އިންސާގެ އުފެއްދެވުން

އާދަމުގެ ދަރިޔާ

ހާރޫން ޔަޙުޔާ , ތަރުޖަމާ: ޑރ. މޫސާ މުރާދު/ ދަރުމަ - ސެޕްޓެމްބަރ 2003
ރަޙިމުގައި އުފެދުން:-.

އާދަމުގެ ދަރިޔާ އޭނާގެ ހަމަވިސްނުމުގެ ބޭނުން ނުހިފައި އަމިއްލަ ނަފްސަށް އޭނާ މިވުޖޫދަށް އައީ ކިހިނެއްކަމާމެދު ސުވާލުނުކުރާ ކަމުގައިވާނަމަ އޭނާއަށް އިޚްތިޔާރު ކުރެވޭނީ އެއްވެސް ތާކުންތާކު ނުޖެހޭ ޚިޔާލުތަކެކެވެ. “އަހަރެން ކޮންމެވެސް ގޮތަކުން ވުޖޫދަށް އައީއެވެ! ............” މިފަދަ ޚިޔާލުތަކާއެކު އޭނާ ފަށާ ދިރިއުޅުމުގައި މިކަންތައްތަކާއިމެދު ވިސްނާނެ ކުޑަވެސް ވަގުތުކޮޅެއް އޭނާއަކަށް ނުލިބެއެވެ.

ހަމަވިސްނުން ހުރި އިންސާނަކުނަމަ އޭނާ ވުޖޫދަށް އައިގޮތާއި ދުނިޔެމަތީގައި އޭނާއަށް އުޅެން ލިބިފައިވާ ދިރިއުޅުމުގެ މާނައާއި ބޭނުމާއިމެދު ވިސްނާ ޚިޔާލުކުރަން ޖެހޭނެއެވެ. މިފަދަ ޚިޔާލުތައް ކުރާއިރު “އަހަރެން ހައްދަވާފައިވަނީ ކޮންމެވެސް ފަރާތަކުން” ކަން ވިސްނޭ ބައެއް މީހުން ބިރުގަންނަ ފަދައިން ބިރުގަންނާކަށް ނުޖެހެއެވެ. މިފަދައިން ބިރުގަންނަ މީހުން، އެބައިމީހުން ހެއްދެވި ފަރާތަށް ނުވަތަ ކަލާނގެއަށް އެބައިމީހުންގެ ފަރާތުން އެއްވެސް ޒިންމާއެއް ވާކަމަށް ގަބޫލުކުރާކަށް ބޭނުމެއް ނުވެއެވެ. އެބައިމީހުން ހެއްދެވީ ކޮންމެވެސް ފަރާތަކުންކަން ގަބޫލުކޮށްފިނަމަ، އެބައިމީހުންގެ ދިރިއުޅުމުގެ ވައްޓަފާޅިއާއި، އާދަތަކާއި ގަބޫލުކުރާ ކަންތައްތައް ބަދަލުކުރަން ޖެހިދާނެކަމަށް މިބައިމީހުން ބިރުގަނެއެވެ. އެހެންކަމުން ވުޖޫދަށް ގެންނެވި ކަލާނގެއަށް ކިޔަމަންނުވާން ދުވަނީއެވެ.

އެމީހެއްގެ ދިރިހުރުމާއިމެދު ޚިޔާލާއި ފިކުރު ހިންގައި، ހަމަވިސްނުން ވިސްނާ މީހަކަށް، އެމީހެއްގެ ކިބައިގައި ހުރިކަންތައްތައް ދޭހަކޮށްދެނީ ހަމަ އެންމެ ކަމެކެވެ. އެހަށިގަނޑަކީ މާތްﷲ، އެކަލާނގެ ކުޅަދުންވަންތަކަމުން އުފައްދަވައި ފުރާނަ އަޅުއްވާފައިވާ އެއްޗެއްކަމެވެ. އޭނާގެ ދިރިހުރުން ބިނާވެގެންވަނީ އެތައްހާސް ނިޒާމްތަކެއްގެ ބަރާބަރު މަސައްކަތާކަމެވެ. މިއިން ހަމަ އެންމެ ނިޒާމަކީވެސް އޭނާ އަމިއްލައަށް އުފެއްދި އަދި އޭނާގެ ބާރުހިނގާ، ކޮންޓްރޯލް ކުރެވޭ އެއްޗެއް ނޫންކަމެވެ. އޭނާއަށް މިކަމުގެ ސަބަބުން ވިސްނޭނެއެވެ. އޭނާ ހެއްދެވި ކޮންމެވެސް ފަރާތެކެވެ. އަދި އޭނާ، އޭނާ ހެއްދެވި ފަރާތް ދެނެގަންނާނެއެވެ. ނަތީޖާއަކީ އޭނާ ހެއްދެވި ފަރާތް އޭނާ ވުޖޫދަށް ގެނެސްފައިވަނީ ކޮން މަޤްޞަދެއްގައި ކަމާމެދު ވިސްނަން އޭނާ މަސައްކަތް ކުރުމެވެ.

