މިނިވަން ކެންޑިޑޭޓުންނަކީ ކޮބާ؟
ރައްޔިތުންގެ މަޖިލީހުގެ އިންތިޚާބު ކުޑަތަންވަމުން އަންނައިރު، އިންތިޚާބު ކުރެވޭ 77 ގޮނޑިއަށް ވާދަކުރާ ކެންޑިޑޭޓުންގެ އަދަދުވެސް އަންނަނީ ގިނަވަމުންނެވެ. ލަފާ ކުރެވޭ ގޮތުގައި އެވްރެޖްކޮށް ކޮންމެ ގޮނޑިއަކަށް އެންމެ މަދުވެގެން 5 ކެންޑިޑޭޓުން ވާދަކުރާނެއެވެ. އެހެންވެއްޖެނަމަ މި އިންތިޚާބުގައި ގާތްގަނޑަކަށް 385 ކެންޑިޑޭޓުން ވާދަ ކުރައްވާނެއެވެ. މިއީ މިހާތަނަށް މިރާއްޖޭގައި ބޭއްވޭ އެންމެ ވާދަވެރިކަން ބޮޑު، އަދި އެންމެ ގިނަ ބަޔަކު ވާދަކުރާ އިންތިޚާބަށް ވެގެންދާނެކަން ޔަޤީނެވެ.
މިހާރު ދިވެހިރާއްޖެއަކީވެސް ފުރިހަމައަށް ޕާޓީ ސިސްޓަމް ތަޢާރަފްވެ، ޕާޓީ ސިސްޓަމަށް ރިޔާސީ ވެރިކަމެއް ހިންގާ ޤައުމެކެވެ. މީގެ ކުރީން އަބަދުވެސް ދިވެހިން ދައްކަމުން ގެންދިޔައީ ޕާޓީ ނިޒާމުގެ މުހިއްމުކަމާއި، ޕާޓީ ނިޒާމަކީ ޑިމޮކްރަސީގެ އަސާސްކަމުގައެވެ. އެހެންނަމަވެސް މަޖިލީހުގެ އިންތިޚާބު ބޯމަތިވަމުން އަންނައިރު މިފެންނަނީ މުޅިން އެހެން މަންޒަރެކެވެ. އެއީ ޕާޓީ ޓިކެޓްގެ ބަދަލުގައި 'މިނިވަން ކެންޑިޑޭޓު' ގެ ގޮތުގައި ބަޔަކު ނިކުމެ ވާދަކުރާ މަންޒަރެވެ.
މިނިވަން ކެންޑިޑޭޓުންނަކީ ދުނިޔޭގެ ޕާޓީ ނިޒާމް ހިންގާ ޤައުމުތަކުގައި ވަރަށް މަދުން ފެންނަ ބަޔެކެވެ. މިފަދަ ޤައުމުތަކުގައި ގިނަ ފަހަރަށް މިނިވަން ކެންޑިޑޭޓުންނަކީ އެޤައުމުތަކުގެ ބޮޑެތި މަހުޖަނުންނެވެ. އެއީ އެއްވެސް ޕާޓީއެއްގެ ނުވަތަ ފަރާތެއްގެ އެހީއެއްނެތި، އަމިއްލަ ޖީބުން ޚަރަދުކޮށްލައިގެން މަޖިލީހުގެ ގޮނޑިއެއް ކަށަވަރު ކުރެވޭނެވަރުގެ މާލީ ތަނަވަސްކަން ލިބިފައިތިބޭ، ރައްޔިތުންގެ މެދުގައި މަޤްބޫލް މީހުންނެވެ.
އެހެނަސް މިރާއްޖެއިން މިފެންނަ މިނިވަން ކެންޑިޑޭޓުންނަކީ ދުނިޔޭގެ އެހެން އެއްވެސް ޤައުމަކުން ނުފެންނަ ޒާތުގެ އައުދަޔާ ޚިލާފު މިނިވަންކަމެއް ލިބިފައިވާ ކެންޑިޑޭޓުންނެވެ. ހަޤީޤަތުގައި މިފަހަރުގެ އިންތިޚާބުގައި ވާދަކުރާ ކެންޑިޑޭޓުންގެ ތެރެއިން މިނިވަން ކެންޑިޑޭޓުން ނުވަތަ އެއްވެސް ޕާޓީއެއްގެ އެންޑޯޒްމަންޓެއްނެތް ހުރިހާ ކެންޑިޑޭޓުން ބޮއިކޮޓް ކުރަންވީއެވެ. އެކަމުގެ ފަހަތުގައި އޮތް ސަބަބުތައް ބައިވަރެވެ.
