ކެންސަރުގެ ބިރަށް އެންޖެލީނާ ޖޯލީގެ އުރަމައްޗާއި ރަހިމް ނަގަނީ

ކެންސަރު ޖެހުމުގެ ބިރު ބޮޑުވުމާއި އެކު ދުނިޔޭގެ އެންމެ މަޝްހޫރު އެއް ބަތަލާ ކަމަށްވާ އެންޖެލީނާ ޖޯލީގެ އުރަމަތި ނަގައި، އޭނާގެ ރަހުމު ނަގަން ތައްޔާރުވެއްޖެއެވެ.

ޑޮކްޓަރުން ބުނާގޮތުގައި ޖޯލީގެ އުރަމަތި ނެގުމަށް ކުރި އޮޕަރޭޝަން ވަނީ ތިން މަރުހަލާއަކަށް ބަހާލާފައެވެ. އެގޮތުން މިދިޔަ އޭޕްރީލް މަހުގެ 27 ވަނަ ދުވަހު އެ އޮޕަރޭޝަން އެއްކޮށް ނިމާފައިވާ ކަމަށްވެސް ޑޮކްޓަރުން ވަނީ ބުނެފައެވެ.

މިކަމާއި ގުޅިގެން ޑޮކްޓަރުން ވާހަކަ ދައްކާފައިވަނީ، މިދިޔަ ހަފްތާގައި ޖޯލީ ނިއުޔޯކު ޓައިމްސްގައި ލިޔުނު ލިޔުމެއްގައި އޭނާގެ އުރަމަތި ނެގުމަށް އޮޕަރޭޝަން ކޮށްފައިވާ ކަން ހާމަ ކުރުމާއި އެކުގައެވެ. ޖީލީ ބުނެފައިވަނީ އޭނާ އުރަމަތި ނެގުމަށް ކުރި އޮޕަރޭޝަނުގެ ފަހުން ކެންސަރު ޖެހުމުގެ ފުރުސަތު 87 އިންސައްތައިން ފަސް އިންސައްތައަށް ދަށްވެފައިވާ ކަމަށެވެ.

"އަހަރެންގެ އޮޕަރޭޝަން ސިއްރެއްގެ ގޮތުގައި ނުބޭއްވުމަށް ނިންމީ، ކެންސަރުގެ ބައްޔަށް މީހުން ހޭލުންތެރި ކުރުވުމަށް. އަހަރެންގެ އެދުމަކީ ހުރިހާ އެންމެންވެސް ޖީން ޓެސްޓް ކުރުން. އަދި ކެންސަރު ޖެހުމުގެ ފުރުސަތު ބޮޑުނަމަ ބައެއްކަހަލަ އުދަނގޫ ކަންތައްތައް ކުރަން ޖެހޭނެ،" ޖީލީގެ ލިޔުމުގައި ބުނެފައި ވެއެވެ.

ދުނިޔޭގެ އެންމެ ރީތި އަންހެނުންގެ ތެރޭގައިވެސް ހިމެނޭ ޖޯލީގެ އުރަމަތި ނެގުމަށް ފަހު، ޕްލާސްޓިކް ސާޖަރީ ހަދައި، އަލުން އުރަމަތި "ރީކޮންސްޓްރަކްޓް" ކުރުމުގެ މަރުހަލާ މިހާރު ވަނީ ފަށާފައެވެ. މީޑިއާ ރިޕޯޓްތައް ބުނާގޮތުގައި ޖޯލީގެ އުރަމަތީގެ ޕްލާސްޓިކް ސާޖަރީ ހަދަނީ، މަޝްހޫރު ޕްލާސްޓިކް ސާޖަން ޑރ. ޖޭ އޮތިންޖާ އެވެ.

ކެލެފޯނިޔާގެ ޕިންކް ލޮޓަސް ބްރެސްޓް ސެންޓަރުގައި ޖޯލީ އުރަމަތި ނަގަން އެންމެ ފުރަތަމަ އޮޕަރޭޝަން ކޮށްފައިވަނީ ފެބްރުއަރީ މަހުގެ ދެ ވަނަ ދުވަހުއެވެ. އަދި ދެވަނަ އޮޕަރޭޝަން ކޮށްފައިވަނީ ފެބްރުއަރީ މަހުގެ 16 ވަނަ ދުވަހުއެވެ.

އުމުރުން 37 އަހަރުގެ ޖޯލީ ރަހިމު ނަގަން ނިންމާފައިވަނީ، ރަހިމުގެ ކެންސަރު ޖެހުމުގެ ފުރުސަތު 50 އިންސައްތައަށް އެރުމާއި ގުޅިގެން ޑޮކްޓަރުންގެ ލަފާގެ މަތިން ނެވެ. ޖޯލީއަށް ކެންސަރު ޖެހުމުގެ ބިރު ބޮޑުވެފައިވަނީ އޭނާގެ އާއިލާއިން ވާރުތަ ކޮށްފައިވާ ޖީން އެއްގެ ސަބަބުންނެވެ. އުމުރުން 56 އަހަރުގައި ޖޯލީގެ މަންމަ އަދި މަޝްހޫރު ބަތަލާ މާޝެލިން ބާޓްރެންޑް 2007 ވަނަ އަހަރު މަރުވެފައިވަނީވެސް އޯވަރީގެ ކެންސަރަށް ފަރުވާ ހޯދަމުން ދަނިކޮށެވެ.

ފިލްމީ އިންޑަސްޓްރީގެ އެންމެ އަގުބޮޑު ބަތަލާއިންގެ ތެރޭގައިވެސް ހިމެނޭ އަދި ފިލްމު އިސްޑަސްޓްރީގެ އެންމެ ޝަރަފުވެރި އެވޯޓު، އޮސްކާ އާއި ގޯލްޑަން ގުލޯބްވެސް ކާމިޔާބު ކޮށްފައިވާ ޖޯލީ ރަހިމު ނަގަން ތައްޔާރުވަމުން ދާއިރު އޭނާގެ ތިން ދަރިން އެބަތިއްބެވެ. މަޝްހޫރު އެކްޓަރު ބްރެޑް ޕިޓާ އެންގޭޖުވުމަށް ފަހު އެ ދެމީހުން އަންނަނީ ކައިވެނި ކުރުމަށް ތައްޔާރުވަމުންނެވެ. އެ ދެމީހުންނަށް ތިން ކުދިން ލިބިފައިވާއިރު، އިތުރު ތިން ކުދިން އެޑޮޕްޓްވެސް ކޮށްފައި ވެއެވެ.