އެމީހަކު ހައްދަވައި ވުޖޫދަށް ގެނުވި ސަބަބާއި ބޭނުން ވިސްނައި ހޯދައިގަންނަން މަސައްކަތްކުރާ މީހަކަށް މަގުދައްކާ ފޮތެއް ވެއެވެ. ކީރިތި ޤުރުއާން އެވެ. ޤުރުއާނަކީ އެމީހާއަށާއި އެކަލާނގެ ހައްދަވައި ދުނިޔެމައްޗަށް ފޮނުއްވި އެންމެހައި މީސްތަކުންނަށް މަގުދައްކާ ފޮތެވެ.ވުޖޫދަށް އައިސް ހެދިބޮޑުވުމުގައި ކަންތައްތައް ވަމުންދާ ގޮތަކީ ޤުރުއާނުގައި އެކަން އައިސްފައިވާ ގޮތަށް ހިނގަމުންދާ ކަންތައްތައްކަމީ ވިސްނައި ފިކުރުކުރާ މީހަކަށް ހުރި ހެކިތަކަކާއި ދަލީލުތަކެކެވެ. އަންނަނިވި ޞަފްޙާތަކުގައި ވަނީ، ޚިޔާލާއި ވިސްނުންހުރި މީހަކަށް ހުރި މަޢުލޫމާތުތަކެކެވެ. އެބައިމީހުން ހެއްދެވި ގޮތާއި އެކަމުގައިވާ ޢިބްރަތްތަކާއި އާދަޔާޚިލާފު ކަންތައްތަކާއި ފުރިހަމަކަމެވެ. އިންސާނެއް އުފެދުމުގެ ވާހަކަ ފެށިގެން އަންނަނީ ވަރަށް ދުރުގައިވާ ތަފާތު ދެތަނަކުންނެވެ. އިންސާނާ ދިރިހުރުމުގެ ތެރެއަށް ފިޔަވަޅު އަޅަނީ،

އަންހެނާއާއި ފިރިހެނާގެ ހަށިގަނޑުގައި އެކުލެވޭ ތަފާތު ދޭއްޗެއް ގުޅި ލާމެހިގެންނެވެ. މިއިން ކޮންމެ އެއްޗެއްވެސް އުފެދިފައިވަނީ އަނެކެއްޗާއި ގުޅުމެއްނެތި މިނިވަންކަންމަތީގައެވެ. ފުރިހަމަކަންމަތީގައެވެ. ދޮގުނުކުރެވޭނެ ޙަޤީޤަތަކީ ފިރިހެނާގެ ހަށިގަނޑުގައިވާ ދަރިމައިވުމުގެ ފަނި އުފެދިފައިވަނީ އޭނާގެ އެއްވެސް އިޚްތިޔާރަކާއި ނުލައި އޭނާގެ އެއްވެސް ކޮންޓްރޯލެއް ނެތިއެވެ. ހަމަ އެހެންމެ، އަންހެނާގެ ހަށިގަނޑުގައިވާ ދަރި ބިސް އުފެދިފައިވަނީ އޭނާގެ އިޚްތިޔާރެއްނެތި، އޭނާގެ ކޮންޓްރޯލެއް ނެތިއެވެ. އަދި ކިއެއްތަ، މިއިން ކަމެއް ހިނގަނީ އެއިން އެއްވެސް މީހަކަށް އެނގުމަކާވެސް ނުލައެވެ.“ތިޔަބައިމީހުން ހެއްދެވީ ތިމަންރަސްކަލާނގެއެވެ. ފަހެ ތިޔަބައިމީހުން ތެދުނުކުރަނީ ކީއްވެހެއްޔެވެ؟ ތިޔަބައިމީހުން ބޭރުކުރާ މަންޏާމެދު، ތިޔަބައިމީހުން ފަހެ ވިސްނައި ބެލީމުހެއްޔެވެ؟ އެތަކެތި ހަދަނީ ތިޔަބައިމީހުން ހެއްޔެވެ؟ ނުވަތަ ހައްދަވާ ފަރާތަކީ ތިމަންރަސްކަލާނގެ ހެއްޔެވެ؟” (ސޫރަތުލްވާޤިޢާ: 57، 58، 59)ހާމަވާން ހުރި ޙަޤީޤަތަކީ އަންހެނާއާއި ފިރިހެނާގެ ހަށިގަނޑުން މިއަންނަ ތަފާތު ދެމާއްދާ އުފައްދަވާފައިވަނީ އެކަތި އަނެކައްޗާއި ގުޅޭގޮތަށެވެ. މިދެމާއްދާ އުފެއްދުމާއި، އެދޭތި ގުޅި ލާމެހުމާއި އެއަށްފަހު އިންސާނަކަށް ބަދަލުވުން މިއީ ހަމަގައިމުވެސް ޢަޖާއިބުތަކެކެވެ. މުޢުޖިޒާތްތަކެކެވެ.

ދަރި ފަންޏާއި ފަނި އުފައްދާ ގުނަވަން:

