ކައިވެނި ކަނޑައެޅޭގޮތް

ދުރުޒަމަނުގެ އިސްލާމީ ދިވެހި ކާބަފައިންނާއި ހަމައިން، މިހާރު މިހިނގާޖީލުގެ ދޮށީ ޢުމުރުގެ މީހުންނާއި ހަމައަށް ކައިވެނިކުރުމުގައި ބަލަމުންއައި  އާދަތަކެއް ހުއްޓެވެ. އޭގެތެރޭގައި އެޒަމާނުގެ ދިވެހިންގެ އާއްމު ތަޢުލީމާއި ވިސްނުމުގެ ފެންވަރު ހުރިގޮތުން ދިރިއުޅުމުގެ އެތައްކަމެއްގައި ދެރަގޮތްތަކެއް ހުރި ފަދައިން ، ކައިވެނިތައް ބިނާކުރުމުގައިވެސް ގިނަ މީހުންގެ މެދުގައި އެކަންއޮތީ ލޯބީގެ މައްޗަށް ބިނާކުރެވިފައެއް ނޫނެވެ. މަތީ ދަރަޖައިގެ މީހުންގެ ތެރޭގައި ނަސަބުގެ މައްޗަށް އަދި ޢާއިލާގާތްކަމުގެ މައްޗަށް ބެލިއެވެ. މިގޮތުން ކިރިޔާ ކައިވެނި ހެޔޮވާވަރުން ގުޅުވާފައި ހުރެއެވެ. މުދާ އާއިލާގެ ތެރެއިން ބޭރަށް ނުދާގޮތަށްވެސް  ވިސްނާފައި ހުރެއެވެ. މިގޮތުން ލޭނިކަމެތިވެ ޞިއްޙަތުގެއްލިފައިވާ ޢާއިލާތައް ހުރެއެވެ. އަދި އަބުރަށް ގެއްލުން ލިބޭގޮތްވެސް ދިމާވެފައި ހުރެއެވެ.

މިވޭލާއަކާއި ހަމަޔަށް ރަށްފުށުގައި މުދާވެރިކަމަށް ބަލައިގެން ކަމުވޮށިންގެ ކައިވެނިތައް ގިނައިން ކޮށްފާހުރިކަމަށް ފެނެއެވެ. މިގޮތުން ވަލުމުދާވެރިން، ފައިސާވެރިން ވަކިން ބޮޑަށް ފާހަގަ ވެއެވެ. މަސްއޮޑިވެރިންގެ އަންހެން ދަރިންގެ ކައިވެނި އޮޑިދޯނިފަހަރު ރަނގަޅަށް ހިންގޭނޭގޮތަށް ބިނާކޮށްފައި ހުންނަލެއް ގިނައެވެ. މިސާލަކަށް: އަންހެން ދަރިޔަކު ރަގަޅު ޒުވާން ކެޔޮޅަކާއި ދެވާފާނެއެވެ. އަނހެން ކުއްޖާ ނުރުހުނު ކަމުގައިވިޔަސް މައިންބަފައިން މިގޮތަށް ނިންމާފާނެއެވެ.

20 ވަނަ ގަރުނުގެ މެދަކާހަމަޔަށް އައިފަހުން މިގޮތް މަޑުމަޑުން ބަދަލުވަމުން އައެވެ. ދިވެހިންގެ ތެރޭގައި ކައްޗަރުވެފައިވާ މުއްސަނދިލެއާއި ގުޅުވުން، އަދި ތަޢުލީމުގެ މައްޗަށް ވިސްނުމާއިއެކު ޖިންސީ ލޯބި ވަޒަން ކުރަމުން ގެންދެވުނެވެ. ދިވެހިންނަކީ ދުނިޔޭގެ ހުރިހާ ޤައްރާއަކާއި ލޭގެ ގޮތުން ގުޅި މެހި މަސްހުނިވެފައިވާ ބައެއްކަމަށް ބެލެވެއެވެ. 

ކަންމިހެން ހުރުމާއެކު ތަޢުލީމީ ގޮތުން ހޭލުންތެރިވުމާއި ދުނިޔޭގެ ބަވަނަ ފުރާޅުގެ ހިޔާލިބުމާއެކު ވިސްނުންތެރިން މިޙާރު ކައިވެނިތައް ބިނާކުރުމުގައި އަންހެން ކުއްޖެއްގެ ސިފަތައް ބަލަމުން ދަނީ ކުރީގައި ބަލާގޮތަކަށް ނޫނެވެ. އަންހެން ކުއްޖާ އަގުކުރެވޭ މާތް ސިފަތައްތަކަށް ބެލެވެއެވެ. ކާމިޔާބު ޒަވާޖީ ޙަޔާތަކަށް ޓަކައެވެ. އަންހެން ކުއްޖާ ހުންނަން ޖެހޭ މިދެންނެވި ސިފަތަކަކީ ކިމަންތެރިކަމާއި ވަފާތެރިކަމާއި ތެދުވެރިކަމާއި ރުޅިމަޑުކަމާއި އެކުވެރިކަމާއި ކެތްތެރިކަމެވެ. ކުރީގައި މިސިފަތައް ކާބަފައިން މާނަކުރަނީ " ވަޅިރީތީ ތޫނިއްޔާ އަނިބިރީތީ ހެވިއްޔާ" މި މިސާލުބަހުންނެވެ. 

ބާއްޖަވެރި ކައިވެންޏެއްގައި ދެމަފިރިން އެއްބަސްވެވޭ ކަންތައްތައްކެއް ވެއެވެ. އޭގެތެރެއިން ބޮޑު ބައެއް އޮތީ އަނބިމީހާގެ ކިބާގައެވެ. އެއީ: ޞިއްހަތު، ލޯބި، ރީތި، ދަރިންނަށް ތައުލީމާއި ތަރުބިއްޔަތު ދިނުމުގެ ޤާބިލިއްޔަތު، ދީންވެރިކަމާއި އަޚްލާޤް، ތައުލީމް، ގޭތެރޭގެ ދިރުއުޅުން ބެލެހެއްޓުމުގެ ކާބިލިއްޔަތު ، ދަރިންލިބުން އަދި ދަރިން ބޮޑުކުރުމެވެ.

ޝައްކެއް ނެތެވެ. ޤައުމިއްތެއްހުރި ހަރުދަނާދަރީންތަކެއް އުފެއްދޭނީ މިދެންނެވި ސިފަތަކެއް ހުރިހ މައިންގެ އުނގުންނެވެ. ބާއްޖަވެރި ޙަޔާތެއްގައި ދެމިތިބި ދެމަފިރިއެއްގެ ހިޔާވަހިކަމުގެ ތެރޭގައެވެ.