޔިތުން ކެތްތެރިވެގެން ބޮޑު މަންޒަރު ބަލަން ތިބޭށޭ އެވެ! އެމްޑީޕީ އާއި ރައީސް ނަޝީދު ދިވެހި ރައްޔިތުންނަށް ދައްކަން އުޅޭ ބޮޑު މަންޒަރަކީ ގުދުވެފައި ދެފައި ދެ ގޯޅިން ފަހަތަށް ބެލުމުން ފެންނަ މަންޒަރު ކަމަށް ވެސް ވެދާނެ އެވެ. އެ ބޮޑު މަންޒަރު މިހާރު ބަދަލުވަމުން މިދަނީ ބޮޑު މުސީބާތަކަށެވެ.
ނަޝީދުގެ ވެރިކަމުގެ ސްޓައިލަކީ ޑާރޓް އުކަން ނޭނގޭ މީހަކު ޑާރޓް ބޯޑަށް ކަށި އުކާ ސްޓައިލެވެ. ލޯ މަރާފަ އުކާނީއެވެ. ބައެއް ފަހަރު "ބުލްސް އައި" އަށް ލައްވާލާނެ އެވެ. އަނެއްބައި ފަހަރު ކުޅި ބަލަން އިން މީހެއްގެ ލޮލަށް ވެސް ކަށި ވަދެދާނެ އެވެ.
އަޅުގަނޑަކީ ޒަމާނުއްސުރެ ވެސް މައުމޫނުގެ ހުދުމުހުތާރު ވެރިކަމާ ދެކޮޅަށް ލިޔަމުން އައި މީހަކީމެވެ. އަޅުގަނޑު ކަހަލަ އެތައް ދިވެހި ރައްޔިތުންނެއް ބޭނުންވީ ބަދަލެކެވެ. އަޅުގަނޑު އެއް ދުވަހަކު ބުނި ހަނދާން އެބަހުއްޓެވެ! ދިވެހި ޤައުމުގެ ވެރިކަމަށް އިބިލީސް އަޔަސް ވަރިހަމަ އެވެ. މައުމޫނު ނޫން އެހެން މީހަކު އަންނަނިކޮށް ނިމުނީ އެވެ. ބޭނުން ވީ ބަދަލެކެވެ. އަޅުގަނޑުމެން އެދުނު ގޮތް މިހާރު މިވަނީ ވެފަ އެވެ.
މައުމޫނަކަށް، ތަސްމީނަކަށް، ގާސިމަކަށް، ޙަސަން ސަޢީދަކަށް، ޑރ. ވަޙީދަކަށް، ޑރ. މުނައްވަރަކަށް، ޔާމީނަކަށް ތާއީދެއް ނުކުރެވެ އެވެ. ހަމަ އެހެންމެ، ނަޝީދަކަށް ވެސް މިހާރު ތާއީދެއް ނުކުރެވެ އެވެ. ޤައުމު މިހާރު މިވަނީ އަނެއްކާ ވެސް ބަދަލަކަށް ބޭނުންވެފަ އެވެ. ޤައުމުގެ ޙާލުގެ ދުލުން ގޮވަމުން ދަނީ މިކަމަށް އިސްނަގާނެ ތެދުވެރި، އިޚްލާސްތެރި ވެރިއަކަށެވެ!
މި ސަރުކާރުގެ ސިޔާސަތުތަކުގެ ސަބަބުން ބިކަ ޙާލު ޖެހިފައިވާ ދިވެހި ރައްޔިތުންނަށް ރައީސް ނަޝީދު ދައްކަވަމުން އެ ވަޑައިގަންނަވާ އަނެއް ދިވެހި ރާއްޖެއަކީ މިނިކާ ރާއްޖެ ކަމަށް ވެސް ވެދާނެ އެވެ. އެ ހިސާބަށް ކަންތައް ނުދަނީސް 2013 ގައި ދިވެހި ރައްޔިތުން ސަލާމަތްކޮށްދޭން ބޮޑު ތަކުރުފާނަކު ތެދުވަން ވެއްޖެ އެވެ
Comments