ފިނިއަށިން
މިހާރުމިއޮތް ސަރުކާރުގެ ހިއްސާދާރުން އިހަވަންދޫގައި ވަރަށް ގިނަވާނެކަމަށް ގަބޫލުކުރެވެއެވެ. އިހަވަންދޫގެ ރައްޔިތުންނަކީ ވަރަށްކުރީންވެސް ބަދަލަކަށް ބޭނުންވެފައި ތިބި ބައެކެވެ. މިހާރުގެ ރައީސުލް ޖުމުހޫރިއްޔާ މުހަންމަދު ނަޝީދުވަނީ ، އެމަނިކުފާނުން ވެރިކަމާ ހަވާލުވެ އިހަވަންދޫއަށް ކުރެއްވި ފުރަތަމަ ދަތުރުފުޅުގައި މިމޭރުމުން ވާހަކަފުޅު ދައްކަވާފައެވެ. އެމަނިކުފާނުން ދިވެހިރާއްޖެ އަށް ފުރިހަމަ ޑިމޮކްރަސީ ގެނައުމަށް ކުރެއްވި މަސައްކަތުގައި، އިހަވަންދޫގެ ރައްޔިތުންގެ ފަރާތުން ވަރަށް ބޮޑު ހިތްވަރެއް ލިބިވަޑައިގެންނެވި ކަމަށް ވިދާޅުވި އެވެ.
އިހަވަންދޫއަކީ ނިމިދިޔަ 30 އަހަރުގެ މައުމޫނުގެ ވެރިކަމުގައި ވަރަށްބޮޑަށް އިހުމާލުކޮށްފައިވާ ރަށެކެވެ. ފާއިތުވި 30 އަހަރުގެ ތެރެއިން 28 އަހަރާ 6 މަސްދުވަސް ވަންދެން މިރަށުގެ ރައްޔިތުން ދިރިއުޅުނީ ފުޅިބައްތި އަލީ ގައެވެ. ފަޅުވަނީ އިންދިރާސް ވެފައެވެ. ދިވެހި އިޤްތިޞާދުގެ ލޭނާރުގައި ބޮޑުހިއްސާއެއް އަދާކުރާ މިރަށުގައި ތިންހާހާ ގާތަށް މީހުން ދިރިއުޅެއެވެ. އެންމެ މިޒަމާނުގެ ފެންވަރަށް ހަދާފައިވާ މަހަށް ފުރާ 20 ގަނޑެތި އޮވެއެވެ. މިއީ 80 ނުވަތަ 90 ރިޔަނުގެ އުޅަނދު ފަހަރެވެ.
2008 ވަނަ އަހަރުގެ އޮކްޓޯބަރުމަހުގެ 29 ވަނަ ދުވަހުގެ އިރު ދިވެހި އުދަރެހުން އުދަވީ ، ބަދަލަކަށް ބޭނުންވިފައިތިބި ދިވެހިން ހިނިތުން ކުރުވަމުންނެވެ. އަނެއް ދިވެހިރާއްޖެއަށް ދެވިއްޖެކަން އިޢުލާން ކުރަމުންނެވެ. ޠާހިރު ދިރިއުޅުމެއް މިރާއްޖޭގެ ކޮންމެ ފަރުދަކަށްވެސް އުޅެވޭނެކަން އަންގަމުންނެވެ. ވަރަށް ފޮނި އުއްމީދުތަކެއް ފެހި ސިގްނަލް ދެމުންނެވެ.
އިހަވަންދޫއަށް އަލިނުވި، މައުމޫނުގެ ދުވަސްވީ ވެރިކަމުގެ ހުޅުކޮޅު ނިވި، އެމް.ޑީ.ޕީގެ އިއްތިހާދަށް ކާމިޔާބު ލިބުމުން މިރަށުގެ ރައްޔިތުން ވަރަށް ފޮނި އުއްމީދުތަކެއް ދަނީ ކުރަމުންނެވެ. އިހަވަންދޫގެ ނުވަދިހަ އިންސައްތަ މީހުން އިއްތިހާދާ ގުޅި، ބަދަލަކަށް ވޯޓް ދިނެވެ. ރައީސް ނަޝީދު ވެރިކަމާ ހަވާލުވެ މިރަށަށް ކުރެއްވި ފުރަތަމަ ދަތުރުފުޅުގައިވަނީ، ރަށުގެ ރައްޔިތުންގެ ވިންދާ ކުޅެލާފައެވެ. ރައްޔިތުން ވަރަށް ހިތްހަމަޖެހޭ ތަގުރީރެއް ދެއްވި އެވެ. މިސަރުކާރު ނަގާކޮންމެ ވިލާގަނޑެއްގެ ފެން އިހަވަންދޫއަށް ވެހޭނެކަމުގައި ވިދާޅުވިއެވެ.
