ހަނދާނާއި ތާރީޚްގެ ތެރެއިން:
އޭ މޭޖަރ ފިލިޕްސް އެވެ.
ކަލެއަކީ މީގެ ދެތިން އަހަރެއްގެ ކުރިން ، ދޫނި ސޫފާ ސޫފި ތަޖުރިބާ ކުރުމުގެ ނަމުގައި ، ދިވެހި ރާއްޖެއަށް ޒިޔާރަތްކުޅަ މީހަކީމު ނޫން ހެއްޔެވެ. އާއެކެވެ. ފައްކާ އިނގިރޭސި އަކީ މޫ އެވެ. އެދުވަހު ކަލޭ މައްޗަށް ދިވެހިންގެ ހިތްތަކުގައި އިސްތިހްސާނަ ހަމްދަރުދީގެ ޝުޢޫރުތައް، އުފެދިފައިވީ ކަން ކަށަވަރެވެ. ނަމަވެސް، އެންމެ ފަހުން މިދިޔަ އެޕްރީލް މަހުގެތެރޭގައި ، ކަލޭ ދިވެހި ފަސްގަނޑުން ވަކިވެގެން ދިޔައީ، ދިވެހި ގައުމު ދެކެ ލޯބިވާ، ދިވެހި ރައްޔިތުންގެ ހިތްތަކުގައި ކަލޭގެ މައްޗަށް ރުޅިވެރިކަމާ ނަފްރަތުގެ ޝުޢޫރުތައް އުފައްދާ ފައެވެ. ދިވެހި ރާއްޖެ ދެމިއޮތްހާ ދުވަހަކު ކަލޭގެ މައްޗަށް އެބައި މީހުންގެ ހިތްތަކެއް ހެވެއް ނުވާނެ އެވެ.
އޭ މޭޖަރ ފިލިޕްސް އެވެ. މިއަހަރުގެ ޖެނުއަރީ ފުރަތަމަ ތާރީޚުން ފެށިގެން ދެކުނުގެ ތިން އަތޮޅުގައި އުފެދިގެން އުޅޭ ބަޣާވާތްތެރިކަކުގެ ހަގީގީ މުޝްތަޘާރަކީ ކަލޭ ނޫން ހެއްޔެވެ. ޖެނުއަރި 2 ވަނަ ދުވަހު އައްޑު އަތޮޅު ގަމުގައި ހުންނަ އިނގިރޭސި ދައުލަތުގެލިއެސަން އޮފިސަރުގެ އޮފީހުގައި ދިވެހި ގައުމުގައި ދުވަހަކުވެސް އުފެދުނު އެންމެ ބޮޑު ބަޣާވާތްތެރިޔާ އަށް، ދިވެހި ފަސްގަނޑުގެ ތެރެއިން އަލުން ގައުމެއް އުފެއްދުން ރަގަޅުގަމުގައި އިރުޝާދުދިނީވެސް ހަމަކަލެއެވެ.
