Dhivehi Bas

ތާރީޚަށްޓަކައި:

އިހަވަންދޫ ކައުންސިލަރުން ހުވައި ކުރުމުގެ ދަރުބާރު

މިދަރުބާރަށް މުޅިރަށް އޮތީ ޒީނަތްތެރިކޮށްފައެވެ. ރަށުގެ ބޮޑެތި މަގުތަކުގައިވަނީ ދިދަ ފަތި ދަމާ ބެނާތައް ހަރުކޮށްފައެވެ. ދަރުބާރު އޮތީ 26 ފެބްރުއަރީ 2011 ވަނަ ދުވަހުގެ 9:00 ގައެވެ. ދަރުބާރަށް ދައުވަތު އެރުވިފައިވަނީ ހެނދުނު 8:45 އަށެވެ. 25 ފެބްރުއަރީ 2011 ވީ ހުކުރުދުވަހު ރަށުގެ ޒީނަތްތެރިކުރުމުގެ މަސައްކަތް ރަށު އޮފީހުން ކުރިއަށްގެންދިޔައެވެ. އެ މަސައްކަތުގައި ހަރަކާތްތެރިވީ ކަތީބު މުހައްމަދު އިބްރާހީމާއި ، ކުޑަކަތީބު ޢަބްދުލްހާލިޤް މޫސާ އާއި އޮފީހުގެ އެޑްމިނިސްޓްރޭޓިވް އޮފިސަރ އަހުމަދު އަބުދުއްޞަމަދެވެ.

ކައުންސިލަރުން ހުވައި ކުރުމުގެ ދަރުބާރަށް ރަށުތެރެ ޒީނަތްތެރިކުރަން ދަމާފައިވާ ބެނާއެއް.

 25 ވަނަ ދުވަހުގެ ރޭ ވަރަށް ދަންވަންދެން އޮފީހުގެ މުވައްޒަފުން މިރަސްމިއްޔާތު ތައްޔާރުކުރުމަށް މަސައްކަތްކުރަންމުން ދިޔައެވެ. ރަށުގެ އޮފީގެ ނަންބޯޑްވެސް ބަދަލުކުރިއެވެ. ކުރިންކީ "ތިޔަދުންމަތީ އުތުރުބުރީ އިހަވަންދޫ އޮފީސް" ގެ ނަންބޯޑު ނަގައި، "ތިލަދުންމަތީ އުތުރުބުރީ އިހަވަންދޫ ކައުންސިލްގެ އިދާރާ" ނަމުގައި ނަން ބޯޓެއް ރަށު އޮފީހުގައި ހަރުކުރިއެވެ. މިސައްކަތްކުރީ ހުކުރުދުވަހުގެ ރޭ 9:30 ހާ އިރުއެވެ. މިމަސައްކަތުގައި އުޅުނީ ކައުންސިލަރު ކަމަށް އިންތިޚާބުވެފައިވާ ޝަހަރުއާބާދު މުހައްމަދު ސަމީރާއި، ނަލަހިޔާގޭ އަހުމަދު ވަހީދު އެވެ.

ކުރިންހުރި ނަންބޯޑް ނެގުމަށްފަހު ހަރުކޮށްފައިވާ ނަންބޯޑް

 ރަސްމިއްޔާތު ޒީނަތްތެރިވުމަށް ވާންޖެހޭތައްޔާރީތައް ވުމަށްފަހު ހުކުރުދުވަހުގެ ރޭ 10:30ގައި ހުވައި ކުރުމުގެ ރަސްމިއްޔާތުގެ ރިހާސަލް އޮތެވެ. މިކަން އޮތީ ރަށު މަދަރުސާ ގެ ހޯލްގައެވެ. އެއީ ހުވާކުރުމުގެ ދަރުބާރު އޮންނަނީ ރަށު މަދަރުސާގެ ހޯލްގައި ކަމަށްވާތީ އެވެ. މިރިހާސަލްގެ ތެރޭގައި ކައުންސިލަރުން ހޯލަށްވަދެ، އިށީންނަންވީ ގޮތާއި ، އިސްޓޭޖަށް އަރަންވީގޮތާއި ، އަރާއިރު އިސްކުރަންވީ ފަޔާއި ، އިސްޓޭޖްގައި އެތުރެންވީ ގޮތާއި، އެތުރޭއިރު ތިބެންވީ ކަތިމިނާއި، ދުރުމިނާއި ، ކޮޅަށް ތިބޭއިރު އަތްބަހައްޓަންވީ ގޮތާއި ދެފައި ބަހައްޓަންވީ ފުޅާމިނަށް ދަންދެން ބުނެދެވުނެވެ. މިއިރުޝާދުތައް ދިނުމުގައި ހުންނެވީ ރަށު އޮފީހުގެ ޒިންމާދާރު އިސްވެރިޔާ ކަތީބު މުހައްމަދު އިބްރާހީމެވެ. އަދި ހުވައި ލާންދޭންވީ ގޮތާއި އަޑުގެ ބާރުމިނަށް ދަންދެން ފަނޑިޔާރަށް ވެސް ބުނެދިނެވެ. ހުވައިލާދެއްވާ ފަނޑިޔާރަކަށް ހުންނެވީ އިހަވަންދޫ މެޖިސްޓްރޭޓް ކޯޓްގެ އިސް މެޖިސްޓްރޭޓް މިރަށު އަލިގާ އާދަމް އަބުދުލް ލަޠީފެވެ. ވަރަށް މަޖާ އުފާވެރި މާހައުލެއްގައި ރިހާސަލް ، ދަންވަރު 12:30 ވަންދެން ދެމިގެން ދިޔައެވެ.

