އުޑުމަތި ސާފު ދުވަހެކެވެ. މަޑުމަޑު ވައިރޯޅި ހުޅަނގު ފަރާތުން، ރުއްތަކާއި ގަސްތަކުގައި ބީހެމުން ދާންޖެހޭނީ މެންދުރުގެ ދިލަ ހޫނު ފިނިކުރަމުންނެވެ. ގައްލަންދޫ ކަނޑުއޮޅިން އުފެދޭ އޮއިވަރާއެކު، ކަނޑުގެ ރާޅުތައް ، ތޮށީގައި ޖަހާފައިވާ ބޮޑު ހިލަތަކުގައި ބީހެމުން ދާނީ ނުހަނު އޯގާތެރި ކަމާއި ރަހުމާއެކު ގައެވެ. ބޮޑު ހިލަތަކުގެ މަތިން ރަށުގެ ބަދަރު ފެންނާނީ ބިލް ލޫރި ޝީޓެއް ފަދަ އިންނެވެ. ރަށުގެ ބަނދަރަށް ނަގާފައިވާ ބޮޑު ދެދިދަ ހުންނާނެ އެވެ. ވެރިކަން ކުރާ ޕާޓީ, އެމްޑީޕީގެ ރީނދޫ ދިދައެވެ. އިދިކޮޅު ޕާޓީ، ޑީއާރުޕީގެ ނޫ ދިދަ އެވެ. ދެ ދިދަ ވެސް މިނިވަން ޖައްވުގައި ވިހުރެމުން ދާނީ، ވަރަށް ވެސް މިނިވަން ކަމާއެކު އެވެ. އެއް ވެސް ތަފާތެއް ނެތި އެވެ. އެއް ދިމާ އަކަށެވެ.
މި މަންޒަރު ބަލަން އަހަރެން އިންނާނީ ތޮށީ ބޭރުގައެވެ. ބޮޑު ހާ މަތީ ގައެވެ. ބަރަބޯ ރަޝީދުގެ ދޯނި ހޮވައިގެން ގެނައި ކެނޯ ގައެވެ. ކެނޯ އަށް އަހަރެމެން ކިޔަކީ " ބަގުވާނު" އެވެ. އަހަރެންގެ ނަނުގައި އެއްޗެއް ކޮށާވެސް ނުލާނެ އެވެ. މަހެއް ނުގަންނާތީ މަ އިންނާނީ ވަރަށް ފޫހިވެފައެވެ. އަހަރެންގެ ސަމާލުކަން ގެއްލޭނީ ބަރަބޯ އާދަނު އެއްޗެއް ބުނާ އަޑަށެވެ.
މިއީ އާދަނުގެ ޑައިލޮގެވެ. "ތިއިނީ ހާދަ ގަޔާނުވެ ، ރަށަށް ދާންވީ ދޯ، ފޫހިވީ ތަ"
އަހަރެން އެއްޗެއް ނުބުނާނެވެ. އަހަރެން ހާފުރޭ ވަގުތު ، އާދަނަށް ބަލައިލެވެންވާނެ އެވެ. އާދަނު ބޭނި މަސްކޮޅެއް ކެނޯގައި ހުންނާނެއެވެ. ދެތިން ފާނަ އާއި ގުރުވައަކާއި، ދެ ކަނޑުގުރުވައާއި، ތިން ގިޔުޅެވެ. އަހަންނަށް މަސް ނުބެވެނީ އެންބޮނޑިދަހި ކުރަން ނޭނގޭތީ ކަމަށް ވެސް ވެދާނެ އެވެ.
