ކުރިއަށް އޮތް ލޯކަލް ކައުން ސިލް އިންތިޙާބުގެ ކެމްޕޭން ފޯރި އަންނަނީ ގަދަވެ ފައްކާވަމުން ދޮންވަމުންނެވެ. މިފޯރިވަނީ ގައުމުގެ ހުރިހާ ހިސާބަކަށް ފޯރާފައެވެ. ކެމްޕޭން ފޯރީގެ އައްސިން ރަށްރަށަށާއި، އަވަށް އަވަށަށާއި، އާއިލާތަކުގެ ޞުލްހައާއި މަސްލަހަތަށް އަންނަނީ ހުރަސް އަޅަމުންނެވެ. މިކަމުގެ އުނދަގޫ ހަމައެކަނި ފޯރަނީ ސިޔާސީ ފަރާތްތަކަށް އެކަންޏެއް ނޫނެވެ. ކެންޑިޑޭޓުންނަށް އެކަންޏެއް ވެސް ނޫނެވެ. އެހެނެއް ކަމަކު އެމްޕޭން ފޯރި ހައްދުންނެއްޓުމުން އެކަމަގެ އުދަނގޫ ބޮޑަށް އުފުލަން މިޖެހެނީ އާއްމުންނަށެވެ.
ކެމްޕޭން ފޯރިއާއެކު އެންމެ އާއްމުވެފައިވަނީ ދޮންކުލަ އާއި ނޫކުލަ އެވެ. ފާރުތަކުގައި ލިޔެވޭ ލިޔުންތަކެވެ. ކުލަކުލައިގެ ޕޯސްޓަރު ތަކާއި ބެނާތަކެވެ. ކެންޕޭން ފޯރިއާއެކު އެންމެ ތުރާވަނީ ކެންޕޭން ހަރުގެ ތަކުން ފޮނުވާ ލަވައިގެ ސަބަބުންނެވެ. މިހުރިހާ ކަމަކާ އެންމެ ބޮޑަށް ގުޅިފައިވަނީ އާއްމުން ނެވެ. އެންމެ ބޮޑުތުރާލެއް ކުރިމަތިވަނީ އާއްމުންނަށެވެ. ނަފުސާނީ ގޮތުންނާއި ޖިސްމާނީ ގޮތުންނާއި ޞިއްޙީގޮތުން ލިބޭ ގެއްލުން އެންމެ ފުރަތަމަ ޖެހެނީ އާއްމުންނަށެވެ. ކެންޑިޑޭޓުންނަކަށް ނޫނެވެ. މާރުކޭޓުގައި ލިބެންހުންނަ އެންމެ ބޮޑު، އެންމެ ވަރުގަދަ ތާޅަފިލި ހޯދައިގެން ލަވަ ޖެހުމުގެ ސަބަބުން ގެއްލުންވަނީ ، އުދަނގޫ ވަނީ ކާކަށްތޯ ، ކޮންބަޔަކަށްތޯ ކެންޕޭން ހަރުގެ ތަކުން ވިސްނާލުން ކީއްތޯ އެވެ. ކިޔަވާކުދިންނާއި ކުޑަކުދިންނާއި މުސްކުޅިންނާއި ބަލިމީހުންގެ މަތިން ހަމަ އެއްފަހަރުވެސް ހަނދާންކޮށްލުން ކީއްތޯ އެވެ. ކޮންމެ ރެއަކު ވީޓީވީ ނުވަތަ ދިޓީވީގެ ރޭގަނޑު 8 ގެ ޚަބަރު ތާޅަފިލިން އަޑުގަދަކޮށް މުޅި ރަށަށް އަޑު އިއްވުމުގެ ބޭނުމަކީ އަޅެ ފަހެ ކޮބައިތޯ އެވެ. ޓީވީ އެއް ނުހުންނަ ހަމަ އެންމެ ގެއެއްވެސް ނެތެވެ. އެމީހަކު ބޭނުން ޚަބަރެއް އަޑު އެހުމުގެ ފުރުޞަތު އެންމެންނަށް ދޭށެވެ. ކަންކަމަށް ނުފޫޒު ނުފޯރުވާށެވެ. ކެންޑިޑޭޓުންނަކީ މުސްތަގުބަލްގައި ރަށުގެ ވެރިންނެވެ. ފުރަތަމަ ބިސްމިނަށްވެސް ތިޔަވަނީ ކޮރްޕެޓެވެ. ކަންކަމަށް ނުފޫޒު ފޯރުވަނީ އެވެ. އެދުވަހުން ރައްޔިތުމީހާ ކައުންސިލާ މީހާއަށް ބުނާނެވެ. ".... "