ފިރިހެން ދަރި ފަނި (އިންސާނަކު އުފެދުމުގެ ފުރަތަމަ މަރުޙަލާ) އުފެދެނީ އިންސާނާގެ ހަށިގަނޑުން ބޭރުގައެވެ. މިކަން މިގޮތަށް ހިނގާ ސަބަބަކީ މިފަނި އުފެދުމަށް ހަށިގަނޑުގައި ހުންނަ ހޫނުމިނަށްވުރެ ދެޑިގްރީ ދަށް ހޫނުމިނެއް ބޭނުންވާތީއެވެ. ހޫނުމިން މިވަރުގައި، އެއްވަރެއްގައި ހިފެހެއްޓުމުގެ ގޮތުން ފަނި އުފައްދާ ގުނަވަނުގެ (ޓެސްޓިކަލްގެ) ބޭރުން ޚާއްޞަ ހަންގަނޑެއް ވަނީ ލެވިފައެވެ. ފިނި މާޙައުލެއްގައިނަމަ އެހަންގަނޑަށް ބާރުވެ ކުޑަވެއެވެ. ހޫނު މާޙައުލެއްގައި ހަންގަނޑު ދޫވެ ބޮޑުވެއެވެ. ފިނިހޫނުމިން އެއްވަރެއްގައި ހިފަހައްޓަމުންނެވެ. މިނާޒުކު އަދި ހަމަހަމަ ކަންތަކަށް ބާރު ފޯރުވައި ކަންތައް ހިނގާނެގޮތް ކަނޑައަޅަނީ ފިރިހެނާ އަމިއްލައަށް ހެއްޔެވެ؟ ހަމަޔަޤީނުންވެސް ނޫނެކެވެ. މިކަންތައް މިގޮތަށް ހިނގަމުންދަނީ ފިރިހެނާއަށް އެނގުމަކާވެސް ނުލައެވެ. ހެއްދެވި ފަރާތް ވާކަން ގަބޫލު ނުކުރަން ގަދަހަދާ މީހުންނަށް މިކަމާމެދު ބުނެވޭހާވެސް އެއްޗަކީ “އެއީ ހޯދިފައިނުވާ އިންސާނާގެ ހަށިގަނޑުގެ މަސައްކަތެއް” ކަމަށެވެ. ނަމަވެސް “ހޯދިފައިނުވާ މަސައްކަތެއް” ގެ އެއްވެސް މާނައެއްނެތެވެ. މިއީ ހަމައެކަނި ދެލަފްޒެކެވެ.ފަނި އުފެދޭ ގުނަވަނުގައި މިނެޓަކު 1000 ފަނި އުފެދެމުން ދާއިރު، މިއިން ކޮންމެ ފަންޏެއްވެސް އުފެދިފައިވަނީ އަންހެނާގެ ބިސް އުފައްދާ ގުނަވަން (އޯވަރީ) އާއި ދިމާއަށް ދަތުރުކުރެވޭފަދަ ޚާއްޞަ ސިފައަކަށެވެ. ދަތުރު ކުރިއަށްދާއިރު ހީވަނީ ދާންވީ މިޞްރާބު އެއަށް “އެނގޭ” ހެންނެވެ. ދަރި ފަނި އެކުލެވިގެންވަނީ ބޮލާއި، ކަރު އަދި ނިގުލެއްގެ މައްޗަށެވެ. ރަޙިމުގެތެރޭގައި، މަހެއްފަދައިން ޙަރަކާތްތެރިވުމަށް އެއަށް އެހީވެދެނީ މިނިގުލެވެ. ކުޑަކުއްޖާގެ “ޖެނެޓިކް މަޢުލޫމާތު” ގެ ބައެއް ހިމެނޭ ބޮލުގެ ވަށައިގެންވަނީ ރައްކާތެރިކަމުގެ ޚާއްޞަ ފަށަލައެއް ލެވިފައެވެ. މިރައްކާތެރިކަމުގެ ފަށަލައިގެ މަސައްކަތް ހާމަވަނީ މަންމަގެ ރަޙިމުގެ ތެރެއަށް ފަނިވަންނަ ވަގުތުގައެވެ. ރަޙިމުގެ ތެރޭގައި ވަނީ އެސިޑް އެކުލެވިގެންވާ މާޙައުލެކެވެ. ޝައްކެއްނެތި އެނގޭކަމަކީ ދަރި ފަނި މިފަދަ ރައްކާތެރި ފަށަލައަކުން ރައްކާތެރި ކޮށްފައިވަނީ ރަޙިމުގެ އެތެރޭގެ މާޙައުލުގެ ޙަޤީޤަތް ރަނގަޅަށް ދެނެވޮޑިގެންވާ ފަރާތެކެވެ. (މިފަދަ އެސިޑް އެކުލެވިގެންވާ މާޙައުލެއް ރަޙިމުގެ އެތެރޭގައިވުމުގެ ބޭނުމަކީ މައިމީހާ ބަލިޖައްސާ ޖަރާސީމުތަކުން ދިފާޢުކުރުމެވެ.)އަނބިފިރިކަމުގެ ގުޅުން ހިންގުމުން ރަޙިމުގެ ތެރެއަށް ދޫވެގެންދަނީ ހަމައެކަނި މިލިއަނުން ގުނާލެވޭ މިފަދަ ފަނިތަކެއް އެކަންޏެއް ނޫނެވެ. ފިރިހެނާގެ ޖިންސީ ގުނަވަންތަކުން އުފައްދާ ދިޔައަކީ އެތައް ބައިވަރު ވައްތަރުގެ ދިޔަތަކެއް އެކުލެވިގެންވާ އެއްޗެކެވެ. ކީރިތި ޤުރުއާނުގައި މިވާހަކަ ވަނީ ވަރަށް ފުރިހަމަކޮށް ބަޔާން ކުރެވިފައެވެ. “ނަންގަނެވިގެންވާ އެއްޗެއް ކަމުގައި އިންސާނާ ނުވާ ޒަމާންތަކެއް އެ އިންސާނާގެ މައްޗަށް އައިކަން ކަށަވަރެވެ. ހަމަކަށަވަރުން އެއްކުރައްވާފައިވާ މަނިތިއްކަކުން، ތިމަންރަސްކަލާނގެ އިންސާނާ ހެއްދެވީމެވެ. (އެއީ) އޭނާ އިމްތިޙާން ކުރެއްވުމަށްޓަކައެވެ. ފަހެ ކަންފަތަށް އިވޭ، ލޮލަށް ފެންނަ މީހަކު ކަމުގައި ތިމަންރަސްކަލާނގެ އޭނާ ލެއްވީމެވެ.”(ސޫރަތުލްއިންސާން: 1، 2)ފިރިހެނާގެ މަނީގައި އެކުލެވޭ ތަފާތު ދިޔަތަކުގެ ތެރޭގައި ހަކުރުގެ ބާވަތެއްވެއެވެ. ފަނި ދަތުރުކުރުމަށް ބޭނުންވާ ހަކަތަ ލިއްބައިދެނީ މިހަކުރުގެ މާއްދާއިންނެވެ. މީގެއިތުރުން، މި ތަފާތު ދިޔާ ތާސީރުތަކުގެ މަސައްކަތްތަކުގެ ތެރޭގައި، މަންމަގެ ރަޙިމަށް ވަދެވެން ހުންނަ ދޮރު ކައިރީގައި ހުންނަ އެސިޑްގެ ބާރު ނެތިކޮށްލާ، ފަނި ދަތުރުކުރުމަށް އެހީވުމުގެ ގޮތުން ލޮނދި މާޙައުލެއް އުފައްދައިދެއެވެ. (މިތަނުންވެސް އަޅުގަނޑުމެންނަށް މި ދޭހަވަނީ ތަފާތު ދެމީހަކު ހައްދަވާފައި މިވަނީ އެކަކު އަނެކަކާއި ގުޅެވޭނެ ގޮތަށްކަމެވެ.) މަންމަގެ ބިހާއި ހަމަޔަށް ވާޞިލުވުމަށްޓަކައި މަންމަގެ ހަށިގަނޑުގެ އެތެރޭގައި ފަނި ކުރާ ދަތުރަކީ ދިގު އަދި އެހާމެ އުނދަގޫ ދަތުރެކެވެ. އަމިއްލައަށް ނުރައްކާތަކުން ސަލާމަތްވާން މިފަނިތައް މަސައްކަތް ކުރަމުން ދިޔަކަމުގައިވިޔަސް، މަންމަގެ ހަށިގަނޑުގެ ތެރެއަށް ދޫކޮށްލެވޭ 200 ނުވަތަ 300 މިލިއަން ފަނިތަކުގެ ތެރެއިން މަންމަގެ ބިހާއި ހަމަޔަށް ދަތުރު ކާމިޔާބު ކުރެވެނީ ހަމަ އެންމެ އެއްހާހެއްހާ ފަންޏަށެވެ.