އެދުވަހު ކަލޭދެއްކި ވާހަކަތައް އަދިވެސް އަހަރެންގެ ކަންފަތަށް އިވޭ ކަހަލަ އެވެ!. ދިވެހި ދައުލަތާއި އިނގިރޭސި ދައުލަތާއި ދެމެދުގައި ކުރެވިފައިވާ ވަޢުދު ހަނދާން ކުރުމާވެސް އެކު ކަލޭ ބުނީ ކީކޭ ކަމަށް ހެއްޔެވެ؟"..... އަހަރެމެންވަނީ ، ދިވެހި ރާއްޖޭގެ ދާޚިލިއްޔަތާއި ނުބެހުމަށް ވަޢުދުވެ ފައެވެ. އެކަމުގެ ސަބަބުން ރާއްޖޭގެ ދާޚިލިއްޔަތުގެ ތެރެއަކަށް އިނގިރޭސި ދަޢުލަތަކަށް ނުދެވޭނެ އެވެ. ނަމަވެސް އަހަރެމެން މިތިބީ ވަރަށްވެސް ހިމަހިމަ ލޯވަޅަކުން އެދެމެދަށް ވަދެވޭނެގޮތް ހޯއްދައިގެންނެވެ. އެލޯވަޅުން ވަދެގެން އެއްފަރާތުން އަނެއް ފަރާތަށް ދިއުމަށްޓަކައި އުނަގަނޑާހަމަޔަށް ތެމެން ޖެހެޔޭ " ބުނި ހަނދާން ކަލޭ އެބަހުރި ހެއްޔެވެ؟
އައްޑު އަތޮޅުގެ ފަސްހާސް ރައްޔިތުން ސަރުކާރެއް އުފައްދަން މަދުކަމަށާއި ފޯއްމުލަކާއި ހުވަދު އަތޮޅުގެ ރައްޔިތުން ވެސް އެބަޔަށް އަބުރާލުމަށް އަބުދުﷲ އަފީފަށް ވިސްނައި ދިނީވެސް ހަމަކަލެއެވެ. "މިކަންކަމުގައި" ތިމަންމެންނަށް " ވެވެން އޮތް ކޮންމެ އެހީއެއް ވެދޭނޭ: ކަމުގެ ޔަގީންކަން އަފީފަށް ދިނީވެސް ހަމަ ކަލޭނޫން ހެއްޔެވެ؟ އާއެކެވެ. އައްޑުއަތޮޅު ކަމުގައި އިނގިރޭސި ދައުލަތުގެ ފަރާތުން ހަދަމުން ގެންދާ މަތިންދާ ބޯޓް ތިރިކުރާތަން ހެދުމުގެ މަސައްކަތް ފަހި ކުރުމަށްޓަކައި ދިވެހި ދައުލަތުގެ ލިއެސަން އޮފީސް ތަޅާލާ އަތޮޅުގެ އަންދާލުމުގެ ހުރިހާ ވިސްނުންތަކެއް ފުރޭނިގެން އައި ފުރަތަމަ ސިކުނިޑީއަކީ ހަމަކަލޭގެ ސިކުނޑި ނޫން ހެއްޔެވެ؟
އާއެކެވެ. ޒަމާންތަކެއް ފާއިތުވެ ދިއުމަކުން ކަލޭ ތިޔަކުރި ކަންތައްތަކަކީ ދިވެހި ތާރީޚުން ފިލައިގެންދާނޭ ކަންތައްތަކެއް ނޫނެވެ. އޭ މޭޖަރ ފިލިޕްސް އެވެ. ދިވެހި ދައުލަތުގެ އެއްވެސް ހުއްދައެއްނެތި ، އައްޑި އަތޮޅު ގަމުން، ރުއްތަކާއި ގަސްތައް ކަޑައި ގެތައް ބަދަލުކުރަމުން ފެންދިޔައިރު، އެކަންތައްތައް ކުރަމުން ތިޔަގެންދަނީ ކޮންފަރާތެއްގެ އަމުރަކަށްތޯ ކަލޭ ކުރެން ސުވާލު ވެވުނު ހިނދު އަހުރެން ހިތުން ކަލޭ ދިން ޖަވާބު އަދިވެސް ކަލޭ ހަނދާން ހުންނާނެ އެވެ.