ނަމަވެސް، އިވޭއަޑުތަކާއި ކަންވާގޮތުން ރައްޔިތުން ދަނީ އެމް.ޑީ.ޕީ ދެކެ ފޫހިވަމުންނެވެ. އޭގެތެރެއިން ވަރަށް ހޫނުކޮށް ، ފިނިއަށީގައި ދެކެވުނު ވާހަކަ އެކެވެ. ނަޝީދުގެ ސަރުކާރުގައި މިނިސްޓަރުންނާއި ، މިނިސްޓަރުންގެ ނައިބުންނާއި، ސްޓޭޓް މިނިސްޓަރުންނާއި، ސްޓޭޓް މިނިސްޓަރުންގެ ނައިބުން މަގާމުތައް ބަހަމުން ދިޔައިރު އިހަވަންދޫގެ މީހަކަށް މަގާމެއް ނުލިބުނު ވާހަކައެވެ. މައުމޫނުގެ ސަރުކާރެކޭ އެއްގޮތަށް މަގާމުތަކާއި ކަންތައްތައް އޮންނާނީ ހޯރަފުއްޓަށާއި ދިއްދޫއަށްކަމަށް މޫސާބޭ ބުނެއެވެ. މޫސާބޭ މިހެންބުނީ، މިދެރަށު މީހުންނަށް މިހާރު ދީފައިވާ މަގާމުތަކަށް އިޝާރާތްކޮށެވެ. އެމް.ޑީ.ޕީ އަށް މަރުދޭ ކުޑޭ ބުންޏެވެ. މިފްކޯގެ ޑިރެކްޓަރުންގެ ބޯޑްގައި ކުންޑަ އަބްދުއްޞަމަދު ގެ މަތީނު ހިމެނެއެވެ. ދެން މިރަށުގައި މަގާމެއް ބޭނުން މީހަކު ނެތެވެ.
ރަށު ކައުންސިލް ހެދުމުގެ ކުރީން ރަށްރަށުގެ ވެރިންގެ މައްޗަށް ސަރުކާރުގެ މަންދޫބުން މިހާރު ހަމަޖައްސަވަމުން އެބަގެންދެއެވެ. އެއީ ބައެއް ކަތީބުން މިހާރު އޮތް ސަރުކާރަށް އެއްބާރުލުން ނުދޭތީއެވެ. ސަރުކާރުގެ މަގްޞަދުތައް ތަންފީޒުކުރަން ދަތިވާތީއެވެ. ނަމަވެސް، އިހަވަންދޫގައި ތިބި ރައްޔިތުން ރުޅިއަރާ ކަތީބުންގެ މައްޗަށް މީހަކު ހަމަޖައްސަން ސަރުކާރުން ބޭނުންވިނަމަވެސް އެކަން ކުރެވޭކަށް ނެތެވެ. އެއީ އެމް.ޑީ.ޕީގެ ބަސްބުނާ މީހުންގެ ލެޔާއި، ކަތީބުންގެ ލޭ ކުޅިފައިވާތީއެވެ. ވެރިންގެ މައްޗަށް މީހަކު ހަމަޖެއްސުމުން ކުރިއަށް އޮތް އިންތިޚާބު އެމް.ޑީ.ޕީގެ ކެންޑިޑޭޓަށް ގެއްލިދާނެތީއެވެ. ވީމާ، މިދަނޑިވަޅުގައި އެއްމެން ރުއްސަން ޖެހެއެވެ. ފަހުންވާނެގޮތެއް ނޭގެއެވެ.
Comments