މަގޭ ގޮނޑި
މިއީ އިހަވަންދޫ ޑޮޓް ކޮމްގައި މރ. ކިންލޭ ލިޔެފައިވާ ލިޔުމެކެވެ.
ހިންދުގެ މާކަނޑުގައި، E"11'55°72 N "77'57°6 މިޕޮއިންޓްގައި ، އަލިމަހެއް ހެން އެވިދަނީ، މަގޭ ރަށެވެ. މަގޭ އުފަން ބިމެވެ. އެބިމެއްގައި މަގޭ ޢާއިލާއާއި މަގޭ ރައްޓެހިންނާއި މަގޭ މުޅި ނަފްސުވާ ބިމެވެ. ފޮރުވިފައި އެތައް ތާރީޚީ ހާދިސާ ތަކެއް ހިގާފައިވާ ބިމެވެ. ދިވެހި ތާރީޚް ދުށް އެންމެ ވަރުގަދަ ބަޠޮލު ޣާޒީ ރަދުންގެ ލޮބުވެތި މަންމާ ފުޅު ގެ އުފަން ބިމެވެ. ފަޚުރުވެރި، ތިލަދުންމަތީ އުތުރުބުރީ އިހަވަންދިއްޕޮޅު އެރަށަކަށް ނިސްބަތްވާ އިހަވަންދޫ އެވެ.
މި ގައުމުގެ އިސްލާހީ ހެޔޮ ކޮންމެ ބަދަލަކަށް، މި ބިމުގެ އަހުލުވެރިން އިސްނަގަ އެވެ. ޑިމޮކްރަސީގެ ކޮންމެ ހަރަކާތެއްގައި ބައިވެރި ވެއެވެ. އުތުރު ގަނޑުބަޑު ގައި މަގޭ ކާބަފައިން މާލެ ދިޔައެވެ. ދިވެހި ގައުމު ފަޚުރުވެރިވާ ލޮބުވެތި ޒަޢީމް ފުރަތަމަ ފަހަރަށް މަގޭ ރަށަށް ވަޑައިގެން ފަހަރު މަރުހަބާ ކިޔަން ހުދު މަރިޔާދު ގެއެއް އެޅީމެވެ. ރަށުގެ ހުރިހާ އަންހެނުންގެ ނަމާދު ފޮށައިންނެވެ. ރީތި ފާލަމެއް އެޅީމެވެ. ފާލަމުގައި މީރުވަސް ދުއްވަން ފާލަމުގެ މުޑިތަކުގައި އަތަރު ލީ މެވެ. ކެލާ، ބޮކަރުން ދުން އަޅާ މުޅިތަނުގައި މީރުވަސް ދުއްވީމެވެ. ނަމަވެސް މާޒީވި ތާރީޚްގައި މަށާމެދު ގައުމުގެ ވެރިން ވަނީ އިހުމާލު ވެފައެވެ. މިއަދާ ޖެހެންދެން މަގޭ ދަރިން ދިރިއުޅުނީ ކަނު އަނދިރީގަ އެވެ. މަގޭ ދަރީން ގުރުބާން ވެގެން ހޯދާ ބޮޑެތި އޮޑި ދޯނި ފަހަރު ރައްކާތެރިކަމާއެކު ބެލެހެއްޓޭނެ ގޮތެއް ނެތެވެ. ސާފު ބޯފެނާއި ނަރު ދަމާގެ ހުވަފެން އަދިވެސް ފެންނަނީ ހުދާކަޅުން ނެވެ. މަގޭ ދަރިންގެ ތެރެއިން ބައެއް ކުދިން ނުވިހަން އެބައުޅެއެވެ. ބިރުންނެވެ. ރަގަޅު ޞިއްޙީ ފަރުވާ ލިބޭނެ ގޮތެއް ރަށުގައި ނެތުމުންނެވެ.
އެހެންކަމުން، ބޮޑުވާ ބިއްލޫރިން ނަމަވެސް މިގައުމުގެ ސަހަރޯވެރިންނަށް މަގޭ ދަރިން ދައްކަން ޖެހެއެވެ. މޭ ފަޅާ ހިތުތެރެ ދައްކަން ޖެހެ އެވެ. ހެޔޮހިތުން ހެޔޮ ނިޔަތެއް ގައެވެ.