ރިހާސަލްގެ ހުރިހާކަމެއް ކުރިއަށް ދެންދިޔައީ ހުވައި ކުރުމުގެ ދަރުބާރުގައި ކަންކުރަންވީ ގޮތް އަންގައިދިނުމަށް ހޯމް މިނިސްޓްރީން ފޮނުވާފައިވާ ސަރކިޔުލާ އާ އެއްގޮތަށެވެ. މިސާރކިޔުލަރގައި ކައުންސިލަރުންނާއި ، ފަނޑިޔާރާއި، ދަރުބަރުގައި ޞަލަވާތް ފާޠިހާ ކިޔާ މިހާ އިށީންނަންވީ ތަނާއި ކުރެހުމުންވަނީ ދައްކާ ފައެވެ. ހުވައިލާދޭ އިރު ފަނޑިޔާރު ހުންނަންވީތަނާއި ފަނޑިޔާރުގެ ކުރިމަތީގައި ސްޓޭންޑް މައިކެއް ހުންނަންވާނެކަމަށްވެސް ބަޔާންކޮށްފައި ވެއެވެ. އެއަށްފަހު ހުވައިގެ ގަރާރުގައި ކައުންސިލަރުން ސޮއިކުރުމަށް ޕޯޑިއަމެއް ހުންނަންވާނެ ކަމަށްވެސް ބަޔާންކޮށްފައި ވެއެވެ. އަދި ސްކޫލްތަކުގައި ބޭންޑް އޮންނަ ނަމަ ސްކޫލް ބޭންޑްގައި ގައުމީ ސަލާމް ކިޔައި ޖަލްސާ ނިންމާއިރު ، ސްކޫލް ބޭންޑުގެ ކުދިން ތިބެންވީ ތަނާދަންދެން ބުނެދީފައި ވެއެވެ.

ރިހާސަލަށް ފަހު ކޯޓް ފަޓުލޫނު ހޯދުމަށް ކައުންސިލަރުން މަޝްވަރާކުރި އެވެ. ކޯޑްލިބިއްޖެތޯ އެކަކުއަނެކަކަށް ސުވާލު ކުރަމުން ދިޔައެވެ. ހުވައި ކުރުމުގައި ހެދުން ހުންނަންޖެހޭނެ ކަމަށް ތިން ދަރަޖައެއް ކުރިން ދެންނެވި ސަރކިޔުލާގައި ބަޔާންކޮށްފައި ވެއެވެ. އެއްވަނަ ދަރަޖަ އަކީ ކޯޑް ފަޓުލޫނެވެ. ދެވަނަ ދަރަޖައަކީ ފަޓުލޫނާއި ގަމީހާއި ޓައީ އެވެ. ތިން ވަނަ ދަރަޖަ އަކީ ގައުމީ ހެދުމެއްގައި ހުރުމެވެ. އެހެންކަމުން ހުރިހާ ކައުންސިލަރުންވެސް ނެގީ އެއްވަނަ ދަރަޖައިގެ ހެދުމެވެ.

