ކައުންސިލަރުންނަށް މަރުހަބާ !
ރައްޔިތުންގެ އަތްމައްޗަށް ރައްޔިތުންގެ ވެރިކަން ލިބުން ފެށުނީ އެވެ. ކައުންސިލަރުން ހުވާކުރައްވައި މަގާމާ ހަވާލުވެވަޑައިގަތުމުންނެވެ. ވަރަށްވެސް ތާރީޚީ ދުވަހެކެވެ. ކައުންސިލަރުން ހުވާކުރެއްވި ދުވަހެވެ. ފެބްރުއަރީ 26، 2011 އެވެ. ކުރީގެ އެތަކެއް ވެރިން މީގެ އެތައް އަހަރެއް ކުރިން ސުރެ ދެކެވަޑައިގެންނެވި ހުވަފެން ހަގީގަތަކަށް ވީ ދުވަހެވެ.
ރައްޔިތުނަށް ލިބުނުވަރަށް ބޮޑު އުފަލެކެވެ. ކޮންމެ ރަށެއް ، ކޮންމެ އަތޮޅެއް އިދާރީގޮތުން ހިންގައި ތަރއްގީގެ މަޝްރޫޢުތައް ރާވައި ތަންފީޒުކުރުމުގެ މަސްއޫލިއްޔަތު އަދާކުރާނޭ ބަޔަކު، ސީދާ ރައްޔިތުންގެ ވޯޓަކުން އިންތިޚާބުވުމަކީ ރައްޔިތުންނަށް ލިބުނު ވަރަށް ބޮޑު ހިތްހަމަ ޖެހުމެކެވެ.
ރައްޔިތުންގެ ފުރިހަމަ އިތުބާރާއެކު އެ ރައްޔިތުނަށް ޚިދުމަތްކުރުމުގެ ފުރުޞަތު ލިބުމަކީ ކައުންސިލަރުންނަށް ލިބޭނޭ މާބޮޑު އުފަލެކެވެ.
ވަރަށް ގިނަ ބަޔަކު ގަބޫލުކުރެއެވެ. ރަށަށާއި، އަތޮޅަށާއި އަދި މުޅި ރާއްޖެއަށްވެސް ހެޔޮ ބަދަލުތަކެއް އަންނާނެ ކަމަށެވެ. މީގެ ކުރިން ތަރއްގީގެ ކަންކަމުގަ އާއި އިދާރީ ކަންކަމުގައި މަރުކަޒީކޮށް މާލެ އިން ފުރިހަމަކަރަން ޖެހުނު އެތައްކަމެއް ލާމަރުކަޒީ އުޞޫލުން ، ރަށުން ފުރިހަމަކޮށް ނިންމާލުމުގެ ފުރުޞަތު ފަހިވާތީ އެވެ. މަސްކިތު ހަރިންމަ ފާރުގައި ކުލަލާކަށް މާލެގައި ހުންނަ އޮފީހަކަށް، އަދި އަތޮޅު އޮފީހަކަށް ދެން ސިޓީ ފޮނުވާ މެސެޖް ކުރާކަށް ނުޖެހޭނެ އެވެ. ޕްރީ ސްކޫލް ހަދަން އެޑިޔުކޭޝަނުގައި ދަންނަވައިގެން ޖަވާބެއް ނުލިބިގެން އުޅޭކަށް ނުޖެހޭނެއެވެ. ތަރައްގީގެ ދުވެލީގެ ސްޕީޑް ކައުންސިލްގެ މެމްބަރުން ހިންގުމުގެ ކުޅަދާނަ ކަމާއި ގާބިލްކަމުގެ މައްޗަށެވެ.
ރާއްޖޭގެ ދިގު ތާރީޚްގައި، ދިވެހިރާއްޖެ ލާމަރުކަޒީ އުޞޫލުން ފުރަތަމަ ފަހަރަށް ހިންގަންފެށި ، ކައުންސިލަރުންނާ ރަށުގެ ތަރައްގީ ހަވާލުވީ އެވެ. ރަށާއި އަތޮޅު ތަރައްގީގެ އާއުސްމިންތަކަކަށް ދެވޭނެ ކަމަށް ޔަގީން ކުރަމެވެ. ކައުންސިލަރުންނަށް ކާބިޔާބީ ފާގަތި މުސްތަގު ބަލެކެވެ. ރައްޔިތުންނަށް އަދަށްވުރެން ފެހި ރޯޝަނީ މުސްތަގުބަލެކެވެ.
Comments