ބޭރު ތޮށިމަތީގައި ބަދަރު ހަދާމީހުން ބަދަރު ހެދުމުގެ މަސައްކަތް ކުރާނެއެވެ. ކަނޑިންމާގައި ހިލަ ޖަހާނީ އެވެ. ތޮށީ ބޭރަށް ކަނޑިންމައިން ނެރެފައިހުންނާނީ ހައެއްކަ ފޫޓެވެ. ހިލަޖަހަން އޮލަނބުދަނޑި ޖަހާފައިހުންނާނެވެ. ކުރެދި އަލީ އާއި ރިވެހި ހުސޭނާއި ގަސްކަރަ ތުއްތު މަޑުމަޑުން ހިނގާފައި ދޮށިމަތިން އަންނަނީ ބަދަރު ހަދާމީހުން މަސައްކަތް ކުރާތަނަށެވެ. ކުރެދި އަލީ ހުންނާނީ އަރުވާޖަހައިފައެވެ. ލައިގެން ހުންނާނީ އަލިކުލައިގެ ގަންޖުފަރާހެކެވެ. ބުރެވި ހުސޭނު ހުންނާނީ ކަޅު ފަޓުލޫނެއް ލައިގެންނެވެ. ލައިގެން ހުންނާނީ ރީނދޫ ޓީޝާޓެކެވެ. ގަސްކަރަ ތުއްތު ހުންނާނީ ގަމީސް މައްޗަށް މުންޑު ގޮށްޖަހައިގެންނެވެ. މިތިން މީހުންނަކީވެސް "ކޮއިލަށް" ޚަބަރު ދެވޭ ތިންމީހުންނެވެ. ކެނޯ އެނބުރޭތީ އަހަރެން ބަލައިލާނެވެ. ބަރަބޯ އާދަނާ ދިމާއަށެވެ. މިތިން މީހުން، މަސައްކަތް ކުރަންތިބި މީހުންނާ އަރާހަމަވި އިރު ، އާދަނު ކެނޯގެ ފަނާ ނަގާނީ އެވެ. މަންޒަރުގެ ބައެއް އަހަންނަށް ގެއްލޭނީ އެވެ.
މި ވާހަކަ އެހެން ގޮތަކަށްވެސް ކިޔައިދެވިދާނެ އެވެ. މިސާލަކަށް މިހެންނެވެ. އެ ތިން މީހުންގޮސް ބަދަރު ހެދުމުގެ މަސައްކަތް ހުއްޓުވާނީ އެވެ. މަސައްކަތް ހުއްޓުވާ އިރު، ގަސްކަރަ ތުއްތު ހުންނާނީ ދުރުގައެވެ. ބުރެވި ހުސޭނު ހުންނާނީ ގަސްކަރަ ތުއްތަށް ވުރެން ތަންކޮޅެއް ދުރުގައެވެ. ފަޓްލޫނުގެ ޖީބަށް ކަނާއަތް ލައިގެން ވާތްފަރާތަށް ކުޑަކޮށް އަރިއަށެވެ. ކުރެދި ޢަލީ ގޮސް ބަނދަރު ހެދުމުގެ މަސައްކަތުގައި ތިބި މީހުންގެ ތެރެއިން އެންމެ އިސްކޮށް ހުރި، މީހާ އާ ވާހަކަ ދައްކާނީ އެވެ. ވާހަކަ ދެއްކުމުން ވެސް މަސައްކަތް ކުރިއަށް ގެންދާނީ އެވެ. ދެން ވާނެ ގޮތަކީ، ކުރެދި ޢަލީ ރުޅި އަންނާނީ އެވެ. ރުޅިއައިސްގެން ގޮސް ހައިމާކުގެ ދަތްގަނޑު ދަށަށް ވަންނާނީ އެވެ. ގަސްކަރަ ތުއްތާއި ، ބުރެވި ހުސޭނު ހުރެގެން ހަޅޭ ލަވައި ހަދާނީ އެވެ. މިހިސާބުން ކެނޯ ހުޅަނގު ކޮޅު މަސްކަނޑާގައި އަޅާނީ އެވެ. ކެނޯގައި ހުރި މަސްކޮޅު މަސްކަނޑައަށް ބާލާނީ އެވެ. މިމަންޒަރު އަހަންނަށް ފަސްދީ އޮބާލާނީ އެވެ. މިހިސާބުން ބަދަރު ހެދުމުގެ މަސައްކަތް ހުއްޓާލައި ، ވެހިކަލްތައް މަޑުމަޑުން ގޮސް ސައިޓްގައި ޕާކް ކުރާނީ އެވެ.
(ނުނިމޭ )
Comments