ދުނިޔެއާއި ދިވެހިން ކުރިމަތީ ސިފައިންނާއި ފުލުހުން ބަދުނާމުވީ ރައީސް ވަޙީދުއަށް ޢަމަލު ކުރެއްވުނު ގޮތުން! އެމަނިކުފާނަށް ކަންކަން ކުރެއްވުނީ ޤާނޫނު އަސާސީގައި ބަޔާންކުރާ ވެރިކަމުގެ ނިޒާމާއި ޚިލާފުވާ ގޮތަށް!

ޑރ. ސައުދު

ރާއްޖޭގެ ސިފައިންނާއި ފުލުހުންނަކީ މުޅި މިސަރަޙައްދުގައި އޮތް އެންމެ ހުނަރުވެރި، އެންމެ އެކަށޭނަ ތަމްރީނާއި އެކު ނިސްބަތުން އެންމެ ތަޢުލީމީ އަދި އެންމެ ސިފަވެތި ސަފުތަކެވެ. އެއީ ރައްޔިތުންގެ ލޯތްބާއި އިޙްތިރާމް ލިބިފައިވާ ފައުޖުތަކެކެވެ. ނަމަވެސް ފެބްރުއަރީ 7 ގައި ހިނގައި ދިޔަ ވެރިކަން ބަދަލުވުމުގެ ޙާދިސާއަށް ފަހު ދުނިޔެއާއި ދިވެހިން ރާއްޖޭގެ ސިފައިންނާއި ފުލުހުންނަށް ބަލަމުން އަންނަނީ ޝައްކުގެ ނަޒަރަކުންނެވެ. ނާތަހުޒީބު ފައުޖުތަކެއް ކަމުގައި ބުނެ ތުހުމަތުގެ ނަޒަރަކުންނެވެ. މިކަމުގެ ޒިންމާ އުފުއްލަވަން ޖެހިވަޑައިގަންނަވަނީ ރައީސް ޑރ. ވަޙީދުއެވެ. ކޮންމެ ސަބަބަކާއި ހެދި ނަމަވެސް އެމަނިކުފާނަށް ބައެއް ކަންކަމުގައި ޢަމަލު ކުރެއްވުނު ގޮތުންނެވެ. ގަސްތުގައި ނޫނަސް އެމަނިކުފާނަށް އެޅުއްވިފައިވަނީ ފޫނުބެދޭ ވަރުގެ ކަތި ފިޔަވަޅުތަކެކެވެ. ޤާނޫނު އަސާސީ އާއި ޑިމޮކްރެޓިކް އުޞޫލުތަކާއި، ރާއްޖެ ސޮއިކޮށްފައި ހުރި ބައިންނަލް އަޤްވާމީ މުޢާހިދާތަކާއި، ޤަރާރުތަކާއި ވެސް ފުށުއަރާ ގޮތްގޮތަށެވެ.

ފެބްރުއަރީ 7 ވަނަ ދުވަހު ބޭރުފުށުން ޢާއްމުކޮށް ދިވެހި ރައްޔިތުންނަށް ފެނުނު މަންޒަރަށް ބަލާލާއިރު އޭގައި މާބޮޑު މައްސަލަތަކެއް ނެތްކަމުގައި ގިނަ ބަޔަކު ޤަބޫލުކުރާނެއެވެ. އާއްމުންގެ ލޯމައްޗަށް ފެނިގެން ދިޔައީ އެއްވެސް މަޖުބޫރުކަމެއް ނެތި ރައީސް ނަޝީދު އިސްތިއުފާ ދެއްވި މަންޒަރެވެ. އެއާއި އެކު ދެން ފެނިގެން ދިޔައީ ރައީސް ނަޝީދު އިސްތިއުފާ ދެއްވުމާއި ގުޅިގެން ނާއިބު ރައީސް ޑރ. ވަޙީދަށް އުއްތަމަ ފަނޑިޔާރު ރައީސްކަމުގެ ހުވާ ލައިދެއްވި މަންޒަރެވެ. ވީމާ ހަމައެކަނި މިމަންޒަރަށް ބަލައިފި ނަމަ މީގައި އެއްވެސް މައްސަލައެއް ނެތެވެ. އިންތިޚާބީ ރައީސް އިސްތިއުފާ ދެއްވުމުން އޭނާގެ ނާއިބު ރައީސް ޤާނޫނާއި އެއްގޮތްވާ ގޮތުގެ މަތީން ދައުރުގައި ބާކީ އޮތް މުއްދަތަށް ރައީސް ކަމުގެ މަޤާމާއި ޙަވާލުވެ ވަޑައިގަތީއެވެ. އޭގެ ކުރީގެ މަންޒަރުތަކުގައި ކަން ހިނގި ގޮތުގެ ވާހަކަ މިތާގައި ގެނައުމުގެ ބޭނުމެއް ނެތެވެ.