ހޮނިހިރު ދުވަހުގެ ހެނދު 8:45 ށް މަދަރުސާގެ ހޯލަށް މީހުން އަންނަމުން ދެއެވެ. ހޯލުގެ ދެބައިކުޅަ އެއްބަޔަށް ވެސް މީހުން ހާޒިރު ނުވެއެވެ. ސްކޫލް ކުދިންވެސް ވަރަށް މަދެވެ. ސްކޫލް ކުދިން މިދަރުބާރަށް އައުމަށް ހުކުރު ދުވަހުގެ ރޭ 8:30 ހާ އިރު ރަށު އޮފީހުގެ ތާޅަ ފިލި ގޮވި އެވެ. ހޯލަށް މީހުން ވަނުމުން 9:10 ހާ އިރު އިންތިޚާބުވެފައިވާ ކައުންސިލަރުންނާއި ފަނޑިޔާރާއި ކަތީބު ހޯލަށް ވަނެވެ. ވަދެ، އެމީހުނަށް ހާއްޞަ ކުރެވިފައިވާ ގޮޑިތަކުގައި އިށީނުމާއެކު ޞަލަވާތް ފާޠިހާ ކިޔެވުން އޮތެވެ. ޞަލަވާތް ފާޠިހާ ކިޔެވީ ކުޑަކަތީ އަބުދުލް ހާލިޤް މޫސާ އެވެ.

އެއަށް ފަހު ކައުންސިލަރުން ހުވައި ކުރުމުގެ ދަރުބާރު ފެށުނީ އެވެ. މި ދަރުބާރު ތަޢާރަފް ކުރެއްވީ ކަތީބު މުހައްމަދު އިބުރާހިމް އެވެ. ތަޢާރަފްކޮށް ، ކައުންސިލަރުން އިސްޓޭޖަށް އެރުމަށް ދެންނެވުމުން ކައުންސިލަރުން ސުޓޭޖަށް އަރެއެވެ. އެއަށްފަހު ފަނޑިޔާރު ހުވައި ލައިދިނުމަށް ސްޓޭޖަށް އަރަން ދެންނެވުމުން ފަނޑިޔާރު ސްޓޭޖަށް އަރައި މައިކު ކައިރީގައި ހުއްޓި ހުވައި ލައިދެއްވި އެވެ. ފަނޑިޔާރުގެ އަޑުދަށުން ކައުންސިލަރުން ހުވައި ކިޔަމުން ދިޔައެވެ. ދެން އޮތީ ފަނޑިޔާރާ ސަލާމްކޮށް، ހުވައިގެ އިގުރާރުގައި ކައުންސިލަރުން ސޮއި އެޅުމެވެ. ސޮއި އަޅައި ނިމުމުން ގައުމީ ސަލާމުން ދަރުބާރުގެ ހުވައި ކުރުމުގެ ބައި ނިމުނީ އެވެ.



ފަނޑިޔާރު ކައުންސިލަރ ޢަލީ ރަމީޒާ ސަލާމްކުރައްވަނީ. ހުވައި ލައިދެއްވުމަށްފަހު ހުރިހާ ކައުންސިލަރުންނާ ވެސް ސަލާމް ކުރެއްވި



ދެން ކުއްލިއަކަށް ފުރުއްމާގޭ އިބްރާހިމް ޝަރީފް ބުންޏެވެ. މި ތާރީޚި އިހުތިފާލުގައި އަޅުގަނޑުމެން ކައުންސިލަރުންނާއ ސަލާމްކޮށްލަން ބޭނުންވަނީ އިސްޓޭޖްމަތިންނެވެ. އެހެން ޝަރީފު އެބުނީ ތަޢާރަފު ކުރަމުން ކަތީބު ވިދާޅުވީ ސަލާމް ކުރުން އޮންނާނީ ބިލެތް މީރު ކުރަމުން ދާ ވަގުތު ކަމަށް ވާތީ އެވެ. ދެން ޝަރީފު އެހެން ބުނުމުން އެގޮތަށް އެރުފުޞަތު ދީ އިސްޓޭޖް މަތިން ސަލާމު ކުރުމުގެ އިޒުނަ ދިނުމުން ހާޒިރުވެ ތިބި ވަރަށް ގިނަ އަދަދެއްގެ ފިރިހެނުން އިސްޓޭޖްމަތިން ކައުން ސިލަރުންނާ ސަލާމް ކުރިއެވެ.

އިސްޓޭޖްމަތިން ސަލާމު ކުރުމަށް ފަހު ދަރުބާރަށް ހާޒިރުވި އަންހެން ބޭފުޅުންނާ ހޯލުން ބޭރުގައި ދުންނިކަ ގަސް ދޮށުގައި ސަލާމް ކުރުމުގެ ސެޝަނެއް ކުރިއަށް ދިޔައެވެ.



