ކޭޑީއާއި ސުޢޫދު އެމްޑީޕީން އިސްތިއުފާ ދެއްވުމަށް ނިންމަވައި، އަސްލަމްގެ
އިސްތިއުފާގެ އަޑުތަކެއް ފެތުރިއްޖެ- އިބްރާހިމް ވަހީދް (އަސްވާޑް، ހާމަޑެއިލީ
ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ)ގެ އިސްމަޤާމްތައް ފުއްވަމުންއައި އައްޑުއަތޮޅަށް ނިސްބަތްވާ މެމްބަރުން އެޕާޓީން އިސްތިއުފާ ދިނުމަށް ނިންމައިފިކަން މިނޫހަށް ކަށަވަރުވެއްޖެއެވެ. މިގޮތުން އެމްޑީޕީ ރައްޔިތުންގެ ޚާއްސަ މަޖިލީހުގެ މެމްބަރު ހުސްނުއް ސުއޫދު އަދި ގައުމީ މަޖިލީހުގެ މެމްބަރު އިބްރާހިމް ދީދީ (ކޭޑީ)ވަނީ އެމްޑީޕީން އިސްތިއުފާ ދެއްވުމަށް ސިޓީވެސް ފޮނުއްވާފައިކަން މިނޫހަށް ކަށަވަރުކޮށްދެއްވާފައެވެ. އަނެއްކޮޅުން އެމްޑީޕީ ރައްޔިތުންގެ މަޖިލީހުގެ މެމްބަރު މުހައްމަދު އަސްލަމްވެސް އިސްތިއުފާ ދެއްވަން އުޅުއްވާކަމަށް މުއުތަބަރު ފަރާތަކުން މިނޫހަށްވަނީ މައުލޫމާތުލިބިފައެވެ. ނަމަވެސް ނޫސް ޗާޕަށް ދިޔައިރު ކުރެވުނު މަސައްކަތުން އަސްލަމްއާއި ގުޅޭގޮތް ނުވެގެން އެކަންވަނީ ކަށަވަރުވާގޮތް ނުވެފައެވެ. އަސްލަމް އެމްޑީޕީން އިސްތިއުފާ ދެއްވައިފިނަމަ، އައްޑުއަތޮޅު ދާއިރާގައި އެމްޑީޕީގެ އެންމެ ގޮނޑިއެއްވެސް ނުހުންނާނެއެވެ. ސުޢޫދު އިސްތިއުފާ ދެއްވުން:ހުސްނުއް ސުޢޫދަކީ އެމްޑީޕީ އުފެއްދުމަށް ސޮއިކުރި 42 މީހުންގެ ތެރޭގައި ހިމެނޭ އެކަކެވެ. ސުއޫދު ވިދާޅުވާގޮތުގައި "އެމްޑީޕީ" އެނަން ދިނީވެސް އޭނާގެ ލަފާގެ މަތިން ކަމަށެވެ. އެމްޑީޕީ އުފެއްދުމުގައްޔާއި އުފެއްދުމަށްފަހު ޕާޓީއަށް ވަރަށް އަގުހުރި މަސައްކަތްތަކެއް ސުއޫދުވަނީ ކޮށްދެއްވާފައެވެ. މިނޫހުގެ ފަރާތުން ސުއޫދު އިސްތިއުފާ ދެއްވި ސަބަބު ހޯދާލުމަށް ގުޅާލުމުން ވިދާޅުވީ، އިސްތިއުފާ ދެއްވީ، އެއްވެސް މީހެއްގެ ނުފޫޒެއް އޭނާގެ މައްޗަށް އޮވެގެނެއް ނޫންކަމަށެވެ. ނަމަވެސް ރާއްޖޭގެ ގޤާނޫންތަކާއި މިނިވަން މުއައްސަސާތައް ހެދެމުން އަންނަ ދަނޑިވަޅެއްގައި ސިޔާސީ ޕާޓީއެއްގައި ހުރެގެން ޤާނޫނީ ލަފާ ދިނުމަށް ހުރަސްއެޅޭތީ އެމްޑީޕީން އިސްތިއުފާ ދެއްވީ ކަމަށެވެ. "ލީގަލް ޕްރެކްޓިސްއަށް ސިޔާސީ ޕާޓީއެއްގައި ހުރެގެން މަސައްކަތްކުރާއިރު މިހާރު ހުރަސްއެޅޭތީ އިސްތިއުފާ މިދެނީ. އެއްވެސް ބަޔަކާއި އަޅުގަނޑާއި މައްސަލައެއް ނެތް. އިއްޔެއޮތް ޑީއާރްޕީގެ ނިއުސް ކޮންފަރެންސްގައި އެބޭފުޅުންވެސް އެދެއްކެވީ ކޮންމެވެސް ވަރަކަށް ރަނގަޅު ވާހަކައެއް. ސިޔާސީ ޕާޓީއެއްގައި އަޅުގަނޑު ހުރެ މިނިވަން މުއައްސަސާއަކަށް (ސިވިލް ސާވިސް ކޮމިޝަނަށް) އަޅުގަނޑުމެންގެ ލޯފާމުން ލަފާދިނުން ކޮންމެވެސްވަރެއްގެ މައްސަލަތަކެއް ދިމާވޭ. އެހެންވިޔަސް އަޅުގަނޑެއްނޫން ކޮމިޝަނަށް ލަފާ އަރުވަނީކީއެއް. އަޅުގަނޑުމެންގެ ލޯފާމުން. ލޯފާމުގައިވެސް މިކަމާ މަޝްވަރާކުރެވުނު. އަޅުގަނޑު އެކަނި ސިޔާސީ ޕާޓީއެއްގަ މިހާރު ހުރީ. ދެން އަޅުގަނޑު ވަކިވީމަ އެކަންވެސް އެނިމުނީތާ" އިސްތިއުފާދެއްވި ސަބަބު "ހާމަ" ނޫހަށް ވިދާޅުވެދެއްވަމުން ސުއޫދު ވިދާޅުވިއެވެ. މީގެއިތުރުން އެމް.ޑީ.ޕީގަ ހުރެގެން ސުއޫދުގެ ކްލައިންޓުންނަށް ދެއްވާ ލަފަޔާ އިރުޝާދު ގަބޫލުކުރަން ފަސޭހަވެސް ނުވާތީކަމަށް ވިދާޅުވިއެވެ.ސުއޫދުގެ އިސްތިއުފާއާއި، ޑރ.މުހައްމަދު މުނައްވަރު ރިޔާސީ ކެންޑިޑޭޓަށް ނުހޮވުމާއި އެއްވެސް ގުޅުމެއް އޮތްތޯ ސުވާލުކުރުމުން ވިދާޅުވީ، އެކަމާއި އެއްވެސް ގުޅުމެއް ނެތްކަމަށެވެ. މުނައްވަރަށް ކެމްޕެއިން ކުރުމުގައިވެސް ހަރަކާތްތެރި ނުވާކަމަށާއި އިސްތިއުފާ ދެއްވި ސަބަބުތަކުގެ ތެރޭގައިވެސް އެކަން ނުހިމެނޭކަމަށް ސުޢޫދު ވިދާޅުވިއެވެ. ރައްޔިތުންގެ ޚާއްސަ މަޖިލީހުގެ ޖަލްސާގައި އިންނަވައި މިނޫހަށް މައުލޫމާތު ދެއްވަމުން ސުއޫދް ވިދާޅުވީ "މަޖިލީސް ނިންމާފައި ޕާޓީ އޮފީހަށް ސިޓީ ފޮނުވާލާނަން" ކަމަށެވެ.ޕާޓީގެ އެތެރޭގެ ޑިމޮކްރަސީއާއި ދޭތެރޭ ސުވާލުކުރިމަތިކުރުމުން އެކަމަށް އެއްވެސް ޖަވާބެއް ސުއޫދުވަނީ ނުދެއްވާފައެވެ.ކޭޑީ އިސްތިއުފާ ދެއްވުން:އިބްރާހިމް ދީދީ (ކޭޑީ) އަކީވެސް އައްޑުއަތޮޅަށް އުފަން ބޭފުޅެކެވެ. އެމްޑީޕީ އުފެއްދުމުގައި ހިމެނޭ 42 މީހުންގެ ތެރޭގައިވެސް ކޭޑީ ހިމެނެއެވެ. އެމްޑީޕީން އިންތިޒާމްކުރާ މުޒާހަރާތަކާއި އެއްވުންތަކުގައިވެސް ބައިވެރިވެ އެމްޑީޕީގެ ވަރަށް ހަރަކާތްތެރި ބޭފުޅެކެވެ. ޕާޓީގައި ކޭޑީ ފުރުއްވާ މަގާމްތަކުގެތެރޭގައި ގައުމީ މަޖިލިސް މެމްބަރު ކަމަށާއި، ގައުމީ މަޖިލީހުގެ އިދާރީ ކޮމިޓީގެ މެމްބަރު ކަމާއި،މ ހިޔަނި ކެބިނެޓްގެ ސެކެޓްރީކަމުގެ މަގާމު ހިމެނެއެވެ.