ކެންޕޭން ކުރުމުގައި އުޞޫލުތަކެއް ގަވާޢިދުތަކެއް އޮތްކަމަކު އެކަމަށް ފަރުވާ ބަހައްޓަނީ މަދުބަޔެކެވެ. މިކަމުގެ ސަބަބުން ވާ އުދނގުލަށް ފަރުވާ ކުރަންޖެހެނީ އާއްމުނަށެވެ. އެބަޔަކަށް ޖެހުނުތަނެއްގައި ކުލަޔާއި ދަވާދު ލަނީ އެވެ. ހިތަށް އެރިއެއްޗެއް ފާރުތަކުގައި ލިޔަނީ އެވެ. މަގުބައްތިތަކުގެ ދަނޑީގައި "ތަވީދު" އަޅަނީ އެވެ. މީހުންގެ ހިތްތަކުގައި ބިރުވެރިކަން އުފެދެނީ އެވެ. އެއްބަޔެއްގެ މައްޗަށް އަނެއްބަޔަކު ފޫޅުކަނޑައި ނޫސް ބަޔާންތައް ނެރެނީ އެވެ.
ކެމްޕޭނަށް ބޭނުންކުރެވޭ ކޮންލިޔުމެއް ކޮންމެ ލިޔުމެއް ކޮންމެ ޕޯސްޓަރެއް ވާންޖެހޭނީ ފާސްކުރެވިގެން ނެރޭ ތަކެތި ކަމުގައެވެ. އަދި އެތަކެތި ބަހައްޓަންވާނީ މީހުންގެ ހުއްދަ ލިބިގެންނެވެ. ރަސްމީ ފަރާތްތަކާއި ނުރަސްމީ ފަރާތްތަކުންނެވެ. ކެންޑިޑޭޓުންނަށާއި ތަކެއްޗަށް ގެއްލުންދިނުމަކީ ކޮށްގެންވާނެ ކަމެއް ނޫނެވެ. އެއީ ވަރަށް ދަށުދަރަޖައިގެ އަމަލެކެވެ. ނާތަހުޒީބު މުޖުތަމަޢުތަކުގެ ސިފައެވެ. ވަކިކެންޑިޑޭޓަކަށް ވޯޓް ނުދިނުމަށް ބުނެ އެންޑިކެންޕޭންވެސްކޮށްގެން ނުވާނެއެވެ. މިފަދަ ކަންތައްތަކަކީ ޑިމޮކްރަސީ އާއި މިނިވަންކަމާއި ހައްގުތައް ހޯދައިދިނުމަށް ވަކާލާތުކުރާ ބައެއްގެ ކިބައިން ފެނިގެންވާނެ ސިފައެއް ނޫނެވެ.
ރައްޔިތުންނަށް ޚިދުމަތްކުރާ މަގާމުތަކަށް ވާދަކުރާ ކެންޑީޑޭޓުން ރައްޔިތުންނަށް ނަމޫނާ ދައްކަން އެބަ ޖެހެއެވެ. ތަފާތު ޚިޔާލުތަކުގެ މީހުންނާއި ގުޅިގެން ރައްޔިތުންނާއި ރަށުގެ މަސްލަހަތަށް ރައްކާތެރިވާ ބަޔަކުކަން ކެންޑިޑޭޓުންގެ އަމަލުން ރައްޔިތުންނަށް ޔަގީންކޮށްދޭން އެބަޖެހެއެވެ. ވާދަވެރި އެކުވެރި ރޫހެއްގައި ކެމްޕޭން ހަރަކާތް ބައްޓަންވާން އެބަޖެހެއެވެ. އެހެންނޫނީ މުޅިރަށުގައި ފިތުނައިގެ ނުރައްކާތެރި ހުޅުގަނޑު ފަލައިގެން ގޮސް ހުޅުހިފައި ރައްޔިތުންގެ މުދަލަށް ގެއްލުން ވެދާނެ އެވެ.
Comments