ދުންނިކަ ގަސްދޮށުގައި ބޭއްވި ސަލާމްކުރުމުގެ ސެޝަން؛



އެއަށް ފަހު ބިލެތް މީރުކޮށް ފޮޓޯ ނެގުން އޮތެވެ.

ދެން އޮތީ ކައުންސިލްގެ ރައީސަކާއި ނައިބު ރައީސެއް އިންތިޚާބު ކުރުމެވެ. މިކަން އޮތީ ކައުންސިލްގެ އިދާރާގައެވެ. ކުރީ އިހަވަންދޫ އޮފީހުގައެވެ. ކައުންސިލަރުން އެބޭފުޅުންގެ އިދާރާއަށް ދިޔައިރު ވަރަށް ގިނަ އަނހެނުން ކައުންސިލަރުންގެ އިސްތިގުބާލުގައި އިދާރާ ގޮށުގައި ތިއްބެވެ.



ކައުންސިލަރުންގެ އިސްތިގުބާލުގައި ރަށުގެ އަންހެން ބޭފުޅުން ، ކައުންސިލްގެ އިދާރާ ދޮށުގައި



ކައުންސިލްގެ ފުރަތަމަ ޖަލްސާ ގައެވެ. ޖަލްސާގެ ރިޔާސަތު ބެލެހެއްޓެވީ ކަތީބު މުހައްމަދު އިބްރާހިމް އެވެ. ކައުންސިލްގެ ރައީސެއް އިންތިޚާބު ކުރެވެން ދެންނެވެ. ކައުންސިލްގައި ހިމެނޭ ފަސް މީހުންގެ އިއްތިފާގުން ރައީސަކަށް އިންތިޚާބު ކުރީ ޝަހަރުއާބާދު މުހައްމަދު ސަމީރު އެވެ. ކައުންސިލްގައި ހިމެނެނީ ސަމީރުގެ އިތުރުން ބަހާރުގޭ ޢަބުދުﷲ މަންސޫރު ، ނަލަހިޔާގޭ އަހުމަދު ވަހީދު ، ހިޔަލީބާޣު މުހައްމަދު ސިރާޖު އަދި އެންދެރިމާގޭ އަލީ ރަމީޒެވެ. ސަމީރު ކައުންސިލްގެ ރައީސަކަށް އިންތިޚާބުކުރުމުން އޭނާ އާ ރިޔާސަތު ހަވާލުކުރިއެވެ. ސަމީރުގެ ރިޔާސަތުން ކައުންސިލްގެ ނައިބު ރައީސެއް ހޮވުމަށް ، ނައިބު ރައީސްކަމަށް ކުރިމަތި ލުމަށް ފުރުޞަތު ހުޅުވާލުމުން ކުރިމަތިލީ ކައުންސިލް މެމްބަރު ޢަބުދުﷲ މަންސޫރު އެވެ. އަބުދުﷲ މަންސޫރުވެސް ކައުންސިލްގެ 5 މެމްބަރުން އިއްތިފާގުން އިންތިޚާބު ކުރި އެވެ.



ކައުންސިލްގެ ނައިބުރައީސެއް ހޮވުމަށް މެމްބަރުން ވޯޓްލަނީ:

އެއަށްފަހު ޖަލްސާގެ އެޖެންޑާގައި އޮތީ ކައުންސިލަތައް ހިންގުމަށް ސަރުކާރުން ހުށަހަޅާފައިވާ ކައުންސިލަތަކުގެ ހިންގާ ގަވާއިދު ފާސްކުރުމެވެ.

ސަރުކާރުން ހުށަހަޅުއްވާފައިވާ ކައުންސިލަތައް ހިންގުމުގެ ގަވައިދު ކައުންސިލަރުން ވިދާޅުވަނީ

މިއަދަކީ ދިވެހިރާއްޖޭ ވެރިކަން ހިންގުމުގެ ހަޔާތުގައި ތާރީޚި ދުވަހެކެވެ. ރާއްޖޭގެ ހުރިހައި ރަށެއްގައި ކައުންސިލަރުން ހުވައި ކުރުން އޮތެވެ. ކޯޓް އަމުރުދަށުން ހުވައި ފަސްކުރުމަށާއި އިންތިޚާބުގައި މައްސަލަތައް ދިމާވި ރަށްތައް ފިޔަވައެވެ.