އަންހެނާގެ ދަރިމައިވުމުގެ ބިސް:

ފިރިހެން ދަރިފަނި ޑިޒައިން ކުރެވިފައިވަނީ އަންހެނާގެ ބިހާ ގުޅެވޭ ގޮތަށް ކަމަށްވާއިރު، އަންހެނާގެ ބިސް އަނެއްކޮޅުން، އައު ދިރުމެއްގެ އޮށަށްވުމަށް ތައްޔާރުވެފައިވަނީ މުޅިން ތަފާތު އެހެން މާޙައުލެއްގައެވެ. އަންހެނާއަށް އެނގުމަކާނުލައި ފުރަތަމަ އޯވަރީގެ ތެރޭގައި އިނދެ ފައްކާވެފައިވާ ބިހެއް ބަނޑުގެ ތެރޭގައިވާ ހުސްޖާގައިގެ ތެރެއަށް ދޫކޮށްލެވެއެވެ. އެއަށްފަހު އެބިސް އަތުލައިގަންނަނީ، ރަޙިމުގެ ދެފަރާތުގައި ލެވިފައިވާ ބިސް ދަތުރުކުރާ ހޮޅި (ފެލޯޕިއަން ޓިއުބް) ގެ ހާމައަށް އިން ކޮޅުގައި ލެވިފައިވާ އިނގިލިތަކެއްގެ ސިފައިގައިވާ އެއްޗެހިތަކަކުންނެވެ. މިއާއެކު ބިސް މިހޮޅީގެ ތެރޭގައި ދަތުރުކުރަންފަށަނީ ހޮޅީގެ ތެރޭގައި ލެވިފައިވާ ކުދިކުދި އިސްތަށިތަކެއް ފާޑުގެ އެއްޗެހިތަކެއްގެ އެހީގައެވެ. މިބިހުގެ ބޮޑުމިން އެއްވަރީ ލޮނުފުކެއްގެ އެއްބަޔާއެވެ.ޢާއްމުކޮށް ބިހާއި ފަނި ބައްދަލުވާ މަންޒިލަކީ ބިސް ދަތުރުކުރާ ހޮޅީގެ އެތެރެއެވެ. މިތަނުގައި ޚާއްޞަ ދިޔާ ތާސީރެއް ބިހުން އުފައްދައެވެ. މިތާސީރުގެ އެހީގައި ފަނި، ބިސް ވާތަން ހޯދައިގަނެއެވެ. އަޅުގަނޑުމެން “ބިހުން ޚާއްޞަ ތާސީރެއް އުފައްދާ” ވާހަކަ ބުނާއިރު ވިސްނާލަންޖެހޭ ކަމަކީ އަޅުގަނޑުމެން މިވާހަކަ ދައްކަނީ ހެޔޮބުއްދި ހުރި މީހެއް ނުވަތަ އެއްޗެއްގެ ވާހަކައެއް ނޫނެވެ. ލޮލަށް ނުފެންނަވަރުގެ ކުޑަކުޑަ ޕްރޮޓީން އިން އުފެދިފައިވާ އެތިކޮޅެއް، އޭތި “އަމިއްލައަށް” ކެމިކަލް ތާސީރެއް “އުފައްދައި” ދަރި ފަނި އެއާދިމާލަށް ދަމަން “ޤަޞްދު” ކުރުމަކީ އިއްތިފާޤެއް ނޫނެވެ. މިކަމުން ދޭހަކޮށްދޭ ކަމަކީ ކޮންމެ އެއްޗެއްވެސް އުފެދިފައިވަނީ އޭތީގެ މަސައްކަތް ފުރިހަމަކުރެވޭނެ ޑިޒައިނަކަށްކަމެވެ. ކުރުކޮށް ބުނާނަމަ، އިންސާނާގެ ހަށިގަނޑުގައިވާ ދަރިމައިވުމުގެ ގުނަވަންތައް ޑިޒައިން ކުރެވިފައިވަނީ ބިހާއި ފަނި އެކަތި އަނެކައްޗާއި ގުޅެވޭނެ ގޮތަކަށެވެ. މީގެ މާނައަކީ އަންހެނާގެ ދަރިމައިވުމުގެ ގުނަވަންތައް އުފެދިފައިވަނީ ފިރިހެނާގެ ފަނީގެ ބޭނުންތައް ފުދޭގޮތަށްކަމާއި ފިރިހެނާގެ ފަނި އުފެދިފައިވަނީ އަންހެނާގެ ހަށިގަނޑުގެ ތެރޭގައިވާ ވެށީގައި އޭތީގެ މަސައްކަތް ބަރާބަރަށް އަދާކުރެވޭގޮތަށްކަމެވެ.