ނަމަވެސް އޭގެ ފަހުގެ މަންޒަރުތަކުގައި ފެނިގެން ދިޔައީ މުޅި ދުނިޔެ ޙައިރާން ކުރުވާ ފަދަ ކަންކަމެވެ. ބާރުގެ ބޭނުން ކޮށްގެން ސަރުކާރެއް ވައްޓާލާފައި، ވެރިކަމަށް އަރާ ރެބެލް ލީޑަރުން ނުވަތަ ގެރިއްލާ ހަނގުރާމަވެރިން ފަދައިން، ނުވަތަ އިންގިލާބީ ލީޑަރަކު ފަދައިން ޑރ. ވަޙީދު ޢަމަލު ކުރެއްވި މަންޒަރެވެ. އެންމެ ފުރަތަމަ ސަރުކާރުގެ ކެބިނެޓް ނުވަތަ ވަޒީރުން ބަދަލުކުރެއްވީއެވެ. ދެން އެއަށް ފަހު ޔުނިޓީ ގަވަރުމަންޓެއް އިޢުލާނު ކުރެއްވީއެވެ.

ޔުނިޓީ ގަވަރުމަންޓަކީ ޢާއްމު ގޮތެއްގައި، ޤައުމުތަކުގައި ޤާނޫނުގެ ބާރުކެނޑިފައިވާ ޙާލަތުތަކުގައި، ޚިޔާލުތަފާތުވާ ބޮޑެތި ހުރިހާ ސިޔާސީ ޖަމާޢަތްތައް ބައިވެރިކޮށްގެން ޤައުމު ކުރިއަށް ގެންދިއުމަށް ސުލްޙަވެރި ޙައްލެއް ހޯދުމަށް ބޭނުންކުރާ ސިޔާސީ ހަތިޔާރެކެވެ. އެފަދަ ޙާލަތުތަކުގައި ޤާނޫނުގެ ބާރު ކެނޑިފައި އޮންނާތީ، އަލުން ޤާނޫނު އަސާސީއެއް އެކުލަވާ ލުން، ނުވަތަ މާކުރީގެ ޤާނޫނު އަސާސީއަކަށް ދިޔުން (މިސާލަކަށް ރާއްޖޭގެ ނޫ ޤާނޫނު އަސާސީއަށް އަނބުރާ ދިޔުން) ފަދަ ކަންކަންވެސް ޔުނިޓީ ގަވަރުމަންޓަކުން ނިންމި ދާނެއެވެ. ވީމާ، އުޞޫލެއްގެ ގޮތުން މިހާރު މިއޮތީ ޔުނިޓީ ގަވަރުމަންޓެއް ކަމުގައި ރައީސް ވަޙީދު އިޢުލާނު ކުރެއްވުމުން އޭގެ މާނަ ދުނިޔޭގެ ހުރިހާ ޢިލްމުވެރިންވެސް ނަންގަވާނީ، އެހިސާބުން ރާއްޖޭގައި ހިނގަހިނގާ އޮތް ޤާނޫނު އަސާސީއާއި ޤާނޫނުތަކުގެ ބާރު ކެނޑުނީ ކަމުގައި ރައީސް ވަޙީދު ނިންމެވީ ކަމަށެވެ. ވީވެސް އެހެންނެވެ. ޔުނިޓީ ގަވަރުމަންޓަކަށް ވީހިސާބުން ޤާނޫނު އަސާސީގައި ބަޔާން ކުރާ ވެރިކަމުގެ ނިޒާމާއި ޚިލާފު ވެރިކަމެއް ޤާއިމުކުރެވުނީއެވެ. ދައުލަތުގެ 3 ބާރު އެއްވީއެވެ. ދައުލަތުގެ ތިންބާރުގައިވެސް އެއްބަޔަކު ތަކުރާރުވެގެން ހިމެނުނީއެވެ.