އެންމެ ފުރަތަމަކަމަކަށް މިފަދަ މީހުންނަކީ ޕާޓީއެއްގެ ޓިކެޓް ލިބޭވަރުގެ މަޤްބޫލް ބަޔަކަށް ނުވުމެވެ. ނުވަތަ ޕާޓީއެއްގެ ކަލެކްޓިވްސިޔާސަތުތަކަށް އެއްބަސް ވެވޭފަދަ ވިސްނުމެއް ގެންގުޅޭ މީހަކުކަމުގައިނުވުމެވެ.
ދެން އޮތީ މިފަދަ މީހުން މަޖިލީހަށް ކުރިމަތިލައިގެން ތިބީ، ކުރިމަތީގައި އޮތް ލާރިގަނޑުގެ ބޭނުމުގައިކަމަށްވުމެވެ. ސަބަބަކީ ޕާޓީތަކުގެ ތާއީދާއެކު މަޖިލީހަށް ކުރިމަތިލާ ކެންޑިޑޭޓުން އިޤްރާރެއްގައި ސޮއިކުރަން ޖެހުމާއި، މެމްބަރުކަމުގެ މުއްދަތުގެ ތެރޭގައި ޕާޓީ ބަދަލު ނުކުރެވުމާއި، މިފަދަ ކަންތައްތަކުގެ ސަބަބުން ތިމާއަށް ލިބެން އޮތް ލާރިގަނޑު ނުލިބޭނެތީ، 'މިނިވަން' ޓެގު ޖަހައިގެން މަޖިލީހަށް ވަންނަން ބޭނުންވަނީއެވެ. މިނިވަން ނަމުގައި ތިބޭ މެމްބަރުން އެކިއެކި ކަންކަމުގައި އެތައް ލައްކަ ރުފިޔާއަކަށް އެންމެ ވޯޓެއް ވިއްކާފައި އެބަހުއްޓެވެ. ކޮއިމަލާއަށް މަޢުލޫމާތު ލިބިފައިވާ ގޮތުގައި މިހާތަނަށް ރައްޔިތުންގެ މަޖިލީހުގެ މެމްބަރަކު އެންމެ ބޮޑުއަގުގައި ވޯޓެއް ވިއްކާފައިވަނީ ބުރުމާ ގާސިމުއަށެވެ. އެއީ 2007 ވަނަ އަހަރު 1 މިލިއަން ރުފިޔާއަށް ގާސިމުއަށް ވިއްކި ވޯޓެކެވެ. މިހެންވުމުގެ ސަބަބުން އެއްވެސް ޕާޓީއަކާ ނުގުޅި މިނިވަނުންގެ ގޮތުގައި މަޖިލީހުގައި ތިބޭ މެމްބަރުންނަކީ އަބަދުވެސް ހިތް އުފާވާފަދަ 'އޮފަރ' ތައް ލިބޭނެ މެމްބަރުންނެވެ. އެފަދަ މެމްބަރުންގެ ދިރިއުޅުން އިސާހިތަކު އަރާމުވެ ފަސޭހަވެގެން ހިނގައިދާނެތެވެ.
މިހާރުވެސް މަޖިލީހަށް ކުރިމަތިލާފައިވާ މިނިވަން ކެންޑިޑޭޓުންނަކީ ހަޤީޤަތުގައި 'މިނިވަން' ބައެއްނޫނެވެ. އެއީ ކޮންމެވެސް ޕާޓީއެއްގެ ނުވަތަ ނުފޫޒުގަދަ މީހެއްގެ އެހީތެރިކަމާއެކު މަޖިލީހަށް ކުރިމަތިލައިގެން އުޅޭ މީހުންނެވެ. އަދި މިނިވަނުންގެ ނަމުގައި އުޅޭ އަނެއްބައި މީހުންނަކީ އެކި ޕާޓީތަކުގެ ޕްރައިމަރީޒްތަކުން ފެއިލްވެފައި ތިބި މީހުންނެވެ. މިފަދަ ކެންޑިޑޭޓުންނަކީ އެއްވެސް ހާލެއްގައި މިނިވަން ބައެއްނޫނެވެ. އެމީހުންނަކީ އެމީހުންގެ އަމިއްލަ ނަފްސާއި، ރައްޔިތުން އެމީހުންނަށް ކުރި އިޙްތިރާމާއި އިތުބާރު، ވިއްކާލަން ތައްޔާރަށް ތިބި މީހުންނެވެ.
Comments