ބިހާއި ފަނި ބައްދަލުވުން:

ދަރި ފަނި ބިހާއި ހަމަޔަށް ކައިރުވުމުން، އަނެއްކާވެސް ފަންޏަށް ޚާއްޞަ ކުރެވިފައިވާ ކެމިކަލް ތާސީރެއް އުފައްދަން ބިސް “ޤަޞްދު” ކުރެއެވެ. މިތާސީރުގެ އެހީގައި ފަނީގައި ލެވިފައިވާ ރައްކާތެރިކަމުގެ ފަށަލަ ގިރުވާލައި ނެތިކޮށްލައެވެ. ނަތީޖާއަކަށްވަނީ، ފަނީގެ ނިގޫކޮޅުގައިވާ ބިހަށް ޚާއްޞަ ކުރެވިފައިވާ ކެމިކަލް ތާސީރުގެ ޕެކެޓްތައް ހާމަވެ، މިޕެކެޓްތައް ފަޅައިގެން ދިއުމެވެ. ފަނި ބިހާއި ހަމަޔަށް ވާޞިލުވުމުން، މިތާސީރުގެ މަސައްކަތަކީ ބިހުގެ ބޭރު ފަށަލައިގައި ބާގަނޑެއް ހަދައި ފަންޏަށް ބިހުގެ ތެރެއަށް ވަދެވޭނޭގޮތް ހަދައިދިނުމެވެ. ބިހުގެ ވަށައިގެންވާ ހުރިހާ ފަންޏަކުންވެސް ބިހުގެ ތެރެއަށް ވަންނަން ވާދަކޮށް މަސައްކަތް ކުރެއެވެ. ނަމަވެސް ޢާއްމުގޮތެއްގައި ބިހުގެ ތެރެއަށް ވަދެ، ބިސް ދަރިމައިކުރެވެނީ އެންމެ ފަންޏަކަށެވެ.ކީރިތި ޤުރުއާނުގައި މިމަރުޙަލާގެ ވާހަކަ އައިސްފައިވާ އާޔަތްތަކަކީ ވަރަށް ޢިބްރަތްތެރި އާޔަތްތަކެކެވެ. ކީރިތި ޤުރުއާނުގައި މިވާހަކަތައް އައިސްފައިވާއިރު، އިންސާނާ ހައްދަވާފައިވަނީ ދިޔާ ތާސީރެއްގެ “އެތިކޮޅަކުން” ކަން އަންގަވާފައިވެއެވެ. މި ދިޔައަކީ ފިރިހެންމީހާގެ މަންޏެވެ. “ދެން އެކަލާނގެ އެއިންސާނާގެ ދަރިފަސްކޮޅު ދެރަވެގެންވާ ފެނެއްގެ ޚުލާޞާއަކުން ހެއްދެވިއެވެ.” (ސޫރަތުއްސަޖިދާ: 8)މިއާޔަތުން އަޅުގަނޑުމެންނަށް ދޭހަވާ ފަދައިން، ބިސް ދަރިމައިކުރަނީ ފަނި، އެދިޔައެއްގެ ތެރޭގައި އެކުލެވޭ ދިޔައަކުން ނޫނެވެ. އެހެނަސް އެދިޔައިގައި ހިމެނޭ “އެތިކޮޅަކުން”ނެވެ. ދަރިމައިކުރާ އޭޖެންޓަކީ މިދިޔައިގެ ތެރޭގައި ހިމެނޭ ފަނިތަކުގެ ތެރެއިން އެންމެ ފަންޏެކެވެ. އަދި ކިއެއްތަ މިފަނީގެ އެތެރޭގައި ހުރި “އެތިކޮޅުތަކެއް” ކަމުގައިވާ ކްރޮމޮސޯމްތަކެވެ.