ދެން ފެނުނީ އަދި އެންމެ ޚުދުމުޚުތާރު ވެރިން ކުރައްވާ ފަދަ ކަމެއް ކުރެއްވި މަންޒަރެވެ. ރައީސް ނަޝީދުގެ ސަރުކާރު، ރައީސް ވަޙިދުގެ ސަރުކާރަކަށް ބަދަލުވީ، ރަގަޅަށް ނޫން ކަމުގެ ޝަކުވާ އުފުލެން ފެއްޓުމާއިއެކު، އެކަން ތަޙުޤީގު ކުރުމަށްޓަކައި ބޭފުޅުންކޮޅެއް، ރައީސް ވަޙީދު އަމިއްލަ ފުޅަށް ޢައްޔަން ކުރެއްވީއެވެ. މައްސަލައިގެ އެއްކޮޅުގައި، މައްސަލަ ރައްދުވާ ފަރާތަކަށް ހުންނެވީ ރައީސް ވަޙީދުކަމަށް ވާއިރު، މައްސަލަ ތަޙުޤީޤު ކުރާނެ މީހުންނާއި، ޙުކުމް ކުރާނެ ޤާޒީއާއި، ޙުކުމް ކުރާނެ ކޯޓަކާއި، ޙުކުމް ކުރާނެ ދުވަހާއި ގަޑި ވެސް ރައީސް ވަޙީދު އަމިއްލަ ފުޅަށް ހަމަޖެއްސެވުމުން އެއީ ވަރަށްވެސް ދެރަކަމެކެވެ. ދުނިޔެ އެކަމާއި ލަދުވެތިވާނޭ ކަމެކެވެ. ރައީސުލް ޖުމްހޫރިއްޔާއަށް ކަމިޝަންތައް އުފެއްދުމުގެ ބާރު އޮންނާތީ ކޮންމެހެން ރައީސް އަމިއްލަފުޅަށް ކޮމިޝަނަށް މީހުން ޢައްޔަން ކުރެއްވުމުގެ ބަދަލުގައި ހުރިހާ ޕާޓީތަކަށް އެއްބަސް ވެވޭ ފަރާތަކާއި ހަވާލުކުރައްވައިގެން އިންކްއަރީ ކަމިޝަންގެ މެމްބަރުން އެކުލަވާ ލެއްވިޔަސް ހަމަ ފުދޭނެއެވެ. އަދި މައްސަލައިގެ އެއްކޮޅުގައި ހުންނެވީ ޚުދު ރައީސް ވަޙީދުކަމަށް ވުމާއިއެކު އެގޮތަށް އެކަން ކުރެއްވި ނަމަ އިންކްއަރީ ކަމިޝަންގެ މުސްތަޤިއްލު ކަމާއި މެދު އުފެދޭ ސުވާލުތައް ނުއުފެދުނީހެވެ.

އެންމެ ހިތާމަވެރި ކަމަކީ މިގޮތަށް ރައީސް ޑރ. ވަޙީދު ޢަމަލު ކުރެއްވުމުގެ ސަބަބުން، ދިވެހި ރައްޔިތުންނާއި ބައިނަލް އަޤުވާމީ މުޖުތަމަޢު އެމަނިކުފާނުގެ ސަރުކާރުގެ ޞައްޙަކަމާއި މެދު ނުވަތަ ސަރުކާރުގެ ޤާނޫނީ ޙައިޞިއްޔަތާއި މެދު އުފައްދާ ސުވާލުގެ ޖަވާބުގައި ސިފައިންނާއި ފުލުހުންނާއި ދިމާލަށް އިގިލި ދިއްކުރައްވާ ކަމެވެ. އާދެ! 7 ވަނަ ދުވަހު ސިފައިންނާއި ފުލުހުން ކުރިމަތިލާން ޖެހުނު ވާހަކައެވެ. އެހެން ހެއްދެވުމުން ހައްތާވެސް ދުނިޔެއާއި، ދިވެހި ރައްޔިތުންނަށް ހީވަނީ ރާއްޖޭގެ ސިފައިންނާއި ފުލުހުން ބާރުގެ ބޭނުން ކޮށްގެން ވެރިކަން ވައްޓާލީ ކަމަށެވެ. އެހެންވެ ޤަނޫނުގެ ބާރު ކެނޑި ދިއުމުން ކުރިން ދެންނެވި ފަދަ ޚާއްޞަ ޙާލަތުތަކުގައި އުފައްދާ ޔުނިޓީ ގަވަރުމަންޓް އުފައްދަވަން ރައީސް ވަޙީދަށް މަޖުބޫރުވީ ކަމަށެވެ. ބައިނަލް އަޤްވާމީ ދުނިޔޭގެ ޝައްކާއި، ދިވެހިންގެ ނަފްރަތާއި، ރުޅިވެރިކަމުގެ ޝިކާރައަކަށް މިވީ ރާއްޖޭގެ ފަޚުރުވެރި ސިފައިންނާއި ފުލުހުންނެވެ.

މިފުރުޞަތުގައި ބައިނަލް އަގުވާމީ މުޖުތަމަޢުގެ އިތުބާރު ލިބިފަވާ ޒިންމާދާރު ޤައުމަކަށް ރާއްޖެ ހެދުމަށްޓަކައި އިންކްއަރީ ކަމިޝަން މިނިވަން މުސްތަޤިއްލު ކަމިޝަނަކަށް ހެއްދެވުމުގައި އަވަސް ފިޔަޅުތަކެއް އެޅުއްވުމަށް ރައީސް ޑރ. ވަހީދަށް އިލްތިމާސް ދަންނަވަމެވެ.