މަ އުފާވެ އެވެ. މި ދިވެހި ދީބަށް ފުރިހަމަ ޑިމޮކްރަސީ އަންނަން އުޅޭތީ އެވެ. މަގޭ ބަނޑުން އުފަންވި ކޮންމެ ފުރާނަ އެއް އަޅުވެތިކަމާއި ދެކޮޅަށް އަޑު އުފުލާ މިނިވަން ކަމުގެ ފޮނި ވާހަކަ ދައްކާތީ އެވެ. ޑިމޮކްރަސީއަށް ލޯބި ކުރާތީ އެވެ. ފެހި ގާނޫނު އަސާސީގެ ދަށުން މަގޭ ނަމަށް، ނިސްބަތްވާ ދާއިރާއެއްގެ ގޮނޑިއެއް ރައްޔިތުންގެ މަޖިލީހުން ލިބުނީ މައެވެ. މިދާއިރާގެ މެޖޯރެޓީ މަށަށް ލިބޭތީއެވެ. މަގޭ ބަނޑުން އުފަން މީހުން ދާއިރާގައި ގިނަވީ ތީ އެވެ.
މަ ވަރަށް އުފާވެއެވެ. ދިވެހި ރާއްޖޭގައި މި ބޭއްވޭ ތާރީޚީ ރައްޔިތުންގެ މަޖިލީހުގެ އިންތިޚާބުގައި، މަގޭ ނަމަށް ނިސްބަތް ވާ ދާއިރާގެ ގޮނޑިއަށް، މަގޭ ބަނޑުން އުފަން ދެ ކުދިން ކުރިމަތިލާ ތާރީޚްގެ ތެރެއަށް އެދެކުދީން ވަދެ އުޅޭ ތީއެވެ. އެދެކުދިން ގެ މަގްބޫލްކަން ދާއިރާގައި ބޮޑުކަން މަށަށް ވިސްނޭތީ އެވެ. އެ ދެކުދިންގެ ހުނަރުވެރިކަމާއި ގާބިލް ކަމުންނެވެ. އެހެން ކެންޑިޑޭޓުން މަގޭ ދަރިންދެކެ ޖެހިލުންވެ މޭ ތެޅޭތީ އެވެ. ހާސްވެ ކަންބޮޑުވާތީއެވެ.
މަވަރަށް ދެރަވެއެވެ. މަގޭ ނަމަށް ނިސްބަތްވާ ދާއިރާއަށް، މަށާ ގުޅުމެއްނެތް ބަޔަކު ކުރިމަތިލާގެން އުޅޭތީ އެވެ. އިސްލާހޭ ކިޔާ ހުސް ވަޢުދުތަކަކުން ނަދުރު ގޮވާތީ އެވެ. މަގޭ ދަރިންގެ ބޮލަށް ރިޝްވަތުގެ ހުތްއަޅާ، މި ސާފުބިން ފަސާދަކޮށް ކޮރަޕްޓް ކުރަން މަސައްކަތް ކުރާތީ އެވެ. ރައްޔިތުންގެ ނިކަމެތި ކަމުގެ ނާޖާއިޒް ފައިދާ ނަގައި، މަގޭ ލޮބުވެތި ދަރިންގެ ނަފްސުގެ އަގު ނަގާލަން މަސައްކަތް ކުރާތީ އެވެ. ހިލާ ތިހެން ވިޔަކަ ނުދޭނަމެވެ.
މަށަށް ވަރަށް ރީތި ހުވަފެނެއް އެބަފެނެ އެވެ. ކޮންމެ ރެއަކު ފެންނަ ހުވަފެނެ ކެވެ. މާމުތް އާރަކަށް މަގޭ ދަރިއަކު ގެނބޭ ތަނެއް ނޫނެވެ. މަޑު އިސްޕަންޖު ގޮނޑިއެއްގައި މަގޭ ދަރިއަކު މަޑުމަޑުން އިށީންނާތީ އެވެ. މިތަން ބަލަން ހުއްޓައި މަގޭ އަތުގެ މުޅަށް ދަނޑީގައި މީހަކު ހިފާފިއެވެ. މަޑުމަޑު އަތަކުން އޯގާވެރިކޮށެވެ. ބަލާލި އިރު މި ރަށްތަކުގައި ވެރިކަންކުރި ގައުމުގެ ރައީސެކެވެ. ކޮނޑުގައި މަޑުމަޑުން ފިރުމާލުމަށްފަހު ވީ ނުވީއެއްވެސް ނެގުނެވެ. މަޑުމަޑުން ހިނގަމުން ހިނގަމުން އައިސް، އަތިރިމަތި ބަލާލެވުނު އިރު، ފަޅުތެރެއިން ކިލަނބުނަގާފައި ކަޅު ބިލަމަސްތައް ފުމެ އަރަނީ އެވެ. ހުދާ ކަޅުން ރޮނގުދެމި ބޮޑެތި ގޮދާ މަހެވެ. އޭރު، ތޮށި ބޭރުން ބޮނޑެތި ރަތް މަސް ފަޅުތެރެއަށް ބާނިލާފައި ދުވެ އަރަނީ އެވެ. މިރަތްމަސް ތަކުގައި ހުދު ލަފެއް ހުންނާތީވެސް ފެނެ އެވެ. މިތަން ބަލަން ހުއްޓައި ގައުމުގެ ރައީސްގެ އަރުމާޒު ކޮޅު ރަށުގައި ބަދަރުކޮށްފި އެވެ. ރަށުގެ ހަލާކުވެފައިވާ ފަޅުތެރޭގައި މިހިނގާ އަޖައިބު ކުރުވަނިވި ކަންތަކުން، އެމަނިކުފާނު ރަށަށް ފައިބައި ވަޑައިނުގެން އެނބުރި ވަޑައިގަތީ އެވެ. މަގޭ އަންހެނުން މަށަށް ގޮވީ ނިދީގައި މަ އުފަލުން ހޭތީ އެވެ.
މަ އުފަލުން ހީ ހީ ހަލާކުވެދާނެ އެވެ. މަގޭ ނަމަށް ނިސްބަތްވާ ގޮނޑިއަށް ކުރިމަތިލި، ކުދިންގެ ތެރެއިން ކުއްޖަކު އެ ގޮނޑިއަށް ހޮވެތީ އެވެ. މަގޭ ދަރިން ވޯޓްލައި ހޮވާތީ އެވެ. މަގޭ ތާރީޚްގައި މަޖިލީހުގެ ގޮނޑިއަކަށް މަގޭ ދަރިއަކު ފުރަތަމަ ކުރިމަތިލި ފަހަރު ކާމިޔާބު ކުރާތީ އެވެ.
އިލްތިމާސްކޮށް ބުނަމެވެ. މި ފަހަރު މަގޭ ކުދިންގެ ތެރެއިން ކުއްޖަ ނުހޮވި ފެއިލް ވުމަކީ މަގޭ ނަމަށް ނިސްބަތްވާ މުޅި ޢާއިލާ އަށް ލިބޭ ނާކާމިޔާބެ ކެވެ. މަގޭ ދަރިއަކު ހޮވުމަކީ މުޅި ޢާއިލާ އަށް ލިބޭ ފަޚުރެކެވެ. ނަމަ ނަމަ ގޯހެއް ނަހަދާށެވެ. މިބިމުގެ އިއްޒަތާއި ޝަރަފަށްޓަކައި މަގޭ ކުދިންގެ ތެރެއިން ކޮންމެވެސް އެއްކުއްޖަކަށް ހުރިހާ ކުދިންވެސް މިފަހަރު ވޯޓްލާށެވެ. އޭރުން މަގޭ ގޮނޑި މަށަށް ޔަގީން ވީ އެވެ. މިއީ މަގޭ ނަމަށް ނިސްބަތްވާ މަގޭ ދާއިރާގެ ގޮނޑިއެވެ. މަގޭ ގޮނޑީގައި އިށީންނަށް މައެދޭނީ މަގޭ ދަރިއެކެވެ. އެއީ މަގޭ ގޮނޑި އެވެ.
Comments