އާއެކެވެ. މިހާރު މިވީގޮތުން " އަމުރު ހޯދާނޭ ފަރާތެއް ދެން ނެތީ ނޫން ހޭ" ކަލޭ ބުނިއިރު އައްޑު އަތޮޅު ގަމަކީ ދިވެހި ރާއްޖޭގެ ފަސްގަނޑުގައި، އޮތް ރަށެއްކަމާއި ރާއްޖޭގައި ގާއިމް ވެގެންވާ ސަރުކާރެއް އޮތްކަން ކަލޭ ހަދާން ނެތުމަކީ ހިތާމަހުރި ކަމެކެވެ! ކޮޅުބުގައި ހުންނަވާ ދިވެހި ދައުލަތުގެ ރެޕްރެޒެންޓެޓިވްއޮފީހުގައި އެދި ވަޑައިގަންނަވައިގެން ، ޔޫ،ކޭ ހައި ކޮމިޝަނަރގެ އޮފީހުން ލަފާދެއްވުމާއެކު، އައްޑު އަތޮޅުގ ގަމުގައި ތިބި ދިވެހި ދައުލަތުގެ ދިވެހި ދައުލަތުގެ ލިއެސަން އޮފީހުގެ އިސްޓާފުން ކޮޅުބަށް ގެނެސް ދިނުމަށް އެންގެވި މެސެޖްގެ ތިރީފޮޅުވަތްތަކުގައި ކަލޭގެ އަމިއްލަ އަތުން ލިޔުނު އިބާރާތްތައްވެސް އަހަރުމެން ލޮލުން ދުށީމެވެ. އެ ފޮޅުވަތްތަކުގެ ފަހަތުން "އަދި ބުއްދިވެރި ގޮތަކީ ލަސްކޮށްލުމޭ" އޮތް އިރު އެވަގުތު ލިއެސަން އޮފީހުގެ މުވައްޒަފުން ތިބީ ހާލު އެންމެ ބޮޑަށް ދަންނާނޭ
ދިވެހި ދައުލަތުގެ ފަރާތުން ރާއްވަވާ ފައިވާ ގޮތުގެ މަތިން ސ އަތޮޅު ގަމުގެ މީހުން ގ އަތޮޅު ކަމަށް ބަދަލުކުރެއްވުމުގެ ބަދަލުގައި ސ އަތޮޅު ވިލިގިއްޔަށް އެބައި މީހުން ބަދަލުކުރައްވަން ސަރުކާރުން ގަސްތުކުރައްވާނަމަ، އެކަމުގެ ސަބަބުން ގަމުގެ ރައްޔިތުންނަށް ކިހާ ފައިދާ ވީސްހޭ ކިޔައިގެން ކަލެއާއި ޢަފީފުއާއި ދެމީހުން ޚިޔާލު ފާޅުކުރިއިރު އެކަމުގެ ސަބަބުން އާއްމު ރައްޔިތުންގެ ހިތްތަކަށް ކުރާނޭ ވިހަ އަސަރުތައް ކަލޭ ހަދާން ނެތިކޮށްލިކަމީ ވެސް، މަލާމާތް ރައްދުވާވެރުގެ ކަމެކެވެ! އޭ މޭޖަރ ފިލިޕްސް އެވެ! ފެނިހުރިގޮތުން މިހުރިހާކަމެއް އިގިލި ދިއްކުރަނީ ހަމަ އެންމެ ދިމާއަކަށެވެ. ކަލެއަކީ ދެކުނުގެ 3 އަތޮޅުގައި ފެތުރިގެން އުޅޭ ބަޣާވާތްތެރިކަމުގެ ޙަގީގީ މުޝްތަޘާރުކަމެވެ. ފަހެ އެހެން ނޫން ހެއްޔެވެ؟ ނޫން ނަމަ ގަމު މީހުން ، ގަމު ކަތީބު ދޮންރަހާގެ ގެވައްޓާލަން އުޅޭކަމުގެ ނިޝާންތަކެއް ކަލެއަށް ލިބިގެން ރޭގަނޑެއްގެ މެންދަމު އެލް ސީ އެމް އަކަށް އަރައިގެން ހިތަދޫ އަކަށް ދާކަށް ނުޖެހުނީހެވެ. އެންމެ ފަހުން އެރޭވެސް ޢަފީފު ގޮވައިގެން ކަލޭގަމަށް ގޮސް އާރު، އޭ . އެފް ގެ ފުލުހުން އިންތިޒާމެއްގެ މަތިން ރުކުރުވިގެން ތިބީ ވެސް ހަމަ ކަލޭގެ ކަލޭގެ މަސައްކަތުން ނޫން ހެއްޔެވެ؟
Comments