އިސްތިއުފާއާއި ބެހޭގޮތުން މިނޫހަށް މައުލޫމާތުދެއްވަމުން ކޭޑީ ވިދާޅުވީ "އަޅުގަނޑު އިސްތިއުފާ ދިނީ އެއްވެސް މީހެއްގެ މަޖުބޫރެއް އޮވެގެނެއް ނޫން. އަޅުގަނޑު މިޕާޓީއަށް ވަނީވެސް އެއްވެސް މީހެއްގެ މަޖުބޫރުކަމެއް ނެތި. މިއަދު ޕާޓީން އަޅުގަނޑު އިސްތިއުފާ މިދޭ މައިގަނޑު ސަބަބަކީ އެމްޑީޕީން މިހާރު ދިވެހިރާއްޖޭގެ ރައްޔިތުންނަށާއި ގައުމަށް އެންމެ ފައިދާވާ ގޮތަށް މަސައްކަތްކުރާކަމަށް ގަބޫލުނުކުރެވޭތީ. ދެން އަސާސީ ގަވާއިދާ އެއްގޮތަށް އިދާރީ މަސައްކަތް ހިންގޭކަމަށްވެސް ގަބޫލުނުކުރެވޭތީ." ކަމަށެވެ. ޕާޓީގެ އެތެރޭގެ ޑިމޮކްރަސީއާއި ބެހޭގޮތުން ސުވާލުކޮށްލުމުން ކޭޑީ ވިދާޅުވީ "އެތެރޭގެ ޑިމޮކްރަސީއަށް ޕާޓީގެ އިސްވެރިން ބޯނުލަނބާ. އިހްތިރާމްކުރާމެއް ނުކުރޭ. ނަމަވެސް އަޅުގަނޑު މިދެންނެވި ސަފުގައި ޕާޓީގެ ރައީސް ޑރ. މުހައްމަދު މުނައްވަރު ނުހިމެނޭ. އެބޭފުޅާ ވަރަށް ރަނގަޅު" ކޭޑީ ވިދާޅުވިއެވެ. ޕާޓީގެ ރައީސް މުނައްވަރުގެ ބަސް:އެމްޑީޕީގެ މެމްބަރުކަމުން އެޕާޓީގެ ރައީސް ޑރ. މުހައްމަދު މުނައްވަރުގެ އެއްބަނޑު އެއްބަފާ ކޮއްކޮ ހުސްނުއް ސުއޫދާއި ރިޔާސީ ޕްރައިމަރީޒްގައި މުނައްވަރަށް ތާއީދުކުރެއްވި ކޭޑީ އިސްތިއުފާ ދެއްވީ މުނައްވަރުގެ ލަފާގެ މަތިންތޯ ބެލުމަށް ގުޅާލުމުން މުނައްވަރު ވިދާޅުވީ ޕާޓީން ކެނޑުމަށް އެބޭފުޅުންގާތު ދަންނަވާފައިނުވާކަމަށެވެ. "އެބޭފުޅުން އިސްތިއުފާ ދެއްވިކަމެއްވެސް އަދި އަޅުގަނޑަކަށް ނޭނގޭ. ތިކަހަލަ ވާހަކައެއް އަޅުގަނޑާއި ދައްކާފައެއްވެސް ނެތް. އެއްގޮތަކަށްވެސް ނޭނގެ ކިހިނެއް ހިނގި ކަމެއްކަމެއް ތިއީ. އެބޭފުޅުން އިސްތިއުފާ ދީފިއްޔާ އެއީ ޕާޓީއަށް ލިބޭނެ އުނިކަމެއް. އަޅުގަނޑު ބޭނުންވަނީ ވީހާވެސް ގިނަބަޔަކު މިޕާޓީގައި ތިބެން" މުނައްވަރު ވިދާޅުވިއެވެ. އެމްޑީޕީގެ ރިޔާސީ ޕްރައިމަރީޒް ދިޔައީ އިންސާފްވެރިކޮށް ނޫންކަމަށްބުނެ ވަރަށް ގިނަ އަދަދެއްގެ މެމްބަރުން ގެންދަވަނީ އެމްޑީޕީން އިސްތިއުފާދެއްވަމުންނެވެ. އޭގެތެރޭގައި ހާއްސަކޮށް އައްޑޫ، ފޯއްމުލައް، ހުވަދޫ މީހުން ހިމެނޭކަމަށް މައުލޫމާތުލިބެއެވެ.
Comments