ބައިވެރިޔާ – ވަޠަންގެ އަންހެން ދަރިޔާއެވެ! އަލުން ތެދުވެ ކުރިއަށް ހިނގާށެވެ! އަލިފާނާ ފެނުގެތެރެއިން ވިޔަސް ކުރިއަރާ މިދިދަ އަލުން ތިބާޔާއެކު ނަޞްރާ ނަޞީބާ ކާމިޔާބުގެ މަންޒިލުގައި އަހަރެމެން އުފުލާލާނަމެވެ!
ޑރ.ސައުދު
މުޖުތަމަޢު ބިނާކުރުމުގެ ބިންގާ އަޅައިދޭ ބަޔަކީ އަންހެނުން ކަމާއި މެދަކު ޝައްކެއް ނެތެވެ. އެހެންކަމުން ވެރިކަމުގެ ފަރާތުން ރައްޔިތުންނަށް އޯގާތެރިވުމުގެ ބޭނުންތެރިކަމުގެ އިޙްޞާސް އެންމެ ބޮޑަށް ހިނގާނީ މިވަޠަންގެ އަންހެން ދަރީންގެ ހިތުތެރޭގައި ކަން ކަށަވަރެވެ. ވީމާ އިތުބާރު ހިފޭ ހެލްތް އިންޝުއަރެންސް ނިޒާމެއްގެ ދަށުން އައިޑީ ކާޑު ހިފައިގެން ދިޔުމުން މަންމައާއި ދަރިފުޅަށް ހިލޭ ބޭސްފަރުވާ ކުރެވުނީމާ؛ އާނ! އަހަރެމެންގެ ޤައުމު އަހަރެމެންނަށް ފުދެޔޭ އެމަންމަ ދަރިފުޅުގާތުގައި ނުބުނާނެތޯއެވެ؟ އެކަނިމާ އެކަނި ދަރިޔަކު ބަލާތީ، ދަރިފުޅު ބެލުމުގެ ޚަރަދު ލިބޭތޯ ޤާޟީ ގާތަށް ދާން ވަކީލަކަށް ދޭނެ ފައިސާ ފޮއްޗެއް ނެތިފައި އިން މަންމަ، އެކަނިވެރި މައިންނަށް ވެރިކަމުގެ ފަރާތުން ދޭ އިނާޔަތުގެ ފައިސާ ގޭގައި އިންދާ ގެއަށް ފޮނުވީމާ؛ އާނ! އަހަރެމެންގެ ޤައުމު އަހަރެމެންނަށް ފުދެޔޭ ދެމައިން ދެމައިންނަށް ނުކިޔާނެތޯއެވެ؟ ވީމާ މިކަންކަން އަލުން ނިގުޅައިގަތުމުގެ ހުއްޖަތެއް ބިނާކުރެވޭތޯ އުޅޭ ވެރިންނާއި ދިމާއަށް " ބާޣީ" އޭ ނޫން އެހެން ގޮތަކަށް ގޮވަން މިވަޠަންގެ އަންހެން ދަރީންގެ ހިތަށް ވަންނާނޭތޯއެވެ؟ މިއީ ޙަޤީޤަތްކަމަށް ވާއިރު ކިތަންމެ ވަރަކަށް ގޮއްމުށުގެ ބާރާއި ފައިސާގެ ނުފޫޒު ބޭނުން ކޮށްގެން މިވަޠަންގެ އަންހެން ދަރިޔާ އަނިޔާވެރިކަމާއި ދެކޮޅަށް އުފުލާ އަޑު ހަމަހިމޭން ކޮށްލަން އުޅުނަސް އެކަން ކުރެވިދާނެތޯއެވެ؟
މިއަދު މިވަނީ ތެދުވެ އަޑު އުފުލަން ޖެހޭ ސަބަބު މެދުވެރިވެފައެވެ. އާދޭހެވެ! ޤާނޫނު އަސާސީއިން ދިވެހި ރައްޔިތުންނަށް ކަށަވަރު ކޮށްދީފައިވާ ޙައްޤުތައް މަޖުލީހުން ހެދި ޤާނޫނުތަކަކާއި، ޤަވާއިދުތައް މެދުވެރިކޮށް އެވަނީ ނިގުޅައިގަނެފައެވެ. އެއްވެ އުޅުމުގެ ޙައްޤެވެ! މިނިވަންކަމާއި އެކު ޚިޔާލުފާޅުކޮށް އަޑު އުފުލުމުގެ ޙައްޤެވެ! ހަމަހަމަކަމާއި އަދުލު އިންސާފު ލިބުމުގެ ޙައްޤެވެ! މިނޫނަސް ޤާނޫނު އަސާސީއިން ލާޒިމުކުރާ ވެރިކަމުގެ ތިންބާރުވަކިވެފައި އޮތުމުގެ ސިފަޔާއި، މިނިވަން މުޢައްޞިސާތަކުގެ މުސްތަޤިއްލުކަމުގެ ސިފަވެސް އެވަނީ 'ޔުނިޓީ ގަވަރުމަންޓަކުން' ނިގުޅައިގަނެފައެވެ. ރައްޔިތުންގެ ވެރިކަން ރައްޔިތުންނަށް އަބުރާ ދިނުމަށް އެމީހުން އިންކާރުކުރެއެވެ.
މިމަކަރުވެރި އަނިޔާވެރިކަމާއި ދެކޮޅަށް މިވަޠަންގެ އަންހެން ދަރީން ތެދުވީމާ އެމީހުންގެ ހިއްވަރާ ކެރުން ބޭއަންދާޒާ ނުކުރައްވާށެވެ! މިޤައުމު ޕޯޗުގީޒުންނާއި ހޮޅީންގެ އަތް ދަށުން މިނިވަން ކުރުމަށްޓަކައި މިވަޠަންގެ އަންހެން ދަރީން ބައިވެރި ނުވޭތޯއެވެ؟ މި ޤައުމު އިގިރޭސީންގެ އަތްދަށުން މިނިވަން ކުރުމަށްޓަކައި މި ވަޠަންގެ އަންހެން ދަރީން ބައިވެރި ނުވޭތޯއެވެ؟ ނޮވެމްބަރު ތިނެއްގެ ހަމަލާއަށް ބަލަން ތިބެފައި ދެން ގައުމަށް އަތުވެދާނެ ހަމަލާއެއް އިހުނަށް ވުރެ ވަރުގަދަވެދާނެ ކަމަށްޓަކައި، ހަތިޔާރާއިއެކު އެތުރި، ލަޝްކަރީންގެ ސަފުތަކުގައި މިވަޠަންގެ އަންހެންދަރީން ބައިވެރި ވެފައި ނެތްތޯއެވެ؟ މި ޤައުމު ތަރައްގީ އާއި ތަހުޒީބުގެ މަގުން ކުރިއަށް ނެރުމަށް ހަމަ ކޮންމެ ރޮނގަކުން މިވަޠަންގެ އަންހެން ދަރީން އިސް ނަގާ ބައިވެރި ނުވޭތޯއެވެ؟ ވީއިރު ރައްޔިތުންގެ ވެރިކަން އަނބުރާ ރައްޔިތުންނަށް ހޯދުމުގެ މަސައްކަތުގައި ވަޠަންގެ އަންހެން ދަރިޔާ ވަރުބަލިވެ ހުއްޓާލަފާނެކަމުގައި ހީފުޅުވޭތޯއެވެ؟
މުގުރު ދިއްކުރައްވަނީ ފަސްޖެހޭނެ ކަމަށްތޯއެވެ! ތިޔަ 'އަނިޔާވެރިޔާ' ވިހެއުމަށް މި ވަޠަންގެ އަންހެން ދަރިޔާގެ ބަނޑުގައި އެޅި ތަދާ، ވޭނާ ގާތްކުރާ ވަރުގެ ތަދެއްވެސް، ވޭނެއްވެސް ތިއިން މުގުރަކުން ޖަހައިގެން އަލަކުން ނުލިބޭނެކަން އެނުކުންނަ ކޮންމެ އަންހެން ދަރިޔަކު ދެނެހުއްޓެވެ. ބިޑި ދިއްކުރަނީ ހައްޔަރު ކުރުމުގެ ބިރު ދައްކަންތޯއެވެ؟ އެކަމަކު ތިޔަ 'އަނިޔާވެރިޔާ' ވިހެއުމަށް ބަނޑުއަޅައި، 9 މަހާއި 10 ދުވަހު ހައްޔަރުގައި އިން މިވަޠަންގެ އަންހެން ދަރިޔާ އަލަކުން ވެދާނެ ހައްޔަރަކާމެދު ފަސްޖެހޭނެތޯއެވެ؟ ފެންޖަހަނީ ތެންމާލަންތޯއެވެ؟ އެކަމަކު ތިޔަ 'އަނިޔާވެރިޔާ' ބަލާބޮޑުކުރުމަށް ވާރެޔާ، ކަނޑާ، ބުރަ މަސައްކަތުން އޮހޮރުނު ދަލުން އެތައް ފަހަރަކު ތެމިފޯވި މިވަޠަންގެ އަންހެން ދަރިޔާ، އަލުން ތެމިދާނެތީ ޖެހިލުންވެދާނެޔޭ ހަމަ ހީވަނީތޯއެވެ؟
ނާ ހަމަހިލާ އެހެނެއް ނުވާނެއެވެ! ވެރިކަމެއް ވައްޓާލާ، ރޫޅާ ރާވާ ހެދިދާނެއެވެ. އެކަމަކު، ދަރި ލިބުނީމާ އެދަރިފުޅުގެ ކުރިމަގަށްޓަކައި ބޮނބި ތަޅާ، ވަލަށްވަދެ ދަރުހޮވާ، އެދަރި ބަލިވެއްޖިއްޔާ ނުމެކައިމެ ނުމެނިދާ، ހަތްހާލީގައި ލައިގެން، ބަލާބޮޑުކޮށް، އެންމެ ފަހުން ވިންސްޓަން ޗާޗިލްއާއި، ރޫޒްވެލްޓާއި، ލޯރެންސް (އޮފް އެރޭބިޔާ) ފަދަ ވަރުގަދަ ޝަޚުޞިއްޔަތުތައް ކިޔެވި ވިލާތުގެ ޔުނިވާސިޓީތަކަށް ފޮނުވައިގެން، އެދަރިފުޅަށް ކުރިއެރުން ހޯދައިދިނުމުގެ ވިސްނުމުގައި ހިންދުމާ ކަނޑުގައި އިން ދިވެހި މަންމަ – ދިވެހި އަންހެން ދަރިޔާގެ އުއްމީދާ ޢަޒުމް، ރޫޅާ ރާވާ ނުހެދޭނެ އިގޭތޯއެވެ؟ އުއްޑުން ވައްޓާލެވިފައި އެއޮތީ މިވަޠަންގެ ހިތްވަރުގަދަ އަންހެން ދަރިއެކެވެ. ދިވެހި ޤައުމުގެ ދިރުމާއި ކުރިއެރުމުގެ ހަމަހަމަ ބައިވެރިއެކެވެ...
ބައިވެރިޔާ – ވަޠަންގެ އަންހެން ދަރިޔާއެވެ!
އަލުން ތެދުވެ ކުރިއަށް ހިނގާށެވެ! އަލިފާނާ ފެނުގެތެރެއިން ވިޔަސް ކުރިއަރާ މިދިދަ އަލުން ތިބާޔާއެކު ނަޞްރާ ނަޞީބާ ކާމިޔާބުގެ މަންޒިލުގައި އަހަރެމެން އުފުލާލާނަމެވެ!
Comments