ދިވެހި ގައުމަށް ............
މިއީ ޞާހިބުލް ފަހާމާ މުހައްމަދު އަމީން ވަރަށް އާލާސް ކަންފުޅާ އުޅުއްވާ ޙާލުކޮޅެއްގައި، ފަރުވާކުރެއްވުމަށްޓަކައި ކޮޅުބަށް ފުރާވަޑައިގަންނަ ގަންނަވަމުން، އޭނާގެ ލޯބިފުޅުވާ ދިވެހި ރަޢިއްޔިތުންނާއި މުޚާތަބުކުރައްވައި ޝާއިޢުކުރެއްވި ލިޔުމެކެވެ. މިލިޔުން ނަގާފައިމިވަނީ ސަރުކާރުގެ ޚަބަރު 117 ވަނަ ނަންބަރުންނެވެ. ( 1 ރަޖަބު 1372 )
ތިޔަ އެންމެ ބޭފުޅުންނަށާއި ، އެންމެ ކަނބަލުންނަށާއި ، ކަލުންނަށްވެސް މިހާރު އެގިވަޑައިގެންފައި ވާނޭ ފަދައިން ، ވަރަށް ބަލި ހާލެއްގައި އުޅެމުން، އަޅުގަނޑު މިއަދު ސިލޯނަށް ދިއުމަށް މިފުރަނީ އެވެ. އާދޭހެވެ! މާތް ރަސްކަނލާގެ އިރާދަ ފުޅު ކުރެއްވިޔާ ބޭސްކުޅައުމަށްޓަކައެވެ. ދިވެހި އުއްމަތުގެ ހެޔި ދުޢާ ތަކާއި އެކުގައެވެ.
ނަމަވެސް........... ޝައްކަކަށް ވަސްވާހަކަށް ތަނެއްނެތެވެ. ދުނިޔެއަކީ ދުނިޔެއެވެ. އިންސާނުންނަކީ އިންސާނުންނެވެ. ދުނިޔެވީ ޙަޔާތަކީ ގަރާރުކަމެއްނެތް ހަޔާތެކެވެ. އެހެންކަމުން އަޅުގަނޑުގެ ލޮބުވެތި ވަޠަނަށް ދެން އެނބުރި ނާދެވުން އެއީ ވަރަށްވެސް އެކަށީގެންވާ ކަމެކެވެ. މިދެންނެވި ފަދަ ގޮތުގެ މަތިން ، މާތްރަސްކަނލާގެ މިންވަރު ކުރައްވައިފި ނަމަ، އަޅުގަނޑުގެ އެންމެ ފަހު ނަޞޭޙަތަކީ މިއީ ކަމުގައި ގަބޫލުފުޅު ކުރެއްވުން ވަރަށްވެސް އެދެމެވެ.
ހަނދުމަފުޅު ކުރައްވާށެވެ. ދެދުނިޔޭގެ ސަލާމަތީ ، ދުނިޔޭގެ ތަހުޒީބާއި ތަމަށްދުންގެ ހަގީގީ ސިއްރުކަމުގައިވާ މާތް އިސްލާމް ދީނެވެ. އެދީނުގެ އަޞްލު އުޞޫލުތަކުގައު ހިފަހައްޓައިފި މީހަކީ ، މިއުއްމަތުގެ މާތް ނަބިއްޔާގެ މަތިވެރި އުޅުއްވުން ފުޅު ތަކަށް ތަބަޢަވެއްޖެ މީހަކީ ސަލާމަތްވެއްޖެ މީހެކެވެ. މި ދެންނެވި ގޮތުން އެއްކިބާވެއްޖެ މީހަކީ ގެއްލި ހަލާކުވެއްޖެ މީހެކެވެ. ދީނުގެ ފަރުޟުތައް ހަނދުމަކުރައްވާށެވެ. ޚާއްޞަކޮށް އިސްލާމުދީނުގެ ތަނބުކަމުގައިވާ ނަމާދާއި ގައިގޯޅިވެވަޑައިގަންނަވާށެވެ. ގައުމުގެ ދިފާޢީ އައްޑަނަތަކަކީ ތެދުވެރި ދުޢާކަމުގައި ހައްދަވާށެވެ.
ދެން އަޅުގަނޑު އެއްޗެއް ދަންނަވާނީ ސިޔާސީ ރޮނގުންނެވެ. އަޅުގަނޑުގެ ވާހަކަ ކުރުވެފައި ސާދާ އެވެ. އަޅުގަނޑަށް ޔަގީންވާގޮތުގައި މި ގައުމު މާތްރަސްކަނލާގެ ވާގިފުޅާލައިގެންސަލާމަތްވާނެ އޮތީ ހަމަ އެންމެ ގޮތެކެވެ. އަޅުގަނޑުމެންގެ ނައިބު ރައީސް ޞޯހިބުލްމަޖުދު އަލްފާޟިލް އިބްރާހިމް މުހައްމަދު ދީދީގެ ފަހަތްޕުޅުން ދިވެހި އުއްމަތުގެ އެންމެ ދަރިން ބިރެއްނެތި ސިހުމެއްނެތި ހިނަގަމުން ދިއުމެވެ. ޝައްކުކުރުމަކީ ހިތަށްވަސްވާސް ވެއްދުމަކީ ވަރަށް ގިނަފަހަރަށް އުއްމަތުގެ އެއްހަލާކެވެ. އިއްތިޙާދަކީ ، ވެރިއެއްގެ މައްޗަށް ހިތަށް ގެނެވޭ ޔަގީން ކަމަކީ، ގާތްގަނޑަކަށް ކޮންމެ ފަހަރަކުމެ އުއްމަތުގެ ސަލާމަތެކެވެ. އަޅުގަނޑު ތަކުރާރުކޮށް ދަންނަވަމެވެ. އަޅުގަނޑު ނެތިއްޖެ ނަމަ، އުއްމަތުގެ ބަހުސެއްނެތް ވެރިއަކީ އަލްފޟިލް އިބްރާހިމް މުހައްމަދު ދީދީ ކަމުގައި ގަބޫލުފުޅު ކުރައްވާށެވެ. އޭނާއަށް އުއްމަތު ހަމްދަރުދީއާއި ، އެހީތެރިކަމާއި، މަދަދުވެރިކަން ދެއްވާށެވެ. މާތްރަސްކަނލާގެ އަޅުގަނޑުމެންގެ ނާއިބުރައީސަށާއި، ދިވެހި ދަރީންނަށް ގައުމުގެ އެންމެހައި ކަންތައްތައް ހެޔޮގޮތުގެމަތިން ގެންދެވުމުގެ ތައުފީޤް ދެއްވާށިއެވެ.
އަޅުގަނޑު ދެން އެއްޗެއް ދަންނަވާލާހިތް އޮތީ ގައުމުގެ ވެރިންނާއި މުޚާތަބުކޮށެވެ. ވެރިންނަކީ ރައްޔިތުންގެ ޙާއްޞަކޮށް ނިކަމެތި ފަގީރު ރައްޔިތުންގެ ހާލު އަހުވާލު ބެލުމަށްޓަކައި މާތްރަސްކަނލާގެ އިސްކުރައްވާ ބަޔެކެވެ. ރައްޔިތުންނާއި މެދު ވެރީން އަދާކުރަންވެފައިވާ ހައްގުތައް ގިނަގުނަވެފައި ތަފާތެވެ. އެހައްގުތަކާއިމެދު ޚިޔާނާތްތެރިވެއްޖެ ނަމަ، އެކަމަށްޓަކައި އާޚިރަތްދުވަހުން ޖަވާބުދޭން ޖެހޭނޭކަމާއިމެދަކު ޝައްކެއް ނެތެވެ. ޚިޔާނާތްތެރިވެރީންގެ މަގާމަށް އެހެންވެރީން އިސްކުރައްވާނޭކަމުގައި އަޅުގަނޑުމެންގެ މާތް ދީން ވަރުގަދައަށް އަންގައިދެއެވެ. އާދޭހެވެ! ރައްޔިތުންގެ ހާލު ބައްލަވާށެވެ. ޙާއްޞަކޮށް ބާރެއް އާރެއްނެތް ނިކަމެތީންގެ ހާލު އިސްލާހު ކުރެވޭތޯ މަސައްކަތްކުރައްވާށެވެ. އެކަމުގެ ހެޔޮ ޘަވާބު މާތްރަސްކަނލާގެ ތިޔަބޭފުޅުންނަށް ދެއްވާށިއެވެ.
އަޅުގަނޑު ލޯބިވާ އަޚުންނާއި އުޚުތުންނޭވެ! ދިވެހިންގެ މާތް ދީނަށާއި ފަޚުރުވެރި މިނިވަންކަމަށް، އަމިއްލަ ފުރާނަފުޅަށްވުރެ ބޮޑަށް ރައްކައުތެރިވެ ވަޑައިގަންނަވާށެވެ. ވިދާހައި އެއްޗަކީ ރަނެއްނޫން އިގޭތޯ އެވެ!
އަޅުގަނޑު މަރުވެ، ފަނާވެދިއުމަށްފަހު އަޅުގަނޑާއިމެދު ދިވެހި އުއްމަތް ހީކުރުން އަޅުގަނޑު އެދެނީ އެންމެ އެއްޗެކެވެ. އަޅުގަނޑު ގައިހުރި ހުރިހައި އުނިކަމަކާއިއެކުވެސް ދައުލަތަށާއި ރައްޔިތުންނަށް ތެދުވެރިކަމާއި އިޚުލާޞްތެރިކަމާއިއެކު ޚިދުމަތް ކުރެވޭތޯ މަސައްކަތްކުރި، ވަފާތެރި ދިވެހި ދަރިއެއްކަމުގައެވެ.
އަޅުގަނޑުގެ ލޯބިވާ އަޚުންނާއި އުޚުތުންނަށް ، އަލްވަދާޢު ކިޔަނީ ޝުކުރުވެރި ހިތަކާއިއެކުގައެވެ. އަޅުގަނޑުގެ މިދިގުބަލީގައި އުއްމަތުގެ ފަރާތުން ފެންނަމުންދިޔަ ހަމްދަރުދީގެ ނިޝާންތަކަށް ޓަކައެވެ. ލިބެމުންދިޔަ ބަޔާންނުކުރެވޭ ފަދަ އެހީތެރިކަމަށްޓަކައެވެ.
މާތްރަސްކަނލާގެ ރުއްސެވިއްޔާ އަލްފާޟިލް އިބްރާހިމް މުހައްމަދު ދީދީ ނިޔަމިކަމުގެ ދަށުގައި ދިވެހި އުއްމަތް ހިނގަމުންދާނީ ކުރިއަށެވެ. އަޅުގަނޑުގެ އަމިއްލަ ދަރިފުޅާއި، އަޅުގަނޑުގެ ލޯބިވާ ބޭފުޅުންކޮޅާއި އަޅުގަނޑުގެ ދަރީންކަމުގައިވާ ދިވެހި އުއްމަތުގެ ދަރީން ނުގުޑާ ފަދަ އީމާނަކާއި ހިތަހަމަ ޖެހުމާއިއެކު އަޅުގަނޑު ވަކީލް ކުރަނީ އިންސާފުވަންތަ ރަހީމްވަންތަ ރަސްކަނލާގެއާއެވެ. މާތްރަސްކަނލާގެ އެކުދީންނަށާއި ދިވެހި އުއްމަތަށް އަބަދަށް ހެޔޮ ރަހުމަތްފުޅު ލައްވާށިއެވެ. ............. ޝުކުރިއްޔާ އަދި އަލްވަދާޢު !
23 ޖުމާދިލްއޫލާ 1372
ގައުމަށް ޚިދުމަތްކުރެވޭތޯ މަސައްކަތްކުރާ
މުހައްމަދު އަމީން
Comments