ބިހުގެ ތެރެއަށް އެންމެ ފަންޏަކަށް ވަދެވޭހިނދު، އިތުރު އެހެން ފަންޏަކަށް އޭގެ ތެރެއަށް ވަދެވުމަކީ ނާދިރުކަމެކެވެ. ސަބަބަކީ ބިހުގެ ވަށައިގެން ލެވޭ ކަރަންޓް މާޙައުލެކެވެ. ބިހުގެ ވަށައިގެން ފުރަތަމަހުންނަނީ ނެގެޓިވް(-) ޗާރޖްތަކެކެވެ. ފުރަތަމަ ފަނި ބިހުގެ ތެރެއަށް ވަނުމާއެކު މިޗާރޖްތައް ޕޮސިޓިވް (+) ޗާރޖް ތަކަކަށް ބަދަލުވެއެވެ. އެހެންކަމުން، ވަށައިގެންތިބި ފަނިތަކުގައި ހުންނަ ޗާރޖްތަކާއި އެއްފަދަ ޗާރޖެއް ބިހަށް ލިބިގެން ދާހިނދު، ބިހުން ފަނިތައް ދުރަށް ކޮއްޕާން ފަށަނީއެވެ. މިކަމުން ދޭހަކޮށްދޭ މާނައަކީ، މުޅީން ވަކިން އުފެދިފައިވާ މިތަފާތު ދޭތީގެ ވަށައިގެން ލެވިފައިވާ ކަރަންޓް ޗާރޖްތައްވެސް ލެވިފައިވަނީ އެކަތި އަނެކައްޗާއި ގުޅޭގޮތަށްކަމެވެ. އެއަށްފަހުން ކަންތައްވާގޮތަކީ، ފިރިހެނާގެ ފަނީގައި އެކުލެވޭ ޖަނަޓިކް މަޢުލޫމާތު އާއި އަންހެނާގެ ބިހުގެ އާއި ލާމެހެނީއެވެ. ދެން އެއުފެދުނީ އައު ދިރުމެއްގެ ފުރަތަމަ އޮށެވެ. ރަޙިމުގެ ތެރޭގައި އުފެދޭނެ އައު އިންސާނެއްގެ ފުރަތަމަ ދިރޭ ޒައްރާއެވެ. މިދިރޭ ޒައްރާއަށް އިނގިރޭސިން ކިޔަނީ ޒައިގޯޓް އެވެ.

ރަޙިމުގެތެރޭގައި ހަރުވެފައިވާ ގަނޑުލޭކޮޅު:

ފިރިހެނާގެ ފަންޏާއި އަންހެނާގެ ބިސް، މަތީގައި ބަޔާން ކުރެވުނު ފަދައިން ގުޅި ލާމެހުމުން، އުފަންވާނެ އައު ކުޑަކުޑަ އިންސާނާގެ ފުރަތަމަ އަސާސް އުފެދުނީއެވެ. ސައިންސްގެ ބަހުރުވައިން “ޒައިގޯޓް” ނަންދެވިފައިވާ މިދިރޭ ޒައްރާ، ވަގުތުން ބޮޑުވާންފަށާ، ބައިވަރު ދިރޭ ޒައްރާތަކަކަށް ބައިވާން ފަށައެވެ. ދެން ކުޑަކުޑަ “މަސްކޮޅަކަށް” އޭތި ބަދަލުވެގެންދެއެވެ.ޒައިގޯޓް، އޭތީގެ ހެދިބޮޑުވުމުގެ ދައުރު ބޭކާރުގޮތުގައި ވޭތިއެއްނުކޮށްލައެވެ. ނަރުވައިތަކެއްގެ އެހީގައި ބިމުގެތެރެއަށް ފެތުރޭ ގަހެއްގެ މޫތަކެއް ފަދައިން މި ޒައިގޯޓްގެ ބައިތައް ރަޙިމުގެ ތެރެއަށް ވަދެގެންދެއެވެ.މިގުޅުމާއެކު، ހެދިބޮޑުވުމަށް ބޭނުންވާ މާއްދާތައް މައިމީހާގެ ހަށިގަނޑުން ޒައިގޯޓަށްލިބެންފަށައެވެ.ހަށިގަނޑުގެ އެތެރޭގައި ކަންތައްތައް ހިނގަމުންދާގޮތް ރަނގަޅަށް އެނގިގެން މެނުވީ މިފަދަ ކަމެއްގެ ތަފްސީލު އެނގުމަކީ ނުވާނެކަމެއްކަން ކަށަވަރެވެ. ކަށަވަރުވާ ކަމަކީ މީގެ ސާދަ ޤަރުނުކުރިން، މިފަދަ މަޢުލޫމާތު އެނގޭ ހަމަ އެންމެ އިންސާނަކުވެސް ނުހުންނާނެކަމެވެ. މާތްﷲ، ކީރިތި ޤުރުއާނުގައި، ރަޙިމުގެ ތެރޭގައި ހެދިބޮޑުވަމުން އަންނަ ޒައިގޯޓް އަށް ނިސްބަތްކޮށްފައިވަނީ ‘ގަނޑުލޭކޮޅެއް’ ގެ ނަމުންނެވެ.ޢަރަބިބަހުގައި “ގަނޑުލޭކޮޅެއް” ގެ މާނައަކީ “ކޮންމެވެސް ތަނެއްގައި ވަކި ހިއްޕައިގެން ނުވަތަ އެލިގެން އިންނަ އެއްޗެއް” ކެވެ. މަޖާޒީގޮތުން މިބަސް، ހަށިގަނޑުގައި ހިއްޕާލައިގެން އިނދެ ހަށިގަނޑުން ލޭބޯ ސޫތްޕެއްކަމަށްވާ ލީޗް އަށް ނިސްބަތްކޮށް ބުނެއުޅެއެވެ. މައިމީހާގެ ރަޙިމުގެ ތެރޭގައި ހިއްޕައިލައިގެން އިނދެ، ރަޙިމުގެ ފާރުތަކުން ތަފާތު މާއްދާތައް ބޮމުން، ބޭނުންކުރަމުން ގެންދާ ޒައިގޯޓް އަށް ނިސްބަތްކޮށް ބޭނުންކުރެވޭނެ މިއަށްވުރެ ވަކި ރަނގަޅު ބަހެއް އޮންނާނެތޯއެވެ؟ޒައިގޯޓް އާއި ބެހޭގޮތުން އިތުރު އެތައް ވާހަކަތަކެއް ކީރިތި ޤުރުއާނުގައި އައިސްފައިވެއެވެ. ވަރަށް ފުރިހަމަކޮށް ރަޙިމުގެ ތެރޭގައި ހިއްޕައިލައިގެން އިނދެ ޒައިގޯޓް ހެދި ބޮޑުވާން ފަށައެވެ. މިކަންތައްތައް މިގޮތަށް ހިނގަމުންދާއިރު، މައިމީހާގެ ރަޙިމުގެ ތެރޭގައި ޒައިގޯޓްގެ ވަށައިގެން ވަނީ ޚާއްޞަ ދިޔައެއް ޖަމާވެފައެވެ. އާދެ، “އެމްނިއޯން ދިޔަ” އެވެ. މިދިޔައިގެ އެންމެ މުހިއްމު ބޭނުމަކީ އޭގެތެރޭގައި އޮވެގެން ދަރިފުޅު ހެދި ބޮޑުވަމުންދާއިރު ބޭރުން މައިމީހާގެ ބަނޑަށް ލިބޭ އެކިއެކި ލޮޅުންތަކުން ދަރިފުޅު ސަލާމަތްކޮށް ރައްކާތެރިކުރުމެވެ. ކީރިތި ޤުރުއާނުގައި މިކަންތައްތަކުގެ ވާހަކަ އައިސްފައިވަނީ އަންނަނިވި ގޮތަށެވެ. “ދެރަވެގެންވާ ފެނަކުން ތިމަންރަސްކަލާނގެ ތިޔަބައިމީހުން ނަހައްދަވަން ހެއްޔެވެ؟ ފަހެ ރައްކާތެރިވެގެންވާ ތަނެއްގައި، ތިމަންރަސްކަލާނގެ އެފެން ލެއްވީމެވެ.” (ސޫރަތުލްމުރްސަލާތި: 20، 21)އާދަމުގެ ދަރިޔާގެ އުފެދުމާއި ބެހޭގޮތުން ކީރިތި ޤުރުއާނުގައިވާ ހުރިހާ މަޢުލޫމާތެއް ހެކިދެނީ، އެޤުރުއާން ބާވައިލައްވައިފައިވަނީ، މިކަންތައްތަކުގެ ތަފްޞީލް އެންމެ ފުންމިނާއި ހަމަޔަށް ދެނެވޮޑިގެންވާ ފަރާތަކުންކަމެވެ. މިކަންތައްތަކާއި މިޙާލަތްތައް އަހަރެމެންނަށް އަނެއްކާވެސް ކީރިތި ޤުރުއާނަކީ މާތްﷲ ގެ ކަލާމްފުޅު ކަމުގައި ހެކިތައް ދައްކައެވެ. ވަގުތާއި އެކުގައި ޖެލީކޮޅެއްހެން އިން މި ޒައިގޯޓްގެ ސިފަ ބަދަލުވަމުންދެއެވެ. ކުރިން މަޑުމަޑުކޮށް އިން މަސްކޮޅުގެ ތެރޭގައި، ހަށިގަނޑަށް ކޮޅަށް ހުރުމުގެ ބާރު ލިއްބައިދޭ ހަރު ކަށިތައް އުފެދެން ފަށައެވެ. ކުރިން އެއްސިފައެއްގައި ހުރި ދިރޭ ޒައްރާތައް އެކި ކަންތަކަށް ޚާއްޞަވެ އެކި ސިފައަށް ބަދަލުވާން ފަށައެވެ. ބައެއް ދިރޭ ޒައްރާތައް އަލި ދެނެގަންނަން ޚާއްޞަ ލޮލުގެ ދިރޭ ޒައްރާތަކަށް، ބައެއް ދިރޭ ޒައްރާތައް ފިންޏާއި ހޫނު އަދި ތަދު އިޙްސާސްކުރާ ނާރުތަކަކަށް، އަނެއްބައި ދިރޭ ޒައްރާތައް އަޑު އެހުމުގެ ކުޅަދާނަކަން ލިބިފައިވާ ޒައްރާތަކަކަށެވެ. މިގޮތަށް އެކިކަންކަމަށް ޚާއްޞަވާން ޤަޞްދުކުރަނީ މި ދިރޭ ޒައްރާތައް އަމިއްލައަށް ހެއްޔެވެ؟ އިންސާނެއްގެ ހިތަކަށް، ނޫނީ ލޮލަކަށް ބަދަލުވެ، މިއެއްޗެހި ކުރާ އާދަޔާޚިލާފު ޙައިރާންކުރުވަނިވި މަސައްކަތްތައް ކުރަން މި ދިރޭ ޒައްރާތައް ފުރަތަމައިނުންވެސް ޤަޞްދުކުރީ މިތަކެތި އަމިއްލައަށް ހެއްޔެވެ؟ ނުވަތަ ކޮންމެވެސް ފަރާތަކުން މިތަކެތީގެ މަސައްކަތް މިހާ ފުރިހަމައަށް އަދާކުރެވޭގޮތަށް މިތަކެތި ހެއްދެވީ ހެއްޔެވެ؟ ހަމަބުއްދިއާއި ވިސްނުން އަދި އަމިއްލަ ނަފްސުވެސް ބުރަވާނީ އެންމެފަހުން މިބުނެވުނުގޮތް، އެއީ ތެދުކަމުގައެވެ.މިހުރިހާ މަރުޙަލާތަކެއް ކަޑައްތު ކުރުމަށްފަހު، ކުޑަ ދަރިފުޅު މައިމީހާގެ ރަޙިމުގެ ތެރޭގައި އޮވެ އުފެދޭ އުފެދުން ފުރިހަމަކޮށް، ދުނިޔެއަށް އުފަންވެއެވެ. މިހާއިރު އެދަރިފުޅު ވަނީ އެންމެ ދިރޭ ޒައްރާއެއްގެ ގޮތުގައި އޮތް އިރަށްވުރެ 100 މިލިއަން ގުނަ އިތުރަށް ބޮޑުވެ، 6 ބިލިއަން ގުނަ އިތުރަށް ބަރުވެފައެވެ. މިއީ ދިރިހުރުމުގެ ތެރެއަށް އިންސާނާ އެޅި ފުރަތަމަ ފިޔަވަޅުގެ ވާހަކައެވެ. މިއީ އެހެން މަޚްލޫޤެއްގެ ވާހަކައެއް ނޫނެވެ. މިފަދަ ޙައިރާން ކުރުވަނިވި ކަންތައްތަކެއްގެ ނުވަތަ ހެއްދެވި ހެއްދެވުމެއްގެ މަޤްޞަދާއިމެދު ވިސްނުމަށްވުރެ އާދަމުގެ ދަރިޔާއަށް ފަހެ ދެން މުހިއްމުވާނީ ކޮންކަމެއް ހެއްޔެވެ؟މިހުރިހާ ކަމެއް ހިނގަމުންދަނީ ‘އެއެއްޗެއްގެ އަމިއްލަ ޒާތުގައި’ ކަމަށް ގަބޫލުކުރުމީ، ހަމަބުއްދިއާއި ހަމަވިސްނުމާއި ޚިލާފު ކަމެއްކަން ކަށަވަރެވެ. އެއްވެސް އިންސާނަކަށް، އޭނާ އަމިއްލައަށް އުފެދުމުގެ ކުޅަދާނަކަން ލިބިފައެއް ނުވެއެވެ. އަދި ކިއެއްތަ، އެހެން އިންސާނަކު ނޫނީ އެހެން އެއްވެސް މަޚްލޫޤަކު އުފެއްދުމުގެ ކުޅަދާނަކަންވެސް ހަމަ ލިބިގެނެއް ނުވެއެވެ. މިތަނުގައި މިވާހަކަ ދެކެވުނު ހުރިހާ ކަންތައްތަކެއް، ކޮންމެ މަރުޙަލާއެއް، ކޮންމެ ސިކުންތެއް އަދި ކޮންމެ ބަދަލެއް ހެއްދެވީ ހަމަކަށަވަރުން ގަދަކީރިތިވަންތަ ﷲ އެވެ. “ވެލިން ދެން މަނި ތިއްކަކުން ތިޔަބައިމީހުން ހެއްދެވީ ﷲ އެވެ. ދެން ދެޖިންސުގެ މީހުން ކަމުގައި އެކަލާނގެ ތިޔަބައިމީހުން ލެއްވިއެވެ. އަދި އެކަލާނގެ ދެނެވޮޑިގަތުމާ އެކުގައި މެނުވީ އަންހެނަކު މާބަނޑެއް ނުވެއެވެ. އަދި ނުވެސް ވިހާމެއެވެ. އަދި ފޮތެއްގައި ކަނޑައަޅުއްވާފައިވާ ގޮތުން މެނުވީ ޢުމުރު ދިގުމީހެއްގެ ޢުމުރު ދިގުވެގެން ނުދެއެވެ. އަދި އޭނާގެ ޢުމުރު ކުރުވެގެންވެސް ނުމެދޭމެއެވެ. ހަމަކަށަވަރުން އެކަންތަކަކީ ﷲ އަށް ދާދިފަސޭހަކަމެކެވެ.” (ސޫރަތުފާޠިރު: 11)“މަނި ތިއްކަކުން” އުފެދި ފުރިހަމަވި އަހަރެމެން އިންސާނުންގެހަށިގަނޑުގައި އެތަކެއް މިލިއަން ނާޒުކު ބައިތަކެއް ލައްވާފައިވެއެވެ. އަހަރެމެންނަށްއެއެއްޗެހީގެ ޚަބަރެއް ނެތްކަމުގައިވިޔަސް، ދިރިހުރުމަށް ބޭނުންވާ ނާޒުކު އަދިއެހާމެ ފުރިހަމަ އެތަކެއް ނިޒާމްތަކެއް އަހަރެމެންގެ ހަށިގަނޑުގައި ވެއެވެ. މިހުރިހާނިޒާމްތަކެއް ހައްދަވައި ބަރާބަރަށް އޭގެ މަސައްކަތް ހިނގަމުންދާނެގޮތް މެދުވެރިކުރެއްވީ އިންސާނާ ހެއްދެވި ފަރާތެވެ. އިންސާނާގެ ވެރި ރަސްކަލާނގެ އެވެ. ކުޅަދުންވަންތަ މާތްﷲ އެވެ. މިފަދައިން އިންސާނާ ހެއްދެވުމުގެ ބޭނުމަކީ “އޭނާ ވަނީ ހައްދަވާފައި” ކަމާމެދު އިންސާނާ އަމިއްލައަށް ވިސްނުމެވެ. އިންސާނުން ހައްދަވާފައިވަނީ މާތްﷲ އެވެ. އަދި އިންސާނުން ހައްދަވާފައިވާތީ، “(އެއްވެސް ބޭނުމެއްނެތި) އޭނާ ކުރާނެކަމެއް ކުރަން ދޫކޮށްލުމެއް ނެތެވެ.”