މަޝްވަރާގެ ކުޑަ
މިއީ މަޝްވަރާގެ ކުޑައިގެ ވާހަކަ އެވެ. މިކުޑަ ދަށުގައި ހިނގާ މަޝްވަރާގެ ވާހަކައެވެ. މިކުޑަހުންނާނީ ހިތްފަހި މައިޒާނުގެ އިރު އުތުރުން ދެވަނަ އަށެވެ. ކުޑަ ދަށުގައި މާގިނަބަޔަކު މަޝްވަރާކުރާކަށް ނުތިބެއެވެ. ދެތިން މީހުންނެވެ. މިކުޑައިގެ ދަށުގައި ރަށުގެ ވަރަށް ގިނަކަންތައްތަކާއި، ގުޅުންހުރި ވަރަށް މުހިންމު ސީރިއަސް މައްސަލަތަކާ ބެހޭ ގޮތުން މަޝްވަރާ ކުރެއެވެ. ހިތްފަހި މައިޒާނުގެ ހުޅަނގު އުތުރުގައިވެސް ދެވަނައަށް ހުންނަ ކުޑަދޮށުގައިވެސް ވަރަށް ގިނަ މީހުން ތިބެއެވެ. ޖޯލިފަތި ބަހައްޓައިގެން ނެވެ. ވަރަށް މަދުވަގުތެއްގައި ނޫނީ މީހުން ތިބެއެވެ. ތަފާތު ގިންތީގެ މީހުންނެވެ. މިކުޑަ ދަށުގައި ގިނައިން ދެކެވެނީ " ހޮޅި" ވާހަކަ އެވެ.
މަޝްވަރާގެ ކުޑަދަށުގައި މަޝްވަރާކުރެވޭ ވާހަކައެއް ހިއްސާކޮށްލަންތޯ އެވެ. ރައްޔިތުން އެންމެ ކަންބޮޑުބާ ވާހަކަ އެވެ. ވީގޮތެއް ނޭނގޭ ވާހަކައެވެ. ބަދަރުގެ ވާހަކައެވެ. ބަދަރުގެ ހެދުމުގެ މަސައްކަތް ކުރަމުން ދަނިކޮށް ރަށުކައުންސިލްގެ ފަރާތުން ބަދަރު ހެދުން ހުއްޓުވި ވާހަކަ އެވެ. ކީއްވެގެންތޯ އެވެ. ބަދަރު ހެދުމުގެ މަސައްކަތް ހުއްޓުވީ ބަދަރު ހަދާގޮތެއް ، ހަދާބޮޑުމިނެއް، ކޮންނަ ފުންމިނެއް، ދިގުމިނެއް ، ވަށަމިނެއް، ފުޅާ މިނެއް ރަށު ކައުންސިލްގެ އިދާރާއަށް ނޭނގޭތީ އެވެ. ބަދަރު ހެދުމާބެހޭގޮތުން ސިޓީއެއް ، މެސެޖެއް، ފަތެއް ، ފަތްކޮޅެއް ހާ ހިސާބުވެސް ކައުންސިލްގެ އިދާރާގައި ނެތީ މައެވެ. ބަދަރު ހެދުމުގެ މަސައްކަތް ހުއްޓުވަން ޖެހުނު ސަބަބު، މަޝްވަރާގެ ކުޑަދަށުން ލިބުނުގޮތް މިކިޔާދެނީ އެވެ.
އިހަވަންދޫގެ ބަދަރު ހަދާނީ ރައްޔިތުން ބޭނުންގޮތަށްކަމަށް " ވެރިމީހާ" ވަނީ ވިދާޅުވެފައެވެ. "ރައްޔިތުމީހާ" ބޭނުންވަނީ 1300 ފޫޓް ދިގު 300 ފޫޓް ފުޅާ ފަޅެކެވެ. ބޮޑު ހިލަޖަހާފައިވާ ފަޅެކެވެ. އެމްޓީސީސީ އާ ބަދަރު ހެދުމުގެ މަސައްކަތް ހަވާލުކޮށްގެން މަސައްކަތްކުރަމުން ދިޔަ އިރުވެސް އެއްކަލަ "ރައްޔިތުމީހާ " އަކަށް ފަޅުގެ ބޮޑުމިނެއް ފުޅާ މިނެއް ނޭނގެއެވެ. " ރައްޔިތުމިހާ" އަކަށް އަދި ކޮބައިތޯ ރައްޔިތު މިހާ އައްޔަންކުރި ކައުންސިލަކަށްވެސް ނޭނގެއެވެ. މިކަމާ ކަންބޮޑުވެގެން " ރައްޔިތުމީހާ" އިއްޒަތްތެރި މެމްބަރަށް ދެންނެވުމުން މެމްބަރު ވިދާޅުވެ ބަސް އިއްވަނީ ހާސްނުވާށެވެ. ތިމަން މަނިކުފާނަށް އިތުބާރު ކުރައްވާށެވެ. " ރައީސްމީހާ" ވިދާޅުވި ގޮތަށް ބަދަރު ހެދޭނެއެވެ.
ވަޔެއް 9 އެއް ވެސް " ރައްޔިތުމީހާ" އަށް ރޭކާލީ ކަނޑިންމާގެ ފާކަށި ހެދުމުންނެވެ. ކަންވާރު ބޮޅެއް ހިފައިގެން އިބްރާހިމް މޫދަށް އެރި މިންނެގީމައެވެ. ރައްޔިތުމީހާގެ ޖަޒުބާތުތައް ކޮންޓްރޯލުން ނެއްޓި، އިއްޒަތްތެރި މެމްބަރަށް "ބަޅުއެނބުރި" "އެތެރެކޮއިލަށް" ސޯޓް ޓެކްސްޓް މެސެޖެއް ފޮނުވި އެވެ. ރައްޔިތުމީހާ އައްޔަންކުރި ރަށުގެ ކައުންސިލަށް އެންގި އެވެ. މަސައްކަތް ހުއްޓުވާށެވެ. ހުއްޓުވާށެވެ. ދެން މަސައްކަތް ހުއްޓުވީ އެވެ.
މިގޮތަށް ބަދަރު ހެދުމުގެ މަސައްކަތް ހުއްޓުވާފައި އޮންނަތާ ދޮޅުމަސްވީ އެވެ. ޕާޓީގެ އިންތިޚާބު ނޭފަތުގެ ކުރިއަށް ގާތްވީ އެވެ. ތަފާތު މަގާމުތަކަށް ކުރިމަތިލާފައިވާ މީހުން އާދެއެވެ. ފުރަތަމަ ވަޑައިގަތީ ޕާޓީގެ ރައީސް ކަމަށް ކުރިމަތި ލާފައިވާ ، މިހާރުގެ ވަގުތީ ރައީސް އިބްރާހިމް ހުސެއިން ޒަކީ އެވެ. ޕާޓީގެ ކުދިބޭކަލުން ކަންވާންވީ ގޮތާއި، ކަންހިނގާގޮތް ޒަކީ އަށް ދެންނެވި އެވެ. ދެންނެވީ ނުހަނު އަދަބު އިހުތިރާމާއެކު އެވެ.
ތިން ދުވަސް ނުވަނީސް ބަދަރު ސާވޭކުރަން ބަޔަކު އަތުވެއްޖެ އެވެ. ފަޅުތެރެއާއި ވިލު ދޮޅީގައި ފީނާ ސާވޭ ކޮށްފި އެވެ.
ޖެހިގެން އައި ހަފުތާގައި ވަޑައިގަތީ ކުރީގެ ފިޝަރީސް މިނިސްޓަރ ޑީޑީ ކިޔާމީހެކެވެ. ޑީޑީ ވެސް އުޅުއްވަނީ ޕާޓީގެ ރައީސްކަމަށް ކުރިމަތި ލައްވައިގެންނެވެ. ޑީޑީ ބުނަނީ ޕާޓީގެ ފަރާތުން "ރައްޔިތުމީހާ" އަށް އިތުރަށް ދެން ވިއްކާނެ އެއްޗެއް ނެތް ކަމަށެވެ. "ރައްޔިތުމީހާ" ޑީޑީ އަށް ދެންނެވީ ވަރަށް ފިނި މަރުހަބާ އެކެވެ. ޕާޓީގެ މެމްބަރުންނާ ޑީޑީ ބައްދަލުކުރުމުން، އަދަބުކުޑަގޮތަކަށް ޑީޑީ އާ ސުވާލުކޮށް ޒުވާބެއް ދިނެވެ. އަދި ޕާޓީގެ އިންތިހާބު ބާއްވަން ވޯޓް ފޮށި ބަހައްޓަން ބޭނުން ނޫން ކަމަށް ވެސް " ރައްޔިތުމީހާ " ދެންނެވި އެވެ.
ނަމަވެސް ޑީޑީގެ ފަހަތްޕުޅުން " ރައްޔިތުމީހާ" ކެމްޕޭންކޮށް ދިނުމުގެ ނަމުގައި އުޅުއްވި އެވެ. " މިކަމުގައި" ރަގަޅު ގޮތެއް ވޭތޯ މަސައްކަތްކޮށް ދެއްވާށޭ ކިޔަމުންނެވެ. މިކަން ކޮށްދޭށޭ ، ވޯޓް ދޭނަމޭ ބުނަމުން ނެވެ.
ޖެހިގެން އައި ދުވަހު ކައުންސިލްގެ އިދާރާއަށް ޓަސްލާފައި މެސެޖެއް އައެވެ. ބަދަރާ ބެހޭގޮތުންނެވެ. ބަދަރުގެ ބޮޑު މިނާއި ފުޅާމިނާއި އިތުރު ތަފްޞީލްތަކެވެ. 1300 ފޫޓަށް ބޮޑުކޮށް 300 ގެ ފޫޓްގެ ފުޅާމިން ބަދަރުގެ އިރުމަތީ ކޮޅުން ނެގެން ނެތްވާހަކަ އެވެ. 300 ފޫޓްގެ ފުޅާމިން ނުނެގުނަސް ނެގެން އޮތް އެންމެ ބޮޑެއްކޮށް ހަދައިދޭނެ ވާހަކަ އެވެ. ބަދަރުގެ ހެދުމުގެ މަސައްކަތަށް ރަށުގެ ކައުންސިލުން އެއްބާރު ލުން ދިނުމަށެވެ.
މިމަޝްވަރާތަކަކީ ދިގު ވާހަކަ ތަކެކެވެ. ޑީޑީ ތިކުރެއްވި މަސައްކަތަށް ޝުކުރިއްޔާ އެވެ. ޕާޓީ ގެ އިންތިޚާބު ބާއްވަން ރަށުގައ ވޯޓް ފޮށިވެސް ބަހައްޓާނެ އެވެ. ނަމަވެސް ޑީޑީ އަށް ވޯޓް އަޅާނެހެން ހިއެއް ނުވެއެވެ. ހަމަ ހީ ނުވަނީ އެވެ